Génesis 48
48
Jacobpa José warrarãmaa pedee pia jarada
1Ma tꞌẽepai Josemaa jara pëijida: “Pɨ akꞌõre kꞌayaa bɨ.” Mapa José wãji chi akꞌõre akꞌɨde ichi warrarã Manasés, Efraín ome. 2José cheda jaradakꞌãri, Jacob kꞌapꞌɨa tꞌũmaa baji mĩda, su–akꞌɨ beeji ichi camade. 3Mãpai Josemaa mãgaji:
—Mɨ Canaán eujãde bakꞌãri, Tachi Akꞌõre Waibɨapa ichi mɨmaa unupijida aji, Luz pꞌuurude. 4Na pedee pia mɨmaa jaraji: “Ũripáde aji. Mɨa pɨdeepa warrarã chokꞌara uchiapiitꞌee. Pɨdeepa uchiadaitꞌeerãpa pꞌuuru chokꞌara oodaitꞌee. Na Canaán eujã teeitꞌee ãchimaa, ichita aɨde pꞌanapataadamerã.” 5Mɨa jara kꞌinia bɨ pɨchi warrarã Efraín, Manasés ome, mɨ chei naaweda tꞌodapꞌedaa nama Egipto eujãde ichiaba mëré. Mɨchi warrarãkꞌa pꞌanadaitꞌee; Rubenkꞌa mãikꞌaapa Simeonkꞌa. 6Awaraa warrarã tꞌoruta pɨrã, përé paitꞌee. Ɨ̃pemaarã perã, ichiaba jɨ̃adaitꞌee Efrainpa jɨ̃aitꞌeekꞌa mãikꞌaapa Manasés jɨ̃aitꞌeekꞌa. 7Mɨ Padán Aram eujãdeepa chekꞌãri Canaán eujãdee, Efrata pꞌuuru kꞌaitꞌa pɨ nawe Raquel jai–idaaji. Mama ɨajida Efrata o kꞌaitꞌa; ma pꞌuuru ɨ̃rá tꞌɨ̃jarapata Belén.
8Mãga nepɨrɨmaa bɨde Jacobpa José warrarã unuji mãikꞌaapa iidiji:
—¿Kꞌáirãma aji, nãgɨɨrã?
9Josepa pꞌanauji:
—Mɨ warrarãda aji, Tachi Akꞌõrepa nama Egiptode teeda.
Mãpai Jacobpa mãgaji:
—Kꞌaitꞌaara chedapáde aji. Parãmaa mɨa pedee pia jara kꞌinia bɨ Tachi Akꞌõrepa jarapi bɨkꞌa.
10Israel chonaa chaji. Maperã pia unukꞌaa paji. Mapa Josepa chi warrarã kꞌaitꞌaara wãpipꞌeda, Jacobpa ãchi kꞌĩra ɨ̃tꞌaaji mãikꞌaapa wëre ataji. 11Mãpai Josemaa mãgaji:
—Kꞌĩsiaji pɨ waa unu–e paitꞌee. Mamĩda Tachi Akꞌõrepa pɨ warrarã paara mɨmaa unupiji.
12Josepa chi warrarã Jacob makꞌaradeepa atapꞌeda, bedabaidachi tau bɨɨrɨ te jãde tꞌõbairumaa. 13Mãpai chi warrarã bɨji chi akꞌõre kꞌĩrapite. Chi naapema Manasés bɨji Israel juaraare; jõdee Efraín bɨji juabi eere. 14Mamĩda Israelpa bɨji ichi jua juaraare José warra tꞌẽepema Efraín ɨ̃rɨ; jõdee ichi juabi eere bɨji José warra naapema Manasés ɨ̃rɨ. 15Mãpai na pedee pia jaraji Tachi Akꞌõrepa jarapidakꞌa:
—Mɨ akꞌõchona Abraham, mɨ akꞌõre Isaac ijãadapꞌedaa Akꞌõre Waibɨapa mɨ tꞌoruweda pia akꞌɨ bapari. 16Mɨ ne–inaa kꞌachiadeepa uchiapipari. Mɨa kꞌinia bɨ mãgɨ́ Akꞌõre Waibɨapa na warrarã aukꞌa pia akꞌɨ bapariimerã. Ãra kꞌaurepa na eujãde mɨ tꞌɨ̃, mɨ akꞌõchona Abraham tꞌɨ̃ mãikꞌaapa mɨ akꞌõre Isaac tꞌɨ̃ kꞌirãpadaitꞌee. Kꞌinia bɨ ãradeepa warrarã chokꞌara uchiadamerã mãikꞌaapa pꞌuuru chokꞌara uchiadamerã.
17Josepa kꞌinia–e paji chi akꞌõrepa ichi jua juaraare bɨmerã ma warra tꞌẽepema poro ɨ̃rɨ. Mapa chi akꞌõre jua juaraare ataitꞌee paji mãikꞌaapa bɨitꞌee paji chi naapema poro ɨ̃rɨ 18nãga jara bɨ misa:
—Akꞌõre, mãga–eda aji. Nãgɨ́ chi naapema. Pɨ jua juaraare bɨpáde aji, nãgɨ́ poro ɨ̃rɨ.
19Mamĩda Jacobpa kꞌinia–e paji. Pꞌanauji:
—Warra, mɨa kꞌawa bɨda aji. Jãgɨdeepa pꞌuuru chokꞌara ichiaba uchiadaitꞌee. Mamĩda chi tꞌẽepema waibɨara paitꞌee iru kꞌãyaara, ichideepa pꞌuuru chokꞌaraara uchiadaitꞌee perã.
20Ma ewateweda Jacobpa na pedee pia jaraji José warrarãmaa:
—Israeldeepa uchiadaitꞌeerãpa pedee pia jaradakꞌãri, parã tꞌɨ̃ jaradaitꞌee nãgá: “Tachi Akꞌõrepa pɨmaa ooipia bɨda adaitꞌee, irua Efrainmaa mãikꞌaapa Manasemaa oodakꞌa.”
Israelpa mãga jarakꞌãri, Efraín tꞌɨ̃ naapɨara jaraji Manasés tꞌɨ̃ kꞌãyaara.
21Maapꞌeda Israelpa Josemaa mãgaji:
—Mɨ jai–idaaitꞌeeda aji. Mamĩda Tachi Akꞌõre baitꞌee parã ome mãikꞌaapa parã wãpiitꞌee tachi chonaarã eujãdee. 22Pɨmaa netꞌaa audupɨara atabëiitꞌee pɨ ɨ̃pemaarãmaa kꞌãyaara. Teeitꞌee eujã pia, ee jẽra bɨ bide bɨ Siquén kꞌaitꞌa; ma eujã mɨa amorreorã juakꞌaawa jãri atada, espadapa mãikꞌaapa ematrɨmapa chõo pꞌanɨde.
Pašlaik izvēlēts:
Génesis 48: sjaB
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
©2005, 2010, 2015 Wycliffe Bible Translators, Inc. All rights reserved.