Luka 20
20
Nau ôp sek ma Brah Yêsu geh nau dơi
(Mathiơ 21:23-27; Markôs 11:27-33)
1Du nar, dôl Brah Yêsu ntĭm nti ma phung ƀon lan tâm ngih brah jêh ri mbơh nkoch Nau Mhe Mhan Ueh, phung kôranh ƀư brah toyh, phung kôranh nchih samƀŭt jêh ri phung bu ranh văch 2ôp ma Păng pô aơ: “Lah hom ma hên gĭt tă bơh moh nau dơi ăn ma May ƀư nau nây, mâu lah mbu nơm ăn ma May nau dơi nây?” 3Păng plơ̆ lah: “Gâp ôp đŏng khân may du trong. Lah hom ma Gâp: 4Ƀaptem Y-Yôhan ƀư luh tă bơh trôk mâu lah tă bơh kon bunuyh?” 5Khân păng tâm nchră ndrăng khân păng nơm: “Tơlah he lah: ‘Tă bơh trôk,’ păng mra lah: ‘Mâm ƀư khân may mâu chroh ma Y-Yôhan?’ 6Bi tơlah he lah: ‘Tă bơh kon bunuyh,’ lĕ rngôch bunuyh ƀon lan mra klŭp lŭ ma he, yorlah khân păng chroh n'hêl nanê̆ ma Y-Yôhan jêng du huê nơm mbơh lor.” 7Yor ri, khân păng plơ̆ lah pô aơ khân păng mâu gĭt ôh mbah tă ƀaptem nây luh. 8Brah Yêsu plơ̆ lah: “Gâp mâu mra lah ma khân may gĭt ôh moh tă nau dơi Gâp ƀư nau aơ.”
Nau hôr ma bunuyh nkhôm đang krăk ƀâu
(Mathiơ 21:33-46; Markôs 12:1-12)
9Brah Yêsu ntơm nkoch bri nau hôr aơ ma phung ƀon lan: “Du huê bunuyh tăm đang krăk ƀâu jêh ri phung tăm krăk ƀâu nkhôm, jêh nây păng hăn tât ta bri êng gŭ jŏ jêh.#Êsai 5:1. 10Tât yan pĕ play, kôranh njuăl du huê oh mon tâm mâp phung tăm krăk ƀâu gay sŏk du kô̆ kao play tă bơh đang krăk ƀâu. Ƀiălah phung tăm krăk ƀâu dong păng, jêh nây mprơh sĭt păng ti dơm. 11Kôranh njuăl tay du huê oh mon êng, ƀiălah khân păng dong đŏng, suai rak jêh ri nsot plơ̆ sĭt ti hŏng. 12Kôranh njuăl đŏng du huê tal pe, ƀiălah khân păng dong đŏng ƀư tât sôt rmanh ma păng jêh ri mprơh lơi. 13Nôk nây, kôranh đang krăk ƀâu lah: ‘Mâm gâp mra ƀư? Gâp mra njuăl kon gâp nơm rŏng ngăn ngên văch, klăp lah khân păng mra yơk chrê!’ 14Ƀiălah tơlah saơ kon bu klâu, phung tăm krăk ƀâu tâm nchră ndrăng khân păng nơm: ‘Aơ jêng nơm ndơn drăp, nkhĭt lơi hom păng, pôri drăp ndơ păng mra jêng ndơ ma he.’ 15Khân păng klŭp kon bu klâu nây luh padih đang krăk ƀâu jêh ri nkhĭt lơi păng. Aƀaơ mâm kôranh đang krăk ƀâu mra phat? 16Păng mra văch jêh ri ƀư rai phung tăm krăk ƀâu nây, jêh nây jao đang krăk ƀâu ma phung êng.” Tơlah tăng lĕ nau nây, khân păng lah: “Mâu geh nau nây ôh!” 17Ƀiălah Brah Yêsu uănh ma khân păng jêh ri lah: “Pônây nâm bu ntĭt nau bu nchih aơ:
‘Lŭ phung ƀư ngih mƀăr lơi jêh,
Hŏ jêng lŭ njônh ngih.’#Mprơ Ơm 118:22.
18Mbu nơm prah jŭr di tâm lŭ nây mra nchah rai, ƀiălah lŭ aơ tŭp di mbu nơm mra rchiăt hăch bunuyh nây.” 19Tâm mông nây, phung kôranh ƀư brah toyh jêh ri phung kôranh nchih samƀŭt joi nau gay nhŭp Păng, yorlah gĭt Brah Yêsu ngơi nau hôr nây ŭch ntĭm ma khân păng yơh, ƀiălah khân păng klach phung ƀon lan.
Brah Yêsu jêh ri Sêsar
(Mathiơ 22:15-22; Markôs 12:13-17)
20Pôri, khân păng uănh nđôi Brah Yêsu jêh ri njuăl phung uănh n'hut n'hi săk ƀư bunuyh sŏng, ŭch ngơi ƀrôk Păng tâm nau Păng ngơi, gay jao Păng ma phung kôranh chiă uănh jêh ri ma kôranh toyh chiă uănh. 21Phung bunuyh nây ôp ma Brah Yêsu: “Hơi Nơm Nti, hên gĭt May ngơi jêh ri nti di ngăn, mâu gŭ ding mpeh ma mbu, ƀiălah nti trong Brah Ndu ma nau di. 22Pôri, nau he chê̆ pi ma Sêsar di nau vay mâu lah mâu?” 23Gĭt rah vah nau blau plĕch khân păng, Păng đă: 24“Ăn hom ma Gâp uănh du rêl đơniê. Ta klơ prăk aơ mbu moh rup jêh ri nau mbên?” Khân păng plơ̆ lah: “Sêsar.” 25Păng lah: “Pôri, mplơ̆ lơi hom ma Sêsar lĕ ndơ jêng ndơ Sêsar, mplơ̆ lơi hom ma Brah Ndu lĕ ndơ jêng ndơ Brah Ndu.” 26Tanăp phung ƀon lan, khân păng mâu dơi nduyh Brah Yêsu du nau ôh. Khân păng hih rhâl ma nau Brah Yêsu plơ̆ lah rĭ dĭng khân păng gŭ rklăk.
Nau ôp ma nau dâk rêh tay
(Mathiơ 22:23-33; Markôs 12:18-27)
27Geh ƀaƀă phung Sađusê,#20:27 Uănh rblang ta Mat 3:7. jêng phung bunuyh lah pô aơ mâu geh nau dâk rêh tay, văch ta Brah Yêsu jêh ri ôp:#Kan 23:8. 28“Hơi Nơm Nti, Y-Môis nchih jêh nau vay nây ma hên: ‘Tơlah du huê bunuyh geh nâu khĭt lăn geh ur ƀiălah mâu geh kon, ri mơ bunuyh nây mra sŏk ur ndrô nây gay geh kon ntrok noi deh ma nâu păng.’#Nkah 25:5. 29Pôri, geh pơh nuyh oh nâu ri, nâu dak bôk sŏk ur jêh nây khĭt, mâu geh kon ôh. 30Bunuyh rơh bar 31jêh nây rơh pe sŏk đŏng ur nây, lĕ pơh bunuyh ăt nâm nây, khĭt da dê, mâu geh kon ôh. 32Nglĕ dŭt, bu ur nây khĭt tâm ban lĕ. 33Kơt nây, ta nar dâk rêh tay, mbu nơm bu ur nây mra jêng ur? Yorlah lĕ pơh bunuyh sŏk păng ƀư ur da dê jêh.” 34Brah Yêsu plơ̆ lah: “Phung kon rnôk aơ sŏk ur sŏk sai, 35ƀiălah phung dơi kơp jêng khư dơn kô̆ tâm rnôk kăndơ̆ jêh ri dơi dâk rêh tay tă bơh nau khĭt, mâu mra hôm sŏk ur sŏk sai ôh. 36Khân păng mâu hôm dơi khĭt ôh, yorlah tâm ban ma phung tông mpăr jêh ri jêng kon Brah Ndu, jêng kon nau dâk rêh tay. 37Bi ma nau phung khĭt dâk rêh tay, nđâp Y-Môis hŏ mpơl jêh tâm nau nkoch bri ma pŭm lok, tơlah Kôranh Brah jêng Brah Ndu Y-Abraham, Brah Ndu Y-Isăk jêh ri Brah Ndu Y-Yakôp.#Ngluh 3:6. 38Pôri, Păng mâu di jêng Brah Ndu ma phung khĭt ôh, ƀiălah ma phung rêh; yorlah ma Păng, lĕ rngôch gŭ rêh da dê.” 39Geh ƀaƀă kôranh nchih samƀŭt ngơi ma Păng: “Hơi Nơm Nti May ngơi di ngăn.” 40Jêh ri khân păng mâu nănh ôp du ntil nau đŏng ôh.
Brah Krist jêng kon hađăch Đavit
(Mathiơ 22:41-46; Markôs 12:35-37)
41Brah Yêsu lah ma khân păng: “Mâm ƀư bu dơi lah ma Brah Krist jêng kon hađăch Đavit? 42Yorlah hađăch Đavit nơm lah jêh tâm ndrom samƀŭt Nau Mprơ Ơm:
‘Kôranh Brah lah ma kôranh Brah gâp: Gŭ hom mpeh pa ma Gâp,
43Tât nôk Gâp dơm phung rlăng may ƀư rnơl chrong jâng ma may.’#Mprơ Ơm 110:1.
44Kơt nĕ, hađăch Đavit kuăl Păng jêng Kôranh Brah, mâm ƀư Brah Yêsu dơi jêng kon hađăch nây?”
Nau njrăng ma phung kôranh nchih samƀŭt
(Mathiơ 23:1-36; Markôs 12:38-40)
45Dôl phung ƀon lan gŭ iăt, Păng lah ma phung oh mon: 46“Njrăng hom ma phung kôranh nchih samƀŭt jêng phung bunuyh ŭch nsoh ao jong hăn nsong pâl, ŭch bu mbah ta ntŭk tăch drăp, ŭch gŭ rnơl khlay rlau lơn tâm lĕ ngih rƀŭn jêh ri ntŭk bu yơk tâm lĕ nau sông sa. 47Khân păng jan rŏ nau mbơh sơm jŏ ƀiălah rvăn ngih phung bu ur ndrô. Khân păng mra dơn nau phat dôih jâk lơn.”
Šiuo metu pasirinkta:
Luka 20: CMO2023
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2023 United Bible Societies. All rights reserved.