Maak 13
13
Adiwuud tembịd ye mme idiọọñọ akpatre emana
1Ke Yisọs asañake awuọ akpọñ tembịd, mbed amọ keed ate anye, “Titia, kap se mme ikpọ itiad ami, ye utọ ikpọ mfọọn ufọk ami!”
2Yisọs amaabọọrọ anye ate, “Emekịt mme ikpọ ufọk ami? Ndomo itiad ami keed idiisọññọ idoro ke emọ-emọ; eyaetoomo ammọ keed-e-keed eduọọñọ ke isọñ.”
3Naña Yisọs atieeghe ke Abod Ọdif mbed, ke nsak iso tembịd ado, Bita, Yemsi, Yọọn ye Andru emaebịp anye ke atu idem ammọ ete, 4“Tañ inọ ñnyịn ini a-mme ñkpọ ami aditịppe. Nso-o idiido idiọọñọ ke mme ñkpọ ami atịppe?”
5Mi ke Yisọs akeneme ye ammọ ate, “Itʌm ikpeme mbaak awo ndomokeed adibiaaña ndufo awakka akpọñ usʌñ. 6Sia uwak awo eyaewuọ edi ke anyịñ mmi, edibo ndufo ete, ‘Ami ndo anye,’ eyaenyʌñ enam umiañ awo ewakka ekpọñ usʌñ. 7Ado ke ini ndufo ediikop ibaña ekọñ ye etob ekọñ, ikiiyak nọ esịd ndufo atịmede. Mme ñkpọ ami eyaedat itie, ado idooho idiọọñọ utịd ini adodo. 8Idịd eyaenwana ye idịd, abio ubọọñ keed eyaenwana ye abio ubọọñ mfen. Mme unyekisọñ eyaeba ke mme itie mme itie, ini akañ ayaaba. Mme ñkpọ ami edoñño idiọọñọ ntọọñọ ubiak uman.
9 “Ado ndufo itʌm ikpeme idem ndufo. Eyaikappa ndufo esịn ke ubọk mme kọnsịn abio enyʌñ imia ndufo ke mme sinakọk. Eyaidaaha ndufo ke ikpe ke iso mbọọñ ye mme adaukara edo ntiense e-enọ ammọ ke ntak mmi. 10Ndin nte akpa ñkpọ, anaekwọrọ eti etob enọ afịd ederimbod. 11Ini ake adodo imʌmmọ ndufo iben ika ikpe, ikiikere me nso-o ke ediitañ inyaaña idem. Itañ kpa se Abasi itemme ndufo kpa idahado, sia idooho ikọ ndufo ke ediitañ; ado ikọ Adisana Sịbidịd.
12 “Ayịneka ayaatap ayịneka anọ ñkpa, nko ete ayaanyʌñ atap ayịn amọ anọ ñkpa. Nditọ eyaedakka enwana ye mme ete ye mme eka enyʌñ enam ewot ammọ. 13Afịd awo eyaisua ndufo ke ntak anyịñ mmi, ado awo a-asọñọke ada akewuọ utịd eyaenyaaña anye.
14 “Ndin naña ndufo ediikịt mbubiam ñkpọ abeene nsobo adi aba ke itie mmiikpibaaha, yak awo a-akoodo ñwed anekke adiọọñọ, idahado yak mme andiba ke Yudia efeeñe ekaiya ikpọ abod. 15Yak awo a-adoroke ke anyọñ akọm ufọk akuusọiyọ ayem idʌk ufọk ñkeben ndomo ñkpọ keed nsio. 16Yak awo a-abaaha ke inwañ akuuyʌñ uka ufọk adikiben afọñ amọ. 17Ado, mbọm ibaan e-esañake ye idịb ye mbon e-esʌkkọ enọnọ nditọ eba ke utọ mme usen ado! 18Ikap ibọñ akam ite yak ñkpọ ntịppe ami akuudo ke ini akpọsọñ atueb, 19sia mme usen ado adido ini ukuud; utọ a-adooho kpaanam ibaaha tọọñọ ke aditọọñọ, ke ini Abasi akebotto ederimbod tutu awuọ idahami; idinyʌññọ iba aba.
20 “Ndin mmiikpidooho Abọọñ Abasi amaakenam mme usen ado aməgho, ndomo awo keed ikpibọkkọke. Ado ke ntak mbon a-anye akemekke, anye amaanam mme usen ado aməgho. 21Ke ini ado awo ndomokeed akpibo ndufo, ‘Se mi, Mesaya aba mi,’ me, ‘Se anye ke ñko,’ ikiinịm ke akpanikọ. 22Uwak nsu-nsu Mesaya ye brọfed nsu eyaewuọọñọ edịghe eyaenyʌñ enam uwak idiọọñọ ye utịbe ñkpọ ma ebiaaña mme awo, ammọ ekpekan, kpa ye mme andimek Abasi. 23Ke ntodo, iba ke ñkpeme idem sia ami mmetañ afịd ñkpọ do inọ ndufo.
24 “Ado, ke mme usen ukuud ado emaeboiyo,
“ ‘utịn ayaakappa akịm,
afiọñ idiinyʌññọ inọ unwana,
25 mme ntantaafiọñ ñkọ eyaeto ke anyọñ eduọññọ,
mme adudu ke ikpaanyọñ ñko eyaenyeeñe.’
26 “Idahado, afịd uduod awo eyaekịt Ayịn Awo naña adoro ke abubịd anyọñ, adi ye ayọhọ adudu ye ubọọñ. 27Ndin anye ayaadọñ mme enyere amọ adọñ ate edikoono mme andimek ikọd amọ ke afịd iso isọñ, atọọñọ ke ata utịd tutu awuọ utịd ikpaenyọñ.
28 “Ndin, ndufo ikpeeb ñkpọ ami ito eto fik: Ke ado anye amaasịññe nseghe, akem mfañ ewuọọñọ, ndin edat ado ediọọñọ ke ndaeyo akpere. 29Ukem-ukem ado, ndufo ñko, naña ediikịt mme ñkpọ ami naña atịppe, idiọọñọ ibo ke ini akpere, kpa ke anyenusʌñ. 30Ke akpanikọ ke ntañ inọ ndufo, emana ami idiiboiyoke tutu afịd ñkpọ ami awuọ asu. 31Anyọñ ye isọñ eyaeboiyo efep, ado ikọ mmi idiiboiyoke ifep.
Awo idiọọñọke usen me awa
32 “Ama ado usen ado, me awa ñkanika, ndomo awo keed idiọọñọke; kpak mme enyere ke hefịn me Ayịn Awo, ke mme ibọhọke Ete ikpọọñ. 33Inekke iba ke mbeeñidem, inekke itịñ anyen! Sia ndufo mmiidiọọñọke ini adidi Ayịn Awo. 34Aditie nte awo akpọñ ufọk aka anyanusʌñ isañ; ayaak ufọk anọ nditọufọk abo ekpeme; adeeme utom anọ ammọ keed-keed; anyʌñ adọkkọ akpeme inuaatob ate anekke akpeme.
35 “Ndufo ñko ikpeme, sia mmiidiọọñọke ini anieufọk adiinyọñ idi; me adido ndubi me ke ufọọd akoneyo; me ke akikọ akpọkkọ me ke usieere. 36Mbaak anye adiwawaad ndufo, adi adikịt nte edadaiya. 37Se ntañ inọ ndufo, ami ntañ ado nnọ afịd awo: ‘Ikpeme.’ ”
Pašlaik izvēlēts:
Maak 13: NAAM
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.