Ñwaè' Matïìyoè 18
18
1À m ba à nfè' anà ŋgǎa yɛ'ni buu Jisòs a vʉ̂, a yɛ ye, a bipshi enɛ̂, “Ŋwɛ̀ ce e yu ŋwɛ̌ ŋgòr sê mbe dǐ' kʉʉ Nyʉ̀ yu nda?” 2E kɛ' mʉ ghàrŋwɛ̀, a tɛr mbe wǎp mʉ, 3a laa enɛ̂, “M ce làa nè mini-ŋwɛ̀ enɛ wèe à ka' tɛ kupse, ba àmbò boo bkɛ' ka', àde' wèe niŋ mbe dǐ' kʉʉ Nyʉ̀ ka'. 4Banɛ ŋwɛ̀ ce e ka' lor yì nyor njep nshè àmbò muu ŋkɛ' ca, ŋgàŋ yu ŋwɛ̌ ŋgòr se mbe dǐ' kʉʉ Nyʉ̀. 5Ŋwɛ̀ ce e ka' koni muu ghàrŋwɛ̀ àmbò ca a mɛ̌ rlii, banɛ ŋgàŋ à koni mɛ̀. 6Ŋwɛ̀ a ka' gee mò' efa boo bkɛ' ce a byemi nè mɛ̀ na a gee yuu bebep, banɛ yi be ba àndèe nè ŋgàŋ, ce a ka' lor ma lǔr ŋgò' baa, cʉʉ ye kù ndoŋ, ma' ye njep rdip rgòr, tɛ e no mdip kwe. 7Ndòo à co' ŋgòŋ njobè' buu yu njep ŋgòŋ ce vi ke gèe bèe a ce gèe buu bbebep. Buu ca vi be kù ce ba. Ka' yi yu wa'a, ndòo be co' ŋwɛ̀ ce buu ca vi be vʉ̀ njo' ye. 8Yo bo kɛ̀ yo kùu ɛ̀, yi ka' gee wɛ̀, à gee yuu bebep, à tee ma'. Yi yu àndèe enɛ à niŋ mbe dǐ' rcu ce nfesè, buu bo kɛ̀ kùu ɛ̀, nè ce enɛ a ke koo wɛ̀ mà' njep mor ce àde' yi liitì ka'. 9Lo rlir li ka' gee wɛ̀, à gee yuu bebep, à so'nì enje tù, ma'. Yi yu àndèe enɛ à ba ntò' rlir, niŋ mbe dǐ' kʉʉ Nyʉ̀ nè ce enɛ à tʉr mmir mmbaa, tɛ a ke koo wɛ̀ mà' njep bè'tè ŋgɛ' mor.
10“Yɛ nè enɛ wèe fa lòr mò' efa boo bkɛ' ca à yuu cicì ka'. M ce suŋ wèe mɛnɛ wap bcìndap ce a yu mbe bùu, a ke kǔ ba à bsii yà Ta ce e yu mbe bùu à nfè' sìp. 11[Muu Ŋwɛ̀ à m vʉ̀ à rgèe tɛ bèe ce a m bʉ, a lûŋ.]
12Wèe ce kwà'shi wee kɛ? Ŋwɛ̀ à ka' tʉr njèe rjèe, mò' da' bʉ, mbò e be mà'shi yǐ ncòp-bʉ̀'ʉ-à-mmbʉ̀'ʉ à rtùu dù ròo yì ce e dà' na a? 13M ce suŋ wèe nè mini-ŋwɛ̀ enɛ e ka' roo yɛ, banɛ e be lu'shi à njèe yǐ mò'sir ce e yɛ na, càa yǐ ncòp-bʉ̀'ʉ-à-mmbʉ̀'ʉ ce yi dà' yi ka' nà. 14Yi ku ba wa'a nè yè Ta ce e yu mbe bùu. E ce kòŋ enɛ mò' efa boo bkɛ' ca bʉ ka'.
15“Nfʉrò à ka' gee yuu bebep nè wɛ̀, à du yɛ ye, suŋ ye. Suŋ ye à nfè' ce ku ba wèe ye bèe a mmbaa. E ka' byemì enɛ e gèe yuu bebep, banɛ wɛ̀ gèe wèe ye à ker kʉti bfʉr. 16E ka' tɛ yu' ka', à lor ŋwɛ̀ mò'sir kɛ̀ bèe a mmbaa ɛ̀, tɛ yi bo ba enɛ bèe a mmbaa kɛ̀ bèe a mntaar ɛ̀, a tɛɛ njìnsa' à yuu wɛɛwɛ ce wèe ye à làa. 17E ka' tɛ kèr yu' ka', à suŋ nè côr. E ka' kani foŋ efa ryu' yuu ce cor à làa, à lor ye tɛ e ba àmbò ŋwɛ̀ ce e rìŋ Nyʉ̀ ka', kɛ̀ àmbò ŋwɛ̀ ŋkùu mbǎa bàrà' wa'a.
18“M ce suŋ wèe nè mini-ŋwɛ̀ enɛ yuu ce wèe à ka' kur njep ŋgòŋ na, banɛ a be kur yi mbe bùu. Yuu ce wèe à ka' fyɛɛshi njep ŋgòŋ na, banɛ a be fyɛ̀ɛshi yi mbe bùu. 19M ker ce suŋ wèe enɛ bèe a mmbaa efa wěe mʉ ce wèe yu njep ŋgòŋ na, a ka' ce loo, byemi à yuu ce wowèe ce loo enɛ Nyʉ̀ gee nè wowèe banɛ yà Ta ce e yu mbe bùu be gèe yuu anà. 20Yi yu wa'a njobè' fàdì' ce bèe a mmbaa kɛ̀ bèe a mntaar ɛ̀, a ka' vʉ àbee a mɛ̌ rlii, banɛ m be ba àfo wèr wowèe.”
21E ka' làa wa'a, Pità à bipshi nè ye enɛ̂, “Tatâ, nfʉrà à ka' ce gèe buu bbebep nè mɛ̀, m foosì bkǎŋ sɛ'? Àde' m foosì ye caar ba' ŋkàrà' sàamba a?” 22Jisòs à beesì enɛ̂, “M ce làa nè wɛ̀ enɛ à ku foosi ye ba ŋkàrà' sàamba cà'cà' ka'. Fòosi ye ŋkàrà' msàambâ, bdì' sàambâ. 23M ce làa wa'a njobè' kʉʉ Nyʉ̀ yi yu àmbò ŋkʉʉ ce e m ce kòŋ à rfyɛ' ŋwǎ' mŋkaa ŋgǎa mfà'. 24E ka' kɛ̀' ce fyɛ', a vʉ nè ŋwɛ̀ rfà' mò' ce e m tʉr rkaa a ye à mmalàr àŋgoo. 25E ka' tʉr yuu ce e la' rkaa anà àgho ka', yì masà à laa enɛ a koo ye ba ŋgwa yì ba boo vi, ker lor yì buu wɛɛwɛ, fyeni la' li rkaa àgho. 26Ŋwɛ̀ rfà' anà à gwe njep yě tìi, a bu' mmbo nè ye, a laa enɛ̂, ‘Fa mɛ̀ mʉ nfè' mò' tɛ m roo mbàa, là' rkaa anà wɛɛwɛ.’ 27Yì masà à koosìmnse nè ye, a laa enɛ e dû, e mà'shi mbàa anà nè ye. 28Ŋwɛ̀ rfà' anà à ka' fʉʉ embe ndàp, a tarte a ŋwɛ̀ rfà' mò' ce a ye a m ba nè rkaa foŋ à bàa mbàa, a koo ye, a kaa à ndoŋ, a laa enɛ̂, ‘Là' ya mbàa.’ 29Ŋwɛ̀ rfà' mò' anà à gwe njep yě tìi, a bu' mmbo nè ye, a laa enɛ̂, ‘Fa mɛ̀ mʉ nfè' mò' tɛ m roo mbàa, là' wɛ̀ àgho.’ 30E kanì, a fa ye ba à shaŋ enɛ e kèe là' yi mbàa wɛɛ ka' fʉʉ embo. 31Ŋgǎa mfà' mo' a ka' yɛ yuu ce yi m koni na, yi bep wowèe sê, wowèe a dû, a suŋ yàp masà buu wɛɛwɛ ce vi m koni anà. 32Yàp masà à kɛ' ŋwɛ̀ rfà' anà a laa nè ye enɛ̂, ‘Ŋwɛ̀ bsàrbuu câ, wɛ̀ ba bu' mmbo nè mɛ̀, mɛ̀ laa mɛnɛ mɛ̀ mà'shi ku' mbàa anà nè wɛ̀. 33Àde' wɛ̀ ke' ba koosimnse foŋ nè ŋwɛ̀ rfà' mò' ca àmbò mɛ̀ ba koosi nè wɛ̀ nà ka' a?’ 34Ntee yi yaŋ yì masà, e fa ye mbe mmbo ŋgǎa ŋkè'ni ŋgǎa shaŋ enɛ a fa ye ŋgɛ' caar tɛ e la' yi mbàa wɛɛwɛ. 35A mbò yà Ta embe bùu be gèe nè ŋwɛ̀ wɛɛwɛ efa wěe mʉ wa'a, ce wèe a ka' tɛ ce fòosi bfʉr wee enje ntee ka'.”
Pašlaik izvēlēts:
Ñwaè' Matïìyoè 18: LNT
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Limbum New Testament © Bible Society of Cameroon, 2003.