Jɔn 17
17
Yezu tiini o lwoori o Kwo Wɛ
1Yezu na tage taane dem konto o ti to, o ma kwoni o yuu wɛɛne ye o we: “Amo Kwo, a toone maŋa kam laam yia. Amo ye nmo Bu mo. Nam pa se a na zula, se amo de wó pa n na zula. 2Kolo ŋwaane nmo pɛ-ne dam nabiina maama baŋa ne se a wane a pa balo maama nmo na pɛ-ne to jwoŋi ŋwea kalo na ba jege kweelim to. 3Ŋwea kalo na ba jege kweelim to mo ye se nabiina taa yei nmo wolo yerane na ye chega tu Baŋa Wɛ to, se ba daare ba taa yei amo, Yezu Krista wolo nmo na toŋe to. 4Amo pɛ se nmo na zula logo baŋa ne, de amo na ti totoŋe dem nmo na pɛ-ne se a toŋe to. 5Amo Kwo, pa se a na nenɔŋ-fɔrɔ nmo tei ne leile konto, se ko maŋe de nenɔŋ-fɔrɔ kolo a na maŋe a jege de nmo ye logo baŋa ta tera to.#Memaŋa 8:23
6Amo pɛ se nɔɔna balo nmo na kuri logo baŋa nɔɔna wone n ke amo jeŋa ne to lɔre nmo na ye wolo to. Banto ye nmo nyem mo, ye n kwei-ba n ke amo jeŋa ne. Ba nam sɛ nmo ni taane dem mo. 7Leile konto ba yei we kolo maama nmo na pɛ amo to nwoŋi nmo tei mo. 8Kokuri to, nmo na pɛ-ne kwora kalo to mo a pɛ-ba, ye ba sɛ. Ba nam yei lanyerane we amo nwoŋi nmo tei mo, ye ba ta sɛ we nmo mo toŋe-ne.
9Amo nam lwoori nmo banto ŋwaane mo, se a ba lwoori nmo a pa logo baŋa nɔɔna maama. Ko nam ye balo nmo na ke a jeŋa ne to, kolo ŋwaane banto ye nmo nyem mo. 10Woŋo kolo maama amo na jege to ye nmo nyem, ye nmo de na jege woŋo kolo maama to ye amo nyem mo. Balo na ye nmo nyem ye n ke-ba amo jeŋa ne to ŋwaane mo pɛ a yere zaŋe de zula. 11Leile konto amo daa bá taa wora logo baŋa ne, ye banto ta wora mo. Amo laam maa beene nmo tei mo. Amo Kwo, Wo-pwoŋo Tu Baŋa Wɛ, nmo yere dem ye amo de nyem mo, ye dento bere nmo dam dem na ye tei to. Ta‑n mae n dam dem konto n nii n nɔɔna baŋa ne, se ko pa ba taa ye woŋo dedoa, ne nmo de amo na ye woŋo dedoa tei to. 12Amo ya na wo ba tei ne to, a mɛ nmo dam dem mo a nii ba baŋa ne. Amo ma che-ba se ba yé ywori nmo chwoŋa kam wone. Ba wolowolo wo jei, ko ná dae wolo wom na maŋe se o na chɔgem to yerane. Nmo tɔnɔ kom bere we wonto jege se o na chɔgem mo.
13Leile konto amo maa beene nmo tei. Amo nam tage wonnu tento logo baŋa ne mo se ko pa nmo nɔɔna bam taa jege amo wopwolo kom dwoŋi ba bochara ne se ko tiini ko gaale. 14A ma ke nmo ni taane dem ba jeŋa ne. Balo kugu jei na wo logo baŋa ne to ma chuli-ba, ba na dae logo baŋa nyem to ŋwaane, ne amo de na dae logo baŋa nyem tei to. 15Ko nam dae we a lwoori nmo se n le-ba logo kom baŋa ne. A nam lwoori‑m se n che-ba wo-lwanno tu setaane jeŋa ne mo. 16Ba dae logo baŋa nyem, ne amo de na dae logo baŋa nyem tei to. 17Fɔge n kwɛ-ba de n chega kam se ba taa ye nmo nyem. Nmo ni taane dem ye chega mo. 18Amo toŋe-ba a yage logo baŋa ne, ne nmo na toŋe amo de n yage logo baŋa ne tei to mo. 19Ko nam ye banto ŋwaane mo amo kwei a tete a ke nmo jeŋa ne, se ko pa banto de wane ba taa ye nmo nyem, nmo chega kam ŋwaane.
20Amo nam ba lwoori nmo a pae banto yerane, se ko ye balo de na wó ba ba sɛ amo banto taane dem ŋwaane to mo. 21Amo nam lwoori nmo se ko pa ba maama taa ye woŋo dedoa mo. Amo Kwo, nmo me de amo, ye amo tigi nmo bochare ne. Nam pa se banto me de debam konto dwoŋi. Konto wó wane ko pa se logo baŋa nɔɔna sɛ we, nmo mo toŋe-ne. 22Amo pɛ-ba nenɔŋ-fɔrɔ kolo dwoŋi nmo na pɛ-ne to, se ba wane ba ji woŋo dedoa, ne amo de nmo na ye woŋo dedoa tei to. 23Amo me de-ba, ye nmo me de amo, se ko pa ba taa tiini ba ye woŋo dedoa, se logo baŋa nɔɔna wane ba lɔre we nmo mo toŋe-ne, ye n jege nmo nɔɔna bam swono, nenɛɛne nmo na swoi amo tei to.
24Amo Kwo, a lage se balo nmo na ke a jeŋa ne to taa tɔge ba wo amo na wo mɛ to, se ko pa ba na amo na jege nenɔŋ-fɔrɔ kolo to. Ko ye nmo na maŋe n jege amo swono faŋa faŋa ye logo baŋa daa ta wo ke to ŋwaane mo n pɛ-ne nenɔŋ-fɔrɔ kom konto. 25Amo Kwo, nmo ye Chega Tu. Logo baŋa nɔɔna bam nam yeiri nmo. Ko daare amo yei nmo, ye a nɔɔna bam yei we nmo mo toŋe-ne. 26Amo nam pɛ se ba lɔre nmo na ye wolo to, ye a daa ta wó taa ke konto mo se ko pa swono kolo nmo na jege amo ŋwaane to taa wo banto de tei ne. Amo tete de maa wó me de-ba.”
Šiuo metu pasirinkta:
Jɔn 17: KBG
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2020, Ghana Institute of Linguistics, Literacy and Bible Translation (GILLBT)