Maak 12
12
Ñke mme adʌñ ufọk awo
1Ndin Yisọs amaatọọñọ aditañ ikọ inọ ammọ ke ñke, ate: “Awo keed aketọ inwañ fain. Anye amaabọp ibene akanna inwañ ado, atịppe ube unyịmme ukọd anyʌñ abọp itie uyeb. Anye amaaben inwañ ami anọ mme atọiñwañ anyʌñ aka isañ ke abio mfen. 2Ini idọk amaakekem anye amaadọñ ayịnufọk ate aka akebọ mme atọiñwañ ami mfịd inwañ. 3Ado ammọ emaemʌm ayịnufọk ami etịm, enọ anyọñ ubọk-ubọk. 4Akem anye adọñ ayịnufọk mfen aka abịne ammọ; ammọ emaemia awo ami ke iwuod enyʌñ esuenne anye. 5Anye amaamaana anọ awo mfen aka, anye ami ammọ emʌm ewot. Anye amaanọ umiañ mbio mfen; ammọ etetịm usʌk, enyʌñ ewowot usʌk.
6 “Anye amaanie awo keed a-akesʌhọke anye adidọñ, ayịn amọ awodeen, a-anye akemaaha. Anye akeanọ anye aka akpatre, abo ate, ‘Ammọ eyaekpono ayịn mmi.’
7 “Ado mbon e-ekenọọhọ inwañ ekama etie edioomo ke idem ammọ ete, ‘Adia akpa ammọ ado ami. Idi, yak iwot anye, akpa iñwan fain a-anye akpediaaha ayaakappa ado ake ñnyịn.’ 8Ado anam ammọ emʌm anye ewot, etop akpo amọ esio ke inwañ fain ado.
9 “Nso-o ndin ke andinie inwañ fain ami adinam? Anye ayaadi adiwot mbon e-ekekamake inwañ fain ami, anyʌñ aben inwañ ami anọ mbon mfen. 10Ndufo ikoodo se ewet ke ñwed Abasi ami ete,
“ ‘Itiad a-mme abọbufọk ekesịnne
akappa ado ekamba itiad inuuk.
11 Abọọñ anam ami,
ado utịbe ñkpọ ke anyen ñnyịn.’ ”
12Mme ikpọ aku, ye mme andikpeeb ibed ye mme adaidaha emaeyem usʌñ naña ekpedat emʌm anye, sia ammọ emaediọọñọ ke anye aketop ñke ami ibaña mmimọ. Ado ammọ ekebaak atu awo; ado anam ammọ emaedakka ekpọñ anye, enyọñọ.
Ukpe taksi nnọ Sisa
13Akem ammọ edọñ mme Farisi ye mbon se isañña ke ukpeeb Herọd emaebịne Yisọs nọ ekemʌm anye ke ikọ inua amọ. 14Mbon ami emaeka ebịne anye ete, “Andikpeeb, ñnyịn imidiọọñọ ke afo ado awo akpanikọ, awo ikanna aduben fiin ntịn usʌñ sia afo ubaaha awo anyen, ado akpeeb usʌñ Abasi ke akpanikọ. Me anen ñnyịn adikpe taksi nnọ Sisa, me inenne? 15Ikpe me itre adikpe?”
Ado Yisọs amaadiọọñọ ñkara ye ndubịk esịd ammọ. Anye amaabịp ammọ ate, “Ntak a-ndufo ekọọhọ afia ennọ miin-e? Iben akʌk ado idi nọ ami nse.” 16Ammọ emaeben akʌk ado edi. Anye abịp ammọ ate, “Ndise anie ido ami? Ñkpọ e-ewette mi abaña anie?”
Ammọ emaebọọrọ ete, “Ake Sisa.”
17Ndin Yisọs amaabo ammọ ate: “Iyaak ñkpọ se inie Sisa inọ Sisa, ndin se inie Abasi iyaak inọ Abasi.”
Idem amaakpa ammọ eti-eti.
Udọ ndọ ke ini awo amaaset ke ñkpa
18Ndin mme Sadusi, mbon a-mmiinịmme ibo ke adised ke ñkpa aba, emaeben mbịme ebịne anye ete, 19“Andikpeeb, Moses amaawet abo, awodeen akpekpa akpọñ anwaan a-adiimanna ayịn, ayịneka amọ ana aben ebekpa anwaan ado adọ nọ abon nditọ anọ anye. 20Amaaba nditọeka ideen itiaba. Akpa adọ anwaan, akpa inieeghe ayịn. 21Ayọhọ iba adiben ebekpa anwaan ayịneka adọ, ado anye ñko adikpa inieeghe ayịn. Ukem ado aketịppe anọ ayọhọ ayịneka awodeen ita. 22Ke ata aditʌm ntañ, bene keed ke atu nditọeka itiaba e-ekedọọhọ añwan ami ikinieeghe ayịn ito awonwaan ami. Ke akpatre, awonwaan ñko anyʌñ akpa. 23Ke ini adised ke ñkpa, anwaan anie ke atu ado ke anye adido, sia naña awo itiaba emaedọ anye?”
24Yisọs amaabọọrọ ate, “Ikịtte ke ndufo emenam ndudue sia ndufo idiọọñọke ikọ Abasi ye adudu Abasi? 25Mme akpañkpa emaeset, ammọ idiidọọhọ ndọ idiinyʌññọ inọ ke ndọ; ammọ ediitie nte mme enyere ke abio ubọọñ Abasi. 26Ke abaña mme akpañkpa adised, ado nte ndufo ikoodo ke ñwed Moses ke mbʌk i-ikañ aketaaha ikọd, naña Abasi akebo Moses ate, ‘Ami ndo Abasi Ebraham, Abasi Aisik, ye Abasi Yekọb?’ 27Anye idooho Abasi mme akpañkpa, ado Abasi mme aduuwem. Ndufo emenam ata akpan ndudue.”
Andikpon ñkan ke afịd ibed
28Keed ke atu mme andikpeeb ibed a-akediighe abịne Yisọs amaakop nte ammọ esʌk efaaña mfaaña. Anye akekop ke Yisọs amaanọ ammọ nneke-nneke ibọọrọ, anye amaabịp anye ate, “Ke atu afịd ibed, ake-e akpon akan?”
29Yisọs amaabọọrọ ate, “Andikpon ñkan ke afịd ibed ado ami: ‘Kpañ utọñ, O Isred: Abọọñ ye Abasi ñnyịn ado keed, anye ado Abasi keed kpọd. 30Ma Abọọñ ye Abasi mfo ye ke afịd esịd mfo ye ke afịd ukpọñ mfo ye ke afịd akikere mfo ye ke afịd adudu mfo.’ 31Ayọhọ iba ado ami: ‘Ma mbọhọidʌñ mfo nte idem mfo.’ Ibaaha ibed a-akponno akan ami.”
32Awo ami amaabọọrọ ate, “Andikpeeb, ametañ afọn, ado ata nnen-nnen afo adibo ke Abasi ado keed, ke mfen ibaaha ke mmiibọhọke anye. 33Adima anye ke afịd esịd mfo ye ke afịd ifiọk mfo, ye ke afịd adudu mfo anyʌñ ama mbọhọidʌñ mfo, naña afo ama idem mfo, akpon akan adifọp uwa ye mme nsio-nsio uwa mfen nnọ Abasi.”
34Ke ini Yisọs amaakekịt ke anye amaabọọrọ ye ayọhọ ifiọk, anye abo anye ate: “Afo unyọọñọ usʌñ ukpọñ abio ubọọñ Abasi.” Tọọñọ ado awo nte keed ikibịppe anye mbịme aba.
Ayịn anie ke Mesaya ado?
35Ke ini Yisọs asʌkkọ akpeeb ñkpọ ke mme akwere tembịd, anye amaabịp mbịme ami ate, “Ntak a-mme andikpeeb ibed ebooho ke Mesaya ado ayịn Defid-e? 36Defid ke idem amọ, ke ini atañña ikọ ato ke adudu Adisana Sịbidịd, amaabo anwa-anwa ate:
“ ‘Abasi abo Abọọñ mmi ate,
“Tie ke ubọk nnasia mmi
tutu ami nnam asua mfo ado ñkpọ
udodukod mfo.” ’
37 Defid ke idem amọ akood anye ‘Abọọñ.’ Anye akeme die ndin adido ayịn Defid?”
Akwa atu awo emaekpañ utọñ ekop ikọ amọ ye inemesịd.
Ndʌdutọñ abañake mme akpeeb ibed
38Naña Yisọs akpeebe ñkpọ, anye abo ammọ ate, “Ikpeme idem ndufo ke eduuwem mme andikpeeb ibed sia ammọ ema adisịne ikpọ afọñ nsaña, enyʌñ eyem afịd awo etuak iwuod ekpono mmimọ ke añwa udua, 39enyʌñ ema mme ikpọ itie ke mme sinakọk ye itie ukpono ke mme usọrọ ndia. 40Ammọ ema adiwood mme ebekpa; ebọi ammọ mme itie idʌñ ammọ, enyʌñ ema adibọñ ñnyan akam. Mme utọ ibon ami eyaebọ ekamba ufen.”
Enọ ebekpa
41Yisọs amaasuuk atie ke nsak iso akebe usịn enọ anyʌñ ase naña mbon awo esịn enọ ke itie unimnkpọ tembịd. Uwak mbon imọ emaesịn uwak akʌk. 42Ado ebekpa keed a-akedooho uweene amaasịn ata akpatre akʌk amọ, anini iba a-akesịppe akan kobo keed.
43Yisọs amaakood mbed amọ anyʌñ abo ammọ ate, “Ke akpanikọ ke ami idọkkọ ndufo nte ke uwueene ebekpa ami asịn akʌk ke ñkpọ usịn akʌk akan afịd mbon ñko. 44Afịd ammọ ekenọ ubaak ke atu uwak inie ammọ, ado awonwaan ami, ke idaha uweene amọ, amaaben afịd se anye akpedat adu uwem adinọ.”
Pašlaik izvēlēts:
Maak 12: NAAM
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.