Rôm̃i 6
6
1Gw’egômbe mèzoṉo, gw’awuṉi ntangô y’iṉèngi, Elenisti w’alagalagi, azoz’Ebèr, konde itiki yaô y’aṉim̃inyô gw’ikera si ntyugw’edu. 2N’igôm̃i nyi rôm̃i ni rôm̃i ṽaṉi w’awey’iṉèngi yôdu gôre waô, awulya inè: E zele kwèkwè gôre zwè gô tig’igamba ny’Anyambyè gô janjiṉ’itavulu. 3Sambô, awarera, vinjaṉi avila gôre ṉwè aṉôm̃e ôrwageṉô, wi re n’elum̃i eṽya, ralye kè n’Iṉiṉa n’imya, ko zwè dôṽya waô gw’eṽilô ziṉo. 4N’azwè, azwè be dwaṉa kaô du gw’ikambiṉa na gw’eṽilô z’igamba.
5N’igamba nyiṉo ny’arondy’aṉaga waôdu. N’avinji waô Stefan, ôma w’avegagi ralye n’ibekelya n’Iṉiṉ’Iṽya, ni Filipi, ni Prôkore, ni Nikanor, ni Timon, ni Parmenas, ni Nikôla ya mw’Aṉongam̃a w’avili gw’Antyok. 6W’alôṽyi mongi siṉo gw’azô mi rôm̃i, na waô kambiṉa pa, w’aralyi ago gôre waô.
7Igamba ny’Anyambyè ny’avendi pôlô, ni ntangô y’iṉèngi y’awuṉi pôlô vyagaṉô gô Yerusalèm, ni nkumba mpôlô y’imiṉisè y’ayoginyô ibekelya.
8Stefan avegagi ralye n’imèpiṉô ni ngulu, ndendag’isam̃u yi mamô ni lemba vôlô gôr’aṉaga. 9N’aṉongw’awèwo avila gôre waô wi mandô yi fweyô inè, mandô ya waô w’alandunyô, na wi mandô ya mongi Kirèni, na wa mongi Alekisandrya, na w’Iju wi dwaṉa gô Kilikya na gw’Azya, w’avakilyi gô dôṽe mpaga ni Stefan; 10ndô wi pa jolye kum̃aṉa gw’imya na gw’Iṉiṉa ny’agambi na yè. 11Vovo w’age mogi n’aṉaga, w’awulyi nè: Azw’are jogo p’ayè e kamb’agamba m’ipèdya gôre Môsès na gôr’Anyambyè. 12N’arumbi waô aṉaga, n’aṉèro n’irèndisi, aṽya gôre yè, agôtè, aṽagè gôr’ôvagô. 13N’alôṽyi waô iyeṉi y’inôka y’awulyi nè: Ôma wiṉo e pa tiga du gô kamb’agamba mi sire mbôra yiṉo y’ôrunda na mi sir’ivanga kè: 14konde azw’are yè jogo pa e bulya inè, Yesu yi Nazarèt yiṉo, e be jilize mbôra yiṉo, agaluṉ’intyale s’avenyô zwè ne Môsès.
15Na waôdu w’alwaṉi g’ôvagô w’avôni Stefan ngolongolo, ayeṉ’ôzô wè ga ôzô wi yenjèl.
Šiuo metu pasirinkta:
Rôm̃i 6: MYE
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Published by the British and Foreign Bible Society in 1927.