Jɔn 16
16
1“Amo nam ŋɔɔne wonnu tento a bere abam se ko pa á yé ywori Wɛ chwoŋa kam ne. 2Ba nam wó le abam ba jeerim di sem ne. Maŋa lage ka ba ye nɔɔno wolo ná go abam, kotu wó boŋe we o ke totoŋ-laao mo o pa Wɛ. 3Ba nam wó ke abam wonnu tem konto, kolo ŋwaane ba yeiri amo Kwo wom, ye ba ta yeiri amo de. 4Amo tɛ wonnu tento maama se te maŋa kam ná yia, se á wane á guli we amo maŋe a ta te taane a bere abam.
Amo wo tage wonnu tem konto a bere abam boboa ne, kolo ŋwaane amo ya ta wo abam tei ne mo. 5Ko daare leile konto amo lage a vo wolo wom na toŋe-ne to tei. Abam wolowolo nam wo bwei-ne we, ‘Nmo lage n vo yei ne mo?’ 6Amo nam tage a bere abam kolo na lage ko ke to, ye ko pa á wo tiini ko chɔge. 7Ko daare a laam tɛ abam chega mo we, amo ná viiri, ko wó taa lana ko pa abam. Kolo ŋwaane amo ná wo viiri, Zeinnu wom bá ba abam tei. Amo nam ná viiri, a laam wó toŋe‑o se o ba abam tei. 8O nam ná tua, o wó pa logo baŋa nɔɔna lɔre we ba tusi mo wɛleera keim seeni, de Wɛ chega kam seeni, de Wɛ borem dem seeni. 9O wó bere-ba we ba tusi wɛleera seeni de ba na wo sɛ amo to mo. 10O ta wó bere-ba we ba tusi Wɛ chega kam seeni, kolo ŋwaane a lage a vo a Kwo Wɛ tei, ye á daa bá na-ne. 11O ta wó bere-ba we ba tusi Wɛ borem dem seeni, kolo ŋwaane logo baŋa dedɛɛro wom maŋe o to de o bora.
12Amo ya ta jege wonnu dedɛ se a ta a bere abam, ye te nam wó taa tiini te chamma te dwoi á jaanem. 13Ko daare Wɛ Sin-laao kom ye chega tu mo. O ná tua, o laam wó pa se á ba á lɔre chega kam maama. Ko nam dae o tete nyem mo o lage o ŋɔɔne. O wó ŋɔɔne kolo o na nigi Wɛ tei ne to mo, o ma daare o ta wonnu telo na lage te ba to o bere abam. 14O nam wó pa amo na zula, kolo ŋwaane o wó kwei amo chega kam mo o bere abam. 15Amo Kwo wom na jege kolo maama to ye amo de nyem mo. Mo kokuri a tage a we, o Sin-laao kom wó kwei amo nyem dem o ma bere abam.
16Ko ná ke fee, abam daa bá na amo, ye ko daa ta ná ke fee ko woli da, á daa wó jwoori á na-ne.”
Wo-chechɔgɔ wó pipiri ko ji wopwolo
17Yezu na tage konto to, o kwaga tɔgena badaara maa tɛ daane ba we, “O na tage o we, ko ná ke fee dé daa bá na‑o, ye ko daa ta ná ke fee, dé daa wó na‑o to, konto kuri mo bɛ? O nam ta tage o we, ko ye o na lage o vo o Kwo tei to ŋwaane mo. Dé yeiri ko kuri.” 18Ba ta maa tiini ba bwɛ daane ba we, “O na tage o we, ‘ko ná ke fee’ to, ko kuri mo bɛ? Dé yeiri o na tɛ kolo to kuri.”
19Yezu ma lɔre we ba lage se ba bwei‑o taane. O ma ta de-ba o we, “Á na bwɛ daane tei to, ko ye amo na tage a we, ‘ko ná ke fee á daa bá na-ne, ye ko daa ná ke fee, á wó na-ne’ to ŋwaane mo na? 20A tɛ abam chega ŋwaane to, abam wó ba á keeri dedɛ wo-chechɔgɔ ŋwaane. Ko daare logo baŋa nɔɔna bam wó taa jege wopwolo. Abam wo maa wó chɔge, ye á wo-chechɔgɔ kom laam wó pipiri ko ji wopwolo.#Matiyu 5:4 21Ko na ye tei to, kaane ná lage o lo bu, o wó taa jege lwia mo, kolo ŋwaane o chanɛɛre maŋa yia. O nam ná loge bu wom, o laam wó swei o chanɛɛre dem ni ne, ye o wó taa jege wopwolo de o na loge bu wom to. 22Ko nam ye konto mo de abam de. Leile konto á jege lwia. Amo nam daa wó jwoori a na abam pa se á tiini á di ywoni, ye nɔɔn-nɔɔno daa bá wane o chɔge á wopwolo kom konto.#Jɔn 20:19-20
23Dɛ dem konto ná yia, abam bá bwei kolokolo amo tei ne. A tɛ abam chega ŋwaane to, amo Kwo wom wó pa abam kolo maama abam na wó lwoori amo yere ŋwaane to. 24De leile konto de, á maŋe á ta wo lwoori kolokolo amo yere ŋwaane. Nam lwoori-na, se á wó na, se ko pa abam wopwolo kom tiini ko gaale.
25Amo na tage wonnu tento a bere abam to, ko ye memaŋa mo a mɛ a ta. Maŋa nam wó ba ye amo daa bá maŋe memaŋa a ma bere abam. Amo nam wó ba a ŋɔɔne a Kwo Wɛ taane jaja mo a bere abam. 26Dɛ dem konto ne, amo daa bá taa jege se a lwoori a Kwo Wɛ abam ŋwaane. Abam mo wó lwoori‑o amo yere ŋwaane, 27kolo ŋwaane Wɛ tete maŋe o jege abam swono, abam na swoi amo ye á kwori á sɛ we a nwoŋi o tei ne to ŋwaane. 28Amo seene a nwoŋi a Kwo Baŋa Wɛ tei mo a ba logo baŋa. Leile konto a lage a yage logo baŋa se a jwoori a vo o tei.”
29Yezu na tage konto to, o kwaga tɔgena bam laam ma ta ded‑o ba we, “Nii, nmo laam tiini n ŋɔɔne jaja mo, ye n daa‑n ba maŋe memaŋa. 30Leile konto dé laam lɔre we nmo yei wonnu maama. Nmo daa‑n ba lage se nɔɔn-nɔɔno bwei‑m taane. Konto nam pɛ se debam sɛ we, nmo seene n nwoŋi Wɛ tei mo.” 31Yezu ma leiri-ba o we, “Abam laam sɛ na? 32Nii-na, maŋa lage ka yi leile konto, ye abam wó jage. Abam dedoa dedoa maa wó jwoori o kwei o chwoŋa o daare amo yerane. Amo nam bá taa ye a yerane, kolo ŋwaane a Kwo wom wó taa wo a tei ne. 33Amo tage wonnu tento a bere abam se ko pa á na bochare-zuru mo, á na me de amo to ŋwaane. Logo baŋa ne á wó na yaara. Nam ta‑á jege-na pu-dɛa. Amo maŋe a wane logo kom baŋa maama.”
Šiuo metu pasirinkta:
Jɔn 16: KBG
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2020, Ghana Institute of Linguistics, Literacy and Bible Translation (GILLBT)