YAHYA 9
9
Ruma Isa kandad̄ina dou mambuda loa eda wali
1Wunga lampa Ruma Isa, Sia edana dou ma mbuda ra'aipu wara wa'una. 2Anamori Ruma Isa sod̄ina d̄i Ruma Isa, ”Pa Guru, b̄ab̄auku dou ake ranggana kambuda? Sab̄ua b̄a dosa ndaina atao b̄ara dosa ama ra inana?”
3Cambe b̄a Ruma Isa, ”Sia mbudana laina b̄ara dosa ndaina atao dosa dou matuana, pala loakud̄u eda b̄a dou kuasa Ruma Hatalla makarawi d̄i ade weki dou ede. 4Salama mbuipu taroa ai, ndai pab̄uaku karawi lampa rawi rad̄i Sia ma ranggadu Nahu. Aimangad̄i d̄imawontu, ro kone sab̄ua dou wati d̄imaloa karawi. 5#Mat. 5:14, Yah. 8:12 Salama Nahu d̄i dunia ake, Nahura taroa dunia.”
6Sawa'u b̄a nggahi ndedena Ruma Isa katufena d̄i dana, ro kacampona oi fela-Na ede lab̄o dana. Edempara kandaikai b̄a Sia d̄i mada dou ede, 7edempara nggahi Sia d̄i dou ede, ”Lao wacapu pahumu d̄i Kolam Siloam.” (Siloam aona ’D̄inggadu’.) Ndad̄i dou ede lao wacana pahuna. Wakatu dula mbalina, sia wa'ura loana eda.
8Dou-dou kompe ra peina ro dou-dou ma sawatipu b̄a ede ma'edana sia ma raho sadeka, nggahi menana, ”Sab̄ua laina sia akesi ma taki doho raho sadeka?”
9Wara ma nggahi, ”Sia romo.” Pala wara rauja ma nggahi, ”Laina, sia sarai b̄une pahu dou ede.”
Pala nggahi b̄a ndai dou ede, ”Madara sia.”
10”B̄uneku ndad̄ina sampe nggomi loakaimu eda?” nggahi siad̄oho d̄i sia.
11Cambe b̄a sia, ”Dou ma ngara Isa ede mandawi sato'i dana makared̄o, edempara kandaina d̄i madaku ro nggahi-Na, ’Lao wacapu pahumu d̄i Kolam Siloam.’ Edempara mada laoku. Ro wakatu mada wacaku pahu, mada loaku eda.”
12”Tab̄eku dou ede?” sod̄i b̄a siad̄oho.
Cambe b̄a sia, ”Io wati b̄adeku.”
Dou Farisi palitina rab̄unena tahokai supu ede
13-14Ainaina ede eded̄u ainaina Sabat wakatu Ruma Isa kacampona dana lab̄o oi fela-Na d̄i loakaina kandad̄i dou mambuda ede loa eda. Ndad̄i dou ma akana ede mbuda ede lao wa'a aka dou-dou Farisi. 15Siad̄oho sod̄i rauna d̄i sia rab̄unena sia loakaina eda. Cambe b̄a sia, ”Sia makandaina dana red̄o d̄i madaku, edempara mada wacaku ro mada loaku eda.”
16Pila-pila dou ade weki dou Farisi ede manggahi, ”Wati lu'u b̄a aka dou ma karawina ake ramaina ta Ruma Hatalla, b̄ara Sia wati kandad̄i auna ainaina Sabat.”
Pala nggahi b̄a dou makalaina, ”Wati lu'u b̄a aka dou ma dosa makarawi b̄isa ra guna b̄une ake?” Edempara wontu lalompa cence ncihi d̄i ade weki siad̄oho.
17Edempara sod̄i wali b̄a dou-dou Farisi d̄i dou ede, ”Au kananu nggomi mab̄oha Sia ma kandad̄ina nggomi loa eda?”
”Sia nabi,” cambe b̄a dou ede.
18Pala dou-dou mana'ekai Yahudi ede wati ne'ena imbi b̄a one dou ede poda mbudana sawatipu b̄a ede ro ake wa'ura loa eda. B̄ara ndede siad̄oho ouna dou matuana, 19ro sod̄ina, ”Sab̄ua poda ake anamu ranggahimu mbuda ra'aipu ranggana wa'u? B̄uneku loakaina eda ake?”
20Ina ra ama ana dou ede macambe, ”Poda ake ana madad̄oho; ro podana sia mbudana ra'aipu ranggana wa'u. 21Pala rab̄unena sia loakaina eda ake, madad̄oho wati b̄adeta. Ro cou ma rakandad̄ina sia loa eda, ede rau madad̄oho wati b̄ademu. Tasod̄i lalompa d̄i ndaina, sia wa'ura na'e; sia naloa cambe b̄a ndaina.” 22Ina ra ama ana dou ede nggahi ndedekaina b̄ara siad̄oho nadahuku d̄i dou-dou mana'ekai Yahudi; b̄ara siad̄oho ede wa'ura kasab̄uana nggahi, b̄a one dou mangaku Isa Sangaji Mambei salama, wati loa walina lu'u d̄i ade uma sambeakai. 23B̄ara ndedena ina ra ama ana dou ede nggahina, ”Sia wa'ura na'e; tasod̄i lalompa d̄i ndaina.”
24Edempara siad̄oho ou walina dou ma rambuda akana ede, ro nggahina d̄i sia, ”Sumpapu b̄a one nggomi d̄imanggahi ma poda. Nami mab̄ade b̄a one dou ede dou madosa.”
25”Sab̄ua Sia nadosa atao wati,” cambe b̄a dou ede, ”mada wati b̄adeku. Pala sab̄ua lampa rawi mada b̄adeku; ntoina mada mbudaku, ake mada wa'ura loa eda.”
26Edempara siad̄oho nggahi walina d̄i sia, ”Sia au rakarawina d̄i nggomi? B̄uneku Sia ndawina nggomi loa eda?”
27Cambe b̄a dou ede, ”Wa'ura ngoa b̄a mada d̄i itad̄oho, pala wati ngawata kade'e b̄a itad̄oho. B̄ab̄auku itad̄oho mane'e kade'e wali? Kombisi itad̄oho mane'e ndad̄i anamori Sia rau?”
28Edempara siad̄oho i'a ra b̄a'ana sia ro nggahina, ”Nggomiku anamori-Na; laina nami! Nami mab̄atuku la Musa. 29Nami mab̄adeku b̄a one Ruma Hatalla wa'ura nuntuna d̄i la Musa. Pala mab̄oha dou ede, nami wati b̄ademu ratab̄e ramaikai-Na.”
30Cambe b̄a dou ede, ”Wati lu'u b̄a aka b̄a one itad̄oho wati b̄adeta ratab̄e ramaikai-Na, pala Sia wa'ura kandad̄ina mada loa eda. 31Ndai wa'ura b̄ade b̄a one Ruma Hatalla wati ringa rakade'ena dou madosa, malaisi dou ma lia ra horoma Ruma Hatalla, ro makarawina rakane'e-Na. 32Ra'aipu tampu'u ndad̄i dunia watipu wara ringa wara dou maloa kandad̄i dou ranggana mbuda loa eda. 33Nggarasi dou ede laina rad̄i Ruma Hatalla, Sia wati loana ndawi au-au.”
34Cambe b̄a siad̄oho, ”Au? Nggomi ma b̄ini b̄a dosa ra'aipu ranggana wa'u, nggomi mane'e ngoa ra tei nami?” Ndad̄i tampu'u ede sia kanta lu'u d̄i ade uma sambeakai.
Dou maloa ede d̄imandad̄i mbuda
35Ringa b̄a Ruma Isa b̄a one siad̄oho wa'ura kantana dou ede lu'u d̄i ade uma sambeakai. Sia ngupana dou ede edempara nggahina d̄i sia, ”Sab̄ua nggomi ma'imbiku d̄i Ana Manusia?”
36Cambe b̄a dou ede, ”Cou Sia, Ruma? Tangoa to'ipu d̄i mada loakud̄u mada imbi d̄i Sia.”
37”Nggomi wa'ura edamu Sia,” cambe b̄a Ruma Isa. ”Sia ma wunga nuntu lab̄o nggomi ake.”
38”Mada imbi, Ruma,” nggahi dou ede, edempara sujuna d̄i tando Ruma Isa.
39Nggahi Ruma Isa, ”Nahu maiku d̄i dunia ake d̄imaparesa; loakud̄u dou ma mbuda naloa eda, ro dou ma loa eda, d̄imandad̄i mbuda.”
40Pila-pila dou Farisi ma wara ta ede maringa nggahi ndede Ruma Isa, edempara sod̄i b̄a siad̄oho d̄i Sia, ”Aona nggahi b̄a Nggomi ede nami ake rau mbuda?”
41Cambe b̄a Ruma Isa, ”Pai mbudasi nggomid̄oho, nggomid̄oho wati dosamu. Pala b̄a nggahi nggomid̄oho, ’Nami ma'edamu,’ ede aona nggomid̄oho mbuipu dosamu.”
Šiuo metu pasirinkta:
YAHYA 9: LAIBHP
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės