Yowana 19
19
Yeesu kaaramurirwa okwitwa ku-musarabha
(Mataayo 27:15-31; Maariko 15:6-20; Ruuka 23:13-25)
1Mmbe, Piraato ˆnaaragirira abhasirikare bhaaye ati, bhagege Yeesu, bhamutarike na ebhibhooko. 2Abhasirikare mbasinga orusuurya rwa amawa, mbamufwafya ku-mutwe. Mbamufwafya na ingibho ya ekikama eya jambarawu. 3Mbamuujaga-ko, mbamukeesha mbaaika ati, “Kasinge omukama wa Abhayawudi!” Mbamubhuma na ebhisaanyi.
4Piraato ˆnaawuruka mu-nyumba kweki, ˆnaabhwira abhaanu bhanu ꞉bhaariga bhasangire ayo ati, “Mwitegeereshe, naareeta omuunu unu kw-imwe, insonga mumenye ati anye nitaamurora-ko kikayo kyonekyone.” 5Mmbe, mbawurusha Yeesu afwayega orusuurya rwa amawa na inkanju ya jambarawu. Piraato ˆnaabhabhwira ati, “Ambe omuunu weemwe ngunu anu.”
6Bhunu abhashengesi abhakuru na abhajuuma bheebhwe ꞉bhaarorere Yeesu, mbamwaya mbaaikaga ati, “Musunge ku-musarabha, mumusunge ku-musarabha!” Mmbe, Piraato ˆnaabhabhwira ati, “Mumugege emwe abheene mumusunge, kwa okubha anye nitaamunyoora-ko kikayo kyonekyone.” 7Abhayawudi mbamusubhya ati, “Eswe kiri na ebhiraagiro. Okuriingʼaana na ebhiraagiro bhiyo, eesire okufwa, kwa okubha keeyaika ati ni Omwana wa Nyamuwanga.”#19:7 Ringira Abharaawi 24:16.
8Bhunu Piraato ꞉oonguuywe amangʼana gayo, ˆnaagenderera okuubhaya muno. 9Mmbe, ˆneengira kweki mu-nyumba, ˆnaabhuusha Yeesu ati, “Awe usookere aaki?” Nawe Yeesu ꞉ataamusubhiishe ryoneryone. 10Mmbe, Piraato ˆnaamubhuusha ati, “Kubhaki utakunsubhya? Utakumenya ati anye niri na obhuturo bhwa okukwigurira, na obhwa okukusunga ku-musarabha?” 11Yeesu ˆnaasubhya Piraato ati, “Utaakabheeye na obhuturo bhwonebhwone ku-anye raabhe utaakayaaywe na Nyamuwanga. Nawe omuunu unu aandeeta ku-awe ari na bhikayo bhinene muno okukira ebhyawo.”
12Mmbe, bhunu Piraato ꞉oonguuywe gayo, ˆnaasaka okwagara injira ya okwigurira Yeesu, nawe Abhayawudi mbagenderera okumwaya mbabhwiraga Piraato ati, “Raabhe ukamwigurira, utakubha musaani wa Kayijaari.#19:12 Kayijaari. Ringira riingʼana rinu mu-Mangʼana Amakomeeye. Omuunu woonewoone unu keekora okubha omukama, kaarema aga Kayijaari.” 13Bhunu Piraato ꞉oonguuywe amangʼana gayo, ˆnaawurusha Yeesu anja, ˆneekara ku-kitebhe kya indamuro, anu ꞉aabhirikirwaga ati Ekibhuga kya Amagina. Mu-nyaaika ya Ekiebhuraaniya abhaaika Gabhata. 14꞉Rwariga ruri rusuku rwa okwirooseresha ku-nsonga ya insikukuru ya Ipaasaka mu-mwisi, mw-isuubha rya mu-ruwotoosi. Piraato ˆnaabhwira Abhayawudi bhanu ꞉bhaariga bhasangire ayo ati, “Murore omukama weemwe ngunu anu!” 15Abheene mbamwaya mbaaikaga ati, “Nuumwite, nuumwite! Nuumusunge ku-musarabha!” Piraato ˆnaabhabhuusha ati, “Angu, omwenda nisunge omukama weemwe ku-musarabha?” Abhashengesi abhakuru mbamusubhya ati, “Eswe kitari na mukama wundi tari Kayijaari era!” 16Mmbe, Piraato ˆnaabhayaana Yeesu, insonga asungwe ku-musarabha.
Yeesu kaasungwa ku-musarabha
(Mataayo 27:32-44; Maariko 15:21-32; Ruuka 23:26-43)
Mmbe, abhasirikare mbamugega mbagenda nawe. 17Yeesu ˆneetwika omusarabha gwaye, mbeemuka ayo, mbagenda anu ꞉aabhirikirwaga mu-Kiebhuraaniya ati, Gorigota, insonga yeende-ko ni kiima kinu ꞉kyasusanaga na ekiyanga. 18Bhunu ꞉bhaayikire Gorigota ayo, mbamusunga ku-musarabha. Anu ꞉bhaamusungiiye, ꞉bhaariga bhasungire-wo abhaanu abhandi bhabhiri, owumwi enu na owundi enu, bhamutuuyega agati.
19Piraato ˆnaaragirira ati bhakaame amangʼana ga okutuura ku-musarabha gwa Yeesu, ngakaamwa. Amangʼana gayo ꞉gaariga gakaamirwe ati,
yeesu omunaajareeti omukama wa abhayawudi.
20Amakaamo gayo ꞉gaariga gakaamirwe mu-Kiebhuraaniya, mu-Kiruumi na mu-Kiyunaani. Bhayawudi bhaafu ꞉bhaariga mbasoma amakaamo gayo, kwa okubha anu ꞉bhaamusungiiye ꞉aariga ari ayeeyi na mu-musi gwa Yerusareemu.
21Mmbe, abhashengesi abhakuru mbabhwira Piraato ati, “Siga okukaama ati, ‘Omukama wa Abhayawudi,’ tari nuukaame ati, ‘Omuunu unu ꞉aaikire ati niwe Omukama wa Abhayawudi.’ ” 22Piraato ˆnaabhasubhya ati, “Wuri, kutyo naakaama nikwo kutyo agasigara gari.”
23Bhunu abhasirikare ꞉bhaasungire Yeesu ku-musarabha, mbagega gingibho gyaye, mbagigabha mafuuta gana. Omusirikare wumwiwumwi ˆnaagega eryaye. Mbagega na inkanju yaaye. Inkanju iyo ꞉yaariga itabhariirirwe, irukirwe yoone kutyo okwambira iiguru. 24Mmbe, mbaaikana ati, “Kisige okutamura inkanju inu, tari kibhume inkuura, kirore ati, nniga kaaja okuyigega.” Gayo ꞉gaabheeye kutyo insonga ganu ꞉gaakaamirwe gakuumire ati, “꞉Bhaagabheene gingibho gyani, mbabhumira inkuura inkanju yaani.”#19:24 Ringira Ijabhuri 22:18. Nikwo kutyo abhasirikare bhayo ꞉bhaakorere.
25Mmbe, ayeeyi na omusarabha ayo, ꞉bhaariga bhariwo abhagasi bhana bhayambaayega. Abhagasi bhayo ni nyiramwene Yeesu na omuyara waabho nyira Yeesu, Maryamu omugasi wa Kuropa, na Maryamu Magidarena. 26Bhunu Yeesu ꞉aarorere nyiramwene, na omwiyigira unu ꞉aariga eendere muno ayambaaye ayeeyi na nyiramwene, ˆnaaika ati, “Maayi, ringira uyo. Mukore abhe mwana waawo.” 27Kimwi ˆnaabhwira na omwiyigira uyo ati, “Ringira uyo. Mukore abhe nyakumwana.” Mmbe, okwambira ayo omwiyigira uyo ˆnaagega nyiramwene Yeesu, ˆnaagenda okwikara nawe.
Okufwa kwa Yeesu
(Mataayo 27:45-56; Maariko 15:33-41; Ruuka 23:44-49)
28Mmbe, Yeesu enu amenyerega ati amangʼana goone kutyo gaamarire okuwa, ˆnaaika ati, “Enuungwa obhwiro.” ꞉Aaikire kutyo insonga ganu ꞉gaakaamirwe mu-Makaamo Amataakatiifu, gakuumire.#19:28 Ringira Ijabhuri 69:21. 29Ayo ꞉bhaariga bhari, ꞉kyariga kiriwo ekiinu kiijuuye-mo iidivaayi induru. Mmbe, mbagega riigaafu, mbeena mu-divaayi iyo, mbarituura ku-muyere, mbayeresha Yeesu, mbamutuurira ku-munwa. 30Bhunu Yeesu ꞉aarabhire iidivaayi iyo, ˆnaaika ati, “Omurimu gwani gwawa!” Mmbe, ˆneenamya omutwe, kimwi ˆnaafwa.#19:30 Ringira Yowana 10:18.
Abhasirikare abhasoma Yeesu na riitimu
31Mmbe kwa okubha mwejo ꞉yaariga iri Nsabhaato, na Insabhaato iyo ꞉rwariga ruri rusuku runene okukira ginsabhaato egindi,#19:31a Insabhaato iyo ꞉rwariga ruri rusuku runene okukira ginsabhaato egindi. Ni kwa okubha Insabhaato iyo ꞉yaariga iri mu-nsikukuru ya Paasaka. abhatangasha bha Abhayawudi ꞉bhaariga bhatakwenda emibhiri gya abhafuuye gibhe ku-misarabha orusuku rwa Insabhaato. Mmbe mbagenda ku-Piraato, mbasabha ati abhasirikare bhagende bhafune amaguru ga bhanu ꞉bhaariga bhasungirwe,#19:31b Bhagende bhafune amaguru ga bhanu ꞉bhaariga bhasungirwe. ꞉Bheendaga bhakore kutyo insonga abhaanu bhayo bhafwe bhwangu. bhabhasooshe ku-misarabha. 32Mmbe, mbagenda, mbafuna amaguru abhaanu bhanu ꞉bhaariga bhasungirwe amwi na Yeesu, owa okwamba na owa akabhiri. 33Nawe bhunu ꞉bhaagendere ku-Yeesu, mbanyoora aamarire okufwa, ꞉bhataamufunire amaguru. 34Nawe omusirikare owumwi ˆnaasoma Yeesu na riitimu mu-rubhafu. Mmbe, amaanyinga ngawurura na amanji. 35Amangʼana ganu gakaamirwe na omuunu unu ꞉aariga ariwo ˆnaagaroraga. Ganu kaaika ni ga kimari, omwene woone amenyere ati kaaika ekimari insonga emwe mwone mwikirishe. 36Amangʼana gayo ꞉gaabheeye kutyo insonga gakuumishe ganu ꞉gaariga gakaamirwe mu-Makaamo Amataakatiifu ati, “Ritariwo eguwa ryaye rinu ririfunwa.”#19:36 Ringira Ijabhuri 34:20. 37Na Amakaamo agandi agaaika kweki ati, “Bhariija okuringira unu ꞉bhaasomere.”#19:37 Ringira Jaakariya 12:10.
Okubhiikwa kwa Yeesu
(Mataayo 27:57-61; Maariko 15:42-47; Ruuka 23:50-56)
38Gayo ꞉geejire gaawa, ˆnaaja muunu wumwi riisiina ryaye ˆnaatogwa Yuusufu. Yuusufu unu, ꞉aariga ari mwibhurwa wa mu-musi gwa Arimataaya. Omuunu uyo ꞉aariga ari omwiyigira wa Yeesu, nawe ꞉aariga ˆnaamwikirisha bhwiyibhise, kwa okubha ꞉aariga ˆnoobhaya abhatangasha bha Abhayawudi. Mmbe, Yuusufu uyo ˆnaagenda ku-Piraato, ˆnaasabha ati amwikirisishe agege omubhiri gwa Yeesu, agende okugubhiika. Piraato ˆnaamwikirisisha. Mmbe, Yuusufu ˆnaagenda, ˆnaasoosha omubhiri gwa Yeesu ku-musarabha.
39Na Niikodeemu unu akabhaga akamwi ꞉aagendere ku-Yeesu iri ngeta,#19:39 Ringira Yowana 3:1-2. ˆnaaja na induru inu ꞉yaatogwaga ati manemane, isaasiibhwe na obhubhaani nkiro makumi gasatu. 40Mmbe, abhabhiri bhayo, mbagega omubhiri gwa Yeesu, mbagufwafya insanda, mbaguyaka amafuta amarange ganu ꞉gaariga gasaasiibhwe-mo induru ya manemane, okuriingʼaana na gintungwa gya Abhayawudi egya okubhiika abhafuuye. 41Ayeeyi na anu Yeesu ꞉aariga asungirwe, ꞉ryariga ririwo riisambu. Mw-isambu muyo ꞉yaariga irimo imbiiyira iinyaaya inu ꞉yaariga ikyariga okubhiikwa-mo omuunu woonewoone.#19:41 Abhayawudi ꞉bhaariga mbabhiika abhafuuye mu-nsenga, egindi ꞉gyariga gibhaajirwe mu-matare ga mu-bhiima. 42Orusuku ruyo, ꞉rwariga ruri rusuku rwa okuramukira Insabhaato. Abhayawudi ꞉bhaariga mbeerooseresha ku-nsonga ya Insabhaato. Ku-nsonga iyo, mbamubhiika mu-mbiiyira iyo, kwa okubha niyo ꞉yaariga iri ayeeyi.
Šiuo metu pasirinkta:
Yowana 19: kya
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2023, Wycliffe Bible Translators, Inc. All rights reserved