Markos 13
13
Yeesus maqhdas carih dumnan yaakumeh warisha
(Maatiyos 24:1-2; Luukas 21:5-6)
1Yeesus wuli maqhdas careeko awcuk, kaa katattaynitko wuliti: “Mudarris, ta dhayit kee ta makun ayidhdha mecem ubul” akko yerhxe. 2Yeesus lel: “Ta naba makun ablituk tane? Taymidde inki dhayi cidditekkah raaco leya adde miyane” akko yerhxe.
Zaban abayshimah tuumar
(Maatiyos 24:3-14; Luukas 21:7-19)
3Usuk maqhdas carih waacinalle Oolac koomalle defeyak, Bithroos, Yacqoob, Yohannis, Indiryaas sinni ulah: 4“Iski noh warish, tayim takko lem manda kinni? Tayim inkoh adde takko le geddahi tuumar ayim yakko kinni?” arhxuk kaa esseren. 5Yeesus tahe akko yarhxo erherhishe: “Akkinnanti sin doolabak selita. 6‘Anu kayya kiyo’ arhxuk yi migacalle mango mari yemeetiinih, mango mara doolaboona kinon. 7Dhiba kee dhibat ware lel taabbin gedda mibirriigina. Tayim takko alle tane, abayshima laakin amaa gedda maki. 8Wathan wathanti diddeh, nigsinna nigsinnat diddeh uguto kinni. Mango baarholle lel kirdidimom kee culul yakko kinni. Tayim lel amaa waaxelti ubkahi erherh kinon.
9Araballe sin baaheenih sinni sunagoogitidde lel sin sabacoona kee, tenah shaahid takkoona, yottah arhxuk masxadaadarit kee nuguusat nifidde daw-tarhxoona kitiinimhi sabbatah, zeelita. 10Mece Ware laakin yookomeh umbuka diikalle warreyo alle tane. 11Xukmelle sin baahaanah sin yasxayin gedda, waanishsham Quddus kin Ufaye kibah sina makinamhi sabbatah, amaa geddadde ayim tarhxiinim sinah tamxawo kinnik, ayim tarhxiinimih tookomiinih manshaaqhalina. 12Sacal ishi sacal yasgadafo kinni, abba lel ishi barha, cindham lel sinni dhaltoyyah didde ugutoona kinon, ten yagdafoona kinon. 13Yi migac hi sabbatah umman tiyah tamnaccaboona kitin. Abayshima fanah curinnanti laakin gargeerimo kinni.
Cazaab waqhte
(Maatiyos 24:15-28; Luukas 21:20-24)
14‘Batakna kin cayne’#13:14 Maatiyos 24:15 yane gubi kutuub ubul. yannaw alle ammissilinnixelle tablin gedda (tamaa yaqhriyeti macalsiito)#Daaniyeel 9:27 ubul., amaymik sarrah Yahuudiyalle yane mari koomamalle kudoona. 15Cari amok sugeti oobe wayo, kaa caredde tanem bahito orobe wayo, 16dhagelle sugeti lel ishi sareena bahito caazalle gaxe wayo. 17Amaa maxadde soono kee dhoyishsha sayyo lel ten careyta! 18Tayim dhamxin waqhtedde takkemko dhaaco abita. 19Amayim Yalli makhaaliqho yukhleqhemko kado fanah tekkeh sodhdha, tayek sarrah gantah akke wayo le cazaab yakko kinamhi sabbatah kinni. 20Amaa max Maddari yuyshudhdhurheh akke wayaado, walaa inki xiyawti gargeerimeh anniye mirhaarho. Amaa doorimeh yane marah arhxuk laakin amaa max yuyshudhdhurhe. 21Amaydo, akkinnanti, ‘Ubula, Masiix talle yane!’ hido ‘Ubula, toohille yane!’ sinak yerhxemko maamanina. 22Amayim lel zirabti masiixiin kee zirabti nobowa uguteenih, dhiiceenimko, amaa Yalli doore mara doolaboona ciloh ishaarar kee bexsishsham aboona kinon. 23Atin laakin selita! Ummannim ookomeh sinah warisheh aniyo.
Xiyawti Barhih mumut
(Maatiyos 24:29-31; Luukas 21:25-28)
24Amaa maxadde, amaa cazaabko sarrah ayrotta akkanih dattoyto kinni, alsi lel ishi ifo yaxaw maki, 25xutuk caranko rado kinni, carshi xaylit lel qinqin-yarhxo kinni. 26Amaymik sarrah, Xiyawti Barhi darurudde naba xayla kee nabneelih amiituk yabloona kinon.#Daaniyeel 7:13 27Amaymik sarrah, usuk ishi malaykut faro kinni, usun lel doorimte kaa mara affara jahaako, baarhot wasanko carshi wasan fanah yaskattoona kinon.
Indacartooko nadrusem
(Maatiyos 24:36-44)
28Misaal indacartooko udrusa: tee xakuk silayaako ishi dharhaa yayyaace gedda, karma kab-terhxeh tanem taarhigin. 29Amayim balih lel, atin tayim tablin gedda, usuk kab-yerhxeh yanem kee caraf af gufeh yanem taarhigin. 30Tayim inkoh takkendah, ta ijo tillabto makinam rummah sinak arhxiyuk ane. 31Caran kee baarho inkoh tillaaboona kinon, yi waani laakin tillabto maki.
Max kee saaca yaarhigeti miyane
32Amaa max kee saaca laakin Abbaako bextih, walaa Barha, walaa carshi malaykut gantah, yaarhigeti miyane. 33Amaydo, amaa waqhti manda yamaato kinam mitaarhigiinimhi sabbatah himma-abita. 34Wuli ishi dik xabeyaako kallaaxe xiyawti, ishi care ishi garuuzalle xabah, ten-ten ciyyo akah yaxayeh, caraf dhawrheena lel himma-abito yeemereya balih kinni. 35-36Amaydo, amaa cari-wanna kaso, hido barti-abrhah, hido dor-hotti andhaxa gedda, hido lel dhaxiine yamaato lem mitaarhigiinimhi sabbatah, gar-heeko yamiiteh dhintimadde sin geyak, himma-abita. 37Ta sinak arhxem umman tiyak arhxem kinnik, himma-abita!”
Šiuo metu pasirinkta:
Markos 13: SCC
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
©2024 Wycliffe Ethiopia