Maak 2
2
Yisọs afeen anọ anyʌñ akọk awo akpaubeñ
1Ñkpọ nte usen ifañ amakeboiyo, Yisọs amaatịmme adi Kapanọm, ndin etob anyʌñ asuana ate ke anye adi ufọk. 2Mme awo e-ekediighe ikịt anye emaewak tutu, ufañ ikibaaha ke ufọk, ukpọk ke esiin, ndin anye asʌk akwọrọ ikọ anọ ammọ. 3Ke ini Yisọs asʌkkọ akwọrọ ikọ anọ ammọ, mme awo inaañ emaeben awo akpaubeñ keed esọk anye. 4Sia awo ekewakka ebọhọ, ammọ ikikanna inam nọ awo akpaubeñ ami akịt Yisọs, ammọ eketịppe akọm ke anyọñ ntie Yisọs akedaaha enyʌñ esuuk awo akpaubeñ ami ke aya anye akenaaha. 5Yisọs amaakekịt mbuọdidem ammọ, anye abo awo akpaubeñ ami ate: “Ayịn, efeen unọ ke ndiọiñkpọ mfo.”
6Ubaak mme ekpeeb ibed e-ekeetiehe ke itie ado, emaekere ke esịd ammọ ete: 7“Ntak awo ami atañña ikọ ntom-o? Anye asuuk Abasi uyo! Anie awo ikeme ifeen idiọọkñkpọ awo ibọhọke Abasi ikpọọñ?”
8Idaha-idaha ado, Yisọs amaadiọọñọ ke sịbidịd amọ ke se ammọ ekekere ke esịd ammọ, ke ntoro anyʌñ amaabịp ammọ ate, “Ntak a-ndufo ekereke utọ mme ñkpọ ami-e? 9Anye ake-e imem ikan: adibo awo akpaubeñ ami, ‘Efeen mme idiọọkñkpọ mfo,’ me adibo, ‘Dakka da, ben aya mfo nyʌñ saña’? 10Ado ami nnam ami adiwọt ndufo ke Ayịn Awo anie adudu ke isọñ ami adifeen mme idiọọkñkpọ.” Ndin anye amaabo awo akpaubeñ ate, 11“Ami ubo fiin nte, dakka da, ben aya mfo nyọñ ufọk.” 12Anye amaadakka ada ke iso afịd ammọ, aben aya amọ asaña anyọñ. Ami amaakpa afịd awo idem, ammọ enyʌñ ekọọm Abasi ete, “Kpaanam ñnyịn ikịtte utọ ñkpọ ntom!”
Yisọs akood Difai anyʌn adia ndidia ye mme anam ndiọiñkpọ
13Yisọs amaamaana awuọ akeba akpere ibiok Kadidi. Uwak atu awo emaekeene anye, anye amaanyʌñ atọọñọ ikpeeb ammọ ñkpọ. 14Naña anye ake asʌkkọ asaña do, anye amaakịt Difai, ayịn Afiọs nte atie ke atayad ubọ taksi. Yisọs ate anye, “Ñkeene miin.” Ndin Difai adakka akeene anye.
15Naña Yisọs ake abaaha ke itie ndidia ke ufọk Difai, uwak mme abọ taksi ye mme “anam ndiọiñkpọ” emaekeene Yisọs ye mme mbed amọ edia ñkpọ, sia uwak mbon awo ntom emaesịne ke atu awo e-ekekeeneke anye. 16Ke mme andikpeeb ibed e-ekedoññoke Farisi ekịtte nte anye adia ñkpọ ye mme anam ndiọi ye mme abọ taksi, ammọ ebịp mbed amọ ete: “Ntaha eteufọk ndufo adiaaha ñkpọ ye ndiọi awo-o?”
17Ke adikop ami, Yisọs amaabọọrọ ate, “Idooho mbon i-idem asọññọ eseeyem abiaibọk, ado mbio idem mmiisọññọ. Ñkediighe adikood mme ndinen awo, ñkedi nnọ ndiọi awo.”
Ebịp Yisọs mbịmme ebaña utreudia
18Mbed Yọọn Aduọkmmọọñ ye mme Farisi emaesitie utreudia. Ado amaanam mme awo edibịp Yisọs ete, “Ntak adooho mme mbed Yọọn ye ake mme Farisi esitre udia, ado ake mfo, itreke-e?”
19Yisọs amaabọọrọ ammọ ate, “Mme isenawo ebendọ ekeme aditre udia ke ini ebendọ abaaha ye ammọ? Ikemekekeme, adaña ini nte anye abaaha ye ammọ. 20Ado ini ayaadi e-ediiben ebendọ idakka ikpọñ ammọ, ini ado ndin ke ammọ ediitre udia.
21 “Awo ndomokeed idatta ufa afọñ idian ke akaan ikịm. Akpenam ntodo, ufa ayaawaak akaan afọñ anam anye awakka akan naña akedo. 22Ñko awo inwaññake ufa ukọd isịn ke akaan ikịm. Akpenam ntodo, ukọọd ami ayaabom ikịm, ndin ukọọd ye ikịm etak. Iyoo, eseenwañña ufa ukọọd esịn ke ufa ikịm.”
Yisọs ado abọọñ Sabad
23Usen Sabad keed Yisọs ye mme mbed amọ ekesaña eboiyo ke inwañ akpakpa. Nte ammọ ekesañake ntom, mme mbed amọ emaetọọñọ adikịppe mme akpakpa. 24Ndin mme Farisi emaebo anye ate, “Kap se, ntaha mme mbed mfo enamma ñkpọ ami ibed akpanna ke usen Sabad-a?”
25Anye amaabọọrọ ate, “Kpaanam ndufo ikoodo se Defid akenam naña abiọñ akedọññọ anye mme nsaña amọ? 26Ke ntak ami, anye adʌk ufọk Abasi ke ini Abiata akedooho akwa aku, anyʌñ aben adisana uyo ata, adooho ibed akebo yak mme aku ikpọọñ eta. Anye amaanyʌñ anọ mme nsaña amọ ubaak.”
27Akem anye abo ammọ ate, “Ekenam Sabad enọ awo, ikinamma awo inọ Sabad. 28Ke ntak ami, Ayịn Awo ado Abọọñ kpa ake Sabad.”
Pašlaik izvēlēts:
Maak 2: NAAM
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.