Markos 14
14
Yeesus gidfohi xagara
(Maatiyos 26:1-5; Luukas 22:1-2; Yohannis 11:45-53)
1Kado Faasiga kee akko yarhxin Cadublat Xabazahi cid yakko lamma lellec akko raaceh yane. Sheekhat manabottit kee sercat dhiiceenit lel siixoh kaa yibbirhiinih kaa yagdafoona wagiyak yinin. 2“Xiyaw gabooko andhax kee dhaw yakkek, cidti geddadde yakko alle mitane” lel yerhxin.
Yeesus Beetcaniyalle yamsukkute
(Maatiyos 26:6-13; Yohannis 12:1-18)
3Kado, Yeesus Beetcaniyalle sakna-le Simcoon caredde maaddille defeyak, wuli numa mangum qaali kin qarce-le “nardos” akko yarhxin xarhaako siraaxime cithir-le zeet, alabaastiros akko yarhxin dhayittooko siraaximte tharmuuzudde bahteh alle temeeteyaako, amaa tharmuuz tigdileh, kaa amolle xadhdhe. 4Gari lel kurrayenyaako sinnek: “Aymih kinni ta zeet taginah ambizziruk yanem? 5Amayim lel tayim adooxa bool dinaariyaako ziyaadah yimibbixeh baaxentitih yamxawo dhiice dhaarhemhi sabbatah” yerhxin. Teya lel tee yoskoolofin. 6Yeesus laakin: “Tee xaba. Aymih tee tayribbishiini? Yottah mecem kinni yoh abtem. 7Amayim lel, baaxentit umman gedda sinneelih litin, farhinnan gedda, mecem akah abtoona dhictaanamhi sabbatah kinni. Yotta laakin umman gedda taalloona makitiini. 8Ishi dhictem abteh tane, yi nabse lel macagaako basolle tuskuteh tane. 9Ta Mece Ware umbuka caalamko alle warroyinnanille, ta numa abteh tanem, tee mazakkartah xussuumo kinam, rummah sinak arhxiyuk ane” akko yerhxe.
Yahuuda Yeesus yasxaw abaysha
(Maatiyos 26:14-16; Luukas 22:3-6)
10Sarrah amaa lamman kee tamanko kin, Iskariyoot Yahuuda, tenalle yasxaw ciloh sheekhat manabottitille yedeye. 11Amayim yoobbin gedda lel, xedenenyaako fiddat solaadi akah yaxawna wacde akah sayen. Usuk lel akah kaa yasxaye caashir wagiyak yine.
Faasiga katattaynitlih
(Maatiyos 26:17-25; Luukas 22:7-14,21-23; Yohannis 13:21-30)
12Faasigi leema adde yarxudin Cadublat Xabazahi cidko erherh lellecidde, kaa katattaynit: “Awlalle nedeyeyaako Faasigi dirar alle bettakke koh nasqirribem nok fadhdha?” akko yerhxin. 13Ishi katattaynitko lamma fareh: “Daafodde oroba, sarrah wuli layet citro yaaqhuce xiyawti sinah garawo kinni. Kaa kataanta. 14Usuk adde orobinnanidde lel, amaa carih wannak tahe akko erhexa: ‘Mudarris yarhxe: Inni katattaynitlih Faasigi dirar alle beeto liyo gerhenti cari awla yane?’ 15Usuk lel bukat fidin cari siddishimeya sin yayballaw kinnik, amadde noh isqirriba” akko yerhxe. 16Katattaynit lel uguteenih amaa daafo fanah yedeyinyaako tamaa usuk tenak akah yerhxeekah geyen, Faasigi dirar lel yisqirribin.
17Baarho dhumte gedda lel, amaa lamman kee tamanlih yemeete. 18Usun amaa thawlalle cikkishiteenih beetak, Yeesus: “Sinko wuliti, yottaalih beetak yaneya, yi yasxaw kinam, rummah sinak arhxiyuk ane” yerhxe. 19Usun mangum yaxzanoona erherhisheenih laklakalle: “Yotta kinniho?” akko yerhxin. 20Usuk lel: “Lamman kee tamanko wuli tiya, ta shaxanadde yottaalih tekerishak yane tiya kinni. 21Xiyawti Barhi tamaa kaa sabbatah akah tunkuttubeekah yadiye, kaa sabbatah Xiyawti Barhi akko yandhibbirheti laakin kaa careyta! Ta xiyawti aabuke wayeh yakkeedo akah ashshe dhadhdhe” akko yerhxe.
Maddari dirar
(Maatiyos 26:26-30; Luukas 22:14-20)
22Usun beetak lel, kinnas yibbirheyaako dhaaco alle abek sarrah yigdileh tenah yoxoyeh: “Hina, tati yi nabse kinni” akko yerhxe. 23Usuk wuli kobbaayatto yibbirheh, cawwatoyshitek sarrah, tenah yoxoyeh, usun inkoh akko yoocobin. 24Usuk lel: “Tayim mango marah arhxuk xarhite yi biilo cahdiya kinni. 25Aykee cusubam Yallih nigsinnadde amaa lellec aacubendah, ta cinab darohimko aacabo makiyom, rummah sinak arhxiyuk ane” akko yerhxe.
Bithroos xinnan Yeesus yaakumeh warisha
(Maatiyos 26:31-35; Luukas 22:31-34; Yohannis 13:36-38)
26Wuli faylat mazmuur abeenimko sarrah lel, Oolac Koomalle yewcin. 27Yeesus lel: “‘Anu loyna aatako kiyo, ciido lel faax-tarhxo kinni’#Zakariyya 13:7 yarhxiinim tunkuttubeh tanemhi sabbatah, inkoh yi xinteenih yi xabtoona kitin. 28Anu rabaako ugutamko sarrah laakin, sinko basolle Galiila fanah adaw kiyo” akko yerhxe. 29Bithroos: “Usun walaa inkoh ku xineenih ku xaboona kibah, anu amayim maaba” akko yerhxe. 30Yeesus: “Kabaradde, dor-hotti lamma gedda andhaxamko basolle, adooxa gedda yi xinto kitom, rummah, kok arhxiyuk ane” akko yerhxe. 31Bithroos laakin yiytirireyaako: “Walaa kottaalih rabo ekkemih, ku xino makiyo” akko yerhxe. Usun lel inkoh amayim balih yerhxin.
Yeesus Gat-shemaanelle yassilliye
(Maatiyos 26:36-46; Luukas 22:39-46)
32Wuli Gat-shemaane akko yarhxin cara fanah lel yedeyin. Usuk lel: “Anu assilliyendah, talle defeya” akko yerhxe. 33Bithroos, Yacqoob kee Yohannis isheelih beyeh, nabaatih yamshaaqhalo kee yamraacado erherhishe. 34Usuk lel: “Yi rooxi mangum xazzanoyeh yanek, walaa rabi fanah, talle sugantaaki macalsita” akko yerhxe. 35Dagum tenko mirixtah yedeeyaako, dhiicimtah yekkemko, ta saaca akah tillabto, kumeh yissilliye. 36Usuk lel “Abba, Wobba kottah ummannim koh takke. Ta kobbaaya asac yok ish. Yakko kibah anu akah farhaakah makiiki, atu fadhdham takkoo” yerhxe. 37Yemeete gedda lel dhiinak ten geye. Bithroosuk lel: “Simcoon, dhiinak tanito? Inki saaca himma-abitto mirhicta? 38Cakanadde orobtanki, himma-abitteenih issilliya. Ufayi rummah farhak yane, xazo laakin tante” akko yerhxe. 39Malammit gedda lel yedeyeh inki waani arhxuk yissilliye. 40Malammih gaxe gedda lel dhiinak ten geye, intit alle yiclishemhi sabbatah lel ayim alle yadabbiinim sorhen. 41Maddaxit gedda alle yemeeteh: “Kaddih dhinteenih acrufuk taniini? Sin dhiica, saaca gufteh tane. Xiyawti Barhi zambi wannunhi gabadde yomxoyeh yane. 42Kata, uguta nadawok, ubula, amaa yi yasxaw leti lel kab-yerhxeh yane” akko yerhxe.
Yeesus yomxoyeh yumudhdhuwe
(Maatiyos 26:47-56; Luukas 22:47-53; Yohannis 18:3-12)
43Akkanih lel, usuk waanishak anuk, amaa lamman kee tamanko kin Yahuuda yemeete, kaalih mango xiyaw seefa kee gomaadi tibbirheya yinin. Usun lel sheekhat manabottit, sercat dhiiceenit kee naba maraako farritime mara kuuk yinin. 44Amaa yasxayeti lel: “Ta anu fuguto liyoti amaa xiyawto kinni, kaa tibbirhiinih dhawrhodde kaa beya” yerhxeh ishaara akah yoxoyeh yine. 45Yemeete gedda, akkanih kaalle yewceh: “Mudarris!” yerhxeh kaa fugute. 46Usun lel gabub alle hayeenih kaa yibbirhin. 47Tamaa kaa agaagalle daw-yerhxeh yine maraako wuliti lel, gaba yiyfiddigeyaako, sef hiriigeh, amaa naba shekhti garuzzok akko yootokeyaako cokka akko yigrice. 48Yeesus lel: “Wuli shiftatto yabbarho le mara balih seefa kee gomaadiilih yotta tabbarhoona temeetiini? 49Maaxi yamaato maqhdas caredde sinlih ekkeh aydurusiyuk ine gedda, yi mabbarhitiini. Kutuub yakmalooki xaba” akko yerhxe. 50Katattaynit lel inkoh kaa xabeenih kuden. 51Wuli natsalah ishe agoogisheya kibah akim hin gombi kaadde kataye. Usun lel kaa yibbirhin, 52usuk laakin amaa natsala xabeh casiinih kude.
Yeesus akottat carelle
(Maatiyos 26:57-68; Luukas 22:54-55,63-71; Yohannis 18:13-14,19-24)
53Usun lel Yeesus naba shekh fanah kaa beyen. Inkoh sheekhat manabottit, naba mara kee sercat dhiiceenit lel inkidde yemeetin. 54Bithroos lel mirixtaako naba shekhti kanshello fanah kaa katattaye. Amaa dhawrheenitlih defeyeh lel giralle lalacak yine. 55Sheekhat manabottit kee umbuka araba lel kaa yagdafoona ciloh, Yeesusulle shaahid wagiyak yinin, laakin inkim migeyinnooni. 56Mango mari zirabah alle yishhidin, laakin ten shaahada inkidde maamaato. 57Wuli mari lel uguteenih zirabah alle yishhidinyaako: 58“‘Ta gabah siraaxime macbad dumuseyaako, adooxa lellecille gabah siraaximinnixe tiya gino kiyo’ arhxuk kaa noobbe” yerhxin. 59Taymille gantah ten shahaada inkidde maamaato. 60Amaa naba shekh fanadde uguteyaako: “Taxaye radde malito? Ta xiyaw kolle ashhiduk yaniinim ayim kinni?” arhxuk Yeesus essere. 61Usuk sik-yerhxenkah alle maadabbinna. Naba shekh malammih: “Atu Masiix, Baraka-letiih Barha kito?” akko yerhxe. 62Yeesus lel: “Yotta kinni. Xiyawti Barhi lel Xayli mizgi gabooko defeyak#Zaabur 110:1 ubul. kee carshi darurlih#Daaniyeel 7:13 amiituk tabloona kitin” akko yerhxe. 63Naba shekh lel ishi sara candhisheyaako: “Tayimko ferteh ayimti shohoda fandhe? 64Kaa waato toobbiinih tanin. Sin mablo ayim kinni?” akko yerhxe. Usun lel inkoh rabi akah eeddamah kaa yifridin. 65Gari thuf alle yarhxoona erherhisheenih, intit akko cummusenyaako gommaadih akko yootokiinih: “Irhig iski!” akko arhxuk yinin. Dhawrheenit gantah kaa beyeenih kaa safuufucusen.
Bithroos Yeesus xina
(Maatiyos 26:69-75; Luukas 22:56-62; Yohannis 18:15-18,25-27)
66Bithroos gubi kanshellolle anuk, wuli garuzzö temeeteyaako, 67Bithroos lalacak kaa tubleh, nifidde kulux akko terhxeyaako: “Atu lel Naazret Yeesuslih tinito” akko terhxe. 68Usuk laakin: “Ayim arhxituk tanem maarhige, ayim kinam lel yodde moobinna” arhxuk aluu-yerhxe. Kanshellot carafko yewce geddaako dor-hotti andhaxe. 69Wuli khaddaamit kaa tubleyaako, amalle yine marak malammih: “Ta xiyawti tenko kinni” akko tarhxo erherhishshe. 70Usuk lel malammih aluu-yerhxe. Dago geddaako sarrah, amalle yine mari malammih Bithroosuk: “Atu Galiilaako kitomhi sabbatah, rummah tenko inketta kito” akko yerhxin. 71Sarrah ishe abaaro kee dhiiwito erherhisheh: “Ta atin adde waanishshan xiyawto maarhige” yerhxe. 72Akkanih lel dor-hotti malammih andhaxe. Bithroos lel Yeesus: “Dor-hotti lamma gedda andhaxekkah adooxa gedda yi xinto kito” akko yerhxeh yinem yizzikkire. Abem kaa laxsusseh lel weece.
Šiuo metu pasirinkta:
Markos 14: SCC
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
©2024 Wycliffe Ethiopia