Maak 3
3
Yisọs akọk udọñọ ke usen Sabad
1Ini mfen Yisọs amaatịmme aka sinakọk, ndin awo keed a-akenieeghe ñkpa-ikpa ubọk amaaba do. 2Usʌk awo e-ekeyemme ntak adibo ke anye abiad ibed mmọdo ekeba ñko, ndin ammọ emaewuuk anyen ese me anye ayaakọk awo ado udọñọ ke usen Sabad. 3Yisọs amaabo awo ñkpa-ikpa ubọk ate, “Dakka da ke iso afịd awo.”
4Ndin Yisọs amaabịp ammọ mbịme ate, “Anye ake-e ke ibed ayak enam ke Sabad: adinam etiñkpọ me adinam idiọọk, adinyaaña awo uwem me adiwowot?” Ado ammọ ikisiooho uyo.
5Anye ndin akanna ase ammọ ye iyadesịd, afʌhọ eti-eti ke ntak isọñ esịd amọ, anyʌñ abo awo ado ate, “Nyanna ubọk mfo.” Anye anyan, ndin ubọk amọ amaana afọn ukeed-ukeed. 6Idaha-idahado mme Farisi ewuọọñọ ke itie ubọñ akam enyʌñ eketọọñọ adidʌk edioomo ye mbon ñka Herọd naña ammọ ekpesaña iwot Yisọs.
Mme atu awo ekeene Yisọs
7Ndin Yisọs ye mbed amọ emaekpọñ eka ibiok, ekamba atu awo emaeto Kadidi ekeene anye. 8Mme awo emaekekop afịd se anye akenam, uwak awo emaeto emaedibịne anye eto Yudia, Yerusedem, Idumia ye mme ñkan-ñkʌk ukañ Yọdan ye mme ukañ Taya ye Sidọn. 9Ke ntak atu awo ami, anye amaabo mbed amọ ate yak ammọ ebọ etək ubom enịm inọ imọ, mbaak mme atu awo ami edifʌk imọ. 10Sia anye amaakọk uwak awo udọñọ, mme adọñọ nsio-nsio udọñọ emaenək idem edi iso nọ ekan etụụk anye. 11Ini keed akeedodo ami ndiọi sịbidịd ekịtte anye, ammọ emaeduọññọ ke isọñ ke iso amọ ebọọñ ñkpo ete, “Afo ado Ayịn Abasi.” 12Ado anye amaatʌm awuuk ammọ ate ammọ ekuuyaara se imọ ido inọ mbon afen.
Yisọs amek ibed duob ye iba
13Akem Yisọs amaadọọk anyọñ abod anyʌñ akood mbon se anye akeyem, ndin ammọ ekaa ebịnne anye. 14Anye amaamek awo duop ye iba anyʌñ akood ammọ abọsịd, e-ediiba ye anye, mbon a-anye adidọñ nọ ekekwọrọ ikọ Abasi; 15ediinyʌñ inie adudu adibịn dimọn nsiooño awo ke idem.
16Awo duop ye iba a-anye akeamekke ado edoñño ami:
Saimọn (a-anye akenyʌññọ anọ anyịñ Bita),
17Yemsi, ayịn Sebidi ye ayịneka amọ Yọọn (a-anye akekoodo ammọ Bonekesi, awuọọñọke “nditọ aduma”),
18Andru,
Fidib,
Batodomiu,
Matiu,
Tọmọs,
Yemsi ayịn Afiọs,
Tadiọs,
Saimọn adooho Sidọd,
19ye Yudas Iskariọd, andikitap anye nnọ.
Ubon Yisọs ye mme akpeeb ibed edod Yisọs uyo
20Ke ini Yisọs amaakedʌk ufọk keed, mme atu awo emaemaana edibəghe do tutu anye ye mbed amọ ikikanna idia ukpọk ndidia. 21Ke mme mbon ubon amọ ekoppo ami, ammọ emaeka adikpeme anye sia ammọ ekebo ete ke, “Iwuod aboiyo anye.”
22Ndin mme andikpeeb ibed e-eketooho Yerusedem edi ekebo ete, “Anye anie Bedsibọb ke idem. Anye adat adudu abọọñ dimọn abịn dimọn asiooño awo ke idem.”
23Do ke Yisọs akeakood ammọ nọ esaña ekpere anye anyʌñ abịp ammọ ke ñke ate: “Setan akeme die ibịn setan nsio? 24Adieke abio ubọọñ abakka ada anwana ye idem amọ, abio ubọọñ ado ikemeke isọọñọ ida. 25Adieke ufọk anieeghe ubakka, ufọk ado ikemeke ida ñko. 26Ndin adieke Setan anwanake ye idem amọ, anye ñko ikemeke ida: awuọ utịd amọ adi. 27Ke akpanikọ awo ndomokeed ikemeke adidʌk ufọk akpọsọñ awo ibọhọke anye abemiso abọp akpọsọñ awo ado. Do ndin ke anye akeme adibịmme ñkpọ ke ufọk awo ado. 28Yak ñtañ akpanikọ inọ ndufo, eyaefeen afịd idiọọkñkpọ ye aditañ atịme-atịme enọ awo, 29ado awo ake adodo a-atañña atịme abaña Adisana Sịbidịd, awo idiifeene idiọọkñkpọ amọ: ammọ enie ubiomikpe nsi-nsi idiọọknkpọ.”
30Yisọs aketañ ami sia ammọ ekebo, “Anye anie ndedeghe sịbidịd.”
31Ndin eka ye nditọeka Yisọs emaediwuọ. Ammọ ematie ke añwa esiin, edọñ awo akekood anye inọ mmimọ. 32Atu awo e-eketieeghe ekanna anye, ebo anye ete, “Eka mfo ye nditọeka mfo esʌk uyem ke añwa esiin.”
33Yisọs amaabịp ammọ ate, “Mme anie ido eka ye nditọeka mmi?”
34Ndin anye amaasuan anyen aseed mme awo e-eketieeghe ekanna anye ekʌk, anyʌñ abo ate, “Eka mmi ye nditọeka mmi edoñño ami! 35Awo ake adodo a-anamma uduak Abasi ado ayịneka mmi ye eka mmi.”
Pašlaik izvēlēts:
Maak 3: NAAM
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.