Tsutɨarika 3
3
Tewi kemɨtiu'irɨwiyarie
1Kuu, kwinimieme katinimaiwekaitɨni keyuri hipatɨ yeutari Yawé Kakaɨyari muwarutawewiekai, hikɨ 'uka mɨpaɨ pɨtiuta'iwawiyaxɨ:
―¿Kakaɨyari mɨpaɨ pɨkahainekai xɨari kename xeka'ikwaka naime 'ikwaxi harawerita mieme?
2'Uka mɨpaɨ katinita'eiya:
—Tepɨyɨwawe naime 'ikwaxi temɨtikwanikɨ. 3Mɨkɨ xeikɨa 'iteɨri 'ikwaxiyari haraweri hixɨapa muwe, tepɨkayɨwawe temitikwanikɨ Kakaɨyari pɨtarahɨawekai kename teka'ikwakakekai 'ikwaxi mɨkɨ 'iteɨritsiemieme, xɨka te'itikwani tepɨkwini.
4Kuu 'uka mɨpaɨ kaniutahɨawe:
—Tixaɨ xepɨkakwini. 5Kakaɨyari katinimaika kepauka xemitikwani mɨkɨ 'ikwaxi, kwinimieme xetemaiwawetɨ xepakɨne, xepɨtemaika tita 'aixɨa mɨti'ane, tita 'axamɨti'ane, Kakaɨyari hepaɨ xepɨ'aneneni.
6Hikɨ 'uka mɨkɨ 'ikwaxi witsi'anekame kaniuxeiya kanitihiwe'erieni mitakwanikɨ, timaiwetɨ mayanikɨ. Hikɨ kaneka'inɨni kanitakwani. Kwitɨta yɨkɨna kaniumini mɨkɨta kanitakwani. 7'Ana kwitɨ mekananutaneniere yuhutatɨ 'arike mɨpaɨ mepɨtehetima mepɨmamawekai, hikɨ piní xawarikɨ petsera mekaniyutiwewirieni memuyutetewiyakaikɨ.
8'Uki yɨ'ɨya hamatɨa mekani'enieni Yawé Kakaɨyari harawerita 'uyeikame taikai 'ekatsie, hikɨ mekaniyuti'awieta memɨmamawekaikɨ 'iteɨritsata harawerita. 9Peru Yawé Kakaɨyari 'uki kaniutahɨawe mɨpaɨ 'utaitɨ:
—¿Hakewa pepeyeika?
10'Uki mɨpaɨ kaniutayɨni:
—Nepɨmatsi'u'eni 'uwa pe'uyeikame nepɨmatsi'utimaka nemɨmawekaikɨ, 'ayumieme nepɨyuti'awietaxɨ.
11Hikɨ Kakaɨyari mɨpaɨ kaniutayɨni:
—¿Kemɨ'ane mɨpaɨ matiutahɨawixɨ kename pemawekai? Mɨkɨ 'ikwaxi nemɨxemaiwe'erikatsitɨakai xekate'utikwai.
12'Uki mɨpaɨ kaniutayɨni:
—Mɨkɨ 'uka pemɨnetsi'uwitɨtɨa, pɨnetsi'umi nepitakwai.
13Hikɨ Yawé Kakaɨyari 'uka mɨpaɨ katiniuta'iwawiya:
—'Uka 'aku kepetiuyuri.
'Uka mɨpaɨ kaniutayɨni:
—Kuu pɨnetiu'irɨwiyaxɨ 'ayumieme 'ikwaxi neputakwai.
14Yawé Kakaɨyari 'ayumieme kuu mɨpaɨ katiniutahɨawe:
«Kuu 'aku 'axapepɨtiuyuri,
Yeuta kiekatari watsata pe'uyeikatɨ,
'axapekani'itɨariekamɨkɨ.
'Ayumieme 'ahukama pepukuyeikani,
tumuanari pekwatɨ yuheyemekɨ.
15'Ekɨ kuu 'ukamatɨa xepayuye'unieka,
meta 'aniwema 'uka niwemama wahamatɨa,
'uka nu'aya xewitɨ pumatikwinitɨani 'amu'utsie,
'ekɨta pepɨtikwinitɨani keputsayatsie».
16Meta 'uka mɨpaɨ katiniutahɨawe:
«Kukuiniya nepɨtimɨiriya kepauka pemɨtiniweyanitsie,
matsi 'akɨna pepinaki'erieka,
mɨkɨ mati'aitɨwame payani».
17'Uki meta mɨpaɨ katiniutahɨawe:
«'Uki 'aku 'Arani,
'ekɨtsɨ pepenu'eni 'a'ɨya, pepitakwai 'ikwaxi,
mɨkɨ kɨyetsie mieme tsepa mɨpaɨ nematiutahɨawixɨ pemɨka'ikwakakɨ.
'Ayumieme kwie 'axakani'itɨariekamɨkɨ mɨpaɨ pemɨtiuyurikɨ,
haweri mieme peti'uximayatɨ xeikɨa pepɨtikwaka kwiepa mieme, mexi 'ape'uyeikani.
18Kwie kanitinetɨamɨkɨ xuya 'ahetsiemieme,
yeuta mɨtiutixuxuawereni 'a'ikwai payeikani.
19Tukarikɨ peti'uximayatɨ pekwaxiyatɨ 'a'ikwaite pekatinexeiyakamɨkɨ,
mexi kwiepa pekanuaweni,
hakewa pemetawewiya.
Tumuanari pekanihɨkɨtɨni,
hutarieka pekaninuamɨkɨ tumuanari pemayanikɨ».
20'Uki yu'ɨya 'Ewa pɨtiuterɨwaxɨ, mɨkɨ yunaime nuiwarite wamaama mayanikekaikɨ.#3:20 Hepɨrayukɨ 'Ewa, Tukari panuyɨne.
21Yawé Kakaɨyari puwarutiwewiri nawi kamixayari 'Arani meta 'ɨyaya, mɨkɨkɨ puwarutikemaritɨa.
22Hikɨ Yawé mɨpaɨ kaniutayɨni: «Hikɨri 'uki meta 'uka tahepaɨ mekani'aneneni, metemaitɨ tita 'aixɨa mɨti'ane tita 'axamɨti'ane, xɨka me'itikwani 'ikwaxi tukari mɨtiyupitɨwa, mepɨyɨwaweni yuheyemekɨ me'ayeyuyuritɨ memuyuhayewanikɨ».
23'Ayumieme Yawé Kakaɨyari kaniwaranuyeweiya teɨteri 'Ereni haraweriyarita, kaniwarupitɨani memɨte'uximayakakɨ kwiepa, 'Arani kwiekɨ mutawewiyakɨ. 24Waranuyeweiyaka, haraweri 'Ereni tau manatineika hepatsie Kakaɨyari teɨtametemama memayeneniere meta xeime 'ixipara takame naitsarie 'uyuaneme, huye mɨ'ɨwiyanikɨ kɨye tukari tiyupitɨwame hetsɨa meutayune.
Šiuo metu pasirinkta:
Tsutɨarika 3: hch
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2020, Wycliffe Bible Translators, Inc.