Maliko 4
4
Lushimo lwa mhasi.
1-20.
1Azaandiila vituhu kufuza nkandankanda ya bahali, ne kuhounganana bumba kulu muno kabisa haja, aliho; ne vyeleka, akiingila mwe chombo, azaγoloka nacho mwe bahali, miya jiya bumba joshe jii nkandankanda ya bahali. 2Azawafuza mbuli nyingi na kuwazisa shimo, azawalonga na ija mifuzize yakwe: Teγelezai! 3-4Kuna mhasi azalawa kwa myaγa mbeyu; aho akimyaγa mbeyu, kuṅwe zizagwa silai, videγe vizaiza, vizazija. 5Kuṅwe zizagwa he mawe, hashinaho shanga nyingi, zizafaalika nguzu kwa kushowa shanga nyingi. 6Miya zuwa jikiandiila kuaka, zizanyuluka, zizakalaγala, kwa kuti nkazina sindo. 7Kuṅwe zizagwa he miwa; miwa izakwela, izazifuwa na kuzivungavunga, nkazivyele. 8Kuṅwe zizagwa mwe shanga ntana, zizalawa, zizakula, zizavyaia, zizavukiza, kuṅwe milongo mitatu, kuṅwe milongo mtandatu, kuṅwe gana. 9Akibinda azalonga: Mwena mashikila yeiva neaive!
10Wakiikala wenye du, waja awona nawo haṅwe na waja kumi na waili wazamwuza ziya shimo. 11Azawati: Inywi mzafilwa mbazi, mtaile kihili cha uzumbe wa Mulungu, miya waja we uko se waγambilwa mbuli zoshe kishimo, 12kangwe waolele na mesho yawe, miya washeone, waive na mashikilo yawe, miya washetaile, kangwe washezahituka wakiushiliziγwa uhuza. 13Azawati: Nkamtaila ulu lushimo? Mtaile zeze ziya shimo zoshe? 14Yuja mhasi amyaγa mbulingwa. 15We kuja silai, mbeyu zikomyaγwa, ni waja weiva mbulingwa, miya viya du lushe Satani aiza, ausha mbulingwa imyaγiγweyo mwe myoyo yawe. 16Vivyoho hata ziya zimyaγiγwezo he mawe ni waja weiva mbulingwa na kufikaihokela na nyemi, 17miya nkawana sindo mwe myoyo yawe, wazizimiza mishi miγeke, miya wakiona ukiwa ao nkondo kwa iyo mbuli, wafikaihilwa. 18Ziya ntuhu zimyaγiγwezo he miwa, ni waja Weiva mbulingwa, 19miya sungu za inu shi na lwufyo lwa mali na luzisho lutuhutuhu lwaingila lohena, lwafuwa mbulingwa, ishevyale. 20Ziya zimyaγiγwezo mwe shanga ntana, ni waja weiva mbulingwa na kuihokela, ne wevukiza, kuṅwe milongo mitatu, kuṅwe milongo mtandatu, kuṅwe gana.
Lushimo lwa kijali na lwa kihimo.
21-25.
21Azawati: Kumbe kijali chikaletiγwa, chifunikilwe ngahu, ao du chiikwe he lusazi mzunguwi? Chisheikwe he kiikilo chakwe? 22Nkakuna mbuli ifishiγweyo, ndiyo ishebunkuke; nkakuna vye njamanjama, ndivyo vishelawile na weluwi! 23Mwena mashikilo yeiva neaive!
Lushimo lwa mbeyu yekula ṅwenye.
24Azawati: Olelai viya muvyoiva! Kihimo, ndicho muhime nacho, ne ndicho nezemuhimilwe nacho, kangi nezemγelekwe. 25Hambu mwena kitende atainkwa vivyoho, miya ashinaye hata viya, avyona navyo, atavihokwa. 26Azawati: Uzumbe wa Mulungu wafanana na muntu mwemyaγa mbeyu mwe lubuwa. 27Akibinda ahita kwa sisila, ainuka, kilo na mushi ni vivyoho; miya ija mbeyu yafaalika, yakula, ṅwenye aishitaile. 28Shi ivyala ṅwenye, kuandiila ni mani, vikibula gati yachakula, bindilizo yadalahaza mpuluzi mwe mahimpi. 29Miya mampemba yakigonyoka, viya du lushe atuma tuni, hambu uluki uzabula.
Lushimo lwa mvumo.
30-34.
30Azawati: Uzumbe wa Mulungu tiufanyanye na mbwai? Mbuli yakwe tiilonge na lushimo ani? 31Wafanana na kahuluzi ka ntunda ya mvumo; kakigelwa mwe shanga ni kahuluzi kadodo kuzinka mbeyu zoshe kunu shi. 32Miya kakibinda kuhandwa kalawa, kavota miti yoshe yehandwa, katula matambi makulu, hata madeγe yeanga ulanga yadaha kuhema mwe mpungo yakwe. 33Azawaγambila mbulingwa na shimo nyingi ntuhu zefanana na izi, iivane na aho, wadahileho kuiva. 34Nkakuna mbuli, awalongileyo kishilushimo, miya wahina wakwe ṅwenye azawafumbwila mbuli zoshe, wai wenye du.
Yesu atongomaza bahali.
35-41.
35Mushi uja, kukibinda kushwa, azawaγamba: Netiomboke na sheja! 36Wazashungula waja wantu, wazamγuwa vivyoho, aikalevyo mwe chombo, hata vyombo vituhu vizahita naye. 37Kuzainuka mpeho nkulu yekuntisha na nguvu, izatambika maimbi na mwe chombo, ne chiandiilevyo kumema mazi. 38Ṅwenye a kuja nyuma, aisisile mwe muto; wazamwinula, wazamγamba: Mfuzi, nkuna sungu, tikiaγa? 39Azainuka, azavaila ija mpeho, hata bahali azailonga angwe: Leka lwashu, tongomala! Ne mpeho iholeka kukunta, kuzahombwela kabisa. 40Azawati: Nini mkitaogoha ivyoho? Kangi nini mkishetozesha? 41Wazaingilwa ni woγa ukulu, wazaγambilana: Ni muntu ani uyu, mpeho na bahali zikimwitika?
Pašlaik izvēlēts:
Maliko 4: KISHNT05
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
New Testament in Kishambala © Bible Society of Tanzania, 2005.