YOHANES 10
10
Domba baetaa atakam
1Yesusam atakam aokoretame, “Atakamnak, owe domba asan tiri jimsap bajii apok aemtas, wanam are era tiri ajiendaetas, ere era owe domba wosom owe erare. Are owe pak tasa baetaa owe erare. 2Me, era tiri jimsap ajiimar ipit, domba banamek batai ipit erare. 3Era jimsap banamek batai ipitam, era jimsap, domba banamek batai ipit apaimtamum. Era dombaam abanamek batai ipit atakam jane ajimas. Era ipitam adomba juas taka ajietaaem. Ararawa, era domba era tasan bonak ajaromatem. 4Are era domba takes ataejisimkoromto, are era domba bonak ajaromatem. Me idombaam era ipit atakam amsam. Erarawa are era ipit fe asaramomatmas. 5Era dombaam wan owe fe baemesaramomat asan apok. Are wan owe atakam amsam apok. Erarawa are wan owe aportas, ombare aesosemas.” 6Yesus emes baetaa atakam era owe akoretame. Era owe ere, era akoretame atakam jane bajie apok.
Yesus domba banamek batai ipit akotnak atakam
7Emesare, Yesus atakam era owe aokorome. “Atakamnak, dere era domba asan jimsap emes tamen aememe. 8Dere asep andaeo. Wan owe ere, bonak andaes. Me bonak owe takes wosom owe. Are owe pak tasa baetaa owe. Me domba ere, era owe atakam jane bajie apok aemes. 9Dere jimsap tamen. Era jimsap ajiitas owe ajoremtemas. Era owe era domba asan tiri ajiia ajisa ajiemas emes tamen are. Wanam are akot takapin anda ajiemas. 10Me wosom owe, era pak wosomam, owe batatiiam, pak basokomam, emes taka baem ajinaoemas. Dere ere, jiinenak, owe batetam andaeo. Era jiine, ere anakotnak.
11Denom era domba banamek batai ipit akot ara aememy. Era domba banamek batai ipit akot, adomba dambir batemtam aememem. 12Me wan gaji karai owe ere, domba banamek batai owenak apok. Anom domba armat owe apok. Erarawa are wasen juuri aportas, ombare aesosemas. Are era domba beken ajiosemas. Era wasen juurirawa, wan domba ajipirtaenemas. Are era domba takes awumtiiemas. 13Are gaji karai owe taka. Erarawa are era domba bimak binip apok aemememas.
14,15Emesare, Dere era Domba Banamek Batai Ipit akot, ere Derare. Deritipit anom Dere amsam. Denom Deritipit demsam. Emesamare Dere dedomba demsam. Me dedombaam Dere amsam. Denom dedomba dambir batemtam aememmin. 16Denom wan domba tanane aemomey. Era domba ere, ara aemansa domba asan tiri bajii apok. Denom era domba bataejiim jak aseserommin. Are deatakam jane ajitemas. Are ara asan domba takes takan aememtemas. Wanam dere domba takes abanamek batai ipit depa aememtemin. 17Dere dambir atemtemin, wanam ajaorwasittemin. Erarawa Deritipit Dera afaimman. 18Dere dambir batem pota ere, owe Dera baemetatii asan apok. Dere dambir batem akot ajimin. Dere dambir akot aportey, ere dambir atemtemin. Denom bajaorwasit akot aportey, ajaorwasittemin. Anom Deritipit asakamtamen atakam jipu.” Yesus emes atakam aesime.
19Me Yahudi oweam emes atakam apores, wanam atakam daytinak aojamkorames. 20Wan owe tananeam, “Bii era ipit jak bomon aapeta. Are jaytu. Tanom aatakam jane ajimakam, ere wama tamenem?” Emes atakam aesimes. 21Me wan owe ere, “Era bii jak bomon aemapes owe, emes atakam baemekore asan apok. Biiam banamek kapie owe banamek baemewaramemomtam asan apok.” Emes atakam aesimes.
Yahudi owe Yesus aooes atakam
22Emesare, bonaknak ere, owe, Allah Tame akenemapomesen. Me Allah Tame akenemapomes bimak binip batetaram pakambwi baream aemanse. Yerusalem oweam era pakambwi aemes. Era bare anom jufu bwi ajanemtepe. 23Yesusam Allah Tame bomon ajare. Era ajare asan juas Salomo Tameko erare. 24Me Yahudi oweam Yesus afojomes, wanam atakam akoromes. “Wore Allah Aeremtaere Ipit apaye, Wore era ipit apok apaye, danom damsam apok. Wore era aemmarem pak, atakam baso apok akoremarem. Wore emes atakam baso apok, ete bare ajiire koretem? Wore Allah Aeremtaere Ipit anakot apaye, atakam baso aesimtamaro.” Emes atakam aesimes.
25Yesusam, “Dere atakam tare emekoretamo. Tare ere, deatakam bamesem apok. Emesare, Deritipit afiak pak atetamen. Derarawa, jinim bae pak aemmin. Era jinim bae pak, Allah Dera ataendaemen emes baporomtam pak erare. 26Tare dedomba apok. Erarawa tare Dera bamesem apok aemmakam. 27Me dedomba deatakam jane ajiemas. Denom dedomba demsam. Are Dera ajamkaimanis. 28Denom era jiinenak baememaar dedomba atetammin. Ararawa, danais baemap apoknak aemapaartemas. Oweam, era domba, deban ten, tasa baemeetaer asan apok. 29Me Deritipit era domba Dera atetamen. Armat Ipitam juas aptamnak Ipit. Wan owe takes, ere juas apok owe. Erarawa owe era domba Deritipit ban ten tasa baemeetaer asan apok. 30Denom, Deritipitam, ere awar.” Emes atakam aesime.
31Emesare, era Yahudi owe, eka, Yesus basampirim aotaaes. 32Yesus arawa, atakam era owe akorome. “Deritipit, akot pak tanane baem, atakam asakamtamen. Derarawa, era akot pak, tabipu aemmin. Erarawa tare eka basampirim aemankum, apa akot pak ememmin?” Emes atakam aesime. 33Me Yahudi owerawa, “Dare eka Wora basampirim aemmarom ere, ere akot pak aemmarem apok. Wore ere, Allah pota atakam akoremarem. Wore bambi asamot ipitnak. Me, Wore, ‘Dere Allah,’ emes atakam aesimmarem. Erarawa dare eka Wora basampirim aemmarom.” Emes atakam aesimes. 34Yesus arawa, “Owe, Allah atakam, taBasakamtam Atakam Buku bomon aeapomes. Allaham, ‘Dere atakam tara akoromo, “Tare Allah saman owe tamen,” emes atakam aesimo.’ Allah emes atakam akore. 35Emesare, Allah atakam era owe akorome, ‘Tare oweo aememayes Allah saman owe tamen,’ emes atakam aesime. Danom era Alkitab atakam, bojanimtii apok. 36Emesare, Deritipit Dera aeremtaeren. Are Dere ara aemansa tapirmi ataendaemen. Wanam, Dere atakam akorommin ere, ‘Dere Allah Andep,’ emes atakam aesimmin. Tanom emes atakam apormakam, wanam, ‘Wore Allah pota atakam akoremarem,’ emes atakam aesimmakam. Tare emes atakam ere, wama tamenem? 37Dere Deritipit atakam asakamtamen pak baem apok apaye, ere tanom deatakam bamesem bas. 38Tare deatakam bamesem apok apeno. Me, Dere Deritipit atakam asakamtamen pak aemmin apaye, tare era aemmin pak eemnak ambesemkoromay. Erarawa tare Deritipitam, Denom taka aportemakam. Tanom era pak tamsam aemaptemakam.” Yesus emes atakam aesime. 39Era owe emes atakam apores, wanam are Yesus bajipirtaer aoempores. Yesus ere, atake.
40Emesare, Yesus Yordan ju poman aojire. Are Yohanes owe bwi akupimtaere asan aesose. Are era asan tarainak aemape. 41Owe tananeam Armat Ipit ambaromes. Are atakam akoromes. “Yohanes, jinim bae pak baem apok. Me, Yohanes, Yesus, atakam akore. Era akore atakam takes, ere atakamnak apormarom.” Emes atakam aesimes. 42Emesare, era asan owe tanane, Yesus eemnak ambesemkoromes.
Pašlaik izvēlēts:
YOHANES 10: LAIASC
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
@LAI 1994