Rôm̃i 11
11
1Ayogyô rôm̃i n’awarerè w’avegagi gô Yuda inè, aṉongo m’abongi kè igamba ny’Anyambyè. 2Na gw’avandi Pyère gô Yerusalèm waô w’avegagi kèrô pa w’azèmbi yè, awulya inè: 3W’ayingiṉi gôre mongi wi r’izombè, anya na waô.
4Avakilyi Pyère gô bènguṉa nt’arweṉ’igamba. Awulyi yè inè: 5My’avegagi gô nkala yi Yôpa, na gw’agambiṉagi myè, my’avôswi egolaṉi ga gw’antyôviṉô, n’ayinô myè nyinô: ezom̃a egolaṉi g’ôṉamb’ômpôlô kôtô pa gw’intyôrô sô nay, wi sônyô avila g’ôrôṽa aṽya kwanga gôre myè. 6N’avôni myè ôṉamba mèwoṉo, agèlagèla, n’ayeṉi myè inyam̃a si ntye s’impondo inay, n’inyam̃a s’iga, ni vugiṉa yi dandalanda, n’inyoṉi s’igôṉô. 7N’ayogyô myè inyôy nyi bulinya myè inè: Gum̃aṉa, Pyère, yôṉa ko nya. 8Ndô my’awulyi nè: Nyawè, Rera, konde e zel’ezom̃a z’enyanyambyè g’ezom̃a z’isèkè zi re jingiṉa pa ni mori g’ôgwaṉi wam̃. 9Na gô nyongo yi mbaṉi inyôy ny’ayogaṉô avila g’ôrôṽa inè: Ezom̃a zi r’Anyambyè panga pe nkèrè, avôna zô inè, ezom̃a z’isèkè. 10Igamba nyiṉo ny’agambyô nyongo ntyarô; n’arô duryô yom̃a yôdu g’ôrôṽa. 11Na vôna, agum̃aṉi pelè, swaswo n’ômpômbala wi nagô y’avegagi myè, aṉôm̃e ararô w’arôm̃yô avila gô Sezare aṽya gôre myè. 12N’awulinyô myè n’Iṉiṉa gô kènda na waô mpaga fo. Aṉôm̃e wiṉo ôrôṽa w’agèndi kè na myè, n’ayingiṉi zwè gô nagô yi Kornelyos. 13Ôma mèwoṉo arakilyi zwè nt’aliwô yè ajeṉi yenjèl gô nagô yè nkum̃aṉaga swaswo na yè, awulya inè: Rôm̃a gô Yôpa, ko kôve Simôn, e fweyô inè, Pyère, 14ayè be bulinyo isam̃u yi re wè ko sungiṉô, awè n’inyômbi nyo nyôdu. 15Na gw’avakilyi myè gô kamba, Iṉiṉ’Iṽya ny’azum̃iṉi gôre waô, ga nt’azum̃iṉi nyô gôre zwè gw’ipakilya. 16N’ayônginyi myè igamba mè nya Rerè, nt’awulyi yè inè: Yôan aṽatizi n’aṉingô, ndô aṉwè be batizyô n’Iṉiṉ’Iṽya. 17Ndô gô re nè Anyambyè aveṉi waô ga nt’aveṉi yè zwè, gw’aṽekelyi zwè Rerè Yesu‐Krist, myè, mi ko jolye sir’Anyambyè?
18Waô jogo p’isam̃u yiṉo, w’alwaṉi dodo, azum̃iny’Anyambyè, awulya inè: Sambô Anyambyè are pa p’aṉongo kè iniga si nkôndi gw’em̃èṉo.
19Waô w’avazanganyô n’ikombiza s’aṉongwi g’ômwanja wi Stefan, w’agèndi kwanga gô Foynike, na gô nenge yi Kiprus, na gw’Antyok, nkambiṉag’igamba kaô gôr’Iju dadyè. 20Ndô awèwo gôre waô, aṉôm̃e wi Kiprus na wi Kirèni, gw’aṽyeṉi waô gw’Antyok, w’agambi gôre Grèk, nkambiṉaga waô ntyangô mbya ya Rerè Yesu. 21Ôgo wa Rerè w’avegagi na waô, ni ntangô mpôlô y’aṉaga w’aṽekelyi agalwa gôre Rerè.
22Ntyangô g’ômwanji waô y’aṽyeṉi gw’arôy m’ikirisoṉi si mandô yi Yerusalèm, n’arôm̃i waô Barnabas gô kènda kwanga gw’Antyok. 23Gw’aṽyeṉi yè, ko yè jeṉ’imèpiṉô s’Anyambyè, ayeṉi mbya, arevuṉa waôdu inè, wi ga gôte Rerè ngèngèngè n’irèm̃i yaô yôdu. 24Konde avegag’ôm’ombya, ralye n’Iṉiṉ’Iṽya n’ibekelya. N’agundyô aṉag’awenge gôre Rerè.
25Avila vovo agèndi Barnabas gô Tarsis gô bute Sol, na gw’alèngyè yè, aṽagi yè gw’Antyok. 26N’arweṉi nè ômpum̃a wôdudu w’alataṉagi ni mandô, aṉènj’aṉag’awenge. Iṉèngi y’alônge fweyô inè, ikirisoṉi, gw’Antyok.
27Gw’egômbe mèzoṉo azum̃iṉ’ivogisi avila gô Yerusalèm agènda gw’Antyok. 28N’ôm̃ori gôre waô, ini nyè ne Agabus, agum̃aṉi, amyeza n’Iṉiṉa inè, e be dwaṉe njaṉa mpôlô gô ntye yôdu. Y’aṽyeṉi gw’egômbe zi Klôdyon. 29N’agenj’iṉèngi ôm’edu ga nt’avegagi ngulu yè, gô twaz’iṉunguṉa gôr’awarerè w’alwaṉagi gô Yuda. 30W’alendi yeṉo kè ntwazaga sô gôr’aṉèro n’ago mi Barnabas ni Sol.
Šiuo metu pasirinkta:
Rôm̃i 11: MYE
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Published by the British and Foreign Bible Society in 1927.