Evangelium e Matejestar 17
17
Averćhandipe
1Thaj pale šov dive lija o Isus e Petre thaj e Jakove thaj e Jovano, phrale leskere, thaj inkalda len pe uči plajin korkore. 2Thaj averćhandilo ulo anglal lende, thaj strefisajlo o muj lesko sar o kham, a e fustanja leske ćerdile parrne sar rošlipe. 3Thaj dikh, mothodilo lenge o Mojsije thaj o Ilija save lesa vakerde. 4A o Petar irisarindoj phenđa e Isuseske: Devljutneja, lačhe si amenge akate te ova; te manglan te ćeras akate trin khasora: tuke jekh, thaj e Mojsijaske jekh, thaj jekh e Ilijaske. 5Đikaj ov pana vakerela, e nuvera strefimi ućharda len, thaj dikh, krlo andar e nuvera savo vakerel: Akava si o Čhavo mlo čumidino, savo si pe mlo kamipe; les šunen. 6Thaj ašundoj e sikljovne pele mujea natele thaj but darajlje. 7Thaj alo paše o Isus astarda len thaj phenđa: Ušten thaj ma daran. 8A on, vazdindoj pe jakha, khanika ni dikhle sem e Isuse korkore. 9Thaj kana huljona e plajinatar, čhinada lenge o Isus vakerindoj: Khanikaske ma mothoven so dikhlen đikaj o Čhavo e Manušesko andar e mule ni đlvdinisavol. 10Thaj phučle les e sikljovne leskere vakerindoj: Sose, akana, e lilvarne phenen kaj o Ilija majanglal trubul te avel? 11A o Isus irisarindoj phenđa lenge: O Ilija čače ka avel majanglal thaj sa ka laćharen. 12Numaj phenav tumenge kaj o Ilija akana avilo, thaj ni penđarde les, aj čerde lesa so mangle; ađaar vi o Čhavo e Manušesko ka mudardol lendar. 13Atoska haljarde e sikljovne kaj lenge phenđa baš o Jovan Bolipesarutno.
Sastaripe e čhonutaresoro
14Thaj kana avile e selorese, alo đi o leske o manuš thaj pelo pe čanga anglal oleste vakerindoj: 15Devljutneja, maznosar e čhave mle, kaj si čhonutari thaj mučil pes xoljarne; kaj but droma perel ani jag, thaj but droma ano pani. 16Thaj andem les tire sikljovnenge thaj naštisarde te sastaren les. 17A o Isus irisarindoj phenđa: O bijanipe bipaćamno thaj rumime! Đikote ka ovav tumenca? Đikote tumen ka nakhavav? Anen le akari mange. 18Thaj daravda les o Isus; thaj o beng inklilo andar leste; thaj sastilo o ternoro katar godova časo. 19Atoska ale paše e sikljovne e Isuseske thaj korkore phenđe leske: Sose amen naštisardam ole te tradas? 20A o Isus lenge phenđa: Bašo bipaćajpe tumaro. Kaj čače tumenge phenav: Te isitumen paćape kobor e kučin morjaki, ka phenen e plajinake akalake: nakh akatar okori, thaj ka nakhel, thaj khanči tumenge ni ka ovel bišajune. 21A kava bijanipe ni tradla pes sem ruđipnasa thaj postimasa.
O Isus pale anglalmothol po meripe thaj đivdinisaripe
E Hramosko harači
22A kana phirde pe Galileja, phenđa lenge o Isus: O Čhavo e Manušesko ka ovel muklo ano vasta e manušenge; 23Thaj ka mudaren les, ta o trito dive ka uštel. Thaj but dukhardile.
24A kana avile ano Kapernaum, paše ale e Petroske godola so ćinena didrahme, thaj phenđe: Sar o sikamno tumaro ni del didrahme? 25O Petar phenđa: Del. Thaj kana dija ano kher, angleder olestar o Isus vakerda: So de godi, Simone? E thagara e phuvjakere kastar len harači ja šulkara, ple ćhavendar ja avređenendar? 26Phenđa leske o Petar: E avređenendar. Phenđa leske o Isus: Viz e čhave si mukljarde. 27Numaj kaj len te na la po bezeh, đa po derav thaj čhude e vudica, thaj savo mačho angluno astare, le les; thaj kana putres lesko muj, ka arakhe o statiro; les le thaj de lenge baše mande thaj baše tute.
Pašlaik izvēlēts:
Evangelium e Matejestar 17: SRNZ20
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Copyright © Biblijsko društvo Srbije