Rôm̃i 7
7
1Awulyi miṉisè mpôlô inè: Ngo! isam̃u yiṉo yi re yeṉo?
2Awiṉizi Stefan inè:
Awarera n’irerè, vôganyôreṉi! Anyambyè y’ônjèlènjèlè awôm̃unyi gôre reri yazô Abraam, gw’avegagi yè gô Mesôpôtamya, ayè lwaṉaga ro gô Karan; 3awulinyè inè: Lubwa avila gô ntye yo, n’avila gô mbuṽe yo, ko kènda gô ntye yi be teva myè wè. 4Vovo agogwi yè avila gô ntye ya mongi Kalde, alwaṉa gô Karan, kwanga gw’ayuwi reri yè. Avila vovo, arômbi yè avila gô ntye mèyoṉo yi dwaṉô ṉwè vèṉo; 5ndô e pa pa yè iṉiva gô yô, vangaṉe mbôra yi jarô n’intyôzô sè, ndô avangaṉi na yè gô pè gô niva yô na gôr’awaṉi wè gô nyum̃i yè, vangaṉe e pa diwô adèngi ômwaṉa. 6Anyambyè agambi yeṉo inè: Awaṉi wè wi be dwaṉa gô ntye yi ngaṉi; ko mongi mè tugiza waô ayeṉiza waô azingô inkam̃a s’impum̃a nay. 7Ndô Anyambyè awulyi nè, iṉongo nyi be panga waô asaka, mi be jèkèlya nyô. N’avila vovo wi be kogwa, ayanjiṉa myè gô mbôra yiṉo. 8N’aveṉi Anyambyè njeka y’ikèra gôr’Abraam; yeṉo ayaṉ’Abraam Izaak, agèrè gô ntyugu y’eṉanay; n’ayaṉ’Izaak Yakob agèrè kè; n’ayaṉi Yakob irerè inônga igôm̃i ni mbaṉi.
9Irerè inônga s’ayeṉi Yôsèf ñandi, agôlè gw’Egipt. 10Ndô Anyambyè avegagi na yè, azungiṉè avila gw’injuke sè sôdu, avè imya, avangè gô dèng’imèpiṉô g’ôzô wi Faraô, n’avangyè yè gô dwaṉ’ôvangiṉi w’Egipt ni nagô yè yôdu.
11N’aṽyeṉi njaṉa gw’Egipt yôdu na gô Kanaan. N’azingô m’avegagi ampôlô, n’ireri sazô si pa dèng’ezom̃a zi nya. 12Ndô gw’ayogyô Yakob inè, ibile si re gw’Egipt, arôm̃i yè ireri sazô nyongo nônga gôgô. 13Ni nyongo yi mbaṉi Yôsèf amyenyô n’awareri yè, n’arum̃inyô mbuṽe yi Yôsèf gôre Faraô. 14N’arôm̃i Yôsèf gô kôve reri yè Yakob ni nagô yè yôdu, y’avegag’agôm̃i m’aṉaga ôrwageṉô n’aṉag’ataṉè. 15N’azum̃iṉi Yakob gw’Egipt, n’ayuwi yè vovo, n’ireri sazô s’ayuwi kè; 16n’arwanyô waô gô Sikèm, alimbiṉô g’ôrôngiṉô w’agôlyô n’Abraam gôr’awaṉa w’Emor, rerè yi Sikèm, n’igôlô nyi sika.
17Gw’azus’egômbe z’ômpangaṉô w’avanganyô n’Anyambyè n’Abraam pyèrè gô dendô, aṉaga w’awuṉi pôlô gw’Egipt, 18kwanga gw’avandi ôg’ômwèṉè gw’Egipt, wi re wi pa mye Yôsèf. 19Ôga wiṉo ayanji n’avôṉô gôr’iṉongo nyazô, alendiṉ’ireri sazô mbe, ko yè panga waô gô pung’awaṉi waô, waô vende tôla.
20Gw’egômbe mèzoṉo ayanyô Môsès, avegagi mèpe jeṉô gw’antyo m’Anyambyè. N’avenjavenjô yè agwèli ararô gô nagô ya reri yè; 21na gw’awalyô yè, ômwaṉ’ômwantô wi Faraô awongi yè, avôm̃yè g’ômwaṉi wèmè. 22N’aṉènjyô Môsès gw’imya sôdu sa mongi Egipt, n’avegagi yè ni ngulu gw’igamba na gw’ijanja.
23Gw’arweṉi yè agôm̃i m’impum̃’anay g’ôṉèro wè, aṽyeṉ’ipikilya g’ôrèm̃i wè inè, e ga gènde gô bal’awareri yè, awaṉa w’Israèl. 24Na gw’ayeṉi yè ôm̃ori e dendiṉô mbe, agaṉi yè, awiz’ekôlè z’ôma w’alendinyô mbe, n’awôli yè mw’Egipt. 25Avikilyi nè, awareri yè wi be kôtiza inè, Anyambyè e pa waô isungiṉa vo ôgo wè, ndô wi pa kôtiza. 26Bunya, aṽyeṉi yè gôre waô gw’aṉweṉagi waô; gw’aṽeli yè gô mèpyaṉa waô, awulyi nè: Aṉw’ are awarerè, ntiṉa nde yi dendiṉa ṉwè mbe? 27Ndô ayè y’alendiṉi ôrangaṉô wè mbe aziki yè, awulya inè: Mande alôṽyi wè ôvangiṉi n’ôma wi teṉiz’isam̃u gôre zwè? 28Ô bela gô jôṉa myè, ga nt’ayôṉi wè mw’Egipt jaô? 29Gw’igamba nyiṉo, awangi Môsès, age dwaṉa gô ntye yi Madyan; ayaṉi yè gôgô awaṉ’aṉôm̃e aṽaṉi.
30Gw’am̃aṉ’agôm̃i m’impum̃’anay, yenjèl y’awôm̃unyi gôre yè, gw’itôve si nômba yi Sina, gw’ibam̃iṉa s’ôgôṉi gô mw’erere. 31Gw’ayeṉi Môsès yeṉo, am̃ami g’ômwanja w’ezom̃a mèzoṉo z’ayenyô yè; na gw’azèvi yè pyèrè gô pôna ayogaṉô inyôy nya Rerè inè: 32Myè n’Anyambyè y’ireri so, Anyambyè y’Abraam, n’Anyambyè y’Izaak na yi Yakob. N’ayègèri Môsès ko y’arô dèng’ôrèm̃a gô pôna. 33N’awulinyô yè ne Rerè inè: Rômb’intyôzô so s’atanga avila gw’intyôzô so, konde mbôra yi re wè kum̃aṉa pa gôre yi re mbôra y’ôrunda. 34Rèti my’are jeṉa p’azingô m’aṉagi wam̃ wi re gw’Egipt, my’are jogo p’isim̃iṉi saô, my’are sum̃iṉa pa kè gô sungiṉa waô. Na vèṉo, gènda, mi be tôm̃o gw’Egipt.
35Môsès mè y’aṽikyô waô, awulya inè: Mande alôṽyi wè ôvangiṉi n’ôma wi teṉiz’isam̃u? ayè mèmô arôm̃yô n’Anyambyè n’ôgo wi yenjèl y’awôm̃unyi gôre yè gô mw’erere, gô dwaṉ’ôvangiṉi n’ôzungè. 36Ayè ne yè y’agogunyi waô avila gw’Egipt, ndendag’isam̃u yi mamô ni lemba gô ntye y’Egipt, na gô mbeṉe mbondi, na gw’itôve agôm̃i m’impum̃’anay. 37Ayè ne Môsès mè y’awuliny’Israèl inè: Anyambyè e be nonguny’ôvogisi gôre ṉwè avila gôr’awareri yaṉi egolaṉi ga myè. 38Wiṉo ne yè y’avegagi gô mandô egômbe mè gw’itôve, ni yenjèl y’agambi na yè gô nômba yi Sina avegagi n’ireri sazô, avenyô kè agamba ma bo avila gôr’Anyambyè, gô pa zwè mô. 39Ireri sazô si pa jivira gô jogiṉô yè, ndô w’arômbi yè, ageguny’irèm̃i yaô gw’Egipt, awuliny’Aarône inè: 40Vangiṉa zwè inyambyè si kènda gô bôsô yazô, konde Môsès yiṉo y’agogunyi zwè avila gô ntye y’Egipt, azwè pa mya nt’are twa pa gôre yè. 41Gw’intyugu mèsoṉo w’avangi mwô’nyare, n’ayiri waô ntyagô g’ôgaṉa, ayeṉe mbya gw’ijanja s’ago maô. 42N’agegwi Anyambyè, azenja waô gô janjiṉ’imbèli s’ôrôṽa, ga nt’are tendô pa gw’ezangô z’ivogisi, inè: Aṉwè, nagô y’Israèl, aṉw’ayiriṉi myè inyam̃a s’ayônyô n’intyagô gw’itôve agôm̃i m’impum̃’anay? 43Arwaṉi ṉwè nagô y’ikuku yi Môlok n’ôgègèṉi w’Anyambyè yaṉi yi fweyô inè, Remfan, ikaṉa siṉo aṉw’avangi sô gô saviṉa sô! Yeṉo be twaṉa myè ṉwè vyagaṉô Babèl.
44Ireri sazô s’avegagi ni nagô y’ikuku y’adô mi mbèṽè m’ampanga gw’itôve ga nt’azômbyô yè n’ôma w’awulinyi Môsès gô denda yô, ga nt’avegag’egolaṉi z’ayenyô yè. 45N’ireri sazô, pô pa yô, w’ayinginyi yô ni Yôsua gô ntye y’aṉivyô n’aṉongo m’azugyô n’Anyambyè avila gô bôsô yaô, alwaṉa gô yô kwanga gw’intyugu si David. 46David alèng’imèpiṉô g’ôzô w’Anyambyè, n’aṽambyi yè gô dèngiṉ’Anyambyè yi Yakob mbôra yi dwaṉa; 47ndô Salômôn aṉôgiṉi yè nagô. 48Ndô Ôma w’igôṉômè e pa dwaṉa gw’inagô si nôgô n’ago m’aṉaga, ga nte buly’ôvogisi inè: 49Ôrôṽa n’eki zam̃, ni ntye n’iyariṉô ny’agôlô mam̃. Aṉwè be nôgiṉa myè nagô ôṉongo nde, bulye Rerè, ge mbôra y’ijowi sam̃ yi be dwaṉ’ôṉongo nde? 50Arang’ôgo wam̃ w’avangi yom̃a yiṉo yôdu?
51Aṉw’aṉaga w’impel’iyoli n’izombè gw’irèm̃a na gw’arôy! aṉwè sir’Iṉiṉ’Iṽya egômbe zôdu. Aṉwè denda kè, ga nt’alend’ireri saṉi. 52Gôr’ôvogisi weṉi wi re e pa kombizô n’ireri saṉi? W’ayôṉi mongi w’arevi g’ômwanja w’ibya s’Ôma w’ôgôre egômbe ṽyagaga ro, are ṉwè vèṉo kôtiza pa, ayôṉa, 53aṉwè y’avenyô ivanga vo isômbya si yenjèl, ko ṉwè avenjavenja nyô.
54Gw’ayogyô waô agamba miṉo, w’ayeṉi mbe gw’irèm̃i yaô n’agombi waô anô g’ômwanji wè. 55Ndô Stefan avegagi ralye n’Iṉiṉ’Iṽya, n’avôni yè g’ôrôṽa, ayeṉ’ivenda ny’Anyambyè ni Yesu kum̃aṉa pa gôre g’ôg’ôṉôm̃yè w’Anyambyè. 56N’awulyi yè inè: Vônaṉi, mi jeṉ’ôrôṽa nunguṉô pa zange, n’Ômwaṉa w’ôma kum̃aṉa pa gôre g’ôg’ôṉôm̃yè w’Anyambyè. 57N’awôgiṉi waô n’inyôy ivôlô, aṉunj’arôy maô, ayiraṉe mpo mô gôre yè; 58n’agogunyi waô yè avila gô nkala, avungè adô. Iyeṉi w’alimbiṉ’ingoy saô gw’agôlô m’iwanjo, ini nyè ne Sol. 59N’avungi waô Stefan adô, ayè kambiṉaga, awulya inè: Rera Yesu, wong’iṉiṉi nyam̃! 60N’alôṽi yè akotolo, arônga n’inyôy ivôlô, inè: Arangiṉa waô ibe siṉo! Ayè kamba p’agamba miṉo, ayuwi yè.
Šiuo metu pasirinkta:
Rôm̃i 7: MYE
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Published by the British and Foreign Bible Society in 1927.