Matu 18
18
Se'em en gani za'a
(Maki 9.33-37; Luki 9.46-48)
1 #
Luk 22.24
Sankaŋa ti Yezu zahereba la wa'am a zi'an na soke en yeti, “Ani en gani za'a saazuo sɔ'ɔlum la puan?” 2Ti a yi' bia na ze'ele ba nɛŋan, 3#Mak 10.15; Luk 18.17 ti a yeti, “N yeti ya la Yelemɛŋerɛ, ti han dagena ya tee mɛ ana wuu kɔma, ya kan malum kɛ̃' saazuo sɔ'ɔlum la puan. 4Se'em woo en sigehe a mɛa wuu bia wa, n de se'em n gani za'a saazuo sɔ'ɔlum la puan. 5Se'em woo n to'e bia n ani woo ŋwana mam yu'urɛ zuo, to'e la mam.
Be'em pã'ahegɔ
(Maki 9.42-48; Luki 17.1, 2)
6“Ya se'em han dikɛ pirega lɔkɔ beŋe ti la pirɛ bumbibehi wa ayima en sakɛ bo' mam wa, la wan ana suŋa bo' a daana ti ba dikɛ nɛɛrɛ kugekãtɛ lu' yule a yugela tari en ta za'ɛ bahɛ ko'omen ti a muhi sige tiŋa tiŋa ha. 7Yele boi tiŋa wa zuo, la sɛla en piti nɛreba lubera n boi ka zuo la. Yele sɛ'a en piti nɛreba lubera wan ba'afum wa'am me na, gee yele boi fum se'em daana zuo ti pirega lɔkɔ wa wan ze'ele na la.
8 #
Mat 5.30
“Fum nu'o bii na'arɛ han bahɛ ti fum pita luta, ŋmaaɛ bahɛ, la wan ana suŋa bo' fum ti fum kɛ̃ vom puan la nu'yiŋɔ la na'yinɛ nyana fum tara nu'uhi siyi bii nama ayi' gee ti ba dikɛ fum bahɛ bugum sebo n ka diti kiŋera la puan. 9#Mat 5.29 Fum niho han bahɛ ti fum pita luta, kpikɛ bu lobe bahɛ, la wan ana suŋa bo' fum ti fum ta kɛ̃' vom puan la ninyimɔ nyana fum tara nini iyi' gee ti ba ta dikɛ fum lobe bahɛ bugum tiŋa.
Pehego n bɔregɛ makerɛ
(Luki 15.3-7)
10“Bihɛ ya suŋa la ya da bihɛ bumbibehi wa ayima yoo. Mam yeti ya mɛ wa, ti saazuo ha, ba suŋereba saŋa woo kɔ'ɔm nyɛta mam Sɔ en boi saazuo nɛŋa mɛ saŋa woo. 11[Se'ere en sɔi la, Asaala Dayua wa wa'am na ti a faaɛ la sɛba n bɔregɛ la bahɛ Diimen diimen gulehɛgɔ tuseto ka tari ze'kana]. 12Yamam ti'ihɛ la deni? Nɛra han tara piihi kɔbega, ti kuyima bɔregɛ, a kan bahɛ pihiwai' la siwai' la zoore zuo gee ɛ peseko en bɔregɛ la me yoi? 13La han iŋɛ nyɛ kɔ, yelemɛŋerɛ ti n yɛta ya wa, ti a puurɛ wan pee mɛ, la peyiŋɔ la, gana piihi pihiwai' la siwai' la en ka bɔregɛ la. 14Bala mɛa ti, la dagena ya Sɔ n boi saazuo ha la puti'irɛ ti bumbibehi wa ayima bɔregɛ.
15 #
Luk 17.3
“Se'em han bɔna lageŋɔ puan han tuue fum, pa'alɛ en a tuure la, fum la eŋa ma'a tiŋasuka. A han kelehe fum, fum nyaŋɛ fum suuɔ la lebe me na en bala. 16#Tii 19.15 Gee a han ka kelehe fum, doohe la nɛra ayima bii bayi' pa'ahɛ fum puan, ti yetɔgesebo woo ti ya wan tɔgɛ la, nɛreba bayi' batã wan dɛna aze' nyɛ duma yeti bumɔ n bala. 17Gee a han zagehɛ ka kelehe bamam, yele lageŋɔ la, ti se'em n tuue wa han kelum zagehɛ ti a pun kan kelehe lageŋɔ la, iŋɛ ya nɛre-ina daana wuu se'em en ka zoti Yezu, bii kubetɔ'ɔha la. 18#Mat 16.19; Yɔn 20.23Yelemɛŋerɛ ti n yɛta ya wa, ti sɛla woo ti ya lu' tiŋa wa zuo, saazuo ha me wan lu'. Sɛla woo ti ya lorege bahɛ tiŋa wa zuo, saazuo ha wan me wan lorege bahɛ. 19Le yɛ'ɛha, yelemɛŋerɛ ti en yɛta ya wa, ya bayi' han ku nuurɛ tiŋa wa zuo doohe la sɛla woo ti ya soke bɔta, mam Sɔ n boi saazuo la wan tum dɛ bo' ya. 20Se'ere en sɔi la, zi'an ti nɛreba ba yi' ba tã lagum taaba mam yu'urɛ puan, mam boi bini mɛ la ba.”
Sugeri dia
21 #
Luk 17.3-4
Ti Pita paaɛ Yezu nɛŋan soke en yeti, “Daana, se'em n suuɔ han tuue mam, sugum nuuren bulɛ ti n wan di sugeri bo' en? La tara tara ta paaɛ woo sugum nuuren buyopɔi?” 22#Pi'il 4.24 Ti Yezu yele en yeti, “Dagi sugum nuuren buyopɔi ma'a, gee mam yeti fum la yelemɛŋerɛ wa, sugum nuuren pihiyopɔi sugum nuurɛ buyopɔi.”
23“Dina wa zuo, saazuo sɔ'ɔlum la dikɛ makɛ mɛ la naba en yeti a baŋɛ a yamehi tuuma en kini se'em. 24En pɔhɛ viihegɔ la, ayima tari la a hanɛ la ligeri en de talenta tuha pia, ti ba tari en wa'am na. 25Gee yameŋa wa n kan nyaŋɛ yɔ hanɛ la zuo, ti a daana wa bo' nuurɛ ti ba koohe en la a pɔga, la a kɔma, la lɔgerɔ yɔ hanɛ la. 26Ti yameŋa wa pɔrɛ nama a daana wa nɛŋan ŋmɛ'ɛra nupu'ɔ gee na'aha a daana la yɛta yeti, ‘Iŋɛ sugeri bo' mam, gee n wan yɔ sɛla woo.’ 27Ti nimbu'ɔ nyɔkɛ yameŋa wa daana la, ti a bahɛ en, gee di sugeri bo' a hanɛ la bo' en. 28Gee yameŋa kana mɛa wa en yehe na la, a wa'am na nyɛ la a yameŋa tadaana kayima n me tari a hanɛ dinaari kɔbega, ti a kɔ'ɔm gurɛ a kunkore kɛgera gee yeti ‘Yɔ mam n hanɛ la.’ 29Ti a yameŋa tadaana wa pɔrɛ nama a nɛŋan ŋmɛ'ɛra nu'pu'ɔ yɛta en yeti, ‘Iŋɛ sugeri bo' mam gee en wan yɔ hɔ.’ 30Gee a kɔ'ɔm mum la nini zagehɛ, gee tari en ta pagɛ ti a yɔ hanɛ la za'a. 31Naba la yamehi sise'ehi n nyɛ sɛla n iŋɛ la, ba suya n sagum paaɛ paaɛ, ti ba kiŋɛ ta yele ba daana la sɛla n iŋɛ. 32Bala, ti a daana la yi' en na yele en yeti, ‘Putɔya wa, mam bahɛ fum hanɛ la za'a bo' fum mɛ fum pɔri nama ŋmɛ nupu'ɔ la zuo. 33Fum me ka suni ni ti fum zɔ fum yameŋa tadaana wa nimbu'ɔ, wuu mam zɔ fum nimbu'ɔ se'em la?’ 34Ti a daana la dikɛ susutuulɛ, dikɛ en bo' ti ba namehɛ en ta paaɛ hansɛka ti a wan yɔ hanɛ la za'a za'a. 35Ŋwana ti mam Sɔ en boi saazuo ha me wan dikɛ iŋɛ ya, ya se'em han ka di sugeri bo' a suuɔ a suure puan.”
Šiuo metu pasirinkta:
Matu 18: GBTP
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Gurenɛ New Testament © The Bible Society of Ghana, 2020.