Luka 21
21
Nau bu ur ndrô nhhơr
(Markôs 12:41-44)
1Brah Yêsu n'gơr măt uănh, saơ phung ndrŏng dơm prăk khân păng nhhơr tâm thŭng prăk nhhơr. 2Păng saơ lĕ du huê bu ur ndrô o ach nklăch tâm thŭng nây bar rêl prăk. 3Păng lah: “Nanê̆, Gâp lah ma khân may, bu ur ndrô o ach nây nhhơr âk lơn ma phung êng. 4Yorlah lĕ rngôch phung sŏk drăp ndơ khân păng geh rmeh gay nhhơr, bi bu ur ndrô nây o ach hâu ngăn, ƀiălah nhhơr jêh lĕ rngôch drăp ndơ păng geh gay siăm nau rêh păng nơm.”
Brah Yêsu mbơh lor ma nau ƀư rai ƀon Yêrusalem jêh ri nar Brah Yêsu plơ̆ văch
(Mathiơ 24:1-51; Markôs 13:1-37)
5Geh ƀaƀă bunuyh ngơi ma ngih brah dơi ƀư ueh ma lŭ ueh jêh ri ndơ nhhơr, Brah Yêsu lah: 6“Nar mra tât lĕ ndơ khân may saơ ta ao mra rlâm rai lĕ ƀhiau, mâu hôm du glo lŭ aơ gŭ ta klơ glo lŭ êng ôh.” 7Khân păng ôp Brah Yêsu: “Hơi Nơm Nti, ndah jŏ lĕ nau nây mra tât, jêh ri moh nau ăn ma hên gĭt lĕ kan nây bơi tât?” 8Păng plơ̆ lah: “Njrăng hom, lơi ăn bu ndơm khân may ôh, yorlah âk bunuyh mra nchơt nklă ma amoh Gâp văch jêh ri ngơi pô aơ: ‘Gâp yơh jêng nơm nây jêh ri tâm rnôk văch dăch!’ Khân may lơi tĭng khân păng ôh. 9Tơlah khân may tăng lah ma nau tâm lơh, nau uh ah, lơi klach krit ôh; yorlah lĕ nau nây mra tât geh, ƀiălah ê hŏ tât nar kêng lôch ro ôh.”
10Jêh ri Păng lah thoi: “Phung ƀon lan aơ mra tâm rdâng đah phung ƀon lan aơ êng, bri dak tê̆ mra tâm lơh đah bri dak ri; 11mra geh lĕ nau n'găr neh toyh, nau sât ji ngot ndrel ma nau ji tưp ta âk ntŭk; mra geh lĕ nau dŭt krit kir jêh ri nau tâm mbên toyh ta klơ trôk. 12Ƀiălah lor ma lĕ nau nây tât geh, yorlah amoh Gâp bu mra yơr ti ƀư mhĭk, jao njŭn khân may ma ngih rƀŭn jêh ri ma ngih ndrung; bu mra njŭn khân may hăn tât tanăp măt phung hađăch jêh ri phung kôranh toyh. 13Aơ jêng mông ueh gay ma khân may mbơh nkoch. 14Ăn khân may kah gĭt pô aơ: Lơi ta khân may mĭn lor ôh ma nau khân may n'gang khân may nơm.#Luk 12:11-12. 15Yorlah Gâp mra ăn ma khân may nau ngơi jêh ri nau blau mĭn, ƀiălah mâu geh phung rlăng dơi tâm rdâng jêh ri tâm rlăch đah khân may ôh. 16Mbơ̆ mê̆, oh nâu, phung băl jêh ri phung mĭt jiăng khân may nơm lĕ, mra jao khân may, jêh ri mra nkhĭt âk tâm phung khân may. 17Lĕ rngôch bunuyh mra tâm rmot ma khân may yor amoh Gâp. 18Ƀiălah mâu geh du brai sŏk ta bôk khân may mra roh. 19Ma nau srôih yơh khân may mra tâm rklaih huêng khân may.
20Ƀiălah tơlah khân may saơ phung tahan gŭ jŭm ƀon Yêrusalem, ăn khân may gĭt nau ƀư rai păng dăch jêh. 21Rnôk nây ăn phung gŭ tâm n'gor Yuđa du ta yôk. Ăn phung gŭ ta nklang ƀon Yêrusalem, mra luh, jêh ri lơi ăn phung gŭ tâm mir lăp tâm ƀon ôh. 22Yorlah rnôk nây jêng nar nau tâm plơng nglay săk, gay ma nanê̆ lĕ nau nchih jêh.#Ôsê 9:7. 23Tâm lĕ nar nây, rêh ni ngăn yơh ma bu ur bă ntreo nđâp ma bu ur hôm ăn kon pu toh! Yorlah mra geh nau rêh ni toyh ngăn tâm n'gor nây, jêh ri nau ji nuih ma phung ƀon lan nây. 24Bu mra nkhĭt khân păng ma đao bu njŭn khân păng jêng bu nă tâm lĕ rngôch mpôl băl, jêh ri phung bu năch mra jot ƀon Yêrusalem tâm dâng jâng khân păng, tât rnôk phung bu năch mra ƀư lĕ. 25Mra geh nau mbên tâm nar, tâm khay, jêh ri tâm phung mănh, tâm neh ntu mra geh nau uh ah tâm phung mpôl băl bunuyh. Khân păng mâu gĭt, mâm ƀư tăng nteh dak mƀŭt jêh ri dak sial njach.#Êsai 13:10; Êsê 32:7; Yôel 2:31; Mpơl 6:12-13. 26Âk bunuyh mra khĭt yor nau klach dôl gŭ kâp nau mra tât ma neh ntu, yorlah nau brah klơ trôk mra n'gơ n'găr. 27Nôk nây lĕ rngôch bunuyh mra saơ Kon Bunuyh văch tâm ndâr tŭk ma nau dơi toyh jêh ri ma nau chrêk rmah toyh ngăn.#Dan 7:13; Mpơl 1:7. 28Tơlah nau nây ntơm tât geh, dâk sŏng hom, n'gơr hom, yorlah nau tâm rklaih khân may dôl văch dăch.”
29Brah Yêsu nkoch bri du nau hôr ma khân păng: “Uănh hom ma tơm rvi jêh ri lĕ rngôch tơm si êng. 30Tơlah păng ntơm chăt nkŭr, khân may saơ jêh ri gĭt ma yan vai bơi tât jêh. 31Tâm ban lĕ, tơlah khân may saơ lĕ nau nây tât, khân may gĭt ma ƀon bri hađăch Brah Ndu dăch tât jêh. 32Nanê̆, Gâp lah ma khân may, bunuyh rnôk aƀaơ aơ mâu mra rlau lôch kŏ tât lĕ nau nây tât. 33Trôk neh mra rlau lôch, ƀiălah nau Gâp ngơi mâu mra rlau lôch ôh.
34Pôri, njrăng hom! Klach lah yorlah nau sông sa rlau keh ir, nhŭl ndrănh jêh ri nau rvê nau rêh aơ ƀư ma nuih n'hâm khân may pâl maak, jêh ri Nar nây tât ƀât lât tâm ban ma dăk rlâm klơ khân may, 35tâm ban ma lĕ rngôch bunuyh gŭ lam klơ neh ntu. 36Pôri, rngeh njrăng jêh ri mbơh sơm ƀaƀơ hom, gay khân may tŏng n'hâm suan der luh bơh lĕ nau mra tât geh jêh ri dâk tanăp Kon Bunuyh.”
37Nôk nar, Brah Yêsu ntĭm nti tâm ngih brah, tât măng Păng hăn luh jêh ri bê̆ch ta klơ yôk Ôlive.#Luk 19:47. 38Ơm ôi, phung ƀon lan văch ta Păng tâm ngih brah gay iăt nau Păng nti lah.
Šiuo metu pasirinkta:
Luka 21: CMO2023
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2023 United Bible Societies. All rights reserved.