Yòhanɛ̀s 13
13
Yesù klɔ àfɔ̀ na yebe nukplaviwo
1Gbɔ̀xue Toŋutivayì be àzãa ne vaa, Yesù nya be gàmè sù ne yèa jo lè xixe kèa mè yì Àta gbɔ. E lɔ̃ àmè kèwo nyi ye tɔ̀awo lè xixe kèa mè. E lɔ̃ wo kaka sɔ yì vɔ̀vɔnu. 2Wàlɛbɛ kè Yesù kudo yebe nukplaviwo le ɖù ènu fìɛ̃si mèa, Àbòsam ɖo sùsu mè na Yudà, Simɔ̀n Iskariɔt be èvia ne bèa do Yesù àsi. 3Kè Yesù nya be Mawu sɔ ènu sia ènu do àsi na yè, be Mawu gbɔ yè so, eye Mawu gbɔ yè trɔ le yìa, 4e sitè lè ènu ɖùɖua gbɔ, ɖè àwù kè be do a ɖɛ, eye be sɔ àvɔ ɖe sã ɖo àlì. 5E yomè a, e kɔ̀ èsì ɖo àdàwa ɖe mè, tɔ àfɔ̀ kɔklɔ na yebe nukplaviwo, eye be sɔ àvɔ kè be sã do àlìa le tutu àfɔ̀ na wo. 6Ekè be ɖo Simɔ̀n Petrò jia, Petrò gblɔ̃ na ɛ̀ be: “Tɔhonɔ̀ èwò ye la klɔ àfɔ̀ na mùa?” 7Yesù ɖo e ŋuti na ɛ̀ be: “Ènu kè mù le wɔ̀a, wò mu la teŋu nya ɛ̀ fifì ò. Vɔ̀a, e yomè a wò la va sè e gɔ̃mè.” 8Petrò gblɔ̃ na ɛ̀ be: “Wò mu la klɔ àfɔ̀ na mù gbèɖe ò.” Eye Yesù gblɔ̃ na ɛ̀ be: “Ne nyè mu klɔ àfɔ̀ na wò òa, eŋuãa, wò mu la kpɔ ènu ɖekpe be gomè ku mù ò.” 9Simɔ̀n Petrò gblɔ̃ na ɛ̀ be: “Ne e nyi nène ye à, Tɔhonɔ̀, mu gbà nyi àfɔ̀wo ɖèɖe kpò wò la klɔ na mù ò. Klɔ àlɔ̀ nyèwo ku èta nyè cã.” 10Yesù gblɔ̃ na ɛ̀ be: “Àmè kè lè ye ɖokoe ɖì vɔ̀a, mu gbà hiã la lè èsì ò; àfɔ̀ kɔklɔ kpò be hiã, ɖo e ɖì keŋu-keŋu. Mìawo yaa, mì ɖì; vɔ̀a mu nyi mìa kpata ò.” 11Yesù nya àmè kè la do è àsia. Ekèa ŋuti ye be gblɔ̃ be: “Mu nyi mìa kpata be ŋuti ye kɔ̀ ò.”
12Kè be klɔ àfɔ̀ na wo vɔ̀a, Yesù gbà sɔ yebe àwùa do, eye be yì nɔ̀ ànyi. E biɔ yebe nukplaviawo be: “Mì sè ènu kè mù wɔ̀ na mìa gɔ̃mèa? 13Mì yɔna mù be Ènufiɔtɔ, kudo Àpetɔ; mìabe ènyà lè e mè, ɖo e lè nènea nyàwo. 14Vɔ̀a, ne ènyè kè nyi mìabe Tɔhonɔ̀, ku Ènufiɔtɔa mù klɔ àfɔ̀ na mìa, eŋuãa, e jè be mìawo cã, mìa nɔ klɔ àfɔ̀ na mìa nɔ̀nɔwo. 15Đo kpɔwɔɛ ye mù na mì, ne mìa cã mìa nɔ wɔ̀ sìgbè àlekè mù wɔ̀ na mìa nène. 16Nyàwo ye mù le to na mì. Sumɔvi mu wu àpetɔa ò. *Àmèdɔ̃dɔ̃ cã mu wu àmè kè dɔ̃ ɛ̀a ò. 17Fifì kè mì nya ènu kèawoa, ne mì wɔ̀ ɖo woa jia, Mawu la tu sì na mì. 18Mu nyi mìa kpata ŋuti ye mù le gblɔ̃ ènyà kèa so ò, ɖo mù nya àmè kèwo mù cãawo. Vɔ̀a, ne ŋɔ̀ŋlɔ̃ a bèa zɔ̃ sù be: 'Àmè kè le ɖù ènu kudo mùa sitè ɖo ŋuti nyè.' 19Mù le to na mì fifì, keŋu gbɔ̀xue bèa va jɔ̀. Àleke be, ne e va jɔ̀ a, mìa xɔ̀sè be, ènyè ye nyi àmè kè mù nyia. 20Nyàwo ye mù le to na mì. Àmè kè xɔ̀ àmè kè mù dɔ̃ ɖoɖaa, ènyè ŋutɔ ye be xɔ̀. Eye àmè kè xɔ̀ mùa, xɔ̀ àmè kè dɔ̃ mù ɖoɖaa cã.”
Yesù gblɔ̃ be Yudà la xɔ̀ kpli na yè
(Màt 26.20-25; Mrk 14.17-21; Luk 22.21-23)
21Kè Yesù gblɔ̃ ènyà kèawo vɔ̀a, yebe àyè gbãdo eye be gblɔ̃ na yebe nukplaviawo be: “Nyàwo ye mù le to na mì: àmè ɖèka lè mìa dòmè la do mù àsi.” 22Yebe nukplaviwo le kpɔ woa nɔ̀nɔwo, ɖo wo mu nya àmè kè ŋuti be le gblɔ̃ ènyà kèa so tututu ò. 23Nukplaviawo dòmètɔ ɖèka, àmè kè Yesù ɖève a, lè àxàda mè na ɛ̀. 24Simɔ̀n Petrò wɔ̀ ŋùkuvi na ɛ̀ be ne biɔ Yesù àmè kè be ènyà be le gblɔ̃a. 25Eye *nukplavi ŋua bi ɖo Yesù be àkɔta, biɔ ɛ̀ be: “Tɔhonɔ̀, àmè kɛ ye ò?” 26Yesù ɖo e ŋuti na ɛ̀ be: “Àmè kè mu la kã kpɔ̃nɔ, la tɔ desì, la sɔ na a ye.” Eye Yesù kã kpɔ̃nɔ, tɔ desì, eye be sɔ na Yudà, Iskariɔt Simɔ̀n be èvia. 27Kè Yudà xɔ̀ kpɔ̃nɔa, Satana ɖo ye mè; eye Yesù gblɔ̃ na ɛ̀ be: “Ènu kè wò ɖo la wɔ̀a, wɔ̀ ɛ̀ kaba.” 28Àmè kèwo le ɖù ènu kudo Yesùawo dòmètɔ ɖe mu nya ènu kè ŋuti be gblɔ̃ ènyà kèa ɖo ò. 29Kè be nyi be Yudà ye hɛ̃nà ègà kpɛtɛa, àmè ɖewo bù be Yesù le to na ɛ̀ be ne yì plè ènu kè wo la sɔ ɖù kpɔ̃nɔ àkpiti be àzãa, àlo ne yì na ènu wɔ̀amènɔ̀wo. 30Ekè Yudà ɖù kpɔ̃nɔa, e to zè ɖèka. Èzã do vɔ̀.
Èse yeyea
31Kè Yudà to vɔ̀a, Yesù gblɔ̃ be: “Fifìa wo ɖè *Àgbètɔ be Èvia be gogo fiɔ, eye to Èvia jia, wo ɖè Mawu be gogo fiɔ. 32Mawu la na ɛ̀ gogo lè ye ŋutɔ mè, eye e la na ɛ̀ gogo zãɖe kèa. 33Èvi nyèwo, àzã vi ɖe kpò ye kpɔ̀tɔ̀ ne ma nɔ̀ mìa gbɔ. Mì la ji mù, eye sìgbè àlekè mù gblɔ̃ na Yudàviwo nènea, mì mu la teŋu yì àfi kè mù le yìa ò. 34Mù le na mì *èse yeye: mì lɔ̃ mìa nɔ̀nɔwo. Mì lɔ̃ mìa nɔ̀nɔwo sìgbè àlekè mù lɔ̃ mìa nène. 35Ne mì lɔ̃ mìa nɔ̀nɔwoa, àmèwo kpata la nya be mì nyi *nukplavi nyèwo.”
Yesù gblɔ̃ be Petrò la gbe yè
(Màt 26.31-35; Mrk 14.27-31; Luk 22.31-34)
36Simɔ̀n Petrò biɔ ɛ̀ be: “Tɔhonɔ̀, fikɛ wò le yì ò?” Yesù ɖo e ŋuti na ɛ̀ be: “Wò mu la teŋu kplɔ̀ mù do yì àfi kè mù le yì fifìa ò. Vɔ̀a, e yomè a, wò la jè yo nyè mè.” 37Petrò gblɔ̃ na ɛ̀ be: “Tɔhonɔ̀ nukɛ ŋuti ye nyè mu la teŋu kplɔ̀ wò do fifì ò? Mù sɔ̀gbè la ku ɖo èta wò.” 38Yesù gblɔ̃ na ɛ̀ be: “Wo sɔ̀gbè la ku do èta nyè nyàwo a? Nyàwo mù le to na wò; kòklo mu la ku àtɔ egbè gbɔ̀xue wò la gbe, zè ètɔ̃ be ye mu jèsi mù ò.”
Pašlaik izvēlēts:
Yòhanɛ̀s 13: GEN
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Mina Bible © Bible Society of Togo, 2014.