La'isasikhe 7
7
Wene at Stefanus nen oko yogeisasikhe wene
1At Stefanus wene itithogon oba 'bisukhama, at ap Allah iteerek meke inoe kok etnogo nen,
“Wene iti eberogonat iliogei a? Inekalat iliogei a,” iluk yogokhikhe. 2Yogokhikhemo, at Stefanus nen, men yogeisasikhe,
“Nougi, nagarumi, nopase lak. Wene igin yi, hinasuk hanorogo holini. Ninopa Abraham etnogo o Haran tekhogon wageidek, o Mesopotamia werekma Allah, nogorakhorek meke etnogo elokhoma melageikhe. 3#Kejadian 12:1 Elokhoma melaga dogolik,
O hat welaganma yoma men, hoe hagot ethoma men, hereisalok dukhi lano.
Dukhi lagan halok he, o an nen yakulhisiginmo lano,
iluk yogokhikhe. 4Yogokhikhemo nen, o akhuni Kasdim meke inaila here'isalok, o Haran tekhogon wageikhe. Wageikhesik werekma, opase watlageikhemo nen, o etoma here'isalok Allah nen olirok waganogo hit yogotak welagapma yoma 'bi ageikhe. 5Itithogon 'bi ageikhe meke re, at nen,
O yoma iteerek hat meke o, iluk yakulikhidegat. Nen, agat herlekha'bugurlagat ageikhe yakulikhidegat dogolik,
O yoma yabokane hat iteerek ageik, hat nen itago meke iteerek ageik, hagasugun o,
iluk at a'but itakhidek werek korlegat abok yogokhikhe iti. 6Wene itithogon warikhikhe mekeat, men yogokhikheat,
Hat nen itago meke iti akhuni inaila lalok ap huso negen dogogun.
Itithogon werekma akhuni etoma meke nen inatuaneke hakene 'bisalok,
o mo dageigik usigik hagakhe korlek 400 tahun mep dageik-dagokhogon hagarinakhe dogogun.
7 #
Kejadian 15:13-14
Meke re, it akhuni inaierek nen inapma 'bisalok hagasik dogogun meke iti,
an nen ukum inoba 'biluk weagarinabigin o.
Weagarinabumo, hat nen itago meke iti o etoma nen dukhitluk nen,
o yoma dogolik, an hogotnakhe dogogun o,
iluk Allah nenat yogokhikhe. 8Itithogon yogokhikhesik nen,
An wene warogo wokhinakhi iti, ekagat dogoagaluk inoado aperlagap meke palinakhe dogono o, iluk yakulikhikhemo, Abraham nen a'but Ishak itakhasikhesik nen, iki 7 hari welageikhesik, iki ageikhe baga oado aperlagap meke itithogon palhikhe. Nen, yabokane Ishak nen a'but Yakub itakhasikhesik, itithogonat oado etnogo palhikheat. Nen, Yakub nen, it nit ninopa lak inebe 12 emenogo itaginabiluk, itithogonat inoado aperlagap meke palinakhikheat.
9Ninopa lak emenogo inagot Yusuf oba ua palhe lagoukhasik nen, ebe o Mesir wolok lalok inatuaneke dogoagaluk, ap aperek oba oko waganhukha. Meke re, akhuni nen at ebe hibiku-yogoku weagatduogoluk hagakhunem, Allah ipisak dogolik yi wene ti wene oba wagunem tilho motok welageikhe. 10Itithogon tilho werekma, ap kok Firaun o Mesir meke inoe etagapogot etnogo nen,
Ap yi obabut hano. Akla motok kagalek, iluk oba hotok isikhemo, at nen he, men yogokhikhe,
O Mesir yoma men, an nai men, na'buri men, hat nen hagasik dogolik, an meke yi meke ti meke yoma tha'bokhogonat hat hiki baga dogonok, iluk ebe gubernur dogoagaluk meldisikhe. 11Meldisikhemo, werek korlek, o Mesir etoma men, o Kanaan yoma men, hipiri no kogat ageikhemo weagat welagoukha. Weagat dogolik, ninopa lak emenogo hipiri koma meke heasu heat, werlegat welagoukha. 12Werlegat werekma, akhuni nen,
O Mesir etoma anek he, hipiri gandum eken werek o, iluk isinem, at Yakub asuk holhikhesik nen, at a'buri nit ninopa lak emenogo aperek waganuagaluk la'isasikhe. Alebageik itithogon la'isasikhesik 13yabokane la'isekhe lageikhemo nen, at Yusuf etnogo nen,
An etnogo nebe yiat o, iluk ougi emenogo yakulisasikhe. Yakulisugunem Firaun etnogo nen,
Yusuf agarlak lak inom opakiat itago meke yoma higi, iluk ilu ageikheat. 14Itithogon yakulisasikhesik, at Yusuf nen, opase Yakub men, akhuni at a'buri meke tha'bokhogonat inebe 75 men, inom wisuagaluk wene warogo la'isa ageikhe. 15Wene warogo la'isa ageikhemo it Yakub lak olirok o Mesir usasukha. Etoma usasukhasik dogolik, at ebe men, a'buri ninopa lak men, etomaat watlarik lagoukha. 16Watlarik lagoukhama, alebat at Abraham o Sikhem dogolik, oila akhuni Hemor a'buri inoba oko palhikhemo inebe warek 'bisa agoukha. 17Yabokane, Allah nen Abraham haganeat wene warikhikhe etnogo ebe hagatlasusak tak-tagat horogat aga korlek, akhuni nit meke inebe o Mesir etoma doalegat hagatlagoukha. 18Itithogon doalegat hagatlagoukhama nen, ap kok ageikhe nekalogat, Yusuf ebe okodek meke, o Mesir etoma kok ageikhesik hagasik welageikhe. 19Kok dogolik, akhuni nit meke ninopa lak emenogo nukhetdisigik, yi aik ti aik hagarinakhik, hagakhe lageikhe. Itithogon hagakhe dogolik ina'buri ket itago meke iniluk dogunogo iluk,
Watlakhoak nen itikman ula'isani, iluk ane obatnerogon yogeisekhe lageikhe. 20Itithogon hagarinakhe lageikhe eta tak-tagat, at Musa ebe motok hanoat itaklageikhemo nen, thut henagan opase aila hago welagoukha. 21Hago welagoukhasik, yabokane ula'isukhama, at kok Firaun a'but he nen ebe waganhikhesik, at ekaerek eak negenat kogotdisikhe. 22Kogotdisikhemo, it akhuni o Mesir meke yi wene ti wene inilu welagoukha meke iti, at nen motogat yakulhikhe. Yakulhikhesik, at nen ane baga hano anek igik, iki baga yi meke ti meke hanoat hagakhik, hagakhe dogolik, ebe kogat ageikhe.
23Kok ageikhesik, at Musa itaklageikhesik nen, mo dageigik, usigik, hagakhe korlek umur 40 tahun hagatlageikhe. Hagatlageikhemo, at nen,
Akhuni Israel meke an nagarlak lak emenogo 'birisa lak, iluk akla apasikhe. 24Akla apasikhesik, inoba 'birisa lageikhe hak, ap Mesir meke ageikhe nen ap Israel meke ageikhe tugi wakhunem ileken hasikhe. Ileken halok nen, at werekmake ageikhesik irlirli waganogo, ap Mesir meke etnogo ebe motogat wakhikhe. 25Wakhe dogolik, at akla nen,
It akhuni an nagarlak lak inakla nen,
Allah nen at ayoko 'bekhemo, at iki baga tilninabigin, iluk hutdanugun, iluk apasikhe mekeat, it nen itithogon hutdigidek welagoukha. 26Hutdigidegat dogolik, hubuluke ap inebe pere Israel meke ipisak tugi yakhunem, ileken hisasikhesik dapulogo 'bisagaluk, men yogeisasikhe,
Nagarlak lak. Hit hagarlak hipisak mekeat, nenaluk tugi wat-wat yakhe lagap, iluk yogeisasikhe. 27Meke re, at agarlak tugi wakhe dogolik, at Musa ebe la'ekhe dogolik men yogokhikhe,
Hat nit ninoe kok dogolik, wene inoba 'bigik, kokhik, hagakhe dogoagaluk,
tha nen meldageikhemo ekhe lagan.
28 #
Keluaran 2:14
Ap Mesir meke hiamagane wakhen iti hak an nasigiluk hagakhe lagan a,
iluk yogokhikhe. 29Itithogon yogokhe lageikhemo, wene iti asuk holhikhesik, lo dukhisikhesik olirok o Midian etoma lageikhesik welageikhe. Dogolik, a'buri inebe pere itaginakhikhe.
30Etoma motok dogolik, yabokane 40 tahun welageikhe. Werekma, malaikat Allah nen yoko usa'isa agarek meke emenogo ageikhe Musa nen ileken hoagaluk, tom Sinai apma o limo akhuni inebe dekma etoma usa'ageikhesik, o 'bugurlagat meke hetu amulok yibakhunem elokhoma melageikhemo ileken hasikhe. 31Hasikhesik hogorarik, ileken hanorogo 'bikhagaluk ebe horokhogon lagunem, ninopase kok Etagapogot nen men isinem asuk holhikhe,
32 #
Keluaran 3:6
Hat hopa lak Abraham men, Ishak men, Yakub men, inopase Allah anat o,
iluk yogokhikhemo, at Musa nen oageleke dik-dik iluk ileken hanorogon 'bikha lau ayuk ageikhe. 33Ayuk ageikhemo, ninopase Etagapogot etnogo nen, ageikhe men yogokhikhe,
Agat hat hebe metek welaganma etha, an nekaerek naagat o.
Halok he, hisok sepatu ugu meke ethoma nokorlogo 'bin o.
34 #
Keluaran 3:5, 7-8, 10 An na'buri akhuni o Mesir meke nen yi aik ti aik hagarinakhunem nileken hisigik,
inetaiken ane isinem nasuk hokhik,
hagakhe lagarik nen, an nen tilinabigiluk nebe usa'agei yi o.
Halok he, an nen hat yogotak o Mesir la'ageik nen eme o,
iluk yogokhikhe. 35#Keluaran 2:14 Haganeat it akhuni Israel meke nen,
Hat nit ninoe kok dogolik wene inoba 'bigik, kokhik, 'bekhe dogoagaluk,
tha nen meldageikhemo hagakhe lagan.
Nina'it o,
iluk wenageikhukha etnogo, at Musa at o. Itithogon wenageikhukha mekeat he, malaikat Allah nen yoko usa'isa agarek meke emenogo, at Musa ileken hoagaluk ageikhe usa'i ageikhemo nen, o 'bugurlagat oba nen winam ageikhemo ileken hasikhe meke etnogoat, inoe kok dogolik tilinabuagaluk ayoko 'biluk la'isikhe iti. 36Ayoko 'biluk la'isikhemo, akhuni Israel meke inebe wogosik dukhi ageikhe iti, at Musa nenat o. Wogosik dukhi aga dogolik, o Mesir etoma men, i yekelek etaga Laut Merah etoma men, o limo akhuni dekma etoma, o mo dageigik usigik hagakhe korlek 40 tahun dogolik men, it akhuni nen wene hutduagaluk ageikhe hagasusak dek meke elalinat hagarik wageikhe iti, at Musa nenat o. 37#Ulangan 18:15, 18 Nen, akhuni Israel meke yogeisekhe dogolik,
Allah nen ap at ane yokhisekhe dogoagaluk,
ap hit meke ageikhe an meldanhikhe iti hak,
yabokane meldigin etnaga o,
iluk yogeisasikhe iti, at Musa nenat o. 38Nen, ninopa lak inom o limo akhuni dekma etoma natogorlek werekma, tom Sinai iti apma malaikat Allah nen yoko usa'isa agarek meke emenogo ageikhe oba usa'ageikhesik nen, ipisak wenekak isukha iti, at Musa at o. Ninopa lak emenogo inomat werekma, at Allah nen, wene niniluk dogogun wene iti, nit yoknisoagaluk yogokhikhe iti, at Musa at o.
39Itithogon yogokhikhe mekeat, ninopa lak emenogo nen, at ane inasuk holhe dogosak ina'it welagoukha. Itithogon dogolik, ebe thogotdisukhasik nen,
O Mesir etoma ninapuke lausak meke, iluk inetaiken la'iluk welagoukha. 40#Keluaran 32:1 Inetaiken o Mesir la'iluk dogolik, at Harun ayoko 'biluk men yogokhukha,
At Musa o Mesir nen woknisik dukhi aga etnogo, nikithogon hagatlagama he.
Nit ninokodek, iti nen,
nit ninapuke woknisik o Mesir loak nen,
Allah ebe hakene obolukmo kaneke ageikhe woknisano,
iluk yogokhukha. 41Itithogon yogokhukhasik, o itinem sapi eak hakene alino hagarogo kaneke hagakhukha. Hagatdiluk nen, ako warogo 'biluk,
Niniki nen hagakho yi hano, iluk, inakla arleken akhekhe lagoukha. 42Itithogon hagakhe lagoukhama, at Allah nen oporlik wogeisasikhesik,
Pogot oba meke mo men, thut men, husagal doalegat iti men, hogorakhe dogonek, iluk inebe here'isasikhe. Itithogon hagakhikhe iti, it ap Allah ane yogeisekhe lagoukha meke nen men isukha hagat, hagakhikhe,
Allah nen,
Hit akhuni Israel meke yi thani.
Mo dageigik usigik 40 tahun hagakhe korlek,
o limo akhuni dekma etoma dogolik,
sapi wakhik, hetu hunhik, hagakhe lagagip iti,
an nobasik 'banhik, watnikhik, hagakhe lagagip nogo? Dek o.
43 #
Amos 5:25-27
O su ai etnogo, hinopase Molokh ai men,
husagal hakene etnogo,
hinopase Refan ageisagal men, ya 'bigik,
wolok nekhe lagagip iti.
Itithogon wolok nekhe dogolik, hit at apma ukuogoluk alino hagakhigip iti nen,
hinebe o Babel abel elomake la'inagagin o,
iluk Allah nen isikhemo, holal waganogo 'bisukha iti hak hagakhikhe iti.
44At Allah nen Musa yogokhe dogolik,
An nebe ninom welago, iluk an nai o su ai yigithogonat haldanin o, iluk walegeke walhasikhemo, ileken hasikhesik, o ebe itithogonat halhikhe. Halhikhemo ninopa lak emenogo o su ai itiat hago dogolik o limo akhuni dekma nekhe dogolik ya haldigik, ta haldigik, halogo nekhe lagoukha. 45Itithogon halogo nekhe lagoukhasik, it nen itago meke Yosua inom nen o su ai halek iti misalogo wolok akhuni nit ninai yoma werekma Allah nen mukhogo ula'isasikhemo inaagat thebeli ukitluk, o su ai iti hali uki agoukha. Hali uki agoukha itinem o su ai itiat halek welageikhesik, hurli Daud iluk welageikhe iti hurli halek welageikhe. 46Nen, Daud obabut hagakhe lageikhe iti, Allah oba hotok isikhemo, at nen Allah men yogokhikhe,
Yakub opase Allah harat o. Hai ageikhe halogo 'bagagin o, iluk yogokhikhe. 47Itithogon yogokhikhe mekeat he, Allah ai ebe a'but Salomo nen halogo 'bisasikhe iti.
48-50 #
Yesaya 66:1-2
Itithogon mekeat he, at ap Allah ane yogeisekhe lageikhe meke ageikhe nen wene men isikhe,
Ninopase Allah Etagapogot nen,
Kok anat dogolik, nebe naloke pogot obaat hurek welagei.
Nen, nisok legerogo agat oba 'biluk welagei.
Halok he, hit nen o nikirlik meke haldanusak.
An nebe thet walogo re, o koma dogosak apegep.
Erlok dek o.
Yi meke ti meke tha'bokhogonat ethoma, an nen walhasigi dek nogo?
iluk Allah nen isikhemo, holal waganogo 'bisikhe iti nen, at Allah Etagapogot kok iti, o akhuni iniki nen halharek meke baga dogosak erlok dek o. 51Hit akhuni yoma hinobabut motok weak hinasuk holu'buk, hinoado hinaperlagap meke itithogon palek dogoligat, hinetaiken karelek dek dogolik hinasuk warek dek hagakhe lagap yi re! Hinopa lak nen,
Allah Agoreke ane iti nina'it, iluk ekhe lagoukha hagat, hit it inobabut waganogo hagakhe lagap yoma re! 52It ap Allah ane yogeisekhe lagoukha meke emenogo, hinopa lak nen inebe weagarinakhidek aperek welagoukha nogo? Weagarinakhe lagoukha anek apigi. It Allah ane yogeisekhe lagoukha meke nen,
Allah atuaneke obabut mothogon hagasigin meke iti yabokane wisigin o, iluk ebe wageidek werek korlek, it abok tak ekhe lagoukha meke inebe hinopa lak nenat inakhe lagoukha iti. Yabokane, it nen abok tak isukha meke iti ebe wageikhemo nen, hit nenat at ebe wasuagaluk yoko lageik, ebe wakhik, hagakhep iti. 53Nen, it malaikat Allah nen yoko usa'isa agarek meke emenogo nen wene Allah nen ninasuk wakhikhe wene iti, hirat wokhisasukha mekeat, hinasuk hologo hagasusak hina'irat welagap iti,” iluk yogeisasikhe.
Stefanus Saulus il oba helekit oba wakhukha wene
54At Stefanus nen wene itithogon yogeisekhe lageikhemo, it inasuk holhukhasik, inakla aga dageiluk, inaik hunetdiluk ebe wasuogoluk hagakhe lagoukha. 55Wasuogoluk hagakhe korlek, at Stefanus Allah Agoreke akla kerlekhogon dogolik, ileken pogot oba liakhasikhe meke, at Yesus Allah ebe hogorakharek meke etnogo alilu metek ipisak werekma ileken liagisasikhe. 56Ileken liagisalok, at nen he,
“Lakhani! Pogot hialagama, at abat itaklasi ageikhe meke etnogo, Allah alilu ipisak metek werekma nileken liagisigi o,” iluk yogeisasikhe. 57Itithogon yogeisasikhemo, it emenogo inane amitmit luk-luk, iniki inasuk tetnokhogon, pirlirliat opaki tak-tak oba hobotha ukisukha. 58Oba hobotha ukiluk, o kota nen leget thikmanke hapokhogon ula'iluk nen, helekit oba wakhukha. Ebe wasuogoluk, it at ane isinem inasuk holhukhasik, ukum oba 'bisukha werek emenogo inasu itikmanke meke nokorlogo, elege thue meke etaga Saulus hago dogoagaluk apma 'bisukha. 59'Biluk nen, ebe helekit oba wakhe korlek, at Stefanus etnogo Yesus etaga palhe dogolik,
“Yesus noe. Nagoreke hat nen woknabi me o,” iluk isikhe. 60Itithogon ekhe dogolik, itibagal yukukhogo hurek lageikhe. Hurek lageikhesik nen, ane kokhogonat men isikhe,
“Noe. Ap an weak hagatnakha meke yoma, wene inoba 'bugun o,” iluk yogokhikhesik ebe arat watlageikhe.
Pašlaik izvēlēts:
La'isasikhe 7: LAIDNT
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties