創世記 42
42
約瑟个兄弟到埃及糴糧
1 雅各一聽到埃及有糧食，就對佢个孻仔講：「你等做麼介毋想兜辦法呢？ 2聽講埃及有糧，你等去糴兜轉來，免得𠊎等餓死！」 3恁樣，約瑟十個阿哥全部去埃及糴糧了。 4總係雅各毋肯約瑟个老弟便雅憫㧯佢等共下去，因為雅各驚佢堵到災害。
5 以色列該兜孻仔㧯其他个人攏總去糴糧，因為迦南全地也有飢荒。 6約瑟做埃及宰相，負責糶糧給各地來个人；所以約瑟該兜阿哥來到佢面前，伏在地上跪佢。 7約瑟一看到佢該兜阿哥就認出來，總係詐意毋認識，用嚴厲个話問佢等：「你等係對㖠位來个？」
佢等應講：「𠊎等係對迦南來糴糧个。」
8 約瑟認出該兜阿哥，總係佢个阿哥認毋出佢。 9佢想起頭擺自家發過个夢，就故意對佢等講：「你等係探仔，想來打探𠊎等國家个祕密！」
10佢等應講：「大人啊！僕人毋係探仔，係來糴糧个。 11𠊎等全部係親兄弟，係老實人；若僕人毋係探仔。」
12 約瑟硬講：「騙𠊎！你等一定係來打探𠊎等國家个祕密。」
13佢等講：「大人啊！僕人本來有十二兄弟，係共阿爸𫱔个；佢住在迦南。𠊎等最細个老弟㧯阿爸做伴，還有一個老弟無掉去。」
14 約瑟再一擺強調講：「𠊎頭先講過，你等一定係探仔。 15𠊎愛試你等有誠實麼。𠊎指王个名發誓：你等若無將最細个老弟帶到這位來，𠊎絕對毋准你等離開。 16你等派一個人去帶若老弟來；其他个人關在這位，等到你等所講个話得到證明係毋係有影！若係無影，𠊎指王个性命發誓，你等一定係探仔。」 17恁樣約瑟將佢等共下關入一間監獄三日。
18第三日，約瑟對佢等講：「𠊎係敬畏上帝个；若係你等接受𠊎个條件，𠊎就饒你等个命。 19為到愛證明你等係誠實个人，你等愛留一儕在監獄做人質；其他个人做得轉去，將糧食帶轉去救飢荒中个屋下人。 20然後將最細个老弟帶來𠊎這位。恁樣就證明你等个話係真實个，你等就毋使死。」
佢等接受這個條件， 21互相講：「當初𫣆陷害老弟，這下受報應了。當時𫣆看等佢受痛苦，佢求𫣆放佢一條命，𫣆毋搭佢；所以𫣆堵到這個災難。」
22 呂便講：「𠊎敢毋識勸你等毋好傷害佢，總係你等毋聽；這下這血債該當𫣆來還。」 23約瑟聽得識佢等个話，佢等卻毋知，因為佢㧯佢等講話有人翻譯。 24約瑟轉身出去噭，然後倒轉來對佢等講話，就選出西緬，在佢等面前將佢捆起來。
約瑟个阿哥轉迦南
25 約瑟吩咐人將該兜阿哥帶來个袋仔裝滿糧食，將錢銀放轉逐儕个袋仔，又代佢等準備路項个食物；一切就照恁樣準備好勢。 26佢等就將糴來个糧食放在驢仔背囊，離開該位。 27在過夜个地方，佢等有人打開袋仔愛餵驢仔，發現自家个錢還在袋仔肚。 28佢對該兜兄弟講：「𠊎个錢銀還給𠊎了！你等看，就在𠊎个袋仔肚！」佢等全部驚到會死，又愊愊掣講：「上帝做麼介恁樣對待𫣆呢？」
29佢等轉到迦南地，到佢等个阿爸雅各該位，將經過个事詳細㧯佢講。 30佢等講：「埃及宰相盡嚴對𠊎等講話，指責𠊎等係去打探佢等个國家。 31𠊎等對佢講：『𠊎等係老實人，毋係探仔； 32𠊎等原來有十二兄弟，全部係共阿爸𫱔个。有一個老弟無掉去，最細个老弟留在迦南㧯阿爸做伴。』 33該宰相就講：『𠊎愛試你等有誠實麼？你等愛留一儕在這位，其他个做得轉去，將所糴个糧食帶轉去救飢荒中个屋下人。 34然後愛將最細个老弟帶來𠊎這位。恁樣𠊎就相信你等係誠實个人，毋係探仔。𠊎會將你等个兄弟還你等；你等也做得住在這位做生理。』」
35後來，佢等將糧食倒出來个時，儕儕都發現自家个錢包還在袋仔肚。佢等㧯阿爸一看到錢包，全部無葛無煞。 36雅各對佢等講：「你等愛𠊎喪掉所有个孻仔，係麼？約瑟無掉，西緬也無了！這下你等又愛將便雅憫帶走！哎，災難全部臨到𠊎身上了！」
37 呂便向厥爸保證講：「若係𠊎無將便雅憫帶轉來，你可以㓾掉𠊎兩個孻仔。將細老弟交給𠊎照顧，𠊎一定會帶佢轉來。」
38總係雅各講：「𠊎這个孻仔做毋得跈你等去！佢个親阿哥死掉，這下只賸佢一儕！佢在路項可能會堵到意外个事。你等愛害𠊎這個滿頭白毛个老人家，悲悲慘慘落陰間係麼？」
Pašlaik izvēlēts:
創世記 42: THV12Hdb
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© The Bible Society in Taiwan, 2012
All rights reserved
© 台灣聖經公會版權所有 2012