Yowana 20
20
Okusuuka kwa Yeesu
(Mataayo 28:1-8; Maariko 16:1-8; Ruuka 24:1-12)
1Ekya obhwoyo#20:1 Ekya obhwoyo. Abhayawudi bheeki abhooya ekya Akasansabha. Ekya obhwoyo ni rusuku rwebhwe orwa okwamba orwa obhwoyo. mu-ruguru ekisuute kikyariwo, Maryamu Magidarena ˆnaagenda ku-mbiiyira ya Yeesu. ˆNaanyoora riigina rinu ꞉ryariga riri ku-muryango gwa imbiiyira risiringisiibhwe, ritari ku-muryango gwa imbiiyira. 2Mmbe, ˆnaasooka ayo abhirimire, ˆnaagenda ku-Simooni Peetero na ku-mwiyigira unu Yeesu ꞉aariga eendere. ˆNaabhabhwira ati, “Bhasoosiishe Raatabhugenyi mu-mbiiyira, na kitakumenya enu bhamutuuye!”
3Mmbe, Peetero na omwiyigira uyo mbeemuka, mbagenda ku-mbiiyira erya. 4Bhoone kutyo bhabhiri ꞉bhaariga mbabhirima, nawe omwiyigira owundi wurya ˆnaabhirima bhwangu okukira Peetero, ˆnaatangata okuyika ku-mbiiyira ayo. 5Omwiyigira uyo ˆneenama, ˆnaasungurisha mu-mbiiyira, ˆnaarora insanda inu ꞉bhaariga bhafwafiishe Yeesu iri eyeene, nawe ꞉ateengiiye mu-mbiiyira.
6Mmbe, Simooni Peetero woone ˆnaaja, ˆneengira mu-mbiiyira, ˆnaarora insanda iyo iri ayo eyeene era. 7ˆNaarora na ekitambaara kinu ꞉bhaariga bhamubhoyeeye ku-mutwe, kitari amwi na insanda, tari ꞉kyariga kikunyirwekunyirwe kiri ekyene ku-mbarika. 8Mmbe, omwiyigira unu ꞉aariga atangatire okuyika-wo, woone ˆneengira mu-mbiiyira. ˆNaaringira, ˆneekirisha ganu ꞉aarorere. 9Nawe abheene ꞉bhaariga bhakyari okusombookerwa Amakaamo Amataakatiifu ganu agaaika ati, ibhe isige okubha Yeesu akasuukire okusooka mu-bhafuuye. 10Mmbe, abheeyigira bhayo mbasubha kweki eweebhwe.
Yeesu keeyeresha ku-Maryamu Magidarena
(Mataayo 28:9-10; Maariko 16:9-11)
11Nawe Maryamu Magidarena ˆnaasigara ayambaaye ayeeyi na imbiiyira, ˆnaariraga. Bhunu ꞉aariga ˆnaarira, ˆneenama ˆnaasungurisha mu-mbiiyira, 12ˆnaarora bhaamaraayika bhabhiri bhafwayega ngibho nyeru, bheekaayega anu ꞉bhaariga bhamaamiishe omubhiri gwa Yeesu. Maraayika owumwi ꞉aariga eekaaye emutwe, owundi ꞉aariga eekaaye ku-maguru. 13Maraayika bhayo mbamubhuusha ati, “Maayi, owuririraki?” Omwene ˆnaabhasubhya ati, “Abhaanu bhaagega-mo omubhiri gwa Raatabhugenyi, na anye nitakumenya enu bhaagusira!” 14Bhunu Maryamu ꞉aaikire amangʼana gayo, ˆneekebhuukira, ˆnaarora Yeesu ayambaayega anu ꞉aariga ari, nawe Maryamu ꞉ataamenyere ati ni Yeesu.
15Yeesu ˆnaamubhuusha ati, “Maayi, owuririraki? Angu, owaagara niga?” Maryamu ꞉aariga ˆnaatoga ati, omuunu uyo ꞉aariga ari mwangarisi wa riisambu, ˆnaamusubhya ati, “Ee raata, raabhe ni awe waamugega-mo, mbwira enu waamutuura, anye nigende okumugega-wo.” 16Yeesu ˆnaamubhirikira riisiina ryaye ati, “Maryamu!” Mmbe Maryamu ˆneekebhuukira, ˆnaamurora, ˆnaaika mu-Kiebhuraaniya ati, “Rabhoni!” Insonga yeende-ko ati, “Mwiyigisha.” 17Yeesu ˆnaamubhwira ati, “Siga okungwata-ko, kwa okubha nikyari okugenda mu-rwire ku-Raata. Ambe, genda ubhwire abhayiiri bhaani,#20:17 Abhayiiri bhaani. Insonga yeende-ko ni, Abheeyigira bhaani. ati naagenda mu-rwire ku-Raata, emwe mwone ni esomwana, naagenda ku-Nyamuwanga waani, emwe mwone ni weemwe.” 18Mmbe Maryamu Magidarena ˆnaagenda ku-bheeyigira bha Yeesu, ˆnaabhabhwira ati, “Naarora Raatabhugenyi!” ˆNaamara ˆnaabhabhwira goone kutyo ganu Yeesu ꞉aaragiriiye.
Yeesu keeyeresha ku-bheeyigira bhaaye
(Mataayo 28:16-20; Maariko 16:14-18; Ruuka 24:36-49)
19Keegoro niiyika ku-rusuku rwa obhwoyo ruyo, na abheeyigira bha Yeesu ꞉bhaariga bheekumanyiishe mu-nyumba yimwi bheeyigariiyega, kwa okubha ꞉bhaariga mboobhaya abhatangasha bha Abhayawudi. Mbataka era Yeesu ˆnaayambaara agati weebhwe, ˆnaabhabhwira ati, “Omurembe gubhe na emwe!”#20:19 Omurembe gubhe na emwe. Ni bhukeesha bhwa Ekiyawudi, nikwo kutyo bheeki abhakeeshaanya. 20Bhunu Yeesu ꞉aamarire okubhabhwira gayo, ˆnaabheeresha amabhoko gaaye na orubhafu rwaye. Na bhunu abheeyigira ꞉bhaarorere Esebhugenyi, mbajomerwa muno. 21Yeesu ˆnaabhabhwira kweki ati, “Omurembe gubhe na emwe. Rwa kutyo Nyamuwanga ꞉aantumire anye, nikwo kutyokutyo anye noone enibhatuma mu-kyaro anu.” 22Mmbe ˆnaabhayembera omwika, ˆnaabhabhwira ati, “Muramire Mwoyo Omutaakatiifu. 23Bhanu murisoosisha-ko ebhikayo, bhasoosiibhwe-ko ebhikayo, na bhanu murisiga okubhasoosisha-ko ebhikayo, bhasigiiywe-ko ebhikayo bhyebhwe.”
Yeesu keeyeresha ku-Tomaaso
24Omwiyigira owumwi mu-bheeyigira ekumi na bhabhiri abha Yeesu, riisiina ryaye Tomaaso, unu ꞉aabhirikirwaga ati Masara, ꞉aariga atari amwi na abheejaabho bhunu Yeesu ꞉eejire ˆneeyeresha ku-bhandi. 25Mmbe, abheeyigira abhandi bhanu ꞉bhaariga bhariwo mbamubhwira ati, “Eswe kyarora Raatabhugenyi.” Nawe omwene ˆnaabhasubhya ati, “Anye nitarorere giingʼofu gya emisumaari mu-mabhoko gaaye, nitushe-ko okubhoko kwani, nitushe na okubhoko kwani ku-rubhafu rwaye, nitakutura okwikirisha.”
26Bhunu nsiku munaana ꞉gyaturire, abheeyigira bha Yeesu mbasangira amwi kweki mu-nyumba. Orusuku ruyo Tomaaso woone ꞉aariga ari amwi nabho bheeyigariiyega. Mbataka era Yeesu ayambaaye agati weebhwe, ˆnaabhabhwira ati, “Omurembe gubhe na emwe!” 27Kimwi Yeesu ˆnaabhwira Tomaaso ati, “Tomaaso, reeta anu ekyara kyawo, uringire amabhoko gaani, ureete na okubhoko kwawo ukuunʼye ku-rubhafu rwani, waasiga okubha muunu unu utakwikirisha, tari ubhe omuunu unu keekirisha.” 28Tomaaso ˆnaamusubhya ati, “Raatabhugenyi, na Nyamuwanga waani!” 29Yeesu ˆnaamusubhya ati, “Awe weekirisha kwa okubha wandora. Nyakara bhanu abheekirisha raabhé bhakabha bhakyari okurora.”
Iingʼana inu ekitabho kinu ekyenda umenye
30Mmbe, bhiriwo ebhimenyegesho ebhindi bhyafu bhinu Yeesu ꞉aakorere mu-meeso ga abheeyigira bhaaye, nawe bhitakaamirwe mu-kitabho kinu. 31Nawe ebhimenyegesho bhinu bhiri mu-kitabho kinu, ꞉bhyakaamirwe insonga mwikirishe ati Yeesu niwe Kiriisitu, Omwana wa Nyamuwanga, na mukeekirisha, mubhe na obhurame bhunu bhutakuweera, okuturira kw-isiina ryaye.
Šiuo metu pasirinkta:
Yowana 20: kya
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2023, Wycliffe Bible Translators, Inc. All rights reserved