Lk 11
11
Ũmanyĩsyo wa Yesũ ĩũlũ wa Mboya
(Mat 6.9-13; 7.7-11)
1Mũthenya ũmwe Yesũ nĩwavoyaa vandũnĩ vana. Amina, mũmanyĩw'a ũmwe wake nĩwamwĩie atĩĩ, “Mwĩai, tũmanyĩsye kũvoya, o tondũ Yoana wamanyĩisye amanyĩw'a make.”
2Yesũ nĩwameie atĩĩ, “Yĩla mũũvoya, aasyai ũũ:
‘Asa, ĩsyĩtwa yaku nĩyĩkumw'e;
ũsumbĩ waku nĩwũke.
3Tũnenge kĩla mũthenya lĩu ũtwĩanĩe.#11.3 ũtwĩanĩe: Ndeto ya Kĩkiliki ila ĩtũmĩĩtwe vaa no ĩtonya kũalyũlwa wa ũmũnthĩ kana wa ũnĩ
4Tũekee mavĩtyo maitũ,
nũndũ o naitũ nĩtũmaekeaa ala matũvĩtĩasya,
na ndũkatũlikye matatwanĩ.’ ”
5Nĩvo ĩndĩ Yesũ wameie atĩĩ, “Kwasũanĩa we ũkethĩwa na mũnyanyau, na ũithi kwake ũtukũ katĩ na ũimwĩa, ‘Mũnyanyawa, mwa ngovethye mĩkate ĩtatũ; 6mũndũ ũmwe twĩ ndũũ nĩwanthokea e kyalonĩ na ndi na kĩndũ nĩmũnenga.’ 7Nake mũnyanyau aikũsũngĩa e nyũmba nthĩnĩ aikwĩa, ‘Eka kũnthĩny'a! Mũomo nũminie kũvingwa, na nĩ na syana syakwa nĩtũkomete. Nditonya kũkĩla ngũnenge kĩndũ!’ 8Ekai nĩmũtavye, o na ethĩwa mũndũ ũsu ndeũkĩla akũnenge mĩkate nĩkwĩthĩwa wĩ mũnyanyae, kwondũ wa kũendeea na kũmũthing'ĩĩsya, nũkũkĩla akũnenge kyonthe kĩla ũkwenda.
9“Kwoou nĩmwĩa: Ĩtyai Ngai kĩla mũkwenda, na akamũnenge; manthai na mũkakwata; vingũsyai kwake, na mũkavingũĩwa. 10Nũndũ ũla wĩtasya Ngai kĩndũ o na kĩva nũnengawe, na ũla ũmanthaa nũkwataa, na ũla ũvingũasya kwake nũvingũĩawa. 11Nũũ katĩ wenyu ala mwĩ na syana, ũtonya kũnenga mwana wake#11.11 Maandĩko amwe ma tene ma Ndeto ya Ngai mena ndeto ii: Ĩvia amwĩtya mũkate? Kana akamũnenga nzoka amwĩtya ĩkũyũ? 12Kana akamũnenga kĩng'auĩ amwĩtya ĩtumbĩ? 13Ethĩwa inyw'ĩ ĩndĩ mũthũkĩte ũu mũthũkĩte, nĩmwĩsĩ kũnenga syana syenyu syĩndũ nzeo, Ĩthe wenyu ũla wĩ ĩtunĩ nĩwĩyũmbanĩtye mũno mbee kũmanenga Veva Mũtheu ala mamwĩtya!”
Yesũ Ayĩwa Anengetwe Vinya nĩ Mũnene wa Maimũ
(Mat 12.22-30; Mk 3.20-27)
14Mũthenya ũmwe Yesũ nĩwalũngasya ĩimũ yavingĩte mũndũ ũkethĩa ndatonya kũneena, na yamina kuma mũndũnĩ ũsu ambĩĩa kũneena. 15#Mat 9.34; 10.25 Andũ nĩmaseng'ie mũno na amwe moo masya atĩĩ, “Mũndũ ũũ elũngya maimũ nũndũ anengetwe vinya ũsu nĩ Mbeelisevuli mũnene wa maimũ.”
16 #
Mat 12.38; 16.1; Mk 8.11 Angĩ namo nĩmendie kũmũtata Yesũ, na kwoou mamwĩa nĩeke kyama kuma kwa Ngai. 17Yesũ nĩwamanyie ũndũ meũsũanĩa na kwoou amea atĩĩ, “Ũsumbĩ ũla wĩyĩaanĩtye ikundi ikũkitana nĩwanangĩkaa. O ta ũu mũsyĩ ũla wĩyĩaanĩtye ikundi ikũkitana nũvalũkaa. 18Kwoou ethĩwa Satani nĩmũaanĩku na nũkwĩyũkita we mwene, ũsumbĩ wake ũkaũngama ata? Nĩneena ũu nũndũ mwĩasya kana nĩlũngya maimũ na vinya wa Mbeelisevuli. 19Nĩmũkũlya, ũndũ mũkwasya kana nĩlũngya maimũ na vinya wa Mbeelisevuli, namo aatĩĩi menyu memalũngya na vinya waũ? Kwondũ wa ũu, kĩla aatĩĩi menyu mekwĩka nĩkĩũmwony'a kana ndeto syenyu ti sya w'o! 20Ĩndĩ ethĩwa nĩlũngya maimũ na vinya wa Ngai, manyai kana ũsumbĩ wa Ngai nĩ mũviku katĩ wenyu.
21“Yĩla mũndũ wĩ vinya ũkũsunga nyũmba yake e na mĩio ya kaũ, syĩndũ syake syĩthĩawa syĩ ũsũvĩonĩ. 22Ĩndĩ yĩla mũndũ ũngĩ wĩ vinya kwĩ we wamũvithũkĩa na kũmũkĩlya vinya, nũmũvenaa mĩio ĩsu ya kaũ ĩla ũkwĩkwatasya, na aiaĩa angĩ syĩndũ ila inatavĩtwe.
23 #
Mk 9.40
“Mũndũ ũla ũte vamwe nakwa ethĩawa aileana nakwa, na ũla ũtombanasya vamwe nakwa ekaa kũnyaĩĩkya.
Kũsyoka Kwa Maimũ Mũndũnĩ
(Mat 12.43-45)
24“Yĩla ĩimũ yalũngw'a kuma mũndũnĩ, nĩyangangaa weũnĩ yĩimantha vandũ yĩtũe. Yaema kũvona, nĩyĩsũanĩaa yĩkasya, ‘Nĩngũsyoka nyũmbanĩ yakwa ĩla nĩnaumie.’ 25Nĩyĩsyokaa na kwĩthĩa nyũmba ĩsu yĩ ndute na ĩkaseũvw'a nesa. 26Nĩvo ĩndĩ yĩendaa yĩkaete maimũ angĩ mũonza mathũkangu kwĩ yo. Nĩmalikaa na kũtũa vau, na mwĩkalĩle wa mũndũ ũsu ũyĩthĩwa wĩ mũthũku mbeange kwĩ ũndũ wailyĩ navu mbeenĩ.”
Mũndũ ũla Mũathime W'o
27Yesũ aendee na kũneena ũu, mũndũ mũka ũmwe waĩ ĩkomanonĩ yĩu nĩwaneenie na wasya mũnene asya atĩĩ, “Nĩ mũathime mũndũ mũka ũla wakũsyaie na akũea!”
28Ĩndĩ Yesũ asũngĩa asya atĩĩ, “Ala kwa w'o aathime nĩ ala methukĩĩasya ndeto ya Ngai na kwĩka ũndũ ĩkwasya!”
Yesũ Ayĩwa Nĩeke Kyama
(Mat 12.38-42)
29 #
Mat 16.4; Mk 8.12 Ĩkomano ya andũ o yĩendee na kwingĩva Yesũ nĩwameie atĩĩ, “Andũ ma ĩvinda yĩĩ nĩ athũku mũno! Memantha kwonw'a kyama, ĩndĩ vai kyama meonw'a ate o kĩla kyeekĩkie kwa mwathani Yona. 30#Yona 3.4 O tondũ Yona waĩ wonany'o kwa andũ ma Nineva, now'o o nake Mwana wa Mũndũ wĩĩthĩwa e wonany'o kwa andũ ma ĩvinda yĩĩ. 31#1Asu 10.1-10; 2Mav 9.1-12 Mũthenyanĩ wa Ũsilĩlo, mũsumbĩ mũndũ mũka wa nthĩ ya Sieva nũkokĩla atũle andũ ma ĩvinda yĩĩ mũtĩ. Nũndũ we nĩwaumie nthĩ yĩ kũndũ kũasa ooka kwĩw'a ũĩ wa Solomoni, na kwa sisyai, vaa ve ũndũ mũnene kwĩ Solomoni. 32#Yona 3.5 O ta ũu ĩvindanĩ yĩu, andũ ma Nineva nĩmakokĩla matũle andũ ma ĩvinda yĩĩ mũtĩ. Nũndũ mo nĩmeelilile kwondũ wa naĩ syoo yĩla meewie ũtavany'a wa Yona, na kwa sisyai, vaa ve ũndũ mũnene kwĩ Yona!
Kyeni kya Mwĩĩ
(Mat 5.15; 6.22-23)
33 #
Mat 5.15; Mk 4.21; Lk 8.16 “Vai mũndũ ũkwatasya taa na aiũvitha kana aiũkunĩkĩlya mbisũ. Awiaa vandũ vatũlu nĩ kana ũmulĩkĩle andũ ala meũlika nyũmbanĩ ĩsu. 34Metho maku nĩmo taa wa mwĩĩ waku. Ethĩwa metho maku nĩ maseo, mwĩĩ waku w'onthe ũkakomanwa nĩ kyeni, ĩndĩ ethĩwa metho maku nĩ mathũku, mwĩĩ waku w'onthe ũkeethĩwa kĩvindunĩ. 35Kwoou ĩsũvĩe kyeni kĩla kĩ nthĩnĩ waku kĩikatw'ĩke kĩvindu. 36Ethĩwa mwĩĩ waku w'onthe wĩ na kyeni vate vandũ ve kĩvindu, w'onthe ũkeethĩwa na kyeni o tondũ taa ũkũmulĩkĩlaa na kyeni kya w'o.”
Yesũ Aileana na Avalisi na Amanyĩsya ma Mĩao
(Mat 23.1-36; Mk 12.38-40)
37Yesũ amina kũneena, Mũvalisi ũmwe nĩwamũthokisye kwake makaye lĩu. Nĩwaendie na ekala nthĩ aathĩw'e. 38Mũvalisi ũsu nĩwaseng'ie mũno oona Yesũ aiya atathambĩte moko. 39Nĩvo ĩndĩ Mwĩai weeie Mũvalisi ũsu atĩĩ, “Inyw'ĩ Avalisi mũthambasya ikombe na masaani ngalĩko ya nza, ĩndĩ nthĩnĩ musũĩtwe nĩ ũng'endu na mothũku. 40Inyw'ĩ andũ atumanu! Ũla waseũvisye nza tyo we waseũvisye nthĩnĩ? 41Ĩndĩ tethyai ngya na syĩndũ ila syĩ ikombenĩ syenyu na masaaninĩ, na syĩndũ syonthe mwĩĩthĩwa mwatheew'a.
42 #
Ali 27.30
“Ĩndĩ kyeva nĩ kwenyu inyw'ĩ Avalisi. Mumĩasya Ngai kĩlungu kya ĩkũmi kya syĩndũ ta ndania, ndũlũ na syĩndũ ila ingĩ mũvandaa sya kwĩkĩa lĩunĩ, na mũiatĩĩaa ũsili wa katĩ na wendo wa Ngai. Maũndũ aa nĩmo mwaĩlĩte mũno kũmeka o mũyĩka maũndũ asu angĩ.
43“Kyeva nĩ kwenyu inyw'ĩ Avalisi! Mwendete mũno kwĩkala ivĩlanĩ sya mbee nyũmbanĩ sya Ayuti sya kũthaithĩa na kũmbanĩa, na kũkethaw'a na ndaĩa nĩ andũ mwĩ ndũnyũ. 44Kyeva nĩ kwenyu nũndũ mũilyĩ ta mbũa itekwoneka, ila ikinyangawa nĩ andũ mateũmanya.”
45Ũmwe wa amanyĩsya ma Mĩao nĩweeie Yesũ atĩĩ, “Mũmanyĩsya, yĩla ũũneena maũndũ asu nũũtũuma o naitũ!”
46Yesũ amwĩa atĩĩ, “Kyeva nĩ kwenyu o nenyu amanyĩsya ma Mĩao, nũndũ mũkuĩthasya andũ mĩio mĩito ĩtakuĩka, na inyw'ĩ ene mũyĩtĩkĩla kũkĩlya kyaa mũkamatetheesya kũkua. 47Kyeva nĩ kwenyu nũndũ mwakĩĩaa mbũa sya athani ala aaũmae menyu mooaie. 48Kwoou inyw'ĩ mwĩ ngũsĩ na nĩmũkwĩtĩkĩlana na meko ma aaũmae menyu, nũndũ nĩmo mamoaie, nenyu mwĩakĩĩa mbũa isu. 49Kwondũ wa ũu, Ũĩ wa Ngai nĩwaĩtye, ‘Ngamatũmĩa athani na atũmwa, ĩndĩ makooaa amwe moo na kũthĩny'a ala angĩ.’ 50Kwoou andũ ma ĩvinda yĩĩ makasilĩlwa kwondũ wa kũawa kwa athani onthe ala maaũawa kuma nthĩ yoombwa, 51#Mwa 4.8; 2Mav 24.20-21 kwambĩĩa na kũawa kwa Aveli kũvika kũawa kwa Nzekalia, ũla wooaĩiwe katĩ katĩ wa kĩthembeo na mwako wa Ĩkalũ. Ĩĩ, ekai nĩmũtavye, andũ ma ĩvinda yĩĩ makasilĩlwa nũndũ wa maũndũ asu onthe.
52“Kyeva nĩ kwenyu inyw'ĩ amanyĩsya ma Mĩao, nũndũ nĩmũkuĩte ũvungũo wa nyũmba ya ũmanyi, ĩndĩ inyw'ĩ mũiũlika na nĩmũsiĩĩaa andũ ala angĩ mendaa kũlika.”
53Yesũ ayuma vau athi, amanyĩsya asu ma Mĩao na Avalisi nĩmathing'ĩĩisye mũno kũmũkũlya makũlyo maitata kũmantha aneene maũndũ maingĩ, 54nũndũ nĩmamũteete aneene ũndũ ũte mwaĩlu mamũsikate naw'o.
Šiuo metu pasirinkta:
Lk 11: KAMBA
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
BIBLE SOCIETY OF KENYA © 2011