Jɔn 14
14
Yezu de o Kwo wom ye bedwe
1Yezu laam ma ta o we, “Á yé pa á bochara taa maga. Ta‑á jege-na wo-dedoa de Wɛ, se á ke á wo-dedoa de amo de.#1 Piita 3:14-15 2A Kwo wom sɔŋɔ ne, di daga da dedɛ. A nam lage a vo da a kwɛ jei mo a pa abam. Ko ya ná dae chega, a ya bá ta konto de abam. 3Amo ná vei a kwɛ jei sem a ti a pa abam, a laam wó jwoori a ba a ja abam se á tɔge á vo á ta‑á wo amo na wo mɛ to. 4Abam nam yei chwoŋa kalo na vei mɛ amo na lage a vo to.” 5Tomas ma ta ded‑o o we, “Amo tu, debam yeiri nmo na lage n vo mɛ to. Dé nam wó ke tɛ mo dé lɔre ka chwoŋa?” 6Yezu ma ta ded‑o o we, “Amo mo ye chwoŋa kam, de chega kam, de ŋwea kam. Nɔɔn-nɔɔno bá wane o vo a Kwo wom tei ye o wo dɛ amo baŋa o vo.#1 Tim 2:5 7Abam ná maŋe á yei amo, á laam wó ta‑á yei a Kwo wom de. Leile konto abam yei‑o, ye á nam ta nɛ‑o de.”
8Filipi ma ta o we, “Amo tu, pa se dé lɔre n Kwo wom, se konto wó maŋe debam.” 9Yezu ma leiri o we, “Filipi, amo dáane abam tei ne ye nmo ta yeiri amo na? Wolo maama na nɛ amo to nɛ amo Kwo wom mo. Bɛŋwaane mo ye n ta n we, a pa se á na a Kwo wom? 10Amo tigi a Kwo bochare ne ye dé me daane. Nmo nam ba sɛ konto na? Taane delo amo na tage a bere abam to dae amo nyem. Ko nam na ye tei to, amo Kwo wom me de amo, ye o da amo ŋwaane o ke o totoŋa. 11Ta‑á jege-na wo-dedoa de amo we, amo tigi a Kwo wom bochare ne ye dé me daane. Ko ná dae konto, se á ke á wo-dedoa de amo, totoŋa yalo amo na toŋe to ŋwaane. 12A tɛ abam chega ŋwaane to, wolo na ke o wo-dedoa de amo to wó ke kikia yalo dwoŋi amo na ke to. O nam wó ke totoŋ-kamunnu se ko taa dwoi amo na ke tei to, amo na lage a vo a Kwo tei to ŋwaane. 13Amo wó ke kolo maama abam na wó lwoori amo yere ŋwaane to, se ko pa a Kwo Wɛ na zula amo ŋwaane. 14Abam na wó lwoori woŋo kolo maama amo yere ŋwaane to, amo wó ke-ko a pa abam.
15Abam ná swoi amo, á wó toŋe á tɔge a nia yam. 16Amo nam wó ta de a Kwo wom se o pa abam Zeinnu wodwoŋi. Wonto wó taa wo abam tei ne se ko taa vei wuu. 17Wonto mo ye Wɛ Sin-laao kom. O maa ye chega tu. Nɔɔna balo kugu jei na wo logo baŋa ne to nam ware ba sɛ‑o, kolo ŋwaane ba ware ba na‑o, ye ba ta yeiri‑o de. Ko daare abam nam yei‑o, kolo ŋwaane o me de abam, ye o lage o taa wo á bochara ne mo. 18Amo bá kwei abam a yage á yerane. A nam wó jwoori a ba abam tei. 19Ko ná ke fee, logo baŋa nɔɔna daa bá na amo. Abam nam wó na-ne. Amo na jege ŋwea Wɛ tei ne to, abam de wó na ŋwea Wɛ tei ne. 20Abam ná nɛ ŋwea kam konto dwoŋi, dɛ dem konto ne á wó lɔre we amo de a Kwo me daane. Abam ta wó lɔre we á tigi amo bochare ne, ye amo de me de abam.
21Nɔɔno wolo maama na sɛ amo nia yam ye o toŋe o tɔge-ya to mo ye wolo na swoi amo to. Amo Kwo Wɛ wó taa jege wolo na swoi amo to swono. Amo de nam wó taa swoi‑o, ye a kwori a pa o lɔre amo wo na ye tei to.”
22Yezu na tage konto to, nɔɔno wodwoŋi de yere na ye Judas ye ko dae Yisakara bu wom to ma leiri o we, “Amo tu, nmo wó ke tɛ mo n pa se debam lɔre nmo wo na ye tei, ye logo baŋa nɔɔna bam bá lɔre?” 23Yezu ma leiri‑o o we, “Wolo na swoi amo to wó taa tɔge chega kalo amo na bere to. Amo Kwo wó taa jege konto tu swono, ye amo de a Kwo wó ba o tei dé me ded‑o. 24Wolo maama nam na ba swoi amo to ba cheigi amo berem dem. Amo ni taane delo abam na nigi to nam dae amo nyem, se de nwoŋi amo Kwo wolo na toŋe-ne to tei ne mo. 25Maŋa kam a ta na wo abam tei ne to mo a maŋe a ta a bere abam wonnu tem konto. 26Ko daare se Zeinnu wom laam mo ba abam tei. Wonto mo ye Wɛ Sin-laao kom, a Kwo Wɛ na wó toŋe‑o se o ba amo yere ŋwaane to. Wonto wó ta wonnu maama taane jase o bere abam. O maa wó pa se á guli kolo maama amo na maŋe a ta a bere abam to gula.
27Amo yage bochare-zuru mo a pa abam. Ko ye amo tete nyem mo a kwei a pa abam. Amo na lage a pa abam bochare-zuru kolo to, logo baŋa nɔɔna nam yeiri ko dwoŋi. Á yé pa se á bochara taa maga. Á nam yé ta‑á jege lwia de. 28Abam maŋe á ni amo na tage de abam we, a lage a viiri, ye a ta wó jwoori a ba á tei. Abam ya ná swoi amo, á wó ta‑á jege ywoni dedaane amo na lage a vo a Kwo Wɛ tei to, o na dwoi amo to ŋwaane. 29Amo nam wuuri a ta wonnu tento a bere abam mo ye te ta wo ke, se te ná tu te ke, se á wane á sɛ amo taane dem. 30Amo daa bá na chwoŋa se a ŋɔɔne taane dedɛ de abam, logo baŋa dedɛɛro wom na lage o ba to ŋwaane. Wonto nam bá wane o dwoni de amo. 31Amo nam jege se a pa balo na jege kugu jei logo baŋa ne to lɔre we, amo jege a Kwo wom swono. Konto ŋwaane mo a ke kolo maama a Kwo na pɛ-ne ni se a ke to.
Á nam zaŋe-na ywo-seeni se dé viiri.”
Šiuo metu pasirinkta:
Jɔn 14: KBG
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2020, Ghana Institute of Linguistics, Literacy and Bible Translation (GILLBT)