創世記 41
41
約瑟為埃及王解夢
1兩年後，埃及王發一個夢：佢企在尼羅河滣， 2看到七隻盡靚盡肥个牛乸對河壩上來，在河邊食草。 3接等又有七隻盡媸盡瘦个牛乸對河壩上來，企在河滣該七隻肥牛乸塍頭。 4這七隻盡媸盡瘦个牛乸將該七隻盡靚盡肥个牛乸食掉。這時王就醒過來。 5佢又睡掉，另外發一個夢：佢看到有一頭麥仔生出七串當飽當熟个麥串， 6接等又生出七串被東風吹到燥燥、冇掉个麥串； 7這七串冇掉个麥串將該七串當飽當熟个麥串吞掉。王醒後正知這係一個夢。 8第二朝晨，王个心煩躁，就派人召集埃及所有跳童个㧯星象家來，將佢个夢㧯佢等講，總係無人能為佢解夢。
9這時，酒政對王講：「今晡日𠊎想起自家个過失。 10上擺王大發譴，下令將𠊎㧯膳長關在侍衛長府內个監獄。 11有一暗晡𠊎兩儕攏總發一個夢，兩儕个夢意思無共樣。 12當時有一個希伯來青年㧯𠊎等共下關在該位，佢原來係侍衛長个僕人。𠊎等將自家个夢㧯佢講，佢就代𠊎等解夢。 13結果，事情全部照佢个解釋來實現：𠊎回復原職，膳長卻被人吊死。」
14王就派人傳約瑟來。佢等遽遽帶佢出監獄；佢就剃頭、修面、換衫，來到王面前。 15王對佢講：「𠊎發一個夢，無人能解釋；𠊎聽講你會解夢。」
16 約瑟應王講：「𠊎無這個才調，總係上帝會將圓滿个解釋賜給王。」
17王對約瑟講：「𠊎發夢看到自家企在尼羅河滣。 18有七隻盡靚盡肥个牛乸對河壩上來，在河邊食草。 19接等有七隻盡媸盡瘦个牛乸上來，係𠊎在埃及從來毋識看過恁瘦个。 20這兜盡媸盡瘦个牛乸食掉該七隻肥牛乸。 21無想到，這兜牛乸還係盡媸盡瘦，看毋出佢等有食掉肥牛乸。這時𠊎就醒過來。 22𠊎又發一個夢，看到有一頭麥仔，生出七串當飽當熟个麥串。 23接等又生出七串被東風吹到燥燥、冇掉个麥串。 24這兜冇掉个麥串將該七串飽滿个麥串吞掉。𠊎將這兜夢㧯跳童个講，總係無人能為𠊎解夢。」
25 約瑟對王講：「其實這兩個夢可以做一個夢來解釋，意思攏總共樣。上帝已經將自家愛做个事先㧯王講。 26該七隻肥牛乸代表七年，該七串飽滿个麥串也代表七年，意思攏總共樣。 27接等上來該七隻盡媸盡瘦个牛乸代表七年，該七串被東風吹到燥燥、冇掉个麥串也代表七年，攏總代表七年飢荒。 28就像𠊎頭先對王所講个，上帝已經將自家愛做个事預先指示王了。 29埃及全地會有七年个大豐收， 30接等有七年飢荒。這飢荒會毀壞埃及全地，使人完全毋記得好年冬个樣像； 31飢荒嚴重到非常得人驚，人會感覺毋出以前識有豐收。 32王連續發這兩個夢，代表這係上帝決定个計劃，盡遽就會實現了。
33所以，𠊎建議王選一個有智慧、有眼光个人，派佢治理埃及全國， 34並指派其他官員，在七年豐收期間，徵收埃及全國農產物个五分之一。 35命令佢等在將愛來个豐年期間收集五榖，在各城積存糧食，派人管理。 36在接等將愛來該七年飢荒，這兜囤糧做得供應埃及人民，使國家毋會被飢荒滅掉。」
約瑟治理埃及
37王㧯佢一切官員攏總贊成這個計劃。 38王就對佢个官員講：「𠊎等尋毋到比約瑟較理想个人選了，因為佢底背有上帝个靈！」 39王對約瑟講：「上帝既然將這一切指示你，你一定比別人更有智慧、更有眼光。 40𠊎愛派你治理𠊎个國；𠊎个人民全部愛服從你个命令。在本國，只有𠊎个權力超過你。 41這下𠊎命令你做埃及个宰相。」 42王將自家手指戴个印仔拿來戴在約瑟个手指，又將上等麻紗做个外衫袈在約瑟身上，再將金脖鍊掛在約瑟个頸項。 43佢又俾約瑟坐王室个第二輛車，有警衛開路，大聲喊：「跪下來！」#41:43 「跪下來！」抑係譯做「閃開！」恁樣，約瑟受派做宰相，治理埃及全國。 44王對約瑟講：「𠊎係王，總係在埃及全地，若係無你个命令，麼人都做毋得隨便行動。」 45王賜約瑟一個埃及名，安到撒發那特‧巴內亞，又將希利坡里城个祭司波提非拉个妹仔亞西納給佢做𡜵娘。恁樣，約瑟就治理埃及全地。
46 約瑟三十歲个時開始為埃及王工作；佢離開王宮，到埃及各地巡查。 47在七個豐年期間，五榖豐登。 48約瑟收集五榖，在各城鎮起倉庫，積存對周圍各地收集來个糧食。 49佢大量收集五榖，像海滣个沙仔多到無辦法算。
50在荒年吂到以前，約瑟个𡜵娘就係希利坡里城个祭司波提非拉个妹仔亞西納㧯佢𫱔兩個孻仔。 51約瑟講：「上帝使𠊎毋記得一切个苦難、㧯吾爸全家人。」所以佢㧯長子安名瑪拿西#41:51 「瑪拿西」有「使人毋記得」个意思。。 52佢又講：「上帝使𠊎在受苦个地方興旺。」所以佢㧯第二個孻仔安名以法蓮#41:52 「以法蓮」有「使人興旺」个意思。。
53 埃及人享受个豐年結束了， 54就像約瑟个預言，七個荒年接等就來。逐所在有飢荒，單單埃及全國有糧食。 55後來埃及人民也無糧食了，佢等對王求糧。王就命令佢等去見約瑟，一切聽佢个安排。 56飢荒越來越嚴重，全國都共樣；所以約瑟打開所有倉庫，將存糧賣給埃及人。 57周圍各國个人也來向約瑟糴糧，因為天下逐所在有飢荒，情況非常嚴重。
Pašlaik izvēlēts:
創世記 41: THV12Hdb
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© The Bible Society in Taiwan, 2012
All rights reserved
© 台灣聖經公會版權所有 2012