JOHANE 18
18
Kuwadwa kwa Jesu
(Mat. 26.47-56; Mk. 14.43-50; Lk. 22.47-53)
1Nao iji Jesu wameria kughora agho, ukafuma na wanughi wake ukaruwuka vololo ya Kidroni. Andu aho korekoghe na mbuwa, na Jesu ukangia aho andwamweri na wanughi wake. 2Juda, uo mfunyi wake orekumanyireghe andu aja, angu kalazi koni Jesu orekwanyikieghe na wanughi wake aho. 3Juda umeria kuwidwa masikari na walindiri wa Hekalu kufuma kwa Wakohani wabaa na Mafarisayo, ukacha nawo aja mbuwenyi, widwae taa na tochi na maswagha ghawo. 4Jesu ukimanya agho ghose gherekoghe ghikimchea, ukawifumia ukawizera, “Nani mumlolagha?” 5Nawo wikamtumbulia, “Jesu wa Nazareti!” Jesu ukaghamba, “Ni ini moni.” Juda, uo mfunyi wake, orekoghe andwamweri nawo. 6Uendawizera wei, “Ni ini moni,” wikawuya kinyuma-nyuma wikaghwa andonyi. 7Jesu ukawizera sena, “Nani mumlolagha?” Wikaghamba, “Jesu wa Nazareti.” 8Jesu ukawizera, “Nameria kumghoria angu ni ini moni. Idana ngera ni ini munilolagha, wisighenyi awa wighende chia rawo.” 9(Oreghorieghe agho kukatisha ilagho oreghorieghe, “Awo koreninekieghe simlaghashire ungi anduangi.”) 10Nao Simoni Petro uko na lufu, ukalukua ukamdema mzumba wa Mkohani M'baa, ukamdumbua kudu kwa mkonu ghwa kiwomi; na irina ja uo mzumba ni Maliko. 11Jesu ukamzera Petro, “Wunja lufu lwako kiwonyi kwaro. Welee, kuamanya icho kikombe Aba uninekie sichinywagha?”#Mat. 26.39; Mk. 14.36; Lk. 22.42
Jesu imbiri ya Anasi
12Nao waja masikari, na m'baa wawo, na walindiri wa Wayahudi, wikammbwada Jesu wikamfunga. 13Imbiri, wikamghenja kwa Anasi uo orekoghe mghosi wa Kayafa, nao Kayafa orekoghe Mkohani M'baa mwaka ghuja. 14Uo Kayafa, nuo orewinekieghe Wayahudi njama angu yafwane mundu umu ufo kwa wundu ghwa wandu.#Joh. 11.49-50
Petro kumkana Jesu
(Mat. 26.69-70; Mk. 14.66-68; Lk. 22.55-57)
15Nao Simoni na uja mnughi mzima wikamnugha Jesu. Uja mnughi mzima orekoghe umanyikie kwa Mkohani M'baa, kwa huwo orengirieghe andwamweri na Jesu wazenyi kwa Mkohani M'baa. 16Ela Petro orekoghe kimusi shighadi, kaavui na mnyango. Niko uja mnughi mzima oremanyikieghe kwa Mkohani M'baa ukafuma shighadi, ukaghora na muka mlindiri mnyango, ukamngira Petro andenyi. 17Nao uja muka mlindiri mnyango ukamkotia Petro, “Welee, na oho si umu wa wanughi wa uhu mundu?” Petro ukamzera, “Si ini ungi.”
18Wadumiki na walindiri werekoghe wakora modo ghwa maka, angu korekoghe mbeo; wikakaia wikioda modo. Na Petro orekoghe kimusi ukioda modo andwamweri nawo.
Mkohani M'baa kumkotia Jesu makoto
(Mat. 26.59-66; Mk. 14.55-64; Lk. 22.66-71)
19Nao Mkohani M'baa ukamkotia Jesu malagho aighu ya wanughi wake na mafundisho ghake. 20Jesu ukamtumbulia, “Ini nerekoghe ngighora malagho worinyi kwa wandu wose, na kufundisha andenyi ya masunagogi, na Hekalunyi andu Wayahudi wose wikwanagha, hata na jingi sidedie ilagho jingi kivisonyi anduangi. 21Kwaki kunikotiagha ini? Wikotie awo wisikire ngideda ngera nawizerie wada? Waghimanya agho nighighorie.” 22Nao iji waghora agho, mlindiri umu orekoghe kimusi ahoeni, ukamkaba Jesu na lui ukighamba, “Kuamtumbulia Mkohani M'baa huwu?” 23Jesu ukamzera, “Ngera nadeda makosa kughishuhudie makosa ghapo worinyi, na ngera naghora loli, kwaki kunikabagha?” 24Nao Anasi ukamghenja Jesu ufungilo kwa Mkohani M'baa Kayafa.
Petro kumkana Jesu sena
(Mat. 26.71-75; Mk. 14.69-72; Lk. 22.58-62)
25Petro orekoghe kimusi ajaeni ukioda modo. Wandu wamu wikamkotia, “Welee, oho ndekuko umu wa wanughi wake anguwada?” Nao ukakana ukighamba, “Si ini ungi.” 26Nao umu wa wadumiki wa Mkohani M'baa, kichuku chake uja mundu oredumbuloghe kudu ni Petro ukamkotia, “Welee, siamanya nakuwonieghe mbuwenyi andwamweri nao?” 27Petro ukakana sena, nao ahoeni njogholo ikadeda.
Jesu kuredwa imbiri ya Pilato
(Mat. 27.1-2, 11-14; Mk. 15.1-5; Lk. 23.1-5)
28Nao nakesho wikamfunya Jesu kwa Kayafa wikamghenja ngomenyi iwangwagha praetoriumu, nawo ndewerengirieghe andenyi ya praetoriumu wichelushwa, eri wipate kuija Pasaka. 29Pilato ukawifumia shighadi ukawikotia, “U mundu mwamshitakiaki?” 30Nawo wikamtumbulia, “Ngera mundu uhu si mmbiwi, kumangu ndadamredagha kwako anduangi.” 31Pilato ukawizera, “Mmbwadenyi mumtanye kwa sharia enyu.” Wikatumbulia, “Isi ndediwadie sharia ebwagha mundu anduangi.” 32(Agha gherekaieghe kukatisha malagho oreghighorieghe Jesu gha kuwonyera ni kifwa chiao uchaafwa.)#Joh. 3.14; 12.32 33Pilato ukawuya andenyi ya praetoriumu, ukammbanga Jesu ukamkotia, “Welee, oho ni Mzuri wa Wayahudi?” 34Jesu ukamtumbulia, “Welee, kuakotia agho malagho kumoni, angu ni mndumu wakughoria malagho ghapo?” 35Pilato ukatumbulia, “Kwani ini neeka Myahudi? Mbari yako cheni na wakohani wabaa niwo wakureda kwapo. Kwabonya wada?” 36Jesu ukamtumbulia, “Wuzuri ghwapo si ghwa wurumwengu ughu anduangi. Ngera wuzuri ghwapo ghodeeka ghwa wurumwengu ughu, kumangu wadumiki wapo wabonya wuda, eri nisewado ni Wayahudi; ela wuzuri ghwapo si ghwa wurumwengu anduangi.” 37Niko Pilato ukamkotia, “Kwa huwo oho ko mzuri-e?” Jesu ukamtumbulia, “Ni oho kwaghamba angu ne mzuri. Nani nerevaloghe na kucha wurumwengunyi kwa wundu ughu ghoni, niwighorie wandu iyo loli. Kula mundu uko andenyi ya iyo loli wadanisikira.” 38Pilato ukamkotia, “Niki chiwangwagha loli?”
Jesu kutanywa ubwagho
(Mat. 27.15-31; Mk. 15.6-20; Lk. 23.13-25)
Pilato uendaghora agho, ukawifumia Wayahudi sena ukawizera, “Ini siwonagha ikosa jingi kwake anduangi. 39Ela moko na mzango ghwa ini kumfunguya mundu umweri ngelo ya Pasaka; mwawona wada nimfunguye Mzuri wa Wayahudi?” 40Nao wikaghora kwa lwaka lubaa, “Hata! Uo mbai! Deekunda Baraba.” Na Baraba orekoghe kiting'a.
Šiuo metu pasirinkta:
JOHANE 18: TAITA
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
©Bible Society of Kenya, 1997
All rights reserved.