Juan 17
17
Jesupa ara ichi k'orea Tachi Ak'õrea ɨt'aa chiidida
1Jesupa mãɨya jarak'ari pajãnea ak'ɨk'ari jarasima: «Ak'õre, mɨ ewari ará pasima. Pɨ Warra chi choma bɨt'a unupise pɨ Warrapa pɨ piarã chi choma bɨt'a unupimẽrá. 2Pɨa ẽpẽerã ãarea mɨ juade bɨsima, mɨa ãchi ewaricha chok'ae bapimẽrá. 3Ewaricha chok'ae bepa, ãchia k'awa p'anɨma pɨ piarã Tachi Ak'õre aba bɨt'a. Ichiaba k'awa p'anɨma chi pɨa peeda, Jesucristot'a. 4Pɨa mɨá nãɨ ĩjũane oopida mɨa jõma oosima. Mãɨya k'awapisima pɨ chi choma bɨt'a. 5Mãɨpuru Ak'õre, mɨ pɨ k'ĩrari chi choma bɨse pɨ ome nãɨ ĩjũa ooi naena chi choma bada jĩra.
Jesupa ichi ome p'ɨrrɨapataɨrã k'orea ɨt'aa chiidida
6»Pɨa mɨá ẽpẽerã nãɨ ĩjũanepemarã teasima. Mɨa mãɨrã́ pɨ k'awapisima. Ãchi poremina, pɨa mɨá ãchi teasima. Ãchia pɨ pedea ĩjãa p'anɨma. 7Mãɨpuru ãchia k'awa p'anɨma ne ãarea mɨa uru bɨ pɨdepa che bɨt'a. 8Pɨa mɨá jarada mɨa ãchiá jarateasima. Ãchia mãɨ pedea ĩjãasidama. Mãɨpuru k'awa p'anɨma piarã mɨ pɨmãɨpa chesit'a. Piarã ĩjãa p'anɨma pɨa mɨ peesit'a.
9»Mɨa pɨá ɨt'aa chiidiruma ãchi k'aripamẽrá. Mɨa pɨá ɨt'aa chiidi bɨwẽma nãɨ ĩjũanepemarã k'orea. Mãɨpari chi pɨa mɨá teadaɨrã k'orea ɨt'aa chiidi bɨma, ãchi pore pẽra. 10Ãarea mõré porepɨ mãɨnepa ãarea poré mõrepɨ. Ãchia oo p'anɨnepa mɨ chi choma bɨt'a unupi p'anɨma.
11»Mɨ nãɨ ĩjũane waa baiwẽma maamina ãchi nãɨ ĩjũane p'aneenaipɨ. Ak'õre, pɨ minachia pia bɨma. Mɨ pɨmá wãru pẽra pɨ t'ɨ̃nepa ãchi minachia ak'ɨ base. Pɨ t'ɨ̃nepa, mɨ mãɨya jua chaarea beepisima,#17:11 Mɨ pɨmá wãru pẽra pɨ t'ɨ̃nepa ãchi minachia ak'ɨ base. Griego pedeade chi eda waapẽarã k'art'ade nãɨya bɨ bɨma: Jõma pɨa mɨá teadaɨrã minachia ak'ɨse pɨ jua chaareadepa. ãchi k'ak'ua aba bɨ jĩra p'ananamẽrá, tachi k'ak'ua aba p'anɨ jĩra. 12Mɨ nãma basi ewarimisa pɨ jua chaareadepa mɨa ãarea pɨa teadaɨrã ak'ɨ basima. Ãchidepemarã mi ãpia pida atuaé pasima. Abapuru chi atuai badat'a atuasima Tachi Ak'õre pedea jara bɨ jĩra piarã mãɨyamẽrá.#Salmo 41:9; 55:12-15.
13»Naapae mɨ pɨmá wãipɨ. Maamina wapida nãɨ ĩjũane bɨde mãɨ ãarea jararuma, arapá p'ananamẽrá, mɨ pɨ ome arapá bɨ jĩra. 14Pɨa jarada mɨa ãchiá jarateasima. Maamina nãɨ ĩjũanepemarãpa ãchi unuemaa p'anɨma mɨ jĩra nãɨ ĩjũanepemawẽ pẽra. 15Mɨa pɨá idi bɨwẽma ãchi nãɨ ĩjũanepema ãyá ateewãmẽrá, mãɨpari ɨt'aa chiidi bɨma nemietaadepema ak'ɨ bamẽrá.#17:15 Nemietaadepema. Chok'araɨrãmá mãɨpa «tiore» jara bɨma. 16Ãchi nãɨ ĩjũanepemarãwẽma ara mãɨ mɨ nãɨ ĩjũanepemawẽ jĩra. 17Pɨ pedeapa pɨ piarã k'awapi bɨma. Mãɨpa ãchi aba pɨ pae pia bɨse. 18Pɨa mɨ nãɨ ĩjũanepemarã t'ãena peeda jĩra mɨa ãchi nãɨ ĩjũanepemarã t'ãena peeruma. 19Ãchi k'orea ara mɨ pɨ pae awara beeruma, ãchi sida pɨ pae awara p'ananamẽrá pɨ piarãt'a k'awa p'anɨnepa.
Jesupa jõma ichide ĩjãauta k'orea ɨt'aa chiidida
20»Mɨa abapuru ãchi k'orea ɨt'aa chiidi bɨwẽma. Mãɨpari ãchia mɨ pedea jarautade mɨne ĩjãauta k'orea pida idi bɨma. 21Ak'õre, pɨ mɨ ome bɨ pẽra mãɨnepa mɨ pɨ ome bɨ pẽra mɨa idi bɨma ãchi sida tachi ome k'ak'ua aba bɨ jĩra p'ananamẽrá. Mãɨya nãɨ ĩjũanepemarãpa ĩjãanaipɨ pɨa mɨ peesit'a. 22Pɨa mɨ ateewãsima tachi ará p'ananamẽrá. Mãɨya mɨ chi choma bɨsima. Ara mãɨ jĩra mɨa ãchi chi choma bɨsima tachi ome k'ak'ua aba bɨ jĩra p'ananamẽrá. 23Mɨ ãchi ome bɨ pẽra mãɨnepa pɨ mɨ ome bɨ pẽra tachi ãarea ará k'ak'ua aba bɨ jĩra p'ananaipɨ. Mãɨya nãɨ ĩjũanepemarãpa k'awadaipɨ pɨa mɨ peesit'a mãɨnepa k'awadaipɨ pɨa ãchi k'ɨ̃ria bɨt'a ara mɨ k'ɨ̃ria bɨ jĩra.
24»Ak'õre, pɨa nãɨ ĩjũa ooi naena mɨ k'ɨ̃ria basima. Mãɨpuru pajãne mɨ chi choma bɨsima. Mɨa k'ɨ̃ria bɨma ãarea pɨa mɨá teadaɨrã mãma mɨ ome ará p'ananait'a, pɨa mɨ chi choma bɨda ununamẽrá. 25Ak'õre, pɨ jĩp'a bɨma. Nãɨ ĩjũanepemarãpa pɨ atua p'anɨma, maamina mɨa pɨ k'awa bɨma. Mãɨnepa nãɨrã pida k'awa p'anɨma pɨa mɨ nãmá peesit'a. 26Mɨa ãchiá pɨ k'awapisima. Mãɨ awara wapida atepe k'awapi baipɨ pɨa mɨ k'ɨ̃ria bɨ jĩra ãchi sida chi k'ɨ̃ria p'ananamẽrá mãɨnepa mɨ ãchi sõne uru p'ananamẽrá».
Šiuo metu pasirinkta:
Juan 17: tdc
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© (Active), Wycliffe Bible Translators, Inc. All rights reserved.