Lk 12
12
Yesũ Aikany'a Amanyĩw'a make Mesũvĩane na Mĩseũvyo
(Mat 10.26-27)
1 #
Mat 16.6; Mk 8.15 Yĩla andũ ngili mbingĩ moombanie kũvika weethĩa nĩmeũkinyangana, Yesũ nĩwaneenie na amanyĩw'a make mbee amea atĩĩ,
“Ĩsũvĩanei na mbota ya Avalisi ĩla nĩ mĩseũvyo. 2#Mk 4.22; Lk 8.17 Vai ũndũ mũvithe ũtakaumbũwa, kana kĩmbithĩ kĩtakamanyĩka. 3Kĩla mũũneenea kĩvindunĩ, kĩkeew'ĩka kwĩ kyeni, na kĩla mũũsukana mwĩvingĩĩte nyũmba kĩkatavanĩw'a kĩtaanĩ.
Ũla Inyw'ĩ Mwaĩlĩte Kũkĩa
(Mat 10.28-31)
4“Ekai nĩmũtavye anyanyawa, mũikakĩe andũ; mo matonya o kũmũaa ĩndĩ ĩtina wa vau, vai ũndũ ũngĩ matonya kũmwĩka. 5Nĩngũmũtavya ũla mwaĩlĩte kũkĩa: Kĩai ũla ĩtina wa kũaa, wĩ na ũtonyi wa kwĩkya ĩianĩ ya mwaki. Ĩĩ, ekai nĩmũtavye, mũkĩei ũsu!
6“Tũsũni tũtano tũithooaw'a o mbesa nini? Ĩndĩ Ngai ndolwa nĩ kamwe katw'o. 7O na nzw'ĩĩ syonthe ila syĩ mĩtwenĩ yenyu nĩ ndale. Kwoou mũikakĩe; mwĩ vata mũno kwĩ tũsũni o na twingĩvĩte ata!
Kũmũkũsĩĩa na Kũmũkaĩa Klĩsto
(Mat 10.32-33; 12.32; 10.19-20)
8“O ĩngĩ ekai nĩmũtavye, mũndũ ũla ũkũsĩĩaa andũnĩ kana nĩ mũatĩĩi wakwa, o nake Mwana wa Mũndũ akakũsĩĩa mbee wa alaĩka ma Ngai asye kana nĩ mũatĩĩi wake; 9ĩndĩ ũla wĩkaĩa mbee wa andũ asye ndambĩsĩ, o nake Mwana wa Mũndũ akakaĩa mbee wa alaĩka ma Ngai asye ndamwĩsĩ.
10 #
Mat 12.32; Mk 3.29 “Mũndũ ũla ũneeneaa Mwana wa Mũndũ naĩ akaekewa, ĩndĩ ũla ũmũumaa Veva Mũtheu ndakaekewa.
11 #
Mat 10.19-20; Mk 13.11; Lk 21.14-15 “Yĩla memũtwaa nyũmbanĩ sya Ayuti sya kũthaithĩa na kũmbanĩa mũkasilĩlwe, kana mbee wa makavana kana asumbĩ, mũikaatinde mũithĩnĩka nĩ ũndũ mũũthi kwĩtetea, kana kĩla mũũthi kũneena. 12Nũndũ saanĩ o ũsu Veva Mũtheu akamũmanyĩsya kĩla mwaĩlĩte kũneena.”
Ngelekany'o ya Mũndũ Mũthwii Mũtumanu
13Mũndũ ũmwe waĩ nthĩnĩ wa ĩkomano nĩwamwĩie Yesũ atĩĩ, “Mũmanyĩsya, tavya mwana-a-ia andaĩe syĩndũ ila twatiĩiwe nĩ nau.”
14Yesũ amũsũngĩa amwĩa atĩĩ, “Mũnyanyawa, nũũ ũnengete ũkũmũ wa kũtw'a kana kũaany'a syĩndũ katĩ wenyu?” 15Nĩwaendeeie kũtavya andũ atĩĩ, “Ĩsũvĩei na mũyĩsianĩa na ĩtomo ya syĩndũ o na syĩva, nũndũ thayũ wa mũndũ ndũseũvĩtw'e na syĩndũ ila wĩ nasyo o na athuĩte ata.”
16Yesũ nĩwamatavisye ngelekany'o ĩno: “Mũndũ ũmwe waĩ mũthwii aĩ na mũũnda waĩ na lĩu mwingĩ. 17Nĩwambĩĩie kũsũanĩa ayasya, ‘Nĩĩka ata nyie na ndi na vandũ nĩkĩa ngetha yakwa yonthe?’ 18Nĩvo ĩndĩ waisye atĩĩ, ‘Aa, nĩnamanya ũndũ ngwĩka. Nĩomboanga makũmbĩ makwa ala nĩ namo na kwaka angĩ manene, na vau ngeekĩa ngetha yakwa yonthe na syĩndũ ila ingĩ nĩ nasyo. 19Nĩvo ĩndĩ nĩĩa ngoo yakwa, ngoo, yu wĩ na syĩndũ mbĩanu sya kũtũmĩa vandũ va myaka mingĩ. Thũmũa ũĩsae na kũnyusaa o vamwe na kũtana.’ 20Ĩndĩ Ngai amwĩa, ‘Wĩ mũtumanu we! Ũtukũ ũũ thayũ waku nũkwoswa; syĩndũ ii syonthe wĩyũmbanĩsye ikeethĩwa syĩ syaũ?’
21“Ũu nĩw'o kũkethĩwa kwa andũ ala meyũmbanĩasya mothwii na ti athwii ngalĩkonĩ ĩla ya Ngai.”
Yesũ Aimanyĩsya Andũ Maeke Kwĩmakĩa
(Mat 6.25-34)
22Nĩvo ĩndĩ Yesũ weeie amanyĩw'a make atĩĩ, “Kwoou nyie nĩmwĩa mũikemakĩe nũndũ wa kĩla mũkaĩsaa nĩ kana mwĩkale thayũ, na mũikemakĩe nũndũ wa kũla mũkaumasya ngũa sya kwĩkĩa. 23Kwĩthĩwa thayũ nĩkũthonekete lĩu, naw'o mwĩĩ nũthonokete ngũa. 24Kwa sisyai ngũngũũ: Iivandaa kana kũmbany'a ngetha, o na ii kũndũ kwa kwia lĩu kana makũmbĩ, ĩndĩ Ngai nũiĩthasya. Inyw'ĩ mũi vata mũno mbee wa nyũnyi? 25Ve ũmwe wenyu ũtonya kwĩyongela matukũ ma thayũ wake kũũ ĩũlũ wa nthĩ#12.25 kwĩyongela matukũ ma thayũ wake kũũ ĩũlũ wa nthĩ: Ndeto sya Kĩkiliki ila itũmĩĩtwe vaa no itonya kũalyũlwa kwĩyongela ũasa wake kwa kũũya na kwĩmakĩa kwake? 26Kwoou ethĩwa mũitonya kwĩka kaũndũ kanyivĩte ũu, nĩkĩ mũkwĩmakĩa nũndũ wa maũndũ ala angĩ? 27#1Asu 10.4-7; 2Mav 9.3-6 Kwa sũanĩai ũndũ malaa ma kĩthekanĩ mameaa; maithũkũmaa kana kũtuma ngũa. Ĩndĩ ekai nĩmũtavye, o na Mũsumbĩ Solomoni athuĩte ũndũ wathuĩte, ndaaĩthĩwa na ngũa syanakavĩte ta yĩmwe ya malaa asu. 28Ngai nĩwe ũnengae mĩmea ya kĩthekanĩ wanake ũsu, o na kau yĩthĩawa vo ũmũnthĩ na ũnĩ ĩitw'ĩkĩthw'a ngũ. Kwa w'o akamwĩka inyw'ĩ nesa mbee! Nĩkĩ mwĩ na mũĩkĩĩo ũnyivĩte ũu?
29“Kwoou ekai kwĩmakĩa mũimantha kĩla mũkaĩsaa kana kĩla mũkanyusaa. 30Andũ-ma-mbaĩ-ingĩ nĩmo mathĩnaw'a nĩ syĩndũ isu. Inyw'ĩ Ĩthe wenyu ũla wĩ ĩtunĩ nĩwĩsĩ mwĩ na vata wa syĩndũ isu. 31Thĩnĩkĩai ĩndĩ maũndũ ma ũsumbĩ wa Ngai, nake akamũnenga syĩndũ isu ingĩ.
Kwia Ũthwii Ĩtunĩ
(Mat 6.19-21)
32“Mũikethĩwe na w'ĩa inyw'ĩ ĩĩthya ĩnini, nũndũ Ĩthe wenyu nĩwendie kũmũnenga ũsumbĩ. 33Thoosyai syĩndũ syonthe ila mwĩ nasyo, na mũitethya ngya na i mbesa. Ĩseũvĩsyei ngusu ĩtakũaa, na mũyia ũthwii wenyu ĩtunĩ vala ũtaolekaa, na kĩng'ei kĩtavika, na ngulu itawananga. 34Nũndũ vala ũthwii waku ũĩ, novo ngoo yaku yĩthĩawa.
Athũkũmi Mekalaa Meyũmbanĩtye
35 #
Mat 25.1-13
“Ĩkalaai mwĩyũmbanĩtye kwondũ wa kyonthe kĩla kĩumĩla, na taa syenyu syakene, 36#Mk 13.34-36 ta athũkũmi ala methĩawa meteelete mũnene woo asyoke kuma mbokanĩ ya mũtwaano. Mũnene ũsu avika na akũnanga mũomo, nĩmamũvingũĩaa o vau kwa vau. 37Nĩ aathime athũkũmi asu, ala mũnene woo asyoka ũkamethĩa masalukĩtye! Nĩmũtavya w'o, mũnene ũsu akeeyova kĩkoi we mwene ekalye athũkũmi asu make nthĩ na kũmathũkũma. 38Athũkũmi asu makeethĩwa me aathime meethĩwa nĩ mũnene woo masalukĩtye, o na ethĩwa akooka ũtukũ katĩ kana o vaa kũikya. 39#Mat 24.43-44 Ĩndĩ manyai ũndũ ũũ: Kethĩwa mwene wa nyũmba nĩwĩthĩawa esĩ saa ũla kĩng'ei kĩkũka, ndakĩeka kĩtũle nyũmba yake. 40Kwoou o nenyu ĩkalai mwĩyũmbanĩtye, nũndũ Mwana wa Mũndũ akooka saa ũla mũtataĩĩe.”
Mũthũkũmi wa Kwĩkwatw'a na Ũngĩ ũte wa Kwĩkwatw'a
(Mat 24.45-51)
41Vetelo nĩwamũkũlilye atĩĩ, “Mwĩai, ngelekany'o ĩno nĩ ithyĩ ũũtũtavasya kana wĩtavasya andũ onthe?”
42Mwĩai amũsũngĩa, “Mũthũkũmi wa kwĩkwatw'a na mũĩ nĩ wĩva? Nĩ ũla ũkaiwa nĩ mũnene wake aũngamĩe athũkũmi ala angĩ me nyũmbanĩ yake, na kũmaaĩaa lĩu ĩvinda yĩla yaĩlĩte. 43Nĩ mũathime mũthũkũmi ũla ũkethĩwa nĩ mũnene wake aendee na kũtethya wĩa ũla watiĩiwe. 44Nĩmũtavya w'o, mũnene wake akamũnenga kũũngamĩa syĩndũ syake syonthe. 45Ĩndĩ ethĩwa nĩ mũthũkũmi ũte wa kwĩkwatw'a, no asye ngoonĩ yake, ‘Mũnene wakwa nũkwĩkalanga ayĩsa kũka,’ na ĩndĩ ayambĩĩa kũvũa athũkũmi ala angĩ ma aũme na ma aka na kũĩsaa na kũnyw'a akamilwa. 46Mũnene wa mũthũkũmi ũsu akooka mũthenya ũla we ũtataĩĩe na saa ũla ũtesĩ. Nĩvo ĩndĩ mũnene ũsu wĩmũthĩny'a mũno#12.46 wĩmũthĩny'a mũno: Maandĩko amwe maĩtye wĩmũtilanga ilungu na aimwĩkya kũla kwĩkalaa mbaa matũ.
47“Mũthũkũmi ũla wĩthĩawa esĩ kĩla mũnene wake ũkwenda eke, ĩndĩ ailea kwĩyũmbany'a na kwĩka ũndũ ũsu, akavũwa mũno. 48Nake mũthũkũmi ũla wĩthĩawa atesĩ kĩla mũnene wake ũkwenda eke, ĩndĩ ayĩka ũndũ ũtuma avũwa, ndakavũwa mũno. Mũndũ ũla ũnengetwe syĩndũ mbingĩ, akendeka anengane syĩndũ mbingĩ, na ũla ũnengetwe syĩndũ mbingangĩ, akendeka anengane mbingangĩ.
Yesũ Aetie Ũtilĩkangano katĩ wa Andũ
(Mat 10.34-36)
49“Nyie nookie kwakany'a mwaki ĩũlũ wa nthĩ, na nenda kethĩwa yu nĩwakene! 50#Mk 10.38 Neteelete kũvatiswa na ũvatiso wa mathĩna, na ndi na mũuo ngoonĩ yakwa kũvika ũu ũvĩtũke! 51Ko mũkwona ta nookie kũete mũuo kũũ ĩũlũ wa nthĩ? Aiee! Ndyaaete mũuo. Ĩndĩ naetie ũtilĩkangano katĩ wa andũ. 52Kuma yu, mũsyĩ wĩ na andũ atano ũkeethĩawa na ũtilĩkangano: Atatũ maleanae na elĩ, na elĩ maileana na atatũ. 53#Mika 7.6 Ĩthe wa mwana akaleanaa na mwana wake, nake mwana aileana na ĩthe; inyia wa mwĩĩtu akaleanaa na mwĩĩtu wake, nake mwĩĩtu aileana na nyinyia; inyia wa mũũme wa mũndũ akaleanaa na mũka-a-mwana, nake mũka-a-mwana aileana na inyia wa mũũme.”
Kũvathũkanasya Mavinda
(Mat 16.2-3)
54Yesũ nĩwasyokie atavya ĩkomano o nayo ayĩa atĩĩ, “Yĩla mwoona matu maumĩla ũthũĩlonĩ wa syũa, inyw'ĩ nĩmwaasyaa kana nĩkũkua na kũyua. 55Na yĩla mweew'a kĩseve kĩuutanĩte kuma ngalĩko ya ĩtheo, mũyasya kana kwĩĩthĩwa kwĩ kũvyũ, na kũyĩthĩwa ũu. 56Inyw'ĩ andũ ma mĩseũvyo! Nĩmwĩsĩ kũweta ũndũ kũkwĩthĩwa kũilyĩ kwa kũsisya mũvw'anĩle wa nthĩ na matu; nĩkĩ ĩndĩ mũtatonya kũmanya kĩla kĩendee ĩvinda yĩĩ tũĩ?
Kwĩw'ana na ala mwĩ na Ũndũ Namo
(Mat 5.25-26)
57“Nĩkĩ mũtetw'ĩĩaa kĩla kyaĩlu mũkeka? 58Ethĩwa ve mũndũ wĩ na ĩkoani nake, tata wĩw'ane nake mbee wa mũtanamba kũvika kotinĩ. Nũndũ mwavika, nũkũũnengane kwa mũsili wa makoani, nake mũsili aikũnengane kwa asikalĩ makũvingĩe yela. 59Eka ngũtavye, ndũkauma vau ũtaĩvĩte kĩla ũtw'ĩĩwe kyonthe.”
Šiuo metu pasirinkta:
Lk 12: KAMBA
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
BIBLE SOCIETY OF KENYA © 2011