Juan 18
18
Jesú jitadada
Mateo 26:47-56; Marco 14:43-50; Luca 22:47-53
1Mãɨ ãarea jarak'ari Jesú ichi ome p'ɨrrɨapataɨrã Cedrón to chak'e k'ĩaria wãsidama. Arí ne uu ĩjũa basima. Jesú, ichi ome p'ɨrrɨapataɨrã ome mãmá wãsidama. 2Juda, chi Jesú jitapii bɨpa mãɨ ne uu ĩjũa k'awa basima, Jesú ichi ome p'ɨrrɨapataɨrã ome mãma bari k'ak'o minachia ará nɨbeepachi pẽra. 3Mãɨpuru Judapa chok'ará romanepema papaká berã mãɨnepa chi Tachi Ak'õre te ot'eapataɨrã mãɨ ne uu ĩjũanea ateewãsima. Ãchi chi p'aarerã chi mãɨrã chaarearãpa mãɨnepa p'ariseorã pida Juda ome peesidama. Ãchia ĩpira, laap'ara mãɨnepa jiorro uru p'anasidama. 4Mãɨne Jesupa ãarea ne mãɨyai k'awa bɨ pẽra ãchimá wãk'ari idisima:
—Mãrapa ¿k'ai jɨrɨ p'anɨma?
5Ãchia p'anoosidama:
—Jesú Nazaredepema.
Jesupa jarasima:
—Mɨpɨ.
Mãɨne Juda, chi Jesú jitapii bɨ ãchi ome basima. 6Jesupa «mɨane» aside ãchi jĩitea tɨadak'ari, baewãsidama. 7Maapae Jesupa mãicha idisima:
—¿K'ai jɨrɨ p'anɨma?
Ãchia mãicha p'anoosidama:
—Jesú Nazaredepema.
8Mãɨne Jesupa jarasima:
—Mãɨ mɨane asima. Mɨ jɨrɨ p'anɨpɨra, nãɨ ẽpẽerã itu peet'ɨ.
9Mãɨya jarasima ichia naena jarada pẽra: «Ak'õre, pɨa mɨá teadaɨrã aba pida atuaiwẽma».#Juan 6:39. Ichia jarada jĩra piarã mãɨyasima. 10Mãɨne Simón Pedropa k'ĩruuparí nek'o uru basima. Mãɨ ẽut'aak'ari chi p'aare minachia k'awa bɨ pae pari mimiaparí k'ɨɨrɨ juaraaripema oat'ut'aasima. Mãɨ t'ɨ̃ Malco apachidama. 11Mãɨ k'orea Jesupa Pedroa jarasima:
—Pɨchi k'ĩruuparí nek'o yaase. ¿Mɨ mãɨ mĩai bɨwẽk'ãra, mɨ Ak'õrepa mɨ mĩapii bɨ jĩra?#18:11 Mɨ Ak'õrepa mɨ mĩapii bɨ jĩra. Griego pedeade nãɨya bɨ bɨma: chi mɨ Ak'õrepa mɨá teada pasu.
Jesú Anasmá ateewãnana
Mateo 26:57-58; Marco 14:53-54; Luca 22:54
12Maapae romanepema papaká bepa, ara ãchi poro chaarea bɨpa mãɨnepa chi Tachi Ak'õre te ot'eapataɨrãpa Jesú jitadak'ari jua bɨrasidama. 13Jesú naa ẽpẽra Anás temá ateewãsidama. Anás Caip'á chãware pasima. Mãɨ ãyone Caip'á p'aare minachia k'awa bɨ pasima.#18:13 Caip'á 18 ãyo p'aare minachia k'awa bɨ pasima, ãyo 18—36. 14Ara mãɨ Caip'apa judiorã́ jara basima ẽpẽra aba judiorã ãareaɨrã k'orea piuit'a pia bɨma.#Juan 11:50.
Pedropa Jesú unuk'aade ada
Mateo 26:69-70; Marco 14:66-68; Luca 22:55-57
15Mãɨne Jesú ome p'ɨrrɨapataɨrã Simón Pedro mãɨnepa abaɨ sida Jesú k'aade wãsidama. Chi Simón Pedro ome wãna p'aare minachia k'awa bɨpa k'awa basi pẽra ichi Jesú k'aade eda wãsima p'aare minachia k'awa bɨ te tudá. 16Maamina Pedro eda wãpataɨ tajataria beesima. Mãɨpuru chi ichi ome wãna, chi p'aare minachia k'awa bɨpa k'awa bada tajatá wãsima. Chi eda wãpataɨ ak'ɨparí wẽra ome pedeak'ari Pedro eda ateewãsima. 17Mãɨ wẽrapa Pedroa idisima:
—¿Pɨ sida Jesú ome p'ɨrrɨapariiwẽk'ãra?
Pedropa p'anoosima:
—Mɨwẽma.
18Mãɨne p'aare minachia k'awa bɨ pae pari mimiapataɨrãpa mãɨnepa Tachi Ak'õre te ot'eapataɨrãpa t'ɨpɨ uruapisidama k'õresã́ nɨbɨ pẽra. T'ɨpɨ ik'idá bai nɨp'aneesidama k'ãnai k'orea. Ichiaba Pedro ãchi ome t'ɨpɨ k'ãmaa basima.
Anaspa Jesua minachia ɨt'aa chiidida
Mateo 26:59-66; Marco 14:55-64; Luca 22:66-71
19Maapae p'aare minachia k'awa bɨpa Jesua minachia idisima ichi ome p'ɨrrɨapataɨrã k'orea mãɨnepa ichia jarateada k'orea. 20Mãɨne Jesupa p'anoosima:
—Mɨ ãareaɨrã k'ĩrari jĩp'a pedea basima. Mɨa jaratea basima tachi ará pedeapataɨ techa mãɨnepa Tachi Ak'õre te eda, tachi judiorã ãarea ará chedak'ari pedeapatamá. Mi ãpia pida mẽra jaraé pasima. 21¿K'ãre k'orea mɨá mãɨ idi bɨma? Mãɨpari mɨ pedea ũrinaanarã́ idise, ãchia mɨa jarateadat'a k'awa p'anɨẽra.
22Jesupa mãɨya jararude Tachi Ak'õre te ot'eapataɨrãnepema aba ichi k'ait'a badapa Jesú k'ĩtarramá p'ek'ari jarasima:
—¿Jãɨya p'anoo bɨk'ãra chi p'aare minachia k'awa bɨa?
23Jesupa p'anoosima:
—Mɨa k'achia pedeasipɨra, jarase mɨa k'ãre k'achia pedeasit'a. Maamina pia pedeasipɨra, pɨa ¿k'ãre k'orea mɨ p'esima?
24Maapae Anaspa Jesú jua bɨra bɨt'a Caip'amá peesima, ichi p'aare minachia k'awa bɨ pẽra.
Pedropa mãicha Jesú unuk'aade ada
Mateo 26:71-75; Marco 14:69-72; Luca 22:58-62
25Mãɨmisa Pedro wapida bai nɨbasima, t'ɨpɨ k'ãi k'orea. Mãɨne ẽpẽerãpa ichiá idisidama:
—¿Pɨ sida jãɨ ẽpẽra ome p'ɨrrɨapariiwẽk'ãra?
Pedropa mẽra jarasima:
—Mɨwẽma.
26Mãɨne chi p'aare minachia k'awa bɨ pae pari mimiaparí abaɨpa Pedroa idisima:
—¿Mɨa pɨ ichi ome ne uu ĩjũane unué pasik'ãra?
Mãɨpa chi Pedropa k'ɨɨrɨ t'ɨat'uda chi ẽpẽra mãɨnepema pasima. 27Pedropa mãicha mẽrasima. Ara mãɨya jararude et'erre pirusima.#Juan 13:38.
Jesú Pilato k'ĩrari bada
28Maapae tap'ededa Jesú Caip'á tedepa romanepema chi poro chaarea bɨ chi te minachia bɨdea ateewãsidama. Chi Jesú ateewãnana judiorã mãɨ te Pretorio apataɨde eda wãnaé pasima ãchi eda wãsidara Tachi Ak'õre k'ĩrari piawẽa p'aneenai pẽra. Ichi k'ĩrari pia p'anana k'ɨ̃ria p'anasidama Egitodepa wãnana k'ɨ̃risiapataɨ ewari chik'o k'odai k'orea.#18:28 Judiorãpa jarapachidama judiorãwẽ ãchi tede eda wãsira Tachi Ak'õre k'ĩrari piawẽa beei. Número 9:9-11. 29Mãɨpuru Pilato ãchimá tajatá wãk'ari idisima:#18:29 Romanepemarã minachia k'awa bɨ Tiberio apataɨpa Pilato Judea tuadepema minachia k'awa bɨt'a bɨsima ãyo 26—36. Chi judiorã chaarearãpa Jesú Pilatomá ateewãsidama ãchia chi eda jɨ̃a nɨberã peak'apachida pẽra. Aba romanepemarãpa mãɨya ɨtɨa p'anapachidama.
—Nãɨ ẽpẽra, chi mãrapa nepɨra pará bɨade a p'anɨpa ¿k'ãre nemietá oosima?
30Ãchia p'anoosidama:
—Nãɨpa nemietá oodaépara taipa ichi pɨmá ateewãnaiwẽ pasima.
31Mãɨpuru Pilatopa ãchiá jarasima:
—Mãrapa ichi ateewãnak'ari ak'ɨt'ɨ ara machi leypa jara bɨ jĩra.
Mãɨne judiorãpa jarasidama:
—Taipa ne p'ue oodak'ama, ẽpẽra peapidai k'orea. Mãra Romanepemarãpuru p'ue peapidai p'anɨma.
32Ara chi judiorãpa mãɨya pedeasidama Jesupa naena jara bada jĩra. Ichia jara basima sãmaasã́ piui bɨt'a.#Juan 3:14; 8:28; 12:32. 33Maapae Pilato mãicha tede eda wãsima. Jesú eda ateewãpik'ari idisima:
—¿Pɨ piarã judiorã poro jũra jɨ̃parí jɨ̃ bɨk'ãra?#18:33 Judiorã chi mãɨrã chaarearãpa Pilatoa mãɨ k'orea jarasidama. Luca 23:2.
34Jesupa p'anoosima:
—¿Pɨa mãɨ idi bɨk'ãra pia k'awai k'orea, wa idi bɨma waapẽarãpa pɨá mɨ k'orea mãɨya jarasida pẽra?
35Mãɨ k'orea Pilatopa jarasima:
—¿Mɨ judiok'ãra? Ara pɨ p'uurudepemarãpa mãɨnepa chi p'aarerã chi mãɨrã chaarearãpa pɨ mɨmá enemeesidama. ¿Pɨa k'ãre oosima ãchia mãɨya oodamẽrá?
36Jesupa p'anoosima:
—Mɨ ẽpẽerã mɨ juade ua bɨmina mɨ p'uuru nãɨ ĩjũanepemawẽma. Nãɨ ĩjũanepema padapara mɨ ẽpẽerã mɨ k'orea k'ĩruunai pasima judiorã́ mɨ jitapidaemaapa. Maamina mɨ p'uuru nãɨ ĩjũanepemawẽma.
37Mãɨpuru Pilatopa jarasima:
—¿Mãɨya bɨpɨra piarã pɨ poro jũra jɨ̃parí jɨ̃ bɨk'ãra?
Jesupa p'anoosima:
—Ãjã, pɨa mãɨya jara k'ɨ̃ria bɨpɨra, mɨ ẽpẽerã ãchi poro jũra jɨ̃parí jɨ̃ bɨpɨ. Maamina mɨ nãɨ ĩjũanea chesima chi piarãpẽa pedea jarateai k'orea.#18:37 Nãɨ ĩjũanea chesima. Griego pedeade nãɨya bɨ bɨma: Mɨ nãɨ ĩjũane t'õnak'ari chesima. Jõma chi piarãpẽa k'ɨ̃ria p'anɨpa mɨ pedea ĩjãapatama.
38Mãɨne Pilatopa idisima:
—¿K'ãrema mãɨ piarãt'a?
Jesú peadai k'orea jaradada
Mateo 27:15-31; Marco 15:6-20; Luca 23:13-25
Mãɨya jarak'ari Pilato mãicha tajatá judiorãmá wãk'ari jarasima:
—Mɨa unuwẽma nãɨ ẽpẽra nepɨra pará bɨt'a. 39Maamina Egitodepa wãnana k'ɨ̃risiapataɨ ewari parude, ãyocha mãrapa oopata jĩra, chi eda jɨ̃a nɨbɨdepema aba k'ẽet'aapipatama. ¿Mãrapa k'ɨ̃ria p'anɨk'ãra mɨa nãɨ judiorã poro jũra jɨ̃parí jɨ̃ bɨ k'ẽet'ait'a?
40Mãɨne ãchia biadak'ari p'anoosidama:
—Jãɨwẽma. ¡Barrabat'u k'ẽet'aase!
Mãɨ Barrabá nechɨaparí mietá pasima.
Šiuo metu pasirinkta:
Juan 18: tdc
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© (Active), Wycliffe Bible Translators, Inc. All rights reserved.