YAHYA 8
8
1Pala Ruma Isa laona aka Doro to'i Zaitun. 2B̄ala aisanai sid̄i-sid̄i poda Sia lao walina aka Bait Allah, ro mboto dou mamai raka Sia. Doho Ruma Isa, edempara tampu'u ngoa ra teina siad̄oho. 3Wunga wakatu ede, guru-guru agama ro dou-dou Farisi mai wa'ana d̄i Sia sab̄ua dou siwe raraka eda karawina jina. Siad̄oho kauna dou siwe ede kid̄i d̄ei wohana, 4edempara nggahina d̄i Ruma Isa, ”Pa Guru, dou siwe ake raraka eda wunga karawina jina. 5#Im. 20:10, Ul. 22:22-24 D̄i ade Hukum Musa wara atora b̄a one dou siwe b̄une ake pab̄uaku tob̄a kai wadu sampe madena. Ake b̄une kananu b̄a Ita?” 6Sod̄i ndedekai b̄a siad̄oho b̄a ne'ena kamab̄u Sia, loakaina d̄i kancara b̄a siad̄oho Sia. Pala Ruma Isa na'okompa, ro tuntina kai kangge-Na d̄i dana. 7Wakatu sod̄i pakasa ncau b̄a siad̄oho, Sia hantana tuta-Na ro nggahina d̄i siad̄oho, ”Dou ma wati wara dosa d̄i ade weki nggomid̄oho, co'opu sia d̄imatob̄a ulu kai wadu d̄i dou siwe ede.” 8Sawa'u b̄a ede Ruma Isa oko mbalina ro tunti walina d̄i dana. 9Sawa'u b̄a ringana nggahi ndede Ruma Isa, siad̄oho lao tu'u wi'ina hid̄i ede, sab̄ua-sab̄ua tampu'u ma tua. Cumpukaina Ruma Isa kesena mawara ta ede lab̄o dou siwe ma mbuipu kid̄i d̄i hid̄ina. 10Edempara Ruma Isa hantana tuta-Na ro nggahina d̄i dou siwe ede, ”Tab̄eku siad̄oho sara'ana? Sab̄ua wati wara ma hukum nggomi?”
11”Io wati, Pa,” cambena.
”Taho,” nggahi Ruma Isa, ”Nahu rau wati hukum-Ku nggomi. Ake laora, aina karawi walimu dosa.”]
Ruma Isa eded̄u taroa dunia
12 #
Mat. 5:14, Yah. 9:5 Ruma Isa nuntu ra nggahi walina d̄i dou mamboto, nggahi-Na, ”Nahura taroa dunia. Dou ma b̄atu Nahu wati d̄imalampa d̄i ade rindikaina, pala nantau taroa mori ra wokona.”
13 #
Yah. 5:31
”Ake Ita manuntu ra nggahi mab̄oha weki ndai-Mu,” nggahi dou-dou Farisi ede d̄i Sia, ”nuntu ra nggahi-Mu wati podana.”
14Cambe b̄a Ruma Isa, ”Konena Nahu nuntu ra nggahi-Ku mab̄oha weki ndai-Ku, nuntu ra nggahi-Ku ede napodaku; b̄ara Nahu kab̄ade ratab̄ena maikai Nahu ro tab̄e d̄i laokai Nahu. Nggomid̄oho wati b̄ademu ratab̄ena ramaikai Nahu ro tab̄eku d̄i laokai Nahu. 15Nggomid̄oho paresa ncihi ra ncara dou kai cara manusia; Nahu wati paresaku ncihi ra ncara kone sab̄ua dou. 16Pala paresasi b̄a Nahu ncihi ra ncara dou, raparesa-Ku ede na'adi, b̄ara Nahu wati kese-Ku; Ama ma ranggadu Nahu wara sama-sama lab̄o Nahu. 17D̄i ade Hukum Musa ratunti ndake: Nuntu ra nggahi ma poda eded̄u nuntu ra nggahi rad̄i d̄ua dou. 18Ma nuntu ra nggahi mab̄oha Nahu wara d̄uana – Nahu ro Ama ma ranggadu Nahu.”
19”Teb̄eku Ama-Mu ede?” nggahi siad̄oho.
Cambe b̄a Ruma Isa, ”Nggomid̄oho wati patamu Nahu ro Ama-Ku, mapatasi b̄a nggomid̄oho Nahu, pasti nggomid̄oho mapata rauku Ama Nahu.”
20Sara'ana ede ranggahi b̄a Ruma Isa wakatu Sia wunga tei-Na d̄i Bait Allah d̄eni lab̄o peti-peti hid̄i d̄onggo ra mbeikai piti. Pala wati kone sab̄ua dou rau ma wa'u Sia, b̄ara watipu raka wakatuna.
D̄i hid̄i laokai Nahu, nggomid̄oho wati loamu maikai
21Nggahi wali Ruma Isa d̄i siad̄oho, ”Nahu d̄imalao, ro nggomid̄oho d̄imangupa Nahu, pala nggomid̄oho d̄imamade ade dosamu. Aka hid̄i laokai Nahu, nggomid̄oho wati loamu laokai.”
22Ndad̄i nggahi dou-dou mana'ekai Yahudi, ”Kombisi Sia nane'eku hade weki ndai-Na, b̄ara nggahi Sia, ’Aka hid̄i laokai Nahu, nggomid̄oho wati loamu maikai.’ ”
23Edempara nggahi Ruma Isa d̄i siad̄oho, ”Nggomid̄oho ramaimu ta awa; pala Nahu ramai-Ku ta ese. Nggomid̄oho rad̄i duniana; Nahu laina rad̄i dunia. 24B̄ara ndedena Nahu nggahiku d̄i nggomid̄oho, b̄a one nggomid̄oho d̄imamade d̄i ade dosa-dosamu. Ro podana nggomid̄oho d̄imamade d̄i ade dosa-dosamu, nggara watisi imbimu b̄a one ’Nahura Sia d̄i pehekai NAHU WARA’.”
25”Nggomi cou sapodakaina?” sod̄i b̄a siad̄oho.
Cambe b̄a Ruma Isa, ”D̄i au waliku nuntu ra nggahi lab̄o nggomid̄oho! 26Mboto walipu lampa rawi mab̄oha nggomid̄oho d̄i ne'eku nggahi ra paresa ncihi ra ncaramu b̄a Nahu. Pala Sia ma ranggadu Nahu loa d̄i imbi. Ro Nahu mangoana d̄i dunia au raringa b̄a Nahu rad̄i Sia.”
27Siad̄oho wati loana ka'ao b̄a one Sia wunga nuntu ra nggahina d̄i siad̄oho mab̄oha Ama. 28B̄ara ndedena nggahi Ruma Isa d̄i siad̄oho, ”Peasi nggara nggomid̄oho wa'ura kad̄ese ra kantasamu Ana Manusia, nggomid̄oho d̄imab̄ade b̄a one ’Nahura Sia ma d̄ipehekai NAHU WARA’, ro nggomid̄oho d̄imab̄ade b̄a one wati wara kone sab̄ua rakarawi b̄a Nahu rad̄i ndai Nahu. Nahu nggahimpa au rangoa ra tei b̄a Ama d̄i Nahu. 29Ro Sia ma ranggadu Nahu wara sama lab̄o Nahu. Sia wati paranana co'o wi'i Nahu kese, b̄ara Nahu makarawi ncau au makasana wea ade-Na.”
30Sawa'u b̄a nggahi sara'ana b̄a Ruma Isa ede, mboto dou ma'imbi d̄i Sia.
Ruma Hatalla ma poda mahori kalosana nggomid̄oho
31Edempara nggahi Ruma Isa d̄i dou-dou Yahudi ma wa'ura imbi d̄i Sia, ”Nggara mab̄atusi b̄a nggomid̄oho mori b̄une rangoa ra tei b̄a Nahu nggomid̄oho poda-poda b̄atumu Nahu, 32ndad̄i nggomid̄oho d̄imapata lampa rawi mapoda, ro lampa rawi mapoda ede d̄imahori kalosana nggomid̄oho.”
33 #
Mat. 3:9, Luk. 3:8 ”Madad̄oho ake londo ra mai Ibrahim,” nggahi siad̄oho, ”Madad̄oho watipu iumu ndad̄i ada cou-cou rau! Auku aona nggahi Ita, ’Nggomid̄oho d̄ihori kalosa’?”
34”Nancihi poda nggahi Nahu ake,” nggahi Ruma Isa d̄i siad̄oho, ”Dou ma karawi dosa, eded̄u ada dosa. 35Ro sab̄ua ada wati ntauna hid̄i d̄i ngge'e impikaina d̄i ade iwa ra weki, pala ana d̄i ru'u santoi-ntoina nantau hid̄i ade iwa ra wekina. 36B̄ara ndedena, nggara Ana mahori kalosa nggomid̄oho, nggomid̄oho poda-poda hori weki. 37Nahu b̄ade nggomid̄oho ake poda londo ra mai la Ibrahim. Pala nggomid̄oho mane'e hade Nahu, b̄ara nggomid̄oho wati ngawamu tarima rangoa ra tei b̄a Nahu. 38Au ra'eda b̄a Nahu d̄i Ama-Ku, edeku d̄i nuntu ra nggahi b̄a Nahu. Pala nggomid̄oho makarawiku au rangoa ra tei b̄a ama ndaimu.”
39Cambe b̄a siad̄oho, ”Ama madad̄oho eded̄u Ibrahim.”
”Pai poda-podasi nggomid̄oho ana-ana la Ibrahim,” nggahi Ruma Isa, ”pasti nggomid̄oho makarawiku au rakarawi b̄a la Ibrahim. 40Nahu karonggaku d̄i nggomid̄oho ruku ra rawi mataho raringa b̄a Nahu d̄i Ruma Hatalla, pala nggomid̄oho mane'eku hade Nahu. Ibrahim wati karawina b̄une ede! 41Nggomid̄oho karawimu au rakarawi b̄a ama ndaimu.”
Cambe b̄a siad̄oho, ”Madad̄oho laina ana-ana haram. Ama madad̄oho sab̄uampa, eded̄u ndai Ruma Hatalla.”
42Edempara nggahi Ruma Isa d̄i siad̄oho, ”Nggara podasi Ruma Hatalla ede Amamu, nggomid̄oho d̄imameci ra ca'u Nahu, b̄ara Nahu ramaiku rad̄i Ruma Hatalla. Nahu maiku laina rakane'e ndai-Ku, pala Sia ma ranggaduna Nahu. 43B̄ab̄auku nggomid̄oho wati loamu ka'ao au ranuntu ra nggahi Nahu? B̄ara nggomid̄oho wati wa'umu taha kade'e rangoa ra tei b̄a Nahu. 44Ibilis amamu, ro nggomid̄oho mangawa b̄atu rakane'e amamu. Ra'aipu saramba wa'una Ibilis ede mahade dou. Sia watipu paranana lu'u tamapoda ra mancihi, b̄ara wati wara ruku ra rawi mataho d̄i sia. Sia nanuntu cowasi ede nancihi ncao mpa, b̄ara wa'ura ndede tabe'ana. Sia macowa, ro ramai kai sara'ana macowa. 45Pala Nahu manggahi mapoda ra mancihi, ro b̄ara ndedena nggomid̄oho wati imbimu d̄i Nahu. 46Couku d̄i ade weki nggomid̄oho maloa mbei bukuti b̄a one wara dosa d̄i Nahu? Nggara nggahisi b̄a Nahu lampa rawi mapoda, b̄ab̄auku nggomid̄oho wati imbikaimu d̄i Nahu? 47Dou ma mai rad̄i Ruma Hatalla, naringa ra kade'eku nggahi ra eli Ruma Hatalla. Pala nggomid̄oho laina rad̄i Ruma Hatalla, b̄ara ndedena, nggomid̄oho wati ngawakaimu kade'e.”
Ruma Isa ro Ibrahim
48Cambe b̄a dou-dou Yahudi d̄i Ruma Isa, ”Sab̄uana ncarasi nggahi b̄a nami b̄a one Nggomi dou Samaria ralu'ukai b̄a seta?”
49Cambe b̄a Ruma Isa, ”Nahu wati lu'ukai b̄a seta. Nahu malia ra horoma Ama-Ku, pala nggomid̄oho makab̄awa ra katuna Nahu. 50Nahu wati ngupaku lia ra horoma d̄i ru'u weki ndai-Ku. Wara sab̄ua ma usaha wea lia ra horoma d̄i ru'u b̄a Nahu, ro Sia ma paresa ncihi ra ncara. 51Ncihi poda nggahi-Ku ake, dou ma b̄atu nggahi ra eli Nahu, santoi-ntoina wati d̄imamade.”
52Edempara nggahi dou-dou Yahudi ede d̄i Ruma Isa, ”Ake nami poda-poda b̄ademu b̄a one Nggomi wa'ura lu'u kai b̄a seta! Ndai la Ibrahim wa'ura made, ndede rauja sara'ana nabi. Pala nggahi b̄a Nggomi, ’Dou ma b̄atu nggahi ra eli Nahu, santoi-ntoina wati d̄imamade.’ 53Nggara ndai la Ibrahim wa'ura made, ro nabi-nabi sara'ana wa'ura made rau, Nggomi ake couku? Sab̄ua na'epu Nggomi ntewi kaisi lab̄o ama nami Ibrahim?”
54Cambe b̄a Ruma Isa, ”Pai ngupasi b̄a Nahu d̄ese ra ntasa d̄i ru'u b̄a ndai Nahu, d̄ese ra ntasa ede wara aona. Ruma Hatalla Ama-Ku makad̄ese ra ntasana Nahu. Mab̄oha Sia nggomid̄oho manggahi Sia eded̄u Ruma Hatalla nami. 55Sapodakaina nggomid̄oho wati patamu Sia. Pala Nahu kapataku Sia. Pai nggahisi b̄a Nahu b̄a one Nahu wati pataku Sia, ndad̄i Nahu dou macowa, sama b̄une nggomid̄oho. Nahu kapataku Sia, ro mato'a d̄i ngoa ra tei-Na. 56Amamu la Ibrahim naneo poda adena b̄a one sia d̄ima'eda ainaina Nahu. Sia wa'ura edana ro Sia neo poda adena!”
57Edempara nggahi dou-dou Yahudi d̄i Ruma Isa, ”Umu Nggomi watipu wa'una lima mpuru mba'a, ro Nggomi wa'ura eda-Mu la Ibrahim?”
58Cambe b̄a Ruma Isa, ”Poda Nahu manggahi d̄i nggomid̄oho: sawatipu wara la Ibrahim, Nahu wa'ura wara.”
59Edempara dou-dou Yahudi ede wehana wadu d̄i tob̄akaina Sia; pala Ruma Isa cilina weki, edempara lao tu'u wi'ina Bait Allah.
Šiuo metu pasirinkta:
YAHYA 8: LAIBHP
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės