Ñwaè' Matïìyoè 17
17
1Mnòŋ vi ka' càa ntuunfu, Jisòs à lor Pità ba Jɛ̂ms, ba Jǒn ce e m ba nfʉr Jɛ̂ms, a wowèe a ko' mbe rtǔu rsàsap, à ku ba wowèe mbo cà'cà'. 2A m bà' mbo, Jisòs à kupsè a ba à njɛ̌ɛ jɛɛ, vi bsii vi raa àmbò nyʉ̀, vi bcɛ̀' vi ce là'ŋger. 3Ka' cu, Àlajà ba Musìs a nyɛɛ, a ce de' a Jisòs. 4Pità à laa nè Jisòs enɛ̂, “Tatâ, yi bòŋ àmbò sèe yu àfa na. Mà'shi tɛ m ba'ri btàp vi btaar, tɛ mo' ba yo, tɛ mo' ba yǐ Musìs, tɛ mo' ba yǐ Àlajà.” 5E ka' kù bii ce làa, mmbà' ce rraa li m ce fʉʉ enjo vi vʉ a cete wowèe, njèndoŋ à laa embe mʉ̀ mmbà' anà enɛ̂, “Cena yu muu wà, ce mɛ̀ kòŋ sê, a ce yu' rbòŋ nè ye. Ce yu' nè yuu ce e ce làa.” 6Ŋgǎa yɛ'ni yì buu a ka' yu', a wɛp sê, a gweŋger nè bsii njep nshè. 7Jisòs à vʉ̂, a joo wowèe, a laa enɛ̂, “Nàti nè mbekì, wèe fa wɛp ka'.” 8Wowèe a ka' nàa map mmir, a ker yɛ ŋwɛ̀ mò' caa efa Jisòs ka'.
9Wowèe a ka' ce sùu embe rtùu, Jisòs à laa nè wowèe enɛ̂, “Wèe fa suŋ ŋwɛ̀ mò' yuu ce wèe à yɛ ka' caar tɛ Muu Ŋwɛ̀ ke fʉʉ efa rkwe.” 10Ŋgǎa yɛ'ni yì buu a bipshì nè ye enɛ̂, “Banɛ ŋgǎa ryɛ'ni mncir a ce làa enɛ Àlajà be vʉ̀ entòmbì njokɛ?” 11E beesì a laa enɛ̂, “Rtarnì li yu njo ka', Àlajà be vʉ̀. E be vʉ̀ gèe tɛ buu wɛɛwɛ kʉti àmbò vi m ba. 12M ce suŋ wèe enɛ Àlajà à vʉ̀ wɛɛ, bèe a rìŋ ye ka', a ku ce gèe buu ce a m ce kòŋ à rgèe nè ye. Yi yu enɛ Muu Ŋwɛ̀ ye ye be yɛ ŋgɛ' mbe wǎp mmbò.” 13E ka' làa wa'a, ŋgǎa yɛ'ni yì buu a riŋ sè'ni enɛ e ba ce làa nè wowèe enɛ Àlajà à vʉ̀ wɛɛ wa'a, a ce làa ba àmbò Jǒn ŋwɛ̀ bàptir bèe.
14Wowèe a ka' kʉti, yɛ bèe cà, ŋwɛ̀ mò' a vʉ̂, a gʉ'shi njeptii Jisòs, 15a laa nè ye enɛ̂, “Tatâ, koosimnse nè muu wà, njobè' e ce gwè kà', a ce yɛ ŋgɛ' sê. E ke lò ku gwe njep mor, ba njep mdip. 16Mɛ̀ ka' vʉ̀ nè ye, fa nè ŋgǎa yɛ'ni yò buu, wowèe a moo à rgèe tɛ e ke'se làr.” 17Jisòs à beesì a laa enɛ̂, “Haba! Wěe bèe elùuni ce wèe buu rbyemì, a beesi mini tʉtʉ̀ŋ na. M be cu wèe sèe dù bà' fɛ? M be kur ntee nè wèe dù bà' fɛ? Vʉ̀ nè muu anà fa nè mɛ̀ mbena.” 18Jisòs à lapnì yʉ' nyʉ̀rkà' anà, yi fʉʉ enjep muu anà, e ku ke'sè à nfè' anà.
19Ŋgǎa yɛ'ni buu Jisòs a vʉ̂, à ku ba Jisòs a wowèe, a bipshi nè ye enɛ̂, “Wèr à ba moo à rfʉr yʉ' anà làr njokɛ?” 20E beesì enɛ̂, “Wèe à ba moo làr njobè' le rbyemì li yu mʉcàr àmbò ŋgʉ̀ mostà. M ce suŋ wèe nè mini-ŋwɛ̀ enɛ le rbyemì li ka' ba mʉcàr se àmbò ŋgʉ̀ mostà, àde' wèe ku laa nè rtùu ca enɛ̂, co'ti embe na, du mbena, tɛ li ku co'ti, tɛ yuu mo' yi ker ba tatap nè wèe ka'. 21À ka' ba yi àmbò njɛ̀ɛ yʉ' ca, àde' a fʉr yi enjep ŋwɛ̀ ka', ce a ka' tɛ gèe rloo, jì mdip ka'.”
22Ŋgǎa yɛ'ni buu Jisòs a ka' vʉ̀ àbee à ŋgǒŋ Galèlê, Jisòs à laa nè wowèe enɛ̂, “A be lòr Muu Ŋwɛ̀ fa mbà mmbo bèe, 23tɛ a yʉ ye, mnòŋ vi ba btaar, tɛ e fʉʉ efa rkwe.” E ka' làa wa'a, yi bep wowèe sê.
24Wowèe a ka' dù bà' à rla' Kàpanùm, ŋgǎa ŋkùu mbàa embe Ndàp Nyʉ̀, a vʉ̂, a yɛ Pità, a bipshi nè ye enɛ̂, “Yò ŋwɛ̀ ryɛ'nì e ke là' mbàa embe Ndàp Nyʉ̀ a?” 25Pità à beesì enɛ̂, “Ɛ̀no”. A ka' niŋ mbe ndàp, Jisòs à kɛ' a laa yuu nè ye entombì. E m làa enɛ̂, “À ce kwà'shi yo wɛnɛ kɛ Saimʉ̀n? Bèe ce a ke là' mbàa nè bkʉʉ enjep ŋgòŋ na e ke ba wěe kɛ? E ke là' ŋgǎa to' kɛ̀ bkìlò?” 26Pità à beesì enɛ̂, “E ke là' bkìlò.” Jisòs à laa nè ye enɛ̂, “Banɛ àde' ŋgǎa to' a la' ka'. 27Ka' yi yu wa'a, sèe ce kòŋ enɛ nyor bep bèe ca nè sèe ka'. Dù mbà rò, ma' yò huk njep rò, nca ce wɛ̀ ka' koo entombì, à mʉ' cùu efa gho. Wɛ̌ mʉ̀', tɛ à yɛ mbàa kǒo. Wɛ̌ yɛ, à fʉr, la' mbàa ya ba yo àgho.”
Pašlaik izvēlēts:
Ñwaè' Matïìyoè 17: LNT
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Limbum New Testament © Bible Society of Cameroon, 2003.