Rôm̃i 10
10
1Avegag’ôṉôm̃e gô Sezarya, ini nyè ne Kornelyos, ewônjô zi nkumba y’isozè yi fweyô inè, italyan. 2Ôma mèwoṉo avegag’ôma wi saviṉ’Anyambyè aryè, ayè n’inyômbi nyè nyôdu; aveṉigi mpagaga nyenge gôr’ikuge, agambiṉ’Anyambyè egômbe zôdu.
3Gw’igwèra ny’eṉôgôm̃i ny’ôwenja ayeṉi bômbe gô nyinô yenjèl y’Anyambyè yi jingiṉa gôre yè, awulinyè inè: Kornelyos! 4N’avônyè yè ngolongolo, agôtô akete, n’awiṉizè yè inè: Ezom̃a nde ziṉo, Rera? N’awulinyô yè ne yenjèl inè: Ikambiṉi so ni mpagagi yo y’apandi gôr’Anyambyè, n’Anyambyè ajônginyi sô. 5Ndô vèṉo rôm̃’aṉaga gô Yôpa gô kôve Simôn, e fweyô inè, Pyère; 6e dwaṉa ni Simôn yi pange banda, nagô yè yi re pyèrè ni mbeṉe.
7Yenjèl y’agambi na yè kènda pa, Kornelyos awey’aṉag’aṽaṉi avila gôr’inyôngô sè, ni sozè mori y’azaviṉag’Anyambyè avila gôre waô w’avengiṉagi yè pèkèpèkè; 8ayè takilya pa waô isam̃u yôdu, arôm̃i yè waô gô Yôpa.
9Bunya, gw’avegagi waô gô mpoṉo, na gw’arweṉi waô pyèrè ni nkala, Pyère avandi gw’igôṉô nyi nagô, gw’igwèra ny’ôrôṽa, gô kambiṉa. 10Ayogyô yè njaṉa, aṽela gô nya. Ndô gw’agekizagi waô inya, avôswi egolaṉi ga gw’antyôviṉô. 11Ayèṉi yè ôrôṽa nungwa pa, n’ezom̃a egolaṉi g’ôṉamb’ômpôlô w’ivèla kôtô pa gw’intyôrô sô nay, wi sum̃iṉa azônyô gô ntye. 12Gô zô avegag’aṉongo m’ayam̃a m’impondo inay ni vugiṉa yi dandalanda gô ntye, n’inyoṉi s’igôṉô. 13N’aṽyeṉ’inyôy gôre yè awulya inè: Ṉongwa, Pyère, yôṉa ko nya. 14Ndô Pyère awulyi nè: Nyawè, Rera, konde mi pa ny’ezom̃a z’enyanyambyè ge ezom̃a z’isèkè ni mori. 15N’arô jogaṉô inyôy gôre yè nyongo yi mbaṉi inè: Eza zi r’Anyambyè panga pe nkèrè, ayeṉa zô g’eza z’isèkè. 16Arweṉi yeṉo nyongo ntyarô; avila vovo, aluryô ezom̃a pelè g’ôrôṽa.
17Gw’avegagi Pyère e pa mya nt’are yè gô pikilya g’ômwanja w’ôsam̃u w’ajeṉô yè nte pivya wô, vôna, aṉôm̃e w’arôm̃yô ne Kornelyos, waô bambya pe nagô yi Simôn, w’agum̃aṉi g’ômpômbala, 18aṽambya n’inyôy ivôlô inè, twa pa Simôn, e fweyô inè, Pyère, e dwaṉa gôgô.
19Gw’avikilyagi Pyère ôsam̃u w’ajeṉô yè, Iṉiṉa ny’awulinyi yè inè: Vôna, aṉôm̃e ararô wi bambyo; 20gum̃aṉa, zum̃iṉa ko kènda na waô mpaga fo, konde my’are tôm̃a pa waô. 21Yeṉo azum̃iṉi Pyère, awuliny’aṉôm̃e mèwoṉo inè: Vônaṉi, myè ne yè yi butô ṉwè; aṉw’abye ntiṉa nde? 22Awiṉizi waô inè: Kornelyos, y’ewônjô zi sozè, ôma w’ôgôre e ty’Anyambyè, are kè n’elum̃i eṽya gw’iṉongo nyôdu ny’Iju, amyezô ni yenjèl y’ôrunda inè, e ga weye wè gô nagô yè ayogw’agambi mo. 23Yeṉo aweyô waô ne Pyère ayinginya waô. Bunya, agum̃aṉi yè, agènda na waô. N’awèwo gôr’awarerè wi Yôpa w’agèndi na yè.
24Bunya, aṽyeṉi waô gô Sezare. Kornelyos, ayè datiza pe mongi yè n’indegô sè, avegagi mbôndaga waô. 25Gw’ayingiṉi Pyère, Kornelyos agèndi gô dataṉa na yè, avôswa gw’agôlô mè azaviṉa. 26Ndô Pyère aṉongunyi yè awulya inè: Gum̃aṉa; myè kè my’ôma. 27Gw’agambagi yè na yè, ayingiṉi, aliṽinyi yè aṉag’awenge dataṉa pa. 28N’awulinyi yè waô inè, aṉw’avôrô inè, are degô pa gôre mw’Iju gô jindaṉa n’ôma w’iṉongw’inyèṉè ge gô jingiṉa gôre yè; ndô Anyambyè are teva pa myè inè, my’ayeṉ’ôm’edu g’ezom̃a z’enyalè ge g’ezom̃a z’isèkè. 29Yeṉo abya myè ntyongwè fo gw’aweyô myè; sambô mi bambya ṉwè ntiṉa y’arôm̃i ṉwè gô kôva myè.
30Awulyi Kornelyos inè: Ntyugu nay pyagaṉa pa, gw’igwèra mènyiṉo, my’avengag’esônge, agambiṉaga gô nagô yam̃ gw’igwèra ny’eṉôgôm̃i; na vôna, ôṉôm̃e agum̃aṉi g’ôzô wam̃, bora p’iwor’ iyombwi, 31awulya inè: Kornelyos, ikambiṉi so s’ajoganyô, n’Anyambyè ajônginyi mpagagi yo. 32Sambô, rôm̃a gô Yôpa gô fweye Simôn, e fweyô inè Pyère, e dwaṉa gô nagô yi Simôn, yi pange banda, pyèrè ni mbeṉe, gô be byè e be kamba na wè. 33Yeṉo azunge tôm̃i myè gôre wè, ô re denda pa kè mbyambye gô bya. Sambô azwèdu azw’are vèṉo g’ôzô w’Anyambyè, gô jogw’isam̃u yôdu yi re wè sômbyô pa n’Anyambyè gô bulinya zwè.
34Vovo aṉunguṉi Pyère ôgwaṉi wè, awulya inè: Rèti, my’avôrô inè, Anyambyè e zele n’ôma wa sim̃osim̃o, 35ndô gw’iṉongw’edu ayè yi tyè, n’ayè yi dend’ôgôre ayè bongô yè. 36Arôm̃’igamba gôr’awaṉa w’Israèl, nkambiṉag’igamba vo Yesu‐Krist, ayè ne Rerè ya waôdu. 37Aṉw’avôrô igamba mè ny’arweṉi gô Yuda yôdu, mpankilyaga avila gô Galile, ibatiza kambiṉô pa ne Yôan; 38aṉw’avôrô nt’azagy’Anyambyè azagye Yesu yi Nazarèt n’Iṉiṉ’Iṽya ni ngulu, agèndi mbôry’edu ndendage mbya ni njingaga waôdu w’avegagi tugizô pa ne Satan, konde Anyambyè avegagi na yè. 39Azwè kè n’iyeṉi y’isam̃u yôdu y’alendyô yè gô ntye y’Iju na gô Yerusalèm. Ayôṉi waô yè kè, mbanyègè gw’erere. 40Anyambyè arôngunyi yè gô ntyugu yi ntyarô, ayivira inè, e ga wôm̃unye, 41aranga gôr’aṉaga waôdu, ndô gôr’iyeṉi y’aliwô pinjyô n’Anyambyè, inè, gôre zwè y’anyeṉi ayonga na yè, ayè tôngunyô pa avila gw’ijuwa. 42Ni Yesu azômbyi zwè gô kambiṉa gôr’aṉaga na gô takilya inè, wiṉo ne yè yi re dôṽyô pa n’Anyambyè gô dwaṉ’ôyèkèli wa mongi wi re bo na wa mongi wi re juwa pa. 43Ivogisi yôdu yi takilya g’ômwanji, wè inè, ôm’edu e bekelyè e be dèng’inyezô s’ibe v’ini nyè.
44Gw’agambagi Pyère agamba miṉo, Iṉiṉ’Iṽya ny’azum̃iṉi gôre waôdu w’ayogyô igamba. 45Na waôdu w’avegagi kèrô pa n’aṉaga wi bekelyô, w’aṽyeṉi ni Pyère, w’am̃ami g’ômwanja w’ipô s’Iṉiṉ’Iṽya ny’ayiryô kè gôr’aṉongo. 46Konde w’ayogyô waô wi kamb’iṉèm̃è s’aṉongw’am̃ori, azum̃iny’Anyambyè.
47Vovo Pyère awulyi nè: Azwè ko jolya gô bik’aṉingô m’ibatiza gôre waô wi re pô p’Iṉiṉ’Iṽya ga nt’are zwè? 48N’azômbyi yè inè, wi ga ṽatizô gw’ina nya Rerè. N’agweni waô yè inkolo inè, e ga lwaṉe na waô intyugu sa kwè.
Šiuo metu pasirinkta:
Rôm̃i 10: MYE
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Published by the British and Foreign Bible Society in 1927.