Maliko 5
5
Yesu ahonya mtamu mwena mpepo kulija.
1-21.
1Wazabula sheja ja bahali mwe shi ya Gadala. 2Haho akihalawa mwe chombo azakintana na muntu mwelawa kwe mbila mwena mpepo ye usaba. 3Wikazi wakwe u kuja kwe mbila, kangi nkakuna muntu adahileye kumshunga, hata mazolo yazalema. 4Hambu kangi muno azashungwa na magogolo, na mpingu, miya izo mpingu ziyakadwishiγwa ndiye, hata magogolo yaakabondwabondwa ndiye, nkakuna adahileye kumvota. 5Mishi yoshe kilo na mushi azaikala kuja kwe mbila na kwe mpanga na kushindakemakema na kukishushunta na mawe. 6Akimwona Yesu, ake hale, azamγulukila, azamkinila, azakema na kanwa kikulu angwe: 7Nina mbwai imi na iwe Yesu, ṅwana Mulungu mwe uko ulanga? Nakuhembeleza, ukilishe na Mulungu, kangwe ushezanilumiza. 8Hambu ailongile kuti: Iwe mpepo we usaba, lawa mwe uyu muntu! 9Azamwuza lushe: Zina jako ni weyo ndai? Angwe: Zina jangu ni miyo makulija, hambu ti wangi. 10Zizaisiiza kumhembeleza, ashezilaγilize kulawa mwe ija shi. 11Kuja kwe milima ne kwina ifyo kulu ja nguluwe zelishiγwa. 12Ziya mpepo zizamhembeleza angwe: Titume kwe ziya nguluwe, tikaziingile. 13Azazikundiza; ne ziholawa ziya mpepo ze usaba, zizaingila mwe ziya nguluwe, ne jiya ifyo jiholumbila kunguwi na mwe bahali, kangi ne zii makulija maili, zizanywilimila mwe bahali. 14Waja wezilisha wazanyilika, wazabilikila inu mbuli kuja kaya, hata kwe mizi tanga, ne wantu wahoiza, waolele viya vitendekevyo. 15Wazamwizila Yesu, wazamwona yuja muntu, ndiye akihuma mpepo makulija, aiikale, aikiγubike shuke, ni mtana lushe, ne wahoingilwa ni woγa. 16Waja waenewo, mbuli ya yuja ahumileye mpepo iγendilevyo, wazaiwatamwila, hata ija mbuli ya nguluwe. 17Wazaandiila kumhembeleza, auke mwe shi yawe. 18Akiingila mwe chombo, yuja ahumileye mpepo azamhembeleza, ahite naye. 19Miya nkamkundize, azamγamba: Γotoka na kaya kwako kwa wanduγu wako, uwabilikile viya, Zumbe akutendilevyo, akufilevyo mbazi! 20Azahauka, azaandiila kubilikila mwe ija shi yena mizi kumi, Yesu amγoshwelevyo, miya woshe wazavimaka.
Yesu afufula ṅwana Yailo.
21-43.
21Yesu akibinda kuomboka na chombo na kuja sheja vituhu, wantu wangi wazaunganana haja, aliho he bahali. 22Kuzaiza mfuṅwa ywa vikilo, zina jakwe ndiye Yailo; akimwona azamkinila he milundi yakwe, 23azaisiiza kumhembeleza angwe: Nwanangu ywa kindele aunga kufa; fikaiza, umubadikile mikono, kangwe ahone, aikale ugima. 24Azahita naye; wantu wangi muno wazamtongela, wazamshushumila. 25Kuna mvyele alawileye mpome mavuli kumi na maili; 26uyu azalumiziγwa vikulu ni waγanga wangi, azabinda mali yakwe yoshe, 27kangi nkahonile hata, azaisiiza kuifiγwa. Akiiva mbuli ya Yesu, azamtongela nyuma na jiya bumba joshe, azadowa nkazu yakwe. 28Hambu azaγamba: Ati nadowa nkazu yakwe du, nenihone. 29Viya du lushe ija shoko ya mpome yakwe izahwa, azataila mwe ṅwili wakwe, kuti azahona ija nkondo yakwe. 30Hata Yesu azafikataila ṅwenye, kuti kuna nguvu ilawileyo mwe ṅwili wakwe, azahitukila waja wantu angwe: Adowileye shuke zangu ni ndai? 31Wahina wakwe wazamγamba: Waona, iji bumba joshe jakushushumila, nini ukiγamba: Anidowileye ni ndai? 32Azazungulusha mesho, kangwe amwone yuja aviγosholeye. 33Miya yuja mvyele azaingilwa ni woγa, azadidima, hambu azataila aγoshwelwevyo, miya azaiza, azamkinila, azamγambila mbuli zoshe kweli. 34Yuja azamuti: Ṅwanangu, mitozesheze yako izakuhonya; hita mpeho, uikale ugima, iyo nkondo ishekuuyiye! 35Akelonga naye, kuzaiza wantu wa yuja mfuṅwa ywa vikilo, wazamuti: Ṅwanawo azafa; lushe nini ukimwonya mfuzi lulali? 36Yesu azaiva, inu mbuli ikilongwa, azamγamba yuja mfuṅwa ywa vikilo: Usheogohe! Tozesha du! 37Kangi nkakundize watuhu, wakihita naye, kushima Petelo na Yakobo na nduγuye Yohana. 38Wazaingila mwe nyumba ya yuja mfuṅwa ywa fyomelo, azaona mumo vuzo kulu, hambu muna welilisha na kukemesha. 39Akibinda kuingila azawati: Muvunkai na kulila? Uyu ṅwana nkafile, miya atesisila du. 40Miya wazamsheka. Azawaγulusha woshe, azamγuwa ishe ja ṅwana na nine na waja, awona nawo, azaingila na muja, yuja ṅwana alimo. 41Azamtoza yuja ṅwana mkono, azamuti: Talita kumi!, ni kuγamba: Kandele, nakuti: Inuka! 42Viya du lushe kaja kandele kazainuka, kazaγenda; hambu kaibindile mavuli kumi na maili; ne wahoisiiza kushentukisha. 43Azawalaγiliza kabisa, washezaleka, muntu akitaila inu mbuli; kangi azawati: Munkei vya ja!
Pašlaik izvēlēts:
Maliko 5: KISHNT05
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
New Testament in Kishambala © Bible Society of Tanzania, 2005.