Maliko 10
10
Vyekoma unyumba.
1-12.
1Azakuinuka kuja, azahita mwe shi ya Yudeya na mwe shi ye sheja ja Yolodani. Vituhu wantu wangi wazamlimila, azawafuza vituhu, sa avyokazwela. 2Hata Mafaliseyo wazamwizila, wazamwuza, ati nkavina ṅwiko, mγoshi akilekana na muke, miya watemγeza. 3Azawalandula angwe: Mose amilaγilize mbwai? 4Angwe ndiwo: Mose azakundiza wantu kugonda vyeti vya kukoma unyumba, kangwe walekane. 5Yesu azawati: Kwa mbuli ya ntoγo za myoyo yenyu azamigondela unu mulomo; 6miya aho kuandiila, Mulungu akiumba wantu, azawaumba mγoshi na mvyele. 7Ne vihokaleka, muntu akimwasha ishe na nine, aandakane na muke, awa waili waγaluke ṅwili muṅwe; 8kwa ivyoho awa so waili, miya ni ṅwili muṅwe. 9Kangi viya, Mulungu agombekezevyo, muntu ashezavigombola! Wakiingila na nyumbai, 10wahina wakwe wazamwuza kwa inu mbuli. 11Azawati: Muntu akilekana na muke, akiγuwa mtuhu, atenda kilanga naye; kangi mvyele akilekana na mulume, 12akiγwiγwa ni mγoshi mluhu, atenda kilanga.
Yesu ahokela vizana.
13-16.
13Wazamletela vizana, kangwe avibadikile mikono; miya wahina wazawavaila waja wevileta. 14Yesu akiviona azaihilwa, azawati Lekal, vizana viize kwangu, mshevifingize! Hambu we ivyoho uzumbe wa Mulungu ni wawe. 15Kweli namiti: Ndiye ashehokele uzumbe wa Mulungu sa kazana nkezeauingile. 16Azaviambata, azaviṅaza mesho na kuvibadikila mikono.
Ntoγo ya mzuli.
17-31.
17Akilawa kuja, akibula silai, kuna mwemγulukila, azamgintila mazwi, azamwuza: Mfuzi mtana, nitende zeze, kangwe nezenipale nkalamo ya kale na kale? 18Yesu azamuti: Nini ukiniitanga mtana? Nkakuna mtana, kushima Mulungu ike du. 19Milomongwa waitaila kuγamba: Ushekome! Ushetende kilanga! Ushebawe! Ushemshinge ṅwiyawo ukilonga uwona wa lulimi! Ushemtunguluke muntu! Gimbika isho na nyokwe! 20Yuja azamuti: Mfuzi, ivi vyoshe nizaviγolokela, vivyo nikuzilevyo. 21Yesu azamwolela, azamkundisha, azamuti: Uishiγaze mbuli ṅwenga; hita, ukataγe vyoshe, uvyona navyo, uviinkile kwa wakiwa! Ne ndivyo utende mali mwe lwingu! Ukibinda uize, unitongele! 22Miya yuja azakilwa ni inu mbuli, azahita na ukiwa, hambu ne aina kitende chingi. 23Yesu azazungulusha mesho, azalonga wahina wakwe angwe: Olelai, ntoγo zivyokula, wazuli wakikunda kuingila mwe uzumbe wa Mulungu! 24Wahina wakwe wazashentuka izi mbuli; Yesu azawalandula vituhu, angwe: Wanangu, olelai, ntoγo zivyokula, waja wealila mali yawe wakikunda kuingila mwe uzumbe wa Mulungu! 25Ngameya ntoγo zakwe za kuholokela mwe kihula cha singano nkaziinga sa ziya, mzuli azoona za kuingila mwe uzumbe wa Mulungu. 26Miva waja wazaisiiza kushentuka, wazaγambilana: Lushe ndiye adahe kuzahona, ni ndai? 27Yesu azawaolela, azawati: Kwa wantu nkavidahikana, kushima kwa Mulungu; hambu vyoshe vidahikana kwa Mulungu.
Muntu mweasha vyoshe ndivyo aonele.
28Petelo azaandiila kumlonga angwe: Olela, ishwi tizaasha vyoshe, tizakutongela. 29Angwe ni Yesu: Kweli namiti: Mweasha nyumba ao wanduγu wakwe ao walumbuze ao nine ao ishe ao wanae ao miγunda kwa mbuli ya imi na ya ulaungwa wedi, 30nkakuna ndiye asheviuziziγwe ka gana mwe mishi inu ake kunu shi nyumba zakwe na wakuluwe na wanduγuze na walumbuze na wanine na wanae na miγunda, hata akitaγulushwaγulushwa, kangi mishi ija, ndiyo nezeibule, atazainkwa nkalamo ya kale na kale. 31Miya wangi walongolewo watazashilikiza, kangi washilikizewo watazalongola.
Yesu auγiza kulonga kuti inga alumiziγwe.
32-34.
32Kuja silai wakihita, wakwele Yelusalemu, Yesu aiwalongwele, miya wazamaka, wazamtongela na woγa. Azaγuwa vituhu waja kumi na waili, azaandiila kuwaγambila viya, ndivyo vimubulile, 33angwe: Olelai! Takwela Yelusalemu, ṅwanangwa ywa muntu ainkilwe kwa wavikizi wakulu na kwa watabaluwangwa, wakamlahe masa ya kumkoma, wamwinkile kwa wamzimu, watamfyulila, watamshwela mate, watamluta 34vikibinda watamkoma; miya mishi mitatu ikizinka atafufuka.
Wana Zebedeyo wavyolombeza.
35-45.
35Yakobo na Yohana, wana Zebedeyo, wazamwizila angwe: Mfuzi, takunda, utiγoshwele, ndivyo tikulombeze. 36Azawati: Mukunda, nimiγoshwele mbwai? 37Wazamuti: Utikundize, muṅwe nezeaikale kulume, muṅwe kumosho kwako mwe utana wako! 38Yesu azawati: Nkamtaila muvyolombeza. Mwadaha kunywa icho kinywelo, ndicho ninywe? Mwadaha kubatizwa uwo ubatizi, ndiwo nibatizwe nawo? 39Wazamuti: Tadaha. Miya Yesu azawati: Icho kinywelo, ndicho ninywe, nezemuchinywe! Hata ubatizi, ndiwo nibatizwe nawo, nezemubatizwe nawo! 40Miya k mwikaza muntu kulume ao kumosho kwangu so ndima yangu, kuja kutala waja wakufanyanyiziγwewo. 41Waja weyae wawe kumi wakiviiva wazaihilwa kwa mbuli ya Yakobo na Yohana. 42Yesu azawaitanga, azawati: Mwataila, kuti waja wegimbikwa wazumbe wa mbali za wantu wawatoza na nguvu, hata wafuṅwa watunguluka wantu; miya kwenyu kusheoneke ivyoho! 43Miya mwekunda kuγaluka mkulu kwenyu, shuti a nitumikile! 44Mwekunda kuγaluka ywa bosi kwenyu, shuti aγaluke mupuna ywa weyae woshe! 45Hambu ṅwanangwa ywa muntu yohena okaizile, atumikilwe, miya aizile kwa tumikila, akiinkile ṅwenye, akombole wantu wangi.
Balilimeyo ahonyiγwa mesho.
46-52.
46Wazabula Yeliko. Akilawa Yeliko na wahina wakwe na bumba kulu muno, kuja silai kuzaikala Balitimeyo, ni ṅwana Timeyo, ni tuntu, aakalombeza. 47Akiiva kuti: Ni Yesu ywa Nazaleti, azaandiila kukema angwe: Yesu, ṅwana Dawidi, nifa mbazi! 48Wangi wazamvaila, kangwe aleke lwashu, miya azaisiiza kukema vivyoho: Ṅwana Dawidi, nifa mbazi! 49Yesu azaγoloka, azaγamba Mwitangei! Wazamwitanga yuja tuntu wakimuli: Toγwa ni moyo! Inuka! Akuitanga. 50Yuja azaasha shuke yakwe, azafikainuka, azahila kwa Yesu. 51Yesu azamwuza: Ukunda, nikuγoshweie mbwai? Angwe ni yuja tuntu: Mfuzi mkulu, nakunda, nione! 52Yesu azamuti: Hita! Mitozesheze yako izakuhonya. Viya du lushe azaona, azamtongela kuja silai.
Pašlaik izvēlēts:
Maliko 10: KISHNT05
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
New Testament in Kishambala © Bible Society of Tanzania, 2005.