Juan 19
19
1Maapae Pilatopa Jesú soapa p'episima. 2Mãɨya bɨde romanepema papaká berãpa poro jũra jɨ̃parí ɨɨrɨ k'ada Jesú porode jɨ̃ bɨsidama, mãɨnepa ichi k'ak'ua ɨ̃rɨ anamari jɨ̃parí arena k'ĩra bɨt'a jɨ̃pisidama. 3Maapae Jesumá orrobaridak'ari nãɨya jarasidama:
—¡Minachia pia bɨma, chi judiorã poro jũra jɨ̃parí jɨ̃ bɨt'a!
Mãɨya jaradak'ari ichi k'ĩtarramá p'epachidama.
4Maapae Pilato mãicha tajatá judiorãmá wãk'ari jarasima:
—Ũrit'ɨ. Mɨa mãɨ mãra k'ĩrari enemeeruma, mɨmá ichia nemietá oo newẽa bɨt'a k'awadamẽrá.
5Jesú tajatá ateeutade ɨɨrɨ k'ada poro jũra jɨ̃parí mãɨnepa chi ɨ̃rɨa anamari jɨ̃parí chi arena k'ĩra jɨ̃ basima. Mãɨne Pilatopa jarasima:
—Nãɨ chi ẽpẽrapɨ.#19:5 Pilatopa Jesú tajatá ateepiside, k'awapi k'ɨ̃ria basima chi Jesú ẽpẽra minachia k'awa bɨwẽt'a. Mãɨpari Juanpa «ẽpẽra» bɨside, mãɨpa jara k'ɨ̃ria bɨma Jesú chi Ẽpẽra Warrat'a. Juan 1:1; 1:14.
6Maamina Jesú unuutade p'aarerã chi mãɨrã chaarearãpa mãɨnepa Tachi Ak'õre te ot'eapataɨrãpa jĩk'ua jarasidama:
—¡Ichi k'urusude barijira bɨk'ari peapise! ¡K'urusude barijira bɨk'ari peapise!
Mãɨne Pilatopa jarasima:
—¡Mãrapuru ateedak'ari k'urusude barijira bɨk'ari peapit'ɨ! Mɨmá ichi nemietá newẽa bɨma.
7Maamina judiorãpa p'anoosidama:
—Taipa Moisepa bɨda uru p'anɨma. Mãɨ Moisepa bɨdade jara bɨ jĩra ichi piui bɨma ara ichi Tachi Ak'õre Warraade a bɨ pẽra.#Levítico 24:15-16.
8Mãɨ pedea ũriside Pilato minachia ne wap'easima. 9Maapae ichi te minachia bide eda mãicha wãk'ari Jesua idisima:
—¿Pɨ sãmapemama?
Maamina Jesupa p'anooé pasima. 10Mãɨya bɨde Pilatopa jarasima:
—¿Pɨa p'anoowẽk'ãra? ¿Atua bɨk'ãra mɨa pɨ p'ue k'urusude barijira bɨk'ari peapii bɨt'a wa p'ue k'ẽet'aapii bɨt'a?
11Mãɨne Jesupa p'anoosima:
—Tachi Ak'õrepa pɨ bɨdaépara pɨa mɨ mi ãpia pida ooiwẽ pasima. Mãɨpuru chi mɨ pɨ juade teadapa pɨ k'aepẽra nemietá atepe oosima.
12Mãɨ ũriside Pilatopa k'ɨ̃risia beesima Jesú sãmaasã́ k'ẽet'aapiit'a. Maamina judiorãpa mãicha jĩk'ua jarasidama:
—Pɨa jãɨ ẽpẽra k'ẽet'aapiipɨra pɨ romanepema chi atepe poro chaarea bɨ ome chi mãɨ omepemawẽma. Parituapa ara ichi chi poro jũra jɨ̃parí jɨ̃ bɨade aipɨra, mãɨ ẽpẽra romanepema chi atepe poro chaarea bɨ ome chi nek'ĩramaapɨ.
13Pilatopa mãɨ ũrina pẽra Jesú tajatá ateewãpisima. Maapae ichi ãk'aude suak'abari beesima tejã Mawara K'ak'ayá Ooda apataɨmá. Hebreo pedeade Gabatá apatama. 14Judiorã Egitodepa wãnana k'ɨ̃risiapataɨ ewari norema pada pẽra ãchi ne oo p'anasidama mãɨ ewari pae. Ɨmat'ip'a papodode Pilatopa judiorã́ jarasima:
—Ak'ɨt'ɨ. Cha nãɨ mãra poro jũra jɨ̃parí jɨ̃ bɨpɨ.
15Maamina ãchia jĩk'ua jarasidama:
—¡Ateewãpik'ari, peapise! ¡Ateewãpik'ari, peapise! ¡K'urusude barijira bɨk'ari, peapise!
Mãɨ k'orea Pilatopa jarasima:
—¿Mãɨyara mɨa mãra poro jũra jɨ̃parí jɨ̃ bɨ k'urusude barijira bɨk'ari, peapiik'ãra?
Mãɨne p'aarerã chi mãɨrã chaarearãpa p'anoosidama:
—¡Taipa poro jũra jɨ̃parí jɨ̃ bɨ awara newẽma! ¡Abapuru uru p'anɨma tachi romanepema chi atepe poro chaarea bɨt'a!#19:15 Tachi Ak'õre pedeade jara bɨma israel ĩjũanepemarã poro jũra jɨ̃parí jɨ̃ bɨ ara aba Tachi Ak'õre mãɨya bɨ. Juece 8:23; 1 Samuel 8:7.
16Maapae Pilatopa Jesú romanepema papaká berã́ teasima k'urusude barijira bɨk'ari peadamẽrá. Ara mãɨne ichi ateewãsidama.
Jesú k'urusude barijira bɨdada
Mateo 27:32-44; Marco 15:21-32; Luca 23:26-43
17Jesupa ichi k'urusu ua beek'ari papaká berãpa ichi ateewãsidama ĩjũa Poro Bɨɨrɨ apataɨmá. Hebreo pedeade Gólgota apatama. 18Mãma ãchia Jesú k'urusude barijira bɨsidama. Mãɨnepa ichik'á ẽpẽra ume k'urusude barijira bɨsidama, aba Jesú juaraari, aba ichi juawieri. 19Mãɨ awara Pilatopa pak'uru p'ep'edea Jesú poro nok'oari bɨpisima. Mãɨne nãɨya bɨpisima: «Jesú Nazaredepema, judiorã Poro Jũra Jɨ̃parí Jɨ̃ Bɨpɨ». 20Mãɨ pedea bɨsima hebreo pedeade, latin pedeade mãɨnepa griego pedeade.#19:20 Latin pedea romanepemarãpa pedeapachidama. Hebreo pedea judiorãpa pedeapachidama. Griego pedea perá jõma tuachapemarãpa ãpia k'awa beesima. Griego pedeade pedeapachidama tuacha ne netodai k'orea. Chok'ará judiorãpa mãɨ pedea unusidama, Jesú k'urusude barijira bɨdada p'uuru k'ait'a bɨ pẽra. 21Judiorã p'aarerã chi mãɨrã chaarearãpa mãɨ pedea unusidaɨde Pilatoa jarasidama:
—Bɨrãse “Judiorã Poro Jũra Jɨ̃parí Jɨ̃ Bɨt'a”. Mãɨpari bɨse: “Nãɨ ẽpẽrapa jarasima ichi judiorã poro jũra jɨ̃parí jɨ̃ bɨpɨ”.
22Maamina Pilatopa jarasima:
—Mɨa bɨda ara mãɨya beeipɨ.
23Romanepema papaká berãpa Jesú k'urusude barijira bɨk'ari ichia ɨ̃rɨa anamari jɨ̃ bada atadak'ari mãɨ k'ĩmari k'õanak'ari ãchicha ateewãsidama. Ichia neet'á ek'ari jɨ̃ bada sida ateewãsidama. Mãɨ k'osada chichia nea basima, mãɨpari ɨt'ɨpa edá aba k'osada basima. 24Mãɨne papaká berãpa ãchi tuaba jarasidama:
—Nãɨ k'õanaiwẽma. Pia bɨma nãɨ k'orea ne jemenanai, mãɨ k'aipa jitai k'awayá.
Ara mãɨya mãɨt'u chi ãchia oosidama.
Mãɨyasima Tachi Ak'õre pedeade naena bɨda jĩra:
«Mɨa ɨ̃rɨa anamari jɨ̃ bada ãchicha jedasidama; mãɨnepa mɨa neet'á ek'ari jɨ̃ bada atadai k'orea jemenasidama».#Salmo 22:18.
25Jesú k'urusude jira bɨk'á Jesú nae, chi nae ũpẽawẽra, Cleop'á k'ima María mãɨnepa María Magdalena p'anasidama. 26Jesupa chi nae mãɨnepa chi ichi ome p'ɨrrɨaparí chi «ichia minachia k'ɨ̃ria bɨ» apataɨ ichi bɨk'á unuside, chi naea jarasima:
—Nae, cha bɨ pɨ warrapɨ.
27Maapae ichi ome p'ɨrrɨaparia jarasima:
—Cha bɨ pɨ naepɨ.
Mãɨ ewaridepa Jesú nae chi Jesú ome p'ɨrrɨaparí tede bapachima.
Jesú k'urusude piuda
Mateo 27:45-56; Marco 15:33-41; Luca 23:44-49
28Mãɨya jarak'ari Jesupa k'awasima ichia ooi pada ãarea oosit'a. Mãɨne jarasima:
—Mɨ opisia bɨma.
Mãɨ jarasima Tachi Ak'õre pedeade jara bɨ jĩra.#Salmo 22:15; 69:21.
29Mãɨne arí chok'o uvaba jɨjɨyá ipiru nɨbasima. Chi eda waapẽarãpa mãɨ uvaba jɨjɨyá ne motá bɨ bek'eadak'ari ateewãsidama. Chi ne motá bɨ hisopo pak'uru juade oodak'ari Jesú it'aemá t'õmaripisidama. 30Jesupa mãɨ uvaba jɨjɨyá tok'ari jarasima:
—Mɨa ooi pada ãarea oosima.
Maapae ichi poro edá jaabarik'ari k'ĩrawẽasima.
Jesú orrode miasupa suda
31Judiorã Egitodepa wãnana k'ɨ̃risiapataɨ ewari norema pada pẽra ne oo p'anasidama. Mãɨ arapaapataɨ ewari mimianak'apɨ́ ewari pẽra, judiorãpa ẽpẽerã k'urusude barijira bɨdai k'ɨ̃rianawẽa p'anasidama. Mãɨpuru Pilatoa idisidama chi k'urusude barijira be jĩru bɨap'et'apimẽrá isapea piudak'ari ãchi k'ak'ua mãmapema edá jirapidamẽrá. 32Mãɨ k'orea papaká berã wãnak'ari Jesú ome k'urusude barijira bɨ p'anana aba jĩru bɨap'et'asidama. Ara mãɨya oosidama chi abaɨ sida. 33Maamina Jesumá chesidaɨde ichi piusit'a unusidama. Mãɨpuru ichi jĩru bɨap'et'adaé pasima.
34Mãɨya bɨde aba papaká bɨpa Jesú orrode miasupa susima piarã piusi k'awai k'orea. Ara mãɨne oa mãɨnepa pania chesima. 35Chi nãɨ k'art'a bɨdapa piarã mãɨ unusima. Ichia jara bɨt'a piarãpɨ.#19:35 Juanpa jara bɨma Jesú piuda pẽra piarã ẽpẽra pasit'a. Juan chõa baside waapẽarãpa jarapachidama Jesú ẽpẽra jĩra basimina nãɨ k'ak'uade chewẽ pasit'a. Ichia k'awa bɨma piarã pedea jara bɨt'a mãra pida sõnepa ĩjãanamẽrá. 36Ãarea mãɨ piarã mãɨyasima Tachi Ak'õre pedeade bɨ bɨ jĩra. Nãɨya bɨ bɨma: «Ichi bɨɨrɨ aba pida bɨap'et'adaé pasima».#Éxodo 12:46; Número 9:12; Salmo 34:20. 37Ichiaba Tachi Ak'õre pedeade nãɨya bɨ bɨma: «Chi ãchia sudada pada ẽpẽerãpa ununaipɨ».#Zak'aria 12:10.
Jesú t'ɨbaridada
Mateo 27:57-61; Marco 15:42-47; Luca 23:50-56
38Mãɨya nak'ari judio José apataɨ Pilatomá wãsima. Mãɨ José Arimatea p'uurudepema pasima. Ichi Jesú ome p'ɨrrɨaparí pasima, maamina mi ãpia pida abaɨa jarak'a pasima waapẽarã judiorã wap'ea bɨ pẽra. Ichia Jesú k'ak'ua Pilatoa idisima t'ɨbaride ateewãi k'orea. Mãɨpuru Pilatopa itu ateewãpisima. Ara mãɨne Josepa Jesú k'ak'ua t'ɨbaride ateewãsima. 39Mãɨ awara Nicodemo, chi naena Jesumá teamasi pedeade che badapa mirra k'era áloe ome p'oerada ateewãsima.#Juan 3:1-15. Mãɨ chɨk'ɨa 34 kilo basima.#19:39 34 kilo. Griego pedeade nãɨya bɨ bɨma: cien litrai. Mãɨpa jara bɨma 75 libra. Mirra mãɨnepa áloe pak'uru p'iumá be bapachidama. 40Ãchia Jesú k'ak'ua ateedak'ari mãɨ mirra k'era áloe ome p'oerada p'aru t'orrode p'ɨrɨsidama. Maapae ichi k'ak'ua mãɨ p'aru t'orropa pɨrasidama judiorãpa t'ɨbaridai k'orea oopata jĩra. 41Jesú k'urusude barijira bɨdada k'ait'a ne uu ĩjũa basima. Mãɨ ne uu ĩjũane piuda t'ɨbaripataɨde uria basima p'ẽya uria k'oroda chiwidit'a. Mãma piuda waidi t'ɨbaridak'a pasima. 42Mãɨ uria k'ait'a bɨ pẽra mãɨnepa judiorã mimianak'apɨ́ ewari ará papodo pẽra, Jesú mãma t'ɨbarisidama.
Šiuo metu pasirinkta:
Juan 19: tdc
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© (Active), Wycliffe Bible Translators, Inc. All rights reserved.