Luk 3
3
Dwɔn Sɔnevolɛ ne bɔ nolo
(Mat 3.1-12; Mak 1.1-8; Dw 1.19-28)
1Mɔɔ bɛvale Taebileɛse bɛziele Wulomu Maanle Maanle Belemgbunli na ɔnyianle ɛvolɛ bulu nee nnu la, ɛnee Pɔnteɛse Paelɛte a le amɛnlado wɔ Dwudiya a, yɛɛ Hɛlɔdo noko a ɛnee nea Galeli maanzinli ne azo a. Hɛlɔdo adiema Felepe ɔdaye ɛnee ɔnea Ayetulia nee Telakonaetɛse maanzinli zo, yɛɛ Laeseenease noko nea Abelin maanzinli zo. 2Mekɛ ne anu ɛnee Anase nee Kayafase a le sɛlɛvolɛ mgbanyinli wɔ Yizilayɛ a, na Nyamenle edwɛkɛ ne razile Zɛkalaya ara Dwɔn anwo zo wɔ fienemgbole ne anu. 3Dwɔn hɔle azua mɔɔ gua Azule Dwɔdan ne anloa la azo na ɔbɔle nolo ɔzele kɛ, “Bɛnlu bɛ nwo na bɛrɛla bɛmaa bɛzɔne bɛ, na Nyamenle kɛva bɛ ɛtane ne mɔ kɛhyɛ bɛ.” 4#Aye 40.3-5 Kɛmɔ bɛhɛlɛ ye wɔ Nyamenle kpɔmanvolɛ Ayezaya buluku ne anu la:
“Awie ɛlɛtea nu wɔ fienemgbole ne anu kɛ:
‘Bɛziezie Awulae adenle ne;
bɛdenrɛdenrɛ ye ndenle ne mɔ!
5Bɛdua bɔnza biala,
bɛha awoka mgbole nee ngyikyi kpokpoti aze.
Bɛdenrɛdenrɛ ndenle ahyeɛhyealera ne mɔ,
na bɛduodua ahuma ne mɔ.
6Na menli kɔsɔɔti kɛnwu Nyamenle ngoanelielɛ ne!’ ”
7 #
Mat 12.34; 23.33 Menli dɔɔnwo rale Dwɔn ɛkɛ ne kɛ ɔzɔne bɛ. Na ɔzele bɛ kɛ, “Bɛmɛ ɛkyelebenle mralɛ! Nwane a zele bɛ kɛ bɛnriandi bɛvi Nyamenle ndeanlɛ ne mɔɔ bara la anwo a? 8#Dw 8.33 Bɛbɔ ɔ bo bɛyɛ debie mɔɔ kile kɛ bɛnlu bɛ nwo, na bɛmmakɔ zo bɛka kɛ, ‘Yɛle Ebileham amra.’ Meka meahile bɛ kɛ Nyamenle kola maa awolɛ ɛhye mɔ yɛ Ebileham abo zo amra! 9Baka biala mɔɔ anzo ma kpalɛ la, bɛkɛpɛ ye bɛkɛwula senle nu. Bɛhakye kɛ, kɛkala bɔbɔ, bɛziezie akuma mɔɔ bɛfa bɛadudu mbaka wɔ bɛ ndinli bo a.”
10Menli ne mɔ bizale ye kɛ, “Ɛnee duzu a yɛyɛ a?”
11Dwɔn buale bɛ kɛ, “Bɛmaa mɔɔ lɛ ndanlɛ nwiɔ la ɛva ko ɛmaa mɔɔ ɛnlɛ bie la, na mɔɔ lɛ aleɛ la nee ɔ gɔnwo mɔ ɛli.”
12Adwuledievolɛma bie rale kɛ bɛba bɛamaa bɛazɔne bɛ, na bɛbizale Dwɔn kɛ, “Kilehilevolɛ, duzu a yɛyɛ a?”
13Na ɔzele bɛ kɛ, “Bɛmmadie adwule mɔɔ ɛngɔ mɛla nu la.”
14Sogyama bie noko bizale ye kɛ, “Na yɛdayɛ noko ɛ? Duzu a yɛyɛ a?”
Dwɔn zele bɛ kɛ, “Bɛmmabɔ awie apo bɛdie ye ezukoa, anzɛɛ bɛmmato awie biala ɛzonle. Bɛmaa bɛ kunlu ɛdwo bɛ ezukoa mɔɔ bɛtua bɛ la anwo.”
15Kɛmɔ ɛnee menli dɔɔnwo anye la Mɛzaya ne ɛralɛ zo la, bɛdwenlenle kɛ bekezɛ yemɔ a le Dwɔn. 16Yemɔti Dwɔn zele bɛ kɛ, “Mame, mefa nzule a mesɔne bɛ a, na awie ɛlɛba mɔɔ ɔle kpole ɔtɛla me a. Sonla zɔhane mgbɔlaboa bɔbɔ, menfɛta kɛ menwɔzianyi zolɛ nyɛma. Na yemɔ, ɔbava Sunsum Nwuanzanwuanza ne nee senle a yeazɔne bɛ a. 17Ɔlɛ ye akegyebɛ ɔ sa nu, ɔbava yeahegye ye ma. Ɔbazoa kpalɛ ne yeahɔgua ye bonwolo ne azo, na yeayela abonle ne wɔ senle ne mɔɔ ɛnnu ɛlɛ la anu.”
18Dwɔn luale ndenle dɔɔnwo azo bɔle Edwɛkpa ne nolo hilele menli ne na ɔdule bɛ folɛ kɛ bɛhakyi bɛ subane. 19Na Dwɔn hwile Hɛlɔdo mɔɔ le Galeli maanzinli zo neavolɛ la anyunlu, ɔluakɛ ɛnee Hɛlɔdo ɛgya ɔ diema aye. Raalɛ ne bɛfɛlɛ ye Hɛlɔdease; eza ɛnee Hɛlɔdo ɛyɛ ninyɛndane dɔɔnwo. 20Ɛtane kpole bɔbɔ mɔɔ bo ɛhye mɔ amuala azo, mɔɔ Hɛlɔdo akee yɛle la a le kɛ ɔhyele Dwɔn ɔdole efiade.
Gyisɛse ɛzɔnenlɛ ne
(Mat 3.13-17; Mak 1.9-11)
21Mɔɔ bɛzɔnenle menli ne amuala bɛwiele la, nzinlii bɛzɔnenle Gyisɛse ɔdaye noko, na mɔɔ ɔyɛ nzɛlɛlɛ la, anwuma bukele, 22#Mɔl 22.2; Edw 2.7; Aye 42.1; Mat 3.17; Mak 1.11; Luk 9.35 na Sunsum Nwuanzanwuanza ne le kɛ abubule la dwule ɔ nwo zo. Ɛnelɛ bie vi anwuma zele kɛ, “Wɔmɔ a ɛle me Ra mɔɔ mekulo wɔ kpalɛ a. Me nye die ɛ nwo kpole.”
Gyisɛse abusua ɛlɔnwɔne ne
(Mat 1.1-17)
23Mɔɔ Gyisɛse bɔle ye gyima ne abo la ɛnee yeli ɛvolɛ kɛyɛ abulasa, na ɛnee menli ze kɛ Dwosefi ara ɔ. Dwosefi le Hilae ara. 24Hilae le Matate ara, Matate le Livae ara, Livae le Mɛlekae ara, Mɛlekae le Gyanae ara, Gyanae le Dwosefi ara. 25Dwosefi le Matatayase ara, Matatayase le Emɔso ara. Emɔso le Neehum ara, Neehum le Ɛselae ara, Ɛselae le Nagae ara. 26Nagae le Meeyate ara, Meeyate le Matatayase ara, Matatayase le Semɛyɔn ara, Semɛyɔn le Dwosɛke ara, Dwosɛke le Dwoda ara. 27Dwoda le Dwowanan ara, Dwowanan le Rilisa ara, Rilisa le Zɛlubabɛle ara, Zɛlubabɛle le Hyealeteɛle ara, Hyealeteɛle le Nilae ara. 28Nilae le Mɛlekae ara, Mɛlekae le Adae ara, Adae le Kosam ara, Kosam le Ɛlemadam ara, Ɛlemadam le Ɛɛ ara, 29Ɛɛ le Dwɔhyua ara, Dwɔhyua le Ɛleyizɛ ara, Ɛleyizɛ le Dwolem ara, Dwolem le Matate ara, Matate le Livae ara, 30Livae le Semɛyɔn ara, Semɛyɔn le Dwuda ara, Dwuda le Dwosefi ara, Dwosefi le Dwonam ara, Dwonam le Yilayakem ara, 31Yilayakem le Mɛlɛya ara, Mɛlɛya le Mina ara, Mina le Matata ara, Matata le Neetan ara, Neetan le Devidi ara. 32Devidi le Gyɛsi ara, Gyɛsi le Obɛde ara, Obɛde le Bowaze ara, Bowaze le Salemɔn ara, Salemɔn le Nahyɔn ara. 33Nahyɔn le Amenadabe ara, Amenadabe le Ademen ara, Ademen le Aanae ara, Aanae le Hɛzelɔn ara, Hɛzelɔn le Pɛlɛze ara, Pɛlɛze le Dwuda ara, 34Dwuda le Gyekɔbo ara, Gyekɔbo le Ayezeke ara, Ayezeke le Ebileham ara, Ebileham le Tɛla ara, Tɛla le Neehɔ ara. 35Neehɔ le Sɛlɛge ara, Sɛlɛge le Riliyu ara, Riliyu le Pɛlɛge ara, Pɛlɛge le Yibɛ ara, Yibɛ le Hyɛla ara. 36Hyɛla le Keenan ara, Keenan le Aafazade ara, Aafazade le Hyɛm ara, Hyɛm le Nowa ara, Nowa le Leemɛke ara, 37Leemɛke le Matusɛla ara, Matusɛla le Yinɔko ara, Yinɔko le Gyɛlɛde ara, Gyɛlɛde le Mahalɛli ara, Mahalɛli le Kinan ara, 38Kinan le Yinɔhye ara, Yinɔhye le Sɛte ara, Sɛte le Adam ara, yɛɛ Adam le Nyamenle ara.
Pašlaik izvēlēts:
Luk 3: NB
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Bible in Nzema © Bible Society of Ghana, 1998.