Maliko 9
9
Yesu alangazishiγwa
1-13.
1Azawati: Kweli aamiti: Awa weγoloka aha, weyae wawe kuṅwe nkewaone kifa, shuti waneona uzumbe wa Mulungu, ukiiza na nguvu. 2Mishi mtandatu ikizinka, Yesu azamγuwa Petelo na Yakobo na Yohana, azawakweza mwe ntuli nkulu, wai wenye du. 3Wakimwolela, azaγalamuka, hata shuke zakwe zizanamanika na kuṅalisha kabisa, viya ni kau, nkakuna mfula shuke kunu shi mwedaha kuziṅaza ivyoho. 4Eliya na Mose wazawalawila, wazalonga na Yesu. 5Petelo azamlonga Yesu angwe: Mfuzi, vyatama, tikiikala kunu, tizenge makumbi matatu, iṅwe jako, iṅwe ja Mose, iṅwe ja Eliya. 6Hambu nkataile vya longa, hambu wazaingilwa ni woγa ukulu. 7Kuzaiza zunde, jizawagwishiliza mpungo; muja mwe zunde muzalawa kanwa angwe: Uyu ni ṅwanangu, niyemkundisha, mwivei! 8Viya du lushe wakiolela, nkawaene muntu, ni Yesu ike mwe haja, waliho. 9Wakisheela mwe ija ntuli, azawalaγiliza, washezavimtamwila muntu viya, waenevyo, ṅwanangwa vwa muntu ashizati afufuke kwa wafilewo. 10Inu mbuli wazaitoza mwe myoyo yawe, wakiuzanya kuγamba: Kuja kufufuka kwa wafilewo ni mbwai? 11Wazamwuza angwe: Watabaluwangwa waalonga kuti: Shuti kuneiza Eliya! 12Azawahilwila angwe: Kweli, bosi Eliya aiza, aγoshole vyoshe vibanikevyo, miya ni zeze, mbuli ya ṅwanangwa ywa muntu ikigondwa kuti: Nezealumiziγwe vikulu, nezeabelwe? 13Miya namiti: Eliya azabinda kuiza, kangi wazamγoshwela wakundilevyo, sa viyaho mbuli yakwe igondiγwevyo.
Muntu mwena mpepo ishiyolonga.
14-29.
14Wakibula kwa wahina wazaona bumba kulu haho, hata watabaluwangwa wauzanya nawo. 15Wantu woshe wakimwona wazashentuka, wazafikamγulukila, wazamluγusha. 16Azawauza: Mwuzanya mbwai nawo? 17Muṅwe ywa waja wantu azamγamba: Mfuzi, nizaleta ṅwanangu na kwako, ana mpepo ishiyolonga. 18Ihokamgwila yamshindika na nguvu, alawa tefu haṅwe na kugwelenya meno, vikibinda ṅwili woshe utamhoholeka, nizalonga wahina wako, waiingate, miya nkawadahile. 19Azawalandula angwe: Mbali inu nkaitozesha; niange na inywi mpaka lini? Nimizizimizize mpaka hi? 20Mletei na kwangu! Wazamleta na kwakwe. Akimwona, ija mpepo izamshindika, azakina na shi, azadongoloka, azalawa tefu. 21Azamwuza ishe: Ivi vimwandiile lini? 22Angwe: Ake ṅwana mdodo. Yaakamtambika mwe moto kangi muno, vituhu mwe mazi, kangwe imkome. Miya ati wadaha mbuli, tiambize, utifile mbazi! 23Yesu azamuti: Ukiγamba, ati wadaha, vyoshe vidahiγwa ni muotu mwetozesha. 24Ne ishe ja ṅwana ahokema angwe: Natozesha; ulelenganyi wangu uugele nguvu! 25Miya Yesu akiona, kuti wantu wangi waγuluka na haja, azaivaila ija mpepo ye usaba angwe: Iwe mpepo ushilongawo, kangi ushiivawo, nakulaγiliza, ulawe mwe ṅwili wakwe, ushezauingila vingi! 26Izakemesha, izamnyaγalisha, ikibinda izalawa mwakwe. Azaγaluka viya ni mfi, wangi wazafanyanya kuti azafa. 27Yesu azamtoza mkono, azamwinula, azainuka, 28Akiingila na nyumbai, wahina wakwe wazamwuza he njama: Ni vihi vilekilevyo, tikishedaha kuiingata? 29Azawati: Inu mbali nkaihalawa mwe mimtu, ati so kwa kuvika na kufimga.
Yesu inga akoṅwe.
30-32.
30Wakikulawa kuja wazaanga mwe shi ya Galileya, miva nkakundile, muntu akitaila. 31Hambu azawafuza wahina wakwe, azawati: Ṅwanangwa ywa muntu neainkilwe mwe mikono ya wantu, akoṅwe; miya akibinda kukoṅwa, mishi mitatu ikizinka, neafufuke. 32Miya waja nkawataile inu mbuli, kangi wazaogoha kumwuza.
Wahina wakananilana ukulu.
33-50.
33Wazabula Kapelinaumu. Akiingila na nyumbai azawauza: Kuja silai ne mkifanyanya mbwai? 34Miya wazaleka lwashu. Hambu kuja ne wakikanana kuγamba: Mkulu ni ndai? 35Azaikaia, azalonga na waja kumi na waili, azawati: Muntu akikunda kuγaluka ywa bosi, shuti aγaluke shilikizi ja weyae woshe, awatumikile woshe! 36Azaγuwa kazana, azakaγolosha gatigati haja, waliho, azakaambata, azawati: 37Ndiye ahokele kazana keinga aha kwa mbuli ya zina jangu, anihokela imi; kangi ndiye anihokele imi, nkanihokela imi du, miya amhokela yuja anitumileye.
Muntu aingata mpepo.
38Yohana azamuti: Mfuzi, tataila muntu mweingata mpepo kwa nguvu ya zina jako, kangi nkatitongela, ne tihomfingiza, kwa kuti nkatilongela. 39Angwe ni Yesu: Mshemfingize! Hambu nkakuna mwetenda nguvu kwa zina jangu, vituhu akidaha kufikanishinga vibada. 40Hambu ashiyetiikila nkani ne mweivana na ishwi. 41Hambu ndiye nezeaminke ntungo ya mazi kwa mbuli ya zina jangu, kwa kuti mu wa Kilisito, kweli namiti: Upokezi wakwe nkezeumwaγile.
Mlaho wa viya vyeihiza.
42Miya awa wadodo wenitozesha, ndiye aihize ṅwiyae ywawe muṅwe, vyamtala, mwe shingo yakwe mukigelwa nolo gima, akitambikwa na mwe bahali. 43Ali mkono wako wakuihiza, uushenge! Ni vitana, ukiingila he nkalamo wina mkono muṅwe du, kuzinka aho, ukionya kuzimu na mikono mili, ukigelwa mwe uja moto ushizimawo. 44Hambu zongolo jawe jewalumiza kuja nkajifa, kangi uja moto nkauzima. 45Ati mulundi wako wakuihiza, uushenge! Ni vitana, ukiingila he nkalamo wina mulundi muṅwe du, kuzinka aho, ukishindikwa kuzimu na milundi mili. 46Hambu zongolo jawe jewalumiza kuja nkajifa, kangi uja moto nkauzima. 47Ati zisho jako jakuihiza, jifokole! Ni vitana, ukiingila he nkalamo wina zisho iṅwe du, kuzinka aho, 48ukishindikwa kuzimu wina mesho maili. Hambu zongolo jawe jewalumiza kuja nkajifa, kangi uja moto nkauzima. 49Hambu kila muntu atazatamiziγwa ni moto. 50Munyu ni mtana; miya ati munyu wabanika, nezemuuzifye na mbwai? Tendai munyu mwe myoyo yenyu, mwivane wenye na wenye!
Pašlaik izvēlēts:
Maliko 9: KISHNT05
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
New Testament in Kishambala © Bible Society of Tanzania, 2005.