La'isasikhe 4
4
Petrus Yohanes ipisak ap wene erlo pilinekharek meke inoba wogosik lagoukha wene
1It Petrus Yohanes ipisak nen wene itithogon akhuni emenogo aban yogeisugunem eranogoat, it ap Allah iteerek meke men, Allah ai halek therogo welagoukha meke inoe kok meke men, ap Saduki meke men, inoba wagoukha. 2Wagoukhasikmo, it Petrus Yohanes ipisak nen wene akhuni yakulisekhe dogolik,
“Yesus watlagasik iluk aga iti, akhuni watlageikharek meke inilugurinabiginat o,” iluk yogeisekhe lagoukha iti nen, it ap emenogo inakla aga dageisikhe. 3Inakla aga dageiluk, iniki herle warogo nen, o arat hi ageikhemo, hubuluke initema waganuogoluk, o akhuni herle warogo 'bisasukhama kola'isasukhasik hagasik noge isukha. 4Itithogon meke re, it Petrus Yohanes ipisak itithogon aban kola'isigidek werek korlek, wene akhuni yogeisasukhama, it wene inasuk holhukha meke emenogo inebe doalegat nen,
“Wene iti eberogonat,” iluk waganhukhama, it alep meke inom, yabokane meke inom, dapukhogon, ap anek inebe doalegat 5.000 hakene hagatlageikhe iti.
5-6Itithogon hagatlageikhesikmo, hubuluke it ap koktek emenogo men, inarluetek emenogo men, Allah ane holal waganek iteerek meke emenogo men, natogorlogo, it Allah iteerek meke inoe kok Hanas men, Kayafas men, Yohanes men, Aleksander men, Allah iteerek inoe kok meke agarumi aperek men inom, o Yerusalem natogokhukha. 7Natogokhukhasik nen, Petrus Yohanes ipisak etnogo inoba wogosik wagoukhasik inebe turlem meldisasukhasik nen, initema waganhukha. Initema waganhe dogolik,
“Hit nen ap isok weak meke hagakhep iti, nena meke oatne baga hagakhep. Nen, tha etaga palogo hagakhep,” iluk ekhe lagoukhama nen, 8at Petrus Allah Agoreke akla kerlekhogon welageikhe meke etnogo nen wene men yogeisasikhe,
“Nopase lak nougi wa. 9Hit yogotakne,
Ap isok weak meke iti nena meke obatne baga hano hagakhepma, iluk ninitema waganhe lagap yi. 10Halok he, iti hasik, hit tha'bokhogonat men, akhuni inukuloak etaga Israel meke inebe tha'bokhogonat men, hinilu asuagaluk wene erlo hutukhogon yokhisak. At Yesus Kristus ai Nazaret meke hit nen o baga meldiluk wakhepma Allah nen ilugutdekhe meke etnogo etaga baga ap yi hano agasik hinil oba metek hano werek yi. 11#Mazmur 118:22 Haganeat Allah ane baga holal men iluk waganogo 'bisukha,
Hit o helekit meke halhe dogolik,
Helekit yi weak o, iluk here'isegep mekeat,
o herlaga hagatlaga yi,
iluk Yesus hasigat, holal waganogo 'bisukha iti. 12At Allah nen, nit akhuni agat oba yoma meke at ageikhe nen tilninabuagaluk etaga yakulnisigidek iti nen, ap werlek meke nen tilninabusak erlok dek o. At Yesus nen tilninabuagaluk, at arligat etaga yakulnisasikhe iti,” iluk yogeisasikhe.
13It Petrus Yohanes ipisak inayuk dek dogolik, wene pakhogon itithogon yogeisugunem, it ap emenogo nen hogorinakhe dogolik,
“Ap yi sekolah yakulhidek. Inokodek uma mekeat he, Yesus inom nekhe lagoukha meke etnogo nen higi,” iluk hutdisukha. 14Hutdisukhasik, ap isok hano hagakhukha meke etnogo, it Petrus Yohanes ipisak inom metek werekma, inileken hisalok nen, it ap emenogo nen wene nikithogon yogeisau heat hagatlageikhemo nen, yogeisigidek huk agoukha. 15-16Huk agoukhama nen, Petrus Yohanes ap etnogo inom, o wene erlo pilinekharekma nen ula'isasukhasik, it-it wene ekhe dogolik,
“Ap inebe pere ithi inobasik nikithogon hagarinabuok apegep. It nen hagasusak dek meke iti elalinat hagakhama, akhuni o Yerusalem welageikharek meke tha'bokhogonat inilu ageikha iti nen, nit nen,
Itithogon hagakhidek, ninokodek, iluk la'belusak erlok dek aga iti. 17Itithogon meke re, wene iti wiak-wayakhogon akhuni doalegat inasuk holiluk launogo iluk,
Yesus etaga palogo wene yabokane motok yogeisugup o, iluk inasuk warogo wene paluok o,” iluk isukha. 18Itithogon isukhasik nen, ipisagat waisasukhama, inapuke ukisukhama, men yogeisasukha,
“Hit nen Yesus etaga palogo wene akhuni yogeisigik, yakulisigik, motok hagakhup o,” iluk inasuk warogo wenageisasukha. 19-20Itithogon yogeisasukhama, it Petrus Yohanes ipisak nen,
“Allah il oba mothogon hagasusak he, ki. Hit nen,
Itithogon hagasusak, iluk egep meke iti hologo hagasusak a? At he, Allah nen,
Itithogon hagasusak, ekherek meke iti hologo hagasusak a. Hinakla ebetni. Nit nen, ninileken higik, ninasuk holhik, hagakho meke iti, akhuni aperek yogeisigidek huk asusak erlok dek iti nen yogeisekhe dogogunat o,” iluk yogeisasukha. 21Itithogon yogeisasukhama, ap etnogo elalin hagakhukha iti hasik, akhuni tha'bokhogonat nen Allah hogorakhe lagoukha iti nen, ukum nikithogon inoba 'bu heat hagatlageikhemo, inasuk anek yabokane warogo werlegat ula'isasukha. 22Ap isok weak meke elalin hagakhukha iti, ebe umur 40 tahun welageikhesikmo nen, hano hagakhukha iti.
Allah a'buri nen sembayan isukha wene
23It Petrus Yohanes ipisak etnogo, it ap koktek emenogo nen iniki herle hisalogo ula'isasukhama nen, inagarlak lak inerugi Allah a'buri meke emenogo werekma inoba lagoukha. Lagoukhasik nen, men yogeisasukha,
“It ap Allah iteerek inougi koktek emenogo men, inarluetek emenogo men, it nen wene yigithogon yoknisega,” iluk pilinogo yogeisasukha. 24Itithogon yogeisekhe lagoukhama inasuk holhukhasik nen, inom dapukhogon inetaiken opakiat dogolik, Allah ayoko 'bisukha. Ayoko 'bekhe dogolik,
“Ninopase. Nit hat hapma welago yi. Pogot walhigik, agat walhigik, i laut kok yekelek walhigik, yi meke ti meke pogot oba, agat oba, ima welagarek meke tha'bokhogonat walhigik, hat nenat hagakhigin iti. 25Nit ninopa Daud etnogo hat nen, at ayoko 'bisiginmo, Hagoreke akla dogolik, wene hat nen isigin meke, at nen men isikhe,
Yi akhuni ti akhuni itikmanke meke inakla aga dageiluk,
inane ua-ua werekma wene palha iti nenaluk.
Nen, it akhuni inukuloak etaga ya meke ta meke wene yugunat palha iti nenaluk.
26 #
Mazmur 2:1-2
It ap inetagapogot agat oba meke yoma melatluk,
koktek aperek inom doalogo natogosi itluk,
ninopase Etagapogot Allah iti, it nen he,
Ebe nina'it.
A'but Kristus ayoko 'biluk la'i ageikhe meke iti, nina'irat.
Ninom yabuok, iluk iti hasigat hebelogo werek,
iluk isiginmo ebe Daud nen isikhe iti. 27Itithogon isigin hagat, at Herodes men, Pontius Pilatus men, akhuni itikmanke meke men, akhuni Israel meke men, Yesus, hat hekaerek hatuaneke meke, nit akhuni tilninabuagaluk meldisigin meke etnogo, wasuogoluk eberogonat o yoma doalogo natogosi ageikha iti hasik isigin iti. 28Meke re, wene iti, hat hiki obatne werek meke nen, hakla nen,
Itithogon hagasuak, iluk hakla apasigin obaat, itithogon hagakha iti. 29Meke re, ninopase. Nit ninasuogoluk iliogei iti hileken hisan o. Nit hagarumi yoma wene hat nen isigin meke iti, ninayuk dekhogon yogeisekhe dogoagaluk hobatne woknisan o. 30Hat hobatne woknisugunem, hekaerek hatuaneke meke Yesus etaga baga hat hiki bagaat akhuni u hano hagarinakhik, akhuni wene hutduagaluk hagasusak dek meke elalinat hagarinakhik, hagasigin iti, ebe nit nen hagarinakhe dogoagaluk hobatne woknisan o,” iluk Allah ayoko 'bisukha.
31Itithogon Allah ayoko 'bekhe lagoukhama, o it natogorlek welagoukhama iti aborlok isikhe. Aborlok isinem, Allah Agoreke inebe tha'bokhogonat inakla kerlekhogon ukisikhemo, wene Allah nen isikhe meke akhuni inayuk degat yogeisekhe laogukha.
Allah a'buri inameke inebe tha'bokhogonat supurogo hagakhe lagoukha wene
32It wene eberogonat iluk waganhukha meke iti, inebe doalegat meke re, inetaiken opakiat welagoukha. Dogolik, inameke yi meke ti meke tha'bokhogonat,
“Yi an meke,” iluk igidegat he,
“Ninebe tha'bokhogonat ninameke,” iluk ekhe lagoukha. 33Itithogon ekhe dogolik, it ap Yesus nen inebe inayoko 'biluk la'isasikhe meke emenogo nen,
“Ninoe Etagapogot Yesus iluk agama ninileken arat hogo o,” iluk inane motok obatnerogonat yogeisekhe lagoukha. Yogeisekhe korlek, Allah obabut hano etnogo nen kokhogon yomageisekhe lageikhe. 34-35Itithogon yomageisekhe korlek, inaagat iteerek welagoukha meke inom, inai halek iteerek welagoukha meke inom, akhuni werlek meke inoba oko uang waganhe lagoukha. Waganiluk nen, uang iti it nen wolok ap Yesus nen inebe inayoko 'biluk la'isasikhe meke emenogo inikimo 'bi aga lagoukha. 'Bi agunem, it aperek inameke dek meke inebe tomok erlok supurogo wogeisekhe lagoukhama, it aperek inerlageik ageidegat welagoukha.
36Itithogon hagakhe dogolik, ap ageikhe etaga Yusuf. Ukuloak etaga Lewi meke. Ai o etaga Siprus meke, it ap Yesus nen inebe inayoko 'biluk la'isasikhe meke emenogo nen, nit ninane baga etaga Inetaiken Thebelherek meke iluk u hak, it inane baga etaga Barnabas thalhukha. 37Ap iti aagat werekma, it aperek inoba oko uang waganhikhesik nen, uang iti wolok, it ap Yesus nen inayoko 'biluk la'isasikhe meke emenogo inikimo 'bi ageikhe.
Pašlaik izvēlēts:
La'isasikhe 4: LAIDNT
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties