Luka 19
19
Yesu ɗǝ Zakka
1Yesu lǝr kǝshii Jeriko kǝng ta laksakyaa. 2Sum yen ta tang kǝ tǝsak mee ka Zakka. Ng mushori maa angaa yalan pyar ndar ni, ng mu sokghaa ni. 3Ng ruɗaki kǝ ɓee nani Yesu ki paa? Nzup ɗǝ kaɓan ng dari dari ni, Sok ɓyaa maa rak tung ɓum maa sum. 4Shee som lǝr nggena pang ta turi toor gwammaa tung kǝ sok ɓee Yesu ta, tung ka ng byaa shii ki ni.
5Kǝ Yesu taa gang taa ara kyaa, cir yis toora pang ɓan maa ka, “Zakka, jiri ndaa mang, tung ka ng jira lok mwaa ni ɓari.” 6Pang jiri mang mang ta toora shee yal ma wunak lok myaa ɗǝ katla ma aɗoo.
7Kǝ nzup maa sum kyaa ɓee kaɓan, a lǝr ɓoran gyer, a sheeki ka, “Niyangaa kǝ ta nak sheening mu shaan ram.”
8Shee Zakka nanzu pang ɓan Mulok ka, “Ɓee, Mulok! Zheri ng kapsa korcan maa awung kǝng ɗǝ mee angaa shoor maa, ɗǝ angaan kǝng mop yen kǝng yal awuna ta yena, ng pora yen maa ɗǝ mee ɓol nangs.”
9Yesu ɓan zakka ka, “Ɓari ɓwakghan Vitor taa yaa lok maryaa, tung ka sum mari ki, ng fan Ibrahim ni ket. 10Tung ka Fan Sum taa ka kǝ yar kǝ ɓwak angaan kaa tooshii yaa ni.”
Agara shii maa Kori Waryaa
(Mat 25.14-30)
11Kaa sum kyai ta yira awung kǝng shee kyaa, pang rii nggena ɗǝ shee maa agara, tung ka shii yaa pyet ɗǝ Urushalima shee asumkyai ɓyaaki ka tǝruun Vitor warak nyee. 12Pang shee ka, “Sum yen ta kaa yel ma lokng maa angaa sokghaa ni, nanzu nak ndar yena sor sor ka, kaa ta shiir ma tǝruu, kaapang kǝ por ma. 13Kǝ nak cira shii, shee tok akori mee, asum ware, shee na yen mina ware.#19.13 Mina gaat: mee ni pyar pee mang sum gaat, mang pee taat. Shee ka, ‘Shibshiilan kwak ɗǝ pyar ri, kaa pang kǝng tari.’
14“Nzup ɗǝ kaɓan angaa mee ruɗa ma rak. Meni ryak pang a foo awan tokghaa ta ndar kyaa kaa bii dǝbari mee kaa ta ɓan angaa shiiran tǝruu ki ka, ‘Wo ruɗa sum mari kǝ nak ruu war rak.’
15“Nzup ɗǝ kaɓan a shiir ma ruu ki. Ng kǝ por lokghaa shee tok akori mee mang kǝ na yen pyar ki, tung ka kǝ yiɓǝn yen awung kǝ a Sokghai ta shiin pyarng kǝ na yen ki.
16“Kori mang gaat tari pang taa shee ka, ‘Viikuta, ta pyarng kaa nam mi ki ng shiiɓsǝl kwak ta ng sok ware ta shii nban kyaa.’
17“Pang mulok mee ki ɓan ma ka, ‘A koring zar ni, a shii ta giri kyaa. Tung ka a shii kǝduk-dukghaa shiin maa wuu njot ɗa, wuri andar ware.’
18“Kǝ kori mang kǝ mɓaa ki tari, shee ka, ‘Viikuta, pyarng kaa nam mi ki ng shiiɓsǝl kwak ɗǝ mee ng sok kwen ta shiin nban kyaa.’
19“Mulok ki palta ka, ‘Wuri andar kwen.’
20“Pang maɗakghai kǝ tari shee ka, ‘Mulok, pyar mun ni. Ng karkat maa ta fan zaryaa pang ng naa ɓuɓi. 21Ng yira wop mu, tung ka, dakdur mu ɗak ɗakghai. Wokghai a cira awung kaa ˈyii yaa rak, a ˈyobɓaki ta arang kaa kwana ta rak.’
22“Mulok mee ki ɓan ma ka, ‘A vishiin kori ni! Ng koma ku maa nung ta shii maa awung ka shee. A yokghai ka dakdur min ɗak ɗakghai, ng cira awung Kǝng ˈyii yaa rak, ng ˈyobɓaki taa rang kǝng kwana ta rak. 23Yeni ryak pang a ta ˈyii pyar min ta arang kaa ˈyaa pyar ta rak paa? Tung ka ng mani tari ng taa sokghaa awen turiyaa ta shii kyaa.’
24“Shee ɓan angaan kaa shambalaki ta tang ka, ‘Yelan pyar ki ta kwak myaa, kǝ yin naa koring kǝ sok ware ta shii maa wung kaa na ma pana.’
25“Nzup ɗǝ kaɓan a ɓan ma ka, ‘Mulok, ɓwak sok ware yaa!’
26“Pal ta ka, ‘Ng ɓana yin, nzup mung kǝng ɗaa awuu mee ni pang a naa ma tǝkwak, nzup mung kǝng ɗaa awuu rak, koo awung njot kǝng ɗǝ mee a yalak ta kwak myaa. 27Zheri, angaa vana min, kaa ruɗaki ka kǝng nak ruu shii yena rak, wurang taan yen tǝɓii kǝ yin ɓor yen ta nggen mina.’ ”
Yesu Lǝr Urushalimaa kee Ruu ri
(Mat 21.1-11; Mar 11.1-11; Yoh 12.12-19)
28Kǝ Yesu kǝd sheen nung mari, pang cir shii soo nggen maa angaa byaa mee, pang turi niyang Urushalimaa. 29Kǝ shii pyet ɗǝ Betafaji ɗǝ Betanya, taa genakng kaa tokghaaki ka agenak Zetun, shee ton angaa byaa mee asum mɓaa kaa lakshii nggena. 30Shee ka, “Naan ta kǝshii ndar pana mang kǝng nggen yinaa pan, yin ni ta lǝri yin ɓyaa fan zung lok kaa shiir ma yaa, mang kǝ muɗakghai turi yaa ta rak, kǝ yin bun maa wutaak tii. 31Ng muɗakghai ni yiɓǝn yin, ‘Yeni ryak pang yin buna ma paa?’ Kǝ yin ɓan ma ka, ‘Mulok ni ruɗaki.’ ”
32Angaan kaa ton yen ki a naa ta Sokghai kan kee mang kǝ Yesu ɓan yen ki. 33Kaa ta buna fan zung kyaa, angaa dee ki yiɓǝn yen ka, “Yeni ryak pang yin buna fan zung lok ki paa?”
34A palta ta ka, “Mulok ni ruɗaki.”
35Pang a wutaak zung lok ki ta Yeswaa, shee a fur awuu ryakghaa yen ta shiin zung kyaa, pang a ɓwak Yesu kǝ turi ta shii kyaa. 36Kaa cir shii naa yang, asum wutaak awuu ryakghaa yen pang a ketli ta shaa ta nggen myaa.
37Kǝ naa gang pyet, ta jira jiran agenakng Zetun na, nzup maa angaa byaa mee lǝr katla aɗoo ɗǝ makghaan Vitor ɗǝ foosan nung tung nzup maa awuu maksar maksar mang kaa ɓee,
38a kap sheeki ka, “Ruun mu nggen kal ni kǝ tari kǝshiin tǝsakng Mulokghaa!
Ɗaan wom kǝ ɗa kǝshii toora ɗǝ makghaan Vitor kǝng nggaghaa toora yang!”
39Shee a dǝs maa Farisi kaa ta kǝshii ɓum maa suma, a ɓan ma ka, “Mu maksa, ɓan angaa byaa mu kaa ɗaa maad.”
40Shee palta ka, “Ng ɓana yin, ng ayen ni ɗa maad, atǝtar ryaa kǝ yin ɓyaaki ri a kaɓa byaksa nung.”
Yesu Shidn tung Urushalimaa.
41Kǝ gang pyet ɗǝ Urushalimaa kǝ ɓee ndar ki, shee shiidn tung mee, 42shee ka, “Angaa Urushalima ng yin ni wuu yok ɓari awung kǝ wura taak yin maa ɗaan wusungaa, wuu kuna yin maa! Nzup ɗǝ kaɓan a ɓuɓ yin maa yaa ta yis yinaa zheri. 43Ayisa ta taa kyaa mang kaa angaa vana mu taa komma ku kan kee kukolong. Afuu maa pok taa gilǝngaa yin fwaa tǝɗwaa, kaa sonson yin, kaa pir yin ɗǝ rom. 44Pang a rumza ku kaa fur ndaa, kaa ɓor aswaa mu, kaa ta kǝshii mwaa, a kala tǝtar gaat shiin ɗakghai ya rak, tung ka a yok ayisang kǝ Vitor taa kǝ ɓwak yin rak!”
Yesu kǝshiin Lokng Vitor
45Kǝ gang Urushalimaa shee lǝr lokng Vitora pang kap puna angaa ryapsa maa wuu. 46Ɓan yen ka, “Ng warangaa ni, ‘Lok min nakghaa lokng kwarsan Vitor ni, nzup ɗǝ kaɓan yin shiiɓǝl ma nak aran ɓubsa maa koos!’ ”
47Yesu maksaki ta lokng Vitora nzup maa vii. Nzup ɗǝ kaɓan amushorin maa Farisi, ɗaa Angaan maksan shiiring Musa ɗaa Mushorin maa sum a yar ka kaa wun ma. 48Nzup ɗǝ kaɓan a sok shiin kaa wuna ma ta rak, tung ka nzup maa sum ɓwak ˈyii aɗoo yena ta awung kǝng maksa kyaa.
Šiuo metu pasirinkta:
Luka 19: (Boi) Tiyaa
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
©️2022 Luke Initiative for Scripture Translation