JOHANE 17
17
Jesu kuwilombia wanughi wake
1Nao iji Jesu wameria kughora malagho agho, ukazighana aighu mlungunyi ukaghamba, “Aba, ngelo yameria kuvika; mkase Mwana wako, na Mwana wako wori ukukase oho. 2Angu koremnekieghe nguma aighu ya wadamu wose, uwineke irangi ja kala na kala waja koremnekieghe. 3Najo irangi ja kala na kala nijo iji: wikumanye oho Mlungu wa loli kuekeri, na Jesu Kristo uo koremdumieghe. 4Nakukasa oho aha ndoenyi, naimeria ija kazi koreninekieghe niibonye. 5Idana Aba, nikase ini imbiri kwako, kwa ugho wubaa nerekoghe nagho imbiri ya kuumbwa wurumwengu.
6“Nakubonyere kumanyike kwa wandu awa koreninekieghe wurumwengunyi. Werekoghe wako, kukanineka ini; nawo wamerie kujiwada ilagho jako. 7Idana wamerie kumanya vose kuninekie vedefuma kwako; 8kwa kukaia nawinekie ijo ilagho koreninekieghe, nawo wikajiwada na kumanya kwa loli angu nedefuma kwako; sena wikarumiria angu ni oho korenidumieghe.
9“Ini nawilombia awo, sighulombiagha wurumwengu anduangi; ela nawilombia awo koreninekieghe, angu awo ni wako. 10Vose niko navo ni vako, na vako ni vapo; nani naawuyakaswa andenyi kwawo. 11Idana niacha kwako, siko sena wurumwengunyi; ela awo weko wurumwengunyi. Aba Mweli, wilindie kwa irina jako ijo koreninekieghe, wipate kukaia kindo chimweri sa iji isi diko umweri. 12Iji nerekwanyeghe nawo, nerewiwikieghe banana kwa ijo irina jako koreninekieghe. Nawilindirie, hata ungi nderelagharieghe, ela uo mwana wa kutota; eri maandiko ghikatisho.#Zab. 41.9; Joh. 13.18 13Idana niacha kwako; nani naghighora malagho agha wurumwengunyi, eri kuboilwa kwapo kukate kuchuo andenyi ngolonyi kwawo. 14Nawinekie ilagho jako, wikazamia wurumwengu, angu wiseko wa wurumwengu; seji ini wori niseko wa wurumwengu anduangi. 15Silombagha kuwifunye wurumwengunyi, ela nalomba kuwilindie na uja Mmbiwi. 16Awo ndewiko wa wurumwengunyi, sa iji koni ini niseko wa wurumwengunyi. 17Kuwiwike wikaie wako weni kwa chia ya iyo loli; ijo ilagho jako niyo loli. 18Sa iji oho korenidumieghe wurumwengunyi, nani wokoni nawiduma awo wurumwengunyi; 19na kwa wundu ghwawo, nakuwika ini moni kwako, eri nawo weni wibonyo kukaia wako weni kwa iyo loli.
20“Nani siwilombiagha awo weni wiekeri anduangi, ela hata na awo wichaanirumiria kwa wundu ghwa ilagho jawo. 21Aba, nalomba angu wose wikaie kindo chimweri andenyi kodu; seji oho Aba kuko andenyi kwapo, na ini andenyi kwako. Nawo wikaie kindo chimweri, wurumwengu ghupate kurumiria angu ni oho korenidumieghe. 22Ini nawineka ghuja wubaa ghoni koreninekieghe ini, wipate kukaia kindo chimweri sa iji isi diko umweri. 23Ini nikaie andenyi kwawo, na oho kukaie andenyi kwapo, wipate kukaia kindo chimweri putu; eri wurumwengu ghupate kumanya angu korenidumieghe, na angu oho kwawikunde awo, sa iji kunikunde ini.
24“Aba, nakunda awo koreninekieghe wikaie andwamweri nani andu niko ini; wipate kughuwona ugho wubaa ghwapo koreninekieghe, angu korenikundieghe ini imbiri wurumwengu ghuseumbilo. 25Ee Aba wa hachi, wurumwengu ndeghukuichi oho, ela ini nakuichi, na awa waichi angu ni oho korenidumieghe. 26Nameria kukubonya kumanyike kwawo, nani nichachuria kubonya wokoni, eri ulo lukundo kunikunde nalo lukaie andenyi kwawo, nani nipate kukaia andenyi kwawo.”
Šiuo metu pasirinkta:
JOHANE 17: TAITA
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
©Bible Society of Kenya, 1997
All rights reserved.