Rôm̃i 8
8
1N’ayiviri Sol ijuwa si Stefan. N’aṉongwi ntyugu mèyoṉo ikombize sipôlô si mandô y’avegagi gô Yerusalèm; n’avazangaṉi waôdu, tômbare pa rôm̃i, gô ntye yôdu yi Yuda ni Samarya. 2Aṉaga w’Anyambyè w’aṽèṉi Stefan, aleṉiṉè edingô evôlô. 3Ndô Sol ayilizi mandô, njingiṉaga gw’inagô, agôtag’aṉôm̃e n’antô, awela waô gô ntyôgô.
4Yeṉo waô w’avazanganyô w’agèndi gô mbôry’edu, mbunguṉag’igamba nyi ntyangô mbya.
5Azum̃iṉi Filipi gô nkala yi Samarya, agambiṉa waô Krist. 6Aṉaga waôdu w’avôganyô n’ôrèm̃’ôm̃ô isam̃u y’awulyô ne Filipi, gw’ayogyô waô ayeṉe lemba y’alendyô yè. 7Konde aṉiṉa m’isèkè m’agogwi avila gôr’awenge w’avegagi n’aṉiṉ’ambe, mbôgiṉaga n’inyôy ivôlô, n’awenge w’avegagi juwa p’awogo ni bôke w’ayingyô. 8N’arweṉ’igeṽ’ivôlô gô nkala mèyoṉo.
9Ndô vovo avegag’ôma, ini nyè ne Simôn, aliwô asèṉag’imônda gô nkala, am̃amize mongi Samarya, ntevag’ôkuṽi wè inè, ayè ôm’ômpôlô. 10Ayogiṉô yè ne waôdu, avila gôr’awangô kwanga gôr’aṉèro, awulya inè: Wiṉo ne ngulu mpôlô y’Anyambyè. 11N’avôganyô yè waô mbyambye, konde nè aliwô am̃amizi waô ôling’ôla ni lemba y’isèṉi sè s’avôṉô. 12Ndô, gw’aṽekelyi waô Filipi, y’agambiṉi waô isam̃u g’ômwanja w’iṉongo ny’Anyambyè n’ina nyi Yesu‐Krist, w’aṽatizyô aṉôm̃e n’antô ta. 13Simôn kè aṽekelyi, n’ayè batizyô pa, alwaṉagi ni Filipi, na gw’ayeṉi yè lemba n’isam̃u yi mamô y’alendyôgô ne Filipi, am̃ami.
14Gw’ayogyô rôm̃i y’avegagi gô Yerusalèm inè, Samarya abong’igamba ny’Anyambyè, w’arôm̃i Pyère ni Yôan gôgô. 15Gw’aṽyeṉi mongi siṉo gôre mongi Samarya, w’agambiṉ’Anyambyè g’ômwanji waô inè, wi ga vô Iṉiṉ’Iṽya. 16Konde nyi pa diwô sum̃iṉa gôr’ôm’edu gôre waô, w’aliwô batizyô dadyè gw’ina nya Rerè Yesu. 17Vovo Pyère ni Yôan w’aralyi ago maô gôre waô, n’avenyô waô Iṉiṉ’Iṽya.
18Gw’ayeṉi Simôn inè, gw’italya s’ago mi rôm̃i Iṉiṉ’Iṽya ny’avenyô, aṽeli gô pa waô sika, awulya inè: 19Vaṉi myè kè ngulu yiṉo, k’ôm’edu e be talyô myè ago mam̃ pô Iṉiṉ’Iṽya. 20Ndô Pyère awulinyi yè inè: Siki yo yi ga vere na wè, konde ô re pikilya pa inè, isam̃u y’Anyambyè yi dèngô ni sika! 21Ô zele ni mbèy ge inyanga gw’igamba nyiṉo, konde ôrèm̃i wo wi zele gôre g’ôzô w’Anyambyè. 22Sambô ṉige nkôndi avila gw’ibe so siṉo, ko kambiṉe Rerè, vendetwa ipikilya s’ôrèm̃i wo si be nyezô wè; 23konde mi jeṉa nè, ô re gô ntyua yi nôṉe na gô ntyôgô y’ibe. 24Awiṉizi Simôn inè: Gambiṉaṉi ṉwè Rerè g’ômwanji wam̃ inè, isam̃u yi re ṉwè kamba pa y’aṽya gôre myè.
25Pyère ni Yôan takilya pa, agamb’igamba nya Rerè, w’awinyi gô Yerusalèm, mbunguṉage ntyangô mbya gw’inkal’myenge sa mongi Samarya.
26Yenjèl ya Rerè y’agambi ni Filipi awulinyè inè: Gum̃aṉa, ko kènda gô nkôṽa yi Sud, gô mpoṉo yi sum̃iṉa avila gô Yerusalèm agènda gô Gaza, mbôra mèyoṉo yi zele n’aṉaga. 27N’agum̃aṉi yè agènda. Na vôna, mw’Etyôp, ôvanguṉe, miṉisè yi Kandakè, y’ôg’ômwantô wa mongi Etyôp, avenjavenjag’igumbi nyè nyôdu, aliwô abyeṉi gô Yerusalèm gô saviṉ’Anyambyè; 28na gw’awinyagi yè, dwaṉa pa baru gô ntyôṉe yè, aranguṉag’ezangô z’ôvogisi Yezaya. 29Awuliny’Iṉiṉa Filipi nè: Gènda, ko sèvya pyèrè ni ntyôṉe mèyoṉo. 30N’avali Filipi mangô gôre yè, ayogo yè e tanguṉ’ezangô z’ôvogisi Yezaya. N’awulinyè yè inè: Ô kôtiz’isam̃u yi tanguṉô wè? 31Awiṉizi yè inè: Mi ko kôtiza sèṉi, j’ôma aṽènguṉa myè? N’aweyi yè Filipi gô panda alwaṉa baru na yè.
32Mbôra y’Irèndo y’aranguṉôgô yè ne yiṉo inè: Agèndyô g’idombè gô bazô, na g’ômwidombè wi r’im̃am̃u g’ôzô w’ôma wi sèngiṉa wô, yeṉo kè e pa nunguṉa du ôgwaṉi wè. 33Gw’isônyô sè, ijèkèlyi sè s’arômbyô. Na mongi w’ivôm̃i nyè, mande ko takilya waô? Konde em̃èṉo zè z’azèryô avila gô ntye. 34N’awuliny’ôvanguṉe Filipi nè: Kokolo, ôvogisi e kamba yeṉo g’ômwanja wa mande? G’ômwanja w’ôkuṽi wèmè, mbè g’ômwanja w’ôm’ômwèṉè? 35N’aṉunguṉi Filipi ôgwaṉi wè, avakilya avila gw’irèndo mèyoṉo, amyezè Yesu.
36Gw’agèndagi waô gô mpoṉo, w’aṽyeṉi gw’aṉingô. N’awulyi ôvanguṉe inè: Vèṉo e r’aṉingô; ezom̃a nde zi dega myè gô batizô? 37Awulyi Filipi nè: J’aw’abekelya n’ôrèm̃i wo wôdu, zô ko jolyô. Awiṉiz’ôvanguṉe inè: Mi bekelya nè, Yesu‐Krist ne Ômwaṉa w’Anyambyè. 38Vovo azimbizi ntyôṉe yè: n’azum̃iṉi Filipi n’ôvanguṉe waô aṽaṉi gw’aṉingô, n’aṽatizi Filipi ôvanguṉe. 39Gw’aralwi waô avila gw’aṉingô, Iṉiṉa nya Rerè ny’arômbi Filipi, n’ôvanguṉe e pa tô jeṉè nyèṉè. Ndô gw’agèndi yè gô mpoṉo, njeṉage mbya, Filipi alèngyô gw’Azot, 40n’agèndi yè kwanga gô Sezarya, nkambiṉage ntyangô mbya gw’inkala sôdu s’avyaganyô yè.
Šiuo metu pasirinkta:
Rôm̃i 8: MYE
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Published by the British and Foreign Bible Society in 1927.