La'isasikhe 6
6
Ap inebe 7 baga Allah a'buri aperek yomageisekhe dogoagaluk meldisasukha wene
1Itinem, akhuni Yesus ane waganhukha meke inebe doalegat hagatlagoukhama, it akhuni inebe Yahudi mekeat he, inane Yunani meke nen, men isukha,
“Akhuni yi meke ti meke hibiku-yogokuat supurisekhe dogolik, humi thoge nit meke halok kolelogo thogotdisiliogei iti nenaluk,” iluk, it Yahudi inaierek meke inom wene yakhe lagoukha. 2Wene itithogon yakhe lagoukhama, it ap inebe 12 Yesus nen inayoko 'biluk la'isasikhe meke emenogo nen, akhuni Yesus ane waganhukha meke inebe tha'bokhogonat natogosuagaluk waisasukha. Waisasukhasik wagoukhama, inebe opakimo natogotdiluk dogolik, it nen men yogeisasukha,
“Nit Allah ane yakulisekhe lago iti, here'isalok, yi meke ti meke supurisekhe dogosak weak o. 3Halok he, hit nen he, ap ageikhe Allah Agoreke inakla kerlekhogon dogolik, inetaiken motok kagalek hagakhunem, inobabut ekagat hisekhe lagap meke halok, inebe 7 baga herageinabino. Herageinakhep halok, it nen yi meke ti meke itithogon supurisekhe dogoagaluk, nit nen meldisagun o. 4Meldisaumo, it itithogon hagakhe korlek, nit nen sembayan igik, wene ebe wene itiat yogeisigik, hagakhe dogogun,” iluk yogeisasukha.
5Wene itithogon ekhe lagoukhama, it akhuni Allah a'buri emenogo inebe tha'bokhogonat nen,
“Itithogon egep iti hano,” iluk isukhasik inebe heago 'bisasukha. Itithogon 'bisasukha iti ageikhe Stefanus, etaiken Allah oba hakotdiluk motok werekma Allah Agoreke akla kerlekhogon ukisikhesik welageikhe meke men, Filipus men, Prokhorus men, Nikanor men, Timon men, Parmenas men, Nikolaus o Antiokhia meke Allah ane waganhikhesik, Yahudi meke thalek hagatlageikhe meke iti men, 6inebe 7 eta heago 'bisalok, it ap Yesus nen inayoko 'biluk la'isaikhe meke emenogo inoba 'bisa agoukha. 'Bisa agoukhama, it nen iniki inukuloak thebelogo sembayan isukha. 7Itithogon hagakhe lagoukhama, Allah ane kok aga dogolik, akhuni o Yerusalem meke Yesus ane waganhukha meke inebe doalegat hagatlagoukha. Itithogon hagatlagunem, it ap Allah iteerek meke emenogo inebe motok doalegat nen, wene iti waganhukhasik inetaiken Yesus oba hakotdisukhaat.
Ukum Stefanus oba 'bisukha wene
8At Allah obabut hano nen wogeisekherek meke etnogo, Stefanus kokhogon wogokhikhemo obatne kogat welageikhe. Dogolik akhuni nen wene hutduagaluk hagasusak dek meke kokhogon elalinat hagarinakhe lageikhe. 9Hagarinakhe lageikhemo, it ap Yahudi meke o Kirene meke men, Aleksandria meke men, inebe akhuni aperek inatuaneke welagoukhasik yabokane inasokneat agoukhasik sembayan opakimo ekhe lagoukha meke men, it Yahudi meke aperek o propinsi Kilikia meke men, Asia meke men, inom nen, at Stefanus ane isinem, melagoukhasik nen, itema hithani-hathani waganhukhasik wenagakhukha. 10Itithogon wenagakhukha mekeat, at Stefanus Allah Agoreke akla ukiluk dogolik, wene morat kagoukhogon isinem, it inane oko nikithogon yogosu heat hagatlageikhe. 11Oko nikithogon yogosu heat hagatlageikhemo, it nen, ap aperek nen wene at oba 'buagaluk inakla kagalhukha. Itithogon inakla kagalhe dogolik, men yogeisasikhe,
“Hit nen men ino. At yi nen Musa abok weak palhik, Allah abok weak palhik, isinem, nit ninasuk holho, ino,” iluk inakla kagalhukha. 12Itithogon inakla kagalhukhama, it nen akhuni aperek inakla kagalhik, ap inarluetek emenogo inakla kagalhik, ap Allah ane holal waganek inilu meke emenogo inakla kagalhik, hagakhukhama, it tha'bokhogonat melagoukhasik, at Stefanus ebe ha'iluk, it ap wene erlo pilinekhe lagoukha meke emenogo inoba wolok lagoukha. 13Wolok lagoukhasik nen, ap aperek nen inekalat wene Stefanus oba 'buagaluk meldisasukha. Meldisasukhama, it nen ekhe dogolik,
“Ap yi nen Allah ekaerek ai halek yi abok weak palhik, wene Allah nen ninasuk wakhikhe wene etnogo abok weak palhik, thogotdigidek isi motogat welagarek o. 14Nen, at nen iliogo ageikhe,
Yesus ai Nazaret meke etnogo nen, Allah ai halek yi misalogo 'biluk, wene at Musa nen ninopa lak yakulisasikhemo, nit hagakhe lago meke etnogo, yabokane nekalogat hagasigin o, iluk isinem ninasuk holho o,” iluk isukha. 15Itithogon ekhe lagoukhama, it ap wene erlo pilinekhe lagoukha meke emenogo inebe tha'bokhogonat inom hurek dogolik, inileken at Stefanus oba tek-tek lakhugunem at elokhoken malaikat Allah nen yoko usa'isa wagarek meke emenogo inelokhoken hakene hagatlageikhemo inileken lakhasukha.
Pašlaik izvēlēts:
La'isasikhe 6: LAIDNT
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties