Luka 20
20
Yiɓǝnan Shiran Shining Yesu
(Mat 21.23-27; Mar 11.27-33)
1Vii yenaa kǝ Yesu ta maksa asumaa ta kǝshii lok Vitora, ng ɓana yen nung zarng Vitor. Amushorin sungwarin Vitor ɗǝ angaa maksan shiiring Musa ɗaa mushori a tari ta myaa. 2A ɓan ma ka, “Ɓan war, na ni shiira ku maa shiining kaa shaa awuu mari paa? Ɗǝ shiiran shiini nani pang a shaa awuu mari paa?”
3Yesu pal yen ta ka, “Ng yiɓǝna yin ket, ɓanang mi 4Yohana ɗǝ shiiran Shining nani pang ng bonza asum paa? Mang Vitor nyaa koo maa sum nyaa?”
5A ryak aɗakghai yen nung kutwaa pang a shee ka, “Ng war ni shee ka, ‘Ta Vitora ni,’ Shee ka, ‘Yani ryak pang yin yal ˈyeeng nung Yohana ki rak paa?’ 6Nzup ɗǝ kaɓan ng war ni shee ka, ‘Sokghai taa sumaa ni,’ Nzup maa sum foosa war ɗaa tǝtar koo kuushii, tung ka a ɓwak yal ˈyee ki yaa ka Yohana mu fwaa nung Vitor ni.”
7Tung kaɓan a pal ma ta ka, “Wo yok arang kǝ war ta rak.”
8Yesu shee ka, “Ng ɓana yin mung kǝ shiirng maa Shining Kǝng shaa awung mari rak.”
Agara shiin maa Angaa Yala Ɗǝn ɗǝ Pyar
9Pang Yesu ɓan asum kyaa agara mari ka, “Sum yen ng ɗǝ ɗǝn Inabi mee, pang na angaan yalan ɗǝn shiin pyara, shee nak sǝra ndar yena pwaa ayisa. 10Kǝ ayisang ˈyoɓa ma awuu gang, shee ton kori mee kǝ naa ta yalng maa nung ma mee ta kǝshiin dugur kyaa. Nzup ɗǝ kaɓan angaa yalan ɗǝn shiin pyar ki a ruushii kori ki, a foo ma niyang kwak koori. 11Shee sum ki ton kori ɗakghai tǝkwak. A ruushii ma, a shiing maa awun nɗoo. A foo ma niyang kwak koori. 12Ton kori mang kǝ taat ki. Mee maa a ruushii ma ket kwan-kwan, pang a cir ma fuyang.
13“Pang mu ɗǝn ki shee ka, ‘Yani pang ng shaa paa? Ng tona fan min mang Kǝng ruɗaki. Ng ɓyaaki a ɓyakghaa yira ma.’
14“Angaa yalan ɗǝn shiin pyar kǝ a ɓee fan ki a ɓan aɗakghai yen ka, ‘Mari ni mang kǝ wura ɗǝn ki, wo wunan ma kǝ ɗǝn ki nak mawar.’ 15Tung kaɓan a napshii ma wunak abonjin ɗǝn kyaa, a wun ma.”
Yesu yiɓǝn yen ka, “Yani pang yin ɓyaaki mu ɗǝn ki shaa ɗǝ yen paa? 16Taa ɓora angaa yalan ɗǝn shiin pyar ki, kǝ naa ɗǝn ki a dǝshai.” Kǝ asum kyaa yir kaɓan a shee ka. “Awuu mari shaa rak!”
17Yesu ɓasa yen ɓee kyak, pang yiɓǝn yen ka, “Yani dakng nung mari kǝ a warang kǝshii nung Vitora paa?
“ ‘Tǝtar kǝ angaa lokghaan kǝshii van
mee ni nak tǝtar kaa ryakghaa ma nggungorosng kǝshii#20.17 And 118.22. tǝtar kǝ angaa lokghaan kǝshii van: Tǝtar ki mee ni Yesu, Angaa lokghaki a yeni amushori maa Yahudu.’?
18Nzup mung kǝ piri ta shiin tǝtar ryaa popsara ɓoshak ɓoshak, nzup mung kǝ tǝtar ki ni piri shii mee yaa munza ma.”
19Angaa maksan shiiring Musa ɗaa mushorin sungwarin Vitor a yar shiin kaa kap Yesu ta nyee, tung a yokghai ka, sheeri agara ri shii yena ni. Nzup ɗǝ kaɓan a shii wop maa sum.
Pǝrang Kaisar Pyarng Ndar
(Mat 22.15-22; Mar 12.13-17)
20Shee a yar shiing kaa kaɓa ma ta kǝshiin awung kǝ sheekyaa. Shee a ton a dǝshai mang kaa ryapshii yen ɗǝ pyar kaa ngyepsa ma, a ɗǝ kǝ shaa kan kee a ɗaa sum zar ni, kaa sok wunak nung mee ta nggen mushoring ndar Romaa kǝ kom nung shii myaa. 21Angaan kaa ton yen ki a yiɓǝn Yesu ka, “Mu Maksa, wo yokghai ka, awung kǝ a sheeki, ɗǝ awung kaa maksaki, ng ta giri kyaa ni, a zhakghaa ruɗan shii rak, nzup ɗǝ kaɓan a maksa gwarshiin Vitor duk dukghaa. 22Ɓan war, kun koo pǝr Kaisar pyar ndaraa, koo O oi?”
23Yesu ɓwak yokghai yaa ka a ruɗaki kaa kap maa shiin ngyepsa, pang ɓan yen ka, 24“Zhakghaan mi dinari ki, awurkin nani ɗǝ tǝsak nani ta shii kyaa paa?”
A palta ka, “Mang Kaisar ni.”
25Pang Yesu ɓan yen ka, “Naan Kaisar awung kǝng mang Kaisar, kǝ yin naa Vitor awung kǝng mang Vitor.”
26A sok kaɓa ma ta nung kǝ shee kǝshii maa sumaa rak, ndus yen shiishii ng kǝ Yesu pal yen ta, shee a ɗaa maad.
Asardisu Yiɓǝn shiin Nanzwa maa Sum Kwaa ya
(Mat 22.23-33; Mar 12.18-27)
27Asandukiya asum ni mang kǝ a sheeki ka, asum nanzwa dǝbari ka kushiiya rak. A dǝs yen tari ta Yeswaa pang a yiɓǝn ma ka. 28A shee ka, “Mu maksa, Musa warang war maa ka, ng zǝng sum ni kuu pang kala yii mee ɗaa awan rak, nzup ɗǝ kaɓan sum ki yala yiinɗokghaa ki kǝ tashii maa awan ta. 29Zheri asum tarɓa ɗaa zaa ni. Mushori yen ki yal yii pang kuu kala ɗǝ fan rak. 30Zǝǝ mee mang kǝmɓaa ki, yal yii ki pang mee maa taa kuu kala ma ɗǝ rak, 31Mang kǝtaat ki sok ma kaɓan ket, nzup yen tarɓa ki a yal yii ki pang a kuushii kala ma ɗǝ fan rak. 32Dǝbarin kaɓana yii ki taa kuu ket. 33Zheri, ɓan war, yii ki nakghaa yii nani ta viin Nanzwa maa sumaa kǝ nzup yen tarɓa ki a yal yii ki yaa paa?”
34Yesu pal yen ta ka, “Angaa yisan ɓaryaa amorom Yala ayii, awai yen naaki arong. 35Nzup ɗǝ kaɓan amorom ɗaa yiin kǝ kun kaa nanzwa vii Nanzwa maa sumaa, kaa ɗa taa yisa mang taa pana. Ayalaa yii ɗaa rong tang nak. 36A yaa kuusa ta rak, tung ka a nakghaa kan kee awan tokghaan zar Vitor ri ni. A ɗaa awan Vitor ni, tung ka, a nanzu yaa viin Nanzwa maa sum maa. 37Musa zhakghai yen ka angaa kuusa nanzwak tǝkwak. Ng kǝng ɓana yen agara shiin kuɗukghaa maa awuzhii ya, shee ka, ‘Mulok, mee ni Vitorng Ibrahim, Vitorng Ishaku, Vitorng Yakub.’ 38Ng Vitor maa angaa wom ni, ng Vitor maa angaa kuusa ni rak, ta myaa nzup yen a ɗaa angaa wom ni.”
39A dǝs ma angaa maksan shiiring Musa palta ka, a shee ta giri kyaa ni, “Mu maksa!” 40Dǝbarin nbanaa, muɗakghai ya sham yiɓǝn Yesu ta rak.
Kǝristi ki Fan Nani paa?
(Mat 22.41-46; Mar 12.35-37)
41Yesu yiɓǝn yen ka, “Yani ryak pang asum sheeki ka, Kǝristi ng Fan Dauda ni paa? 42Tung ka Dauda ɗǝ shii mee warang ta kǝshii nɗura ka,
“ ‘Mulok ɓan Mulok min ka,
“Ɗa ta kwak tǝshen mina
43shee mani ryak angaa vana mu
kaa ɗa ngǝsǝng kuɓol mwaa kaa pang.” ’#20.43 And 110.1.
44Dauda tok ma ka, ‘Mulok.’ Kacee ni pang Pora nakghaa fan Dauda paa?”
Nɗǝrang Angaan Maksan Shirng Musa
(Mat 23.1-35; Mar 12.38-40; Luk 20.45-47)
45Ng kǝ nzup maa sum ta yira awung kǝ Yesu maksa kyaa, shee ɓan angaa byaa mee ka, 46“Nɗǝrang ɗaa angaa ka maksa shiiring Musa. A rud sǝraki kǝshii maa suma ɗaa kǝrɓǝt kopsar, a ruɗa waryaa ta arang kaa sum tokshii ta ɗaa ara ɗaa mang zar kǝshii arang Shamang shii maa angaa Yahudu ɗǝ ara maa mushori arang kaa kwar lak ta, 47Ayen ni angaa kaa byaa ayii ɗok lokghaa lokghaa kaa mopɓa yen kaa yalshii lok yen ta, a ɗǝ fednaki kwarsan Vitora kaa zhak ka yen yok Vitor ɗakghai, tung maa awuu mari. A bungaa ɗǝng.”
Šiuo metu pasirinkta:
Luka 20: (Boi) Tiyaa
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
©️2022 Luke Initiative for Scripture Translation