YOHANES 9
9
Yesus banamek kapie ipit banamek awaramemomtame atakam
1Emesare. Yesus aojare. Aojarerawa, Are banamek kapie ipit apore. Era ipit banamek kapie, jak bomon aemomjise. 2Yesus bajamkai oweam ajatepores. “Guru! Ara aemapa ipit banamek kapie jak bomon aemomjise, dosa tao eme? Ara aemapa ipit ape? Aritipit anama arsoot ape?” Emes atakam aesimes. 3Yesus arawa, “Era ipit banamek kapie jak bomon aemomjise adosa bateem apok. Are aritipit anama arsoot adosa bateem apok. Me, Allah, afiak pak baporomtam aeme. Are era ipit banamek bawaramemomtam aeme. Emesare, era ipit banamek kapie jak bomon aemomjise. 4Dare ere Dera ataendaemen Ipit akarai pak joka baetam. Ju atitem. Owe jiiti bomon karai baemee asan apok. Emes atakam aesime. 5Dere ara aemansa tapirmi aemapmin ere, Dere ara tapirmi owe sare asaramtammin.” Emes atakam aesime.
6Emes atakam aesimerawa, besa, tapirmi ajendaemtiie. Are era besa se ajarame. Wanam Are era se era ipit banamek ajaramapome. 7Yesus arawa, atakam era ipit akorome. “Wore era take juas Siloam aesosey. (‘Siloam’ da atakam jow bauumtaer, ‘bataendaem’ are.) Wonom wobanamek bwi baeosomey.” Emes atakam aesime. Emesare, armat ipit aesose, wanam abanamek bwi aeosome. Abanamek arawa, awareme. Are banamek akotnak awareme aojinaoe.
8Era ipit atame setep oweam, era ipit bonaknak uang atakam ajanimaarir apores oweam, ajatepores. “Ara aemapa ipit era uang atakam bajanim aemapaarir ipit aarape?” Emes atakam aesimes. 9Me wan oweam, “Are era ipit arare,” emes atakam aesimes. Me wan owerawa, “Are era ipit apok. Me, are era ipit bi awar.” Emes atakam aesimes. Era banamek kapie aemapaarir ipit ere, “Dere era ipit derare.” Emes atakam aesime. 10Era owerawa, era ipit ajatepores. “Me wobanamek awarear ere, wama tamenem?” Emes atakam aesimes. 11Era ipitam, “Owe juas Yesus besa anama se ambetemtiiar, wanam era se debanamek ajaramapoman. Are atakam akoroman, ‘Era Siloam aesosey. Wonom wobanamek bwi baeosomey.’ Emes atakam aesiman. Derarawa aesosey, wanam debanamek bwi aeosomey. Wanam debanamek awarear?” Emes atakam aesime. 12Era owerawa, “Yesus etepuram?” Emes atakam aesimes. Era ipitam, “Denom demsam apok.” Emes atakam aesime.
Parisi owe era ipit banamek awareme pak, ajatepores atakam
13Emesare, era owe banamek kapie aemapaarir ipit Parisi owepu atoomtines. 14Yesus era besa anama se ajartamtiie, wanam era ipit banamek awaramemomtame bare, ere Yahudi Owe Samayen Bare. 15Era Parisi oweam era ipit ajatepores. “Wobanamek awarear ere, wama tamenem?” Emes atakam aesimes. Era ipit arawa, “Yesus se debanamek ajaramapoman. Derarawa, debanamek bwi aeosomey. Denom waa apormin.” Emes atakam aesime. 16Me wan Parisi owerawa, “Emes pak aemar ipit ara Yahudi Owe Samayen Bare atakam ji bae apok. Erarawa Allah era ipit bataendaem apok apormarom.” Emes atakam aesimes. Me wan owe ere, “Dosa ipit, emes jinim bae pak baem ere, wama tamenem?” Emes atakam aesimes. Emesare, era owe Armat Ipit aeme pak, atakam ajamkorames. 17Era oweam atakam banamek kapie ipit aokoromes. “Wore era Ipit wobanamek awaramtaman atakam akoremarem. Era Ipit ere, ta ipitim? Wore wama atakam koretem?” Emes atakam aesimes. Era ipit arawa, “Emesare, era Ipit Allah atakam bakoretam ipit erare.” Emes atakam aesime.
18Era Yahudi owe, era ipit banamek kapie jak bomon aemomjise, wanam banamek aowareme, emes atakam jane ajies. Me, are emes atakam bamesem apoknak. Erarawa are era ipit arsoot anama aritipit ajates. 19Are arsoot anama aritipit ajatepores. “Ara aemema ipit tatii arare? Tare, ‘Datii banamek kapie jak bomon aemomjise,’ emes atakam aesimekem. Are ara aemema ipit are? Era ipit ere, waa aporem. Ere wama tamenem?” Emes atakam aesimes. 20Arsoot anama aritipit arawa, “Armat ipit datii arare. Are banamek kapie jak bomon aemomjise. 21Me, waa aemansa aporem. Wama tamenmaye? Danom abanamek awarammar ipitam damsam apok. Tanom armat ipit tamba ajateporay. Are tapinto jii apok. Are atakam amba akoretem.” Emes atakam aesimemis. 22Bonak ere, Yahudi owe atakam ajamsakamamtiies. “Owe atakam akoretas, ‘Yesus, Allah Aeremtaere Ipit,’ emes atakam aesimtas, dare era owe dasamayen tame ambirimjisimamo.” Emes atakam aesimes. Era ipit arsoot anama aritipit emes atakam aporemis. Erarawa are era atakam Yahudi owe akoromemis. 23Era atakam ere, “Are tapinto jii apok. Armat ipit tamba ajateporay.” Emes atakam aesimemis.
24Emesare, Yahudi owe era banamek kapie aemapaarir ipit aojates. “Allah banamek taiapa. Emesare atakamnak akoromaro. Dare Yesus dosa ipit apormarom.” Emes atakam aesimes. 25Era banamek kapie aemapaarir ipit arawa, “Yesus dosa ipit apaye, dosa ipit apok apaye, denom demsam apok. Me, dere banamek kapie aemapaaru. Waarawa, dere apormin. Dere emes pak taka demsamnak.” Emes atakam aesime.
26Era oweam, “Era ipit wore wama tamen pak eman? Are wobanamek awaraman, wama tamen emar?” Emes atakam aesimes. 27Era ipit arawa, “Emesare, dere atakam tare emekoretamey. Tare ere, era atakam jane bajie apok. Tare era atakam jane bojie wama tamenem? Tare era Ipit bajamkai akot apaye?” Emes atakam aesime. 28Era owerawa, tame atakam era banamek kapie aemapaarir ipit akoromes. “Wore era Ipit ajamkaimarem. Dare ere, Musa atakam ajamkaimarom owe darare. 29Allah, atakam, Musa akorome. Danom emes damsam. Me, era Ipit aendae asan damsam apok.” Emes atakam aesimes.
30Era banamek kapie aemapaarir ipitam atakam era owe aokorome. “Era Ipit debanamek awarameman. Me, tare era Ipit aendae asan tamsam apok. Emesare, dere era akoremakam atakam jinim daytu aemin. 31Allah, dosa owe ajanimtas atakam, jane bajie apok aemum. Me, owe Allah asitimtasam, aatakam ji aetasam, ere Allah era owe ajanimtas atakam jane ajim. Dare emes damsam. 32Bonaknak ere, owe banamek kapie jak bomon aemomjise ipit abanamek bawaram, ere apoknak. Ara ipit ere, emes pak taka aemar. 33Allah era Ipit bataendaem apok ere, Are emes baemeem asan apok.” Emes atakam aesime. 34Era owerawa, “Ajisamsem ere, wonom dosa ipit anakot aemansem. Worarawa, atakam dara baememtam are?” Emes atakam aesimes. Emesare, are era banamek kapie aemapaarir ipit, Allah Tame aombirimjisimes.
Bimak binip jiiti owe anama banamek kapie owe atakam
35Emesare, Yesus, era owe, banamek kapie aemapaarir ipit aombirimjisimes, atakam jane ajie. Ararawa, era ipit andimartaere. Andimartaererawa, Are armat ipit ajatepore. “Wore Asamot Anakot Ajaoreme Ipit eemnak bamesemkorom ape?” Emes atakam aesime. 36Era ipit arawa, “Dot! Asamot Anakot Ajaoreme Ipit ta ipitim? Dere era Ipit bamesem akot.” Emes atakam aesime. 37Yesusam, “Wore era Ipit bi emeporarem. Are atakam wora akoromman Ipit are.” Emes atakam aesime. 38Era ipit arawa, “Tuhan! Dere eemnak Wora ambesemkorommin.” Emes atakam aesime. Ararawa, Yesus bipu jindi andaepuape. 39Me Yesusam, “Dere, owe adosa baso baporomtam, ara aemansa tapirmi andaeo. Dere era banamek kapie owe, abanamek bawarem andaeo denom era apormas owe, banamek kapie baemapom andaeo.” Emes atakam aesime. 40Emesare, wan Parisi owe Yesus takan aememes. Are era atakam jane ajies. Ararawa, atakam Armat Ipit akoromes. “Danom banamek kapie owe emes tamen ape?” Emes atakam aesimes. 41Yesus arawa, “Tare banamek kapie aememmakam ere, Dere tadosa, atakam basakamtii apok. Me, tare atakam akoremakam, ‘Dare apormarom,’ emes atakam aesimemakam. Erarawa tare dosa aemompakam.” Emes atakam aesime.
Pašlaik izvēlēts:
YOHANES 9: LAIASC
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
@LAI 1994