Aˇ dahˬ 37
37
Yoˇsehˆ hawˇ-eu aˬ yawꞈ-euˬ aˇ doˆ deuˬ
1Yaˬkoˆ-aˬ, aˬ yawꞈ aˬ da neh jawˇ-euˬ Kaˬnaˬ miˇ kʼahˬ-ahˇ paˇ jawˇ daˆ leꞈ-euˬ meh. 2Yaˬkoˆ-euˬ nymˇ jiˇ gaˇ kawˆ heu loꞈ-ehˇ jaˆ-eu meh.
Yoˇsehˆ tseˇ shiꞈ kʼoꞈ kʼawˆ laˇ-awˇ zaˬ guˬ pyeuꞈ laˇ ngeh, aˬ yawꞈ aˬ da-euˬ ma nyiˇ Ziˇlaˬpaˬ hawˇ-eu Biˇlaˬhaˇ-euˬ aˬ li deuˬ nehˬ-ehˇ, ciꞈ myehꞈ hawˇ-eu yawˇ bo bo-ehˇ jawˇ-euˬ meh. Aˬ yawꞈ-euˬ aˇ doˆ deuˬ kʼaˇ mˇ-eu maˬ muiˬ-eu jeˬ dawˬ tawˆ luꞈ, aˬ yawꞈ-euˬ aˬ da-ahˇ aˬ yawꞈ tsaꞈ gaˬ-euˬ meh. 3Yaˬkoˆ-aˬ, aˬ yawꞈ-euˬ zaˬ dawˬ tawˆ luꞈ laꞈ kʼoeˇ, Yoˇsehˆ-ahˇ gaˬ dzehˬ-eu meh. Aˬ jeˬ miˇ neh ehˇ naˇ, aˬ yawꞈ tsawˇ mawˬ mawˬ laˇ ngeh hawˇ-eu Yoˇsehˆ dehꞈ le-euˬ miˇ neh meh. Haw muiˬ dui dui-eu pehˇ kʼahˬ pehˇ mahˇ tiˬ kahˇ, Yoˇsehˆ-ahˇ aˬ yawꞈ guꞈ nehˬ-awˇ bi dm-euˬ meh. 4Aˬ da gʼaˬ Yoˇsehˆ-ahˇ gaˬ dzehˬ gaˇ Yoˇsehˆ-euˬ aˇ doˆ deuˬ ya mawˇ ngeh, Yoˇsehˆ-ahˇ bye-awˇ, dawˬ yaw muiˬ paˬ-ehˇ maˬ ngehˬ cawˬ nehˬ ni jawˇ-euˬ meh.
5Tiˬ miˇ keuˆ laˇ ngeh, Yoˇsehˆ yuꞈ maˆ maˆ-awˇ, aˬ yawꞈ neh yuꞈ maˆ maˆ mawˇ-euˬ gaˇ kawˆ aˬ yawꞈ-euˬ aˇ doˆ deuˬ-ahˇ dzawˇ nehˬ ngeh, aˬ yawꞈ maꞈ aˬ yawꞈ-ahˇ paˇ bye dzehˬ laˇ-euˬ meh. 6Yoˇsehˆ ehˇ-eu, “Ngaˬ neh yuꞈ maˆ maˆ-euˬ gaˇ kawˆ ngaˇ dzawˇ gaˇ tiˬ poˆ naˇ haˬ sheˇ. 7Aˬ dui mehˇ nmˇ yawˬ gʼaˬ na luꞈ deh yaˇ-ahˇ cehˇ dzahˬ dzahˬ luꞈ ngeh, ngaˬ-euˬ cehˇ cehˇ dzahˬ gawˬ yawꞈ yawꞈ laˇ-euˬ meh. Kʼoeˇ ngeh, naw maꞈ-euˬ cehˇ cehˇ dzahˬ dawˬ tawˆ luꞈ ngaˬ-euˬ cehˇ cehˇ dzahˬ dawˬ peh uiˬ laˇ jiˇ-awˇ, ngaˬ-euˬ cehˇ cehˇ dzahˬ-ahˇ uˬ duˬ tahˬ laˇ-euˬ meh.” 8Aˬ yawꞈ-euˬ aˇ doˆ deuˬ ehˇ-eu, “Aˬ kaˇ nga maꞈ kʼoeˇ taˆ nawˇ sahˬ paˬ ya geuꞈ tehꞈ-a lehˇ noeˬ luꞈ te loˇ.” Aˬ yawꞈ yuꞈ maˆ kʼoeˇ loꞈ-ehˇ maˆ-euˬ miˇ neh maˬ ehˇ, yuꞈ maˆ maˆ-euˬ gaˇ kawˆ kʼoeˇ aˬ yawꞈ maꞈ-ahˇ dzawˇ nehˬ leˇ-euˬ miˇ neh maˬ ehˇ, Yoˇsehˆ-ahˇ aˬ yawꞈ maꞈ paˇ bye dzehˬ laˇ-euˬ meh.
9Aˬ yawꞈ yuꞈ maˆ tiˬ poˆ paˇ maˆ-awˇ, aˬ yawꞈ-euˬ aˇ doˆ deuˬ-ahˇ paˇ dzawˇ nehˬ-euˬ meh. “Ngaˇ yuꞈ maˆ tiˬ poˆ paˇ maˆ-eu laꞈ kʼoeˇ, nahˇ ma, ba la hawˇ-eu, aˬ guiˇ tseˇ tiꞈ siˬ ngaˬ-ahˇ uˬ duˬ tahˬ le-euˬ meh” lehˇ dzawˇ nehˬ-euˬ meh.
10Aˬ yawꞈ neh yuꞈ maˆ maˆ-euˬ gaˇ kawˆ kʼoeˇ, aˬ yawꞈ-euˬ aˬ da-ahˇ dzawˇ nehˬ ngeh, “Aˬ joˆ-ehˇ gʼeh-eu yuꞈ maˆ tiˬ hmˬ paˇ maˆ nya teˬ. Nawˬ ma maˬ ehˇ, nawˬ-euˬ aˇ doˆ deuˬ maˬ ehˇ, ngaˇ maˬ ehˇ, nawˬ-ahˇ uˬ duˬ ya tahˬ-eu aˇ nah keuˆ laˇ tehꞈ-a lehˇ nawˇ noeˬ te loˇ” lehˇ, aˬ yawꞈ-euˬ aˬ da aˬ yawꞈ-ahˇ ehˇ nehˬ-euˬ meh. 11Aˬ yawꞈ-euˬ aˇ doˆ deuˬ aˬ yawꞈ-ahˇ myaˆ naˆ laˇ taˬ-euˬ meh. Ehˇ kʼawꞈ, aˬ yawꞈ-euˬ aˬ da-aˬ, aˬ yawꞈ neh yuꞈ maˆ maˆ-euˬ gaˇ kawˆ-ahˇ shaˇ noeˬ shaˇ noeˬ-ehˇ jawˇ-eu meh.
Yoˇsehˆ-ahˇ ahˬ dzaˬ-awˇ Iˇjiˇtuˆ miˇ kʼahˬ-ahˇ bi sheuˬ gʼeh-euˬ
12Tiˬ nah keuˆ laˇ ngeh, Yoˇsehˆ-euˬ aˇ doˆ deuˬ Sheˬkmˬ meuˬ paw jeˬ zaˬ bo-iˇ-euˬ meh. 13“Nawˬ-euˬ aˇ doˆ deuˬ jeˬ zaˬ bo luꞈ-eu Sheˬkmˬ meuˬ paw iˇ haw sheˇ” lehˇ, Yoˇsehˆ-ahˇ Yaˬkoˆ ehˇ nehˬ ngeh, “Ngaˇ iˇ ma da-oˇ” lehˇ Yoˇsehˆ ehˇ kʼoꞈ nehˬ-euˬ meh.
14“Nawˬ-euˬ aˇ doˆ deuˬ aˬ joˆ-ehˇ jawˇ luꞈ nga lehˇ haw-iˇ-awˇ, ngaˬ-ahˇ paˇ tsaꞈ gaˬ laˇ-awˬ” lehˇ, Yoˇsehˆ-ahˇ Yaˬkoˆ ehˇ nehˬ-euˬ meh. Yaˬkoˆ-aˬ, Yoˇsehˆ-ahˇ Heˬbyoˬ meuˬ paw neh bi iˇ-euˬ meh.
Sheˬkmˬ meuˬ-ahˇ Yoˇsehˆ iˇ keuˆ-awˇ, 15deh ga doe doe-ehˇ cah luꞈ ngeh, tsawˇ haˬ tiˬ gʼaˬ tahˬ puˬ le-awˇ, tsawˇ haˬ kʼoeˇ gʼaˬ aˬ yawꞈ-ahˇ, “Aˬ jeˬ shaˇ caw luꞈ te” lehˇ naˇ haˬ-euˬ meh.
16“Heu paw jeˬ zaˬ bi bo le-euˬ ngaˬ-euˬ aˇ doˆ deuˬ-ahˇ poˆ le-euˬ ma. Aˬ yawꞈ maꞈ aˬ geu tsahˇ jawˇ-eu nawˬ-ahˇ maˬ siˬ nya nya loˇ” lehˇ, tsawˇ haˬ kʼoeˇ gʼaˬ-ahˇ Yoˇsehˆ naˇ haˬ-euˬ meh.
17Tsawˇ haˬ kʼoeˇ gʼaˬ ehˇ-eu, “Aˬ yawꞈ maꞈ heu gaˇ maˬ paˇ jawˇ meh. Doˬdaˬ meuˬ paw iˇ ma lehˇ aˬ yawꞈ maꞈ ehˇ-eu ngaˇ gaˬ-euˬ ma.” Kʼoeˇ naˇ, aˬ yawꞈ-euˬ aˇ doˆ deuˬ mehˬ nah Yoˇsehˆ caw teh gʼeh-awˇ, Doˬdaˬ meuˬ-ahˇ iˇ keuˆ ngeh, aˬ yawꞈ maꞈ-ahˇ mawˇ-euˬ meh.
18Gaˇ mahˇ kaˬ gaˇ aˬ yawꞈ oe luꞈ ngeh neh, aˬ yawꞈ-euˬ aˇ doˆ deuˬ aˬ yawꞈ-ahˇ mawˇ-awˇ, aˬ yawꞈ maˬ oe keuˆ mi naˆ-ehˇ, aˬ yawꞈ-ahˇ sehꞈ-eu lehˇ bawˬ dzaˬ taˬ-euˬ meh. 19Aˬ yawꞈ maꞈ tiˬ gʼaˬ tiˇ gʼaˬ ehˇ-eu, 20“Yuꞈ maˆ maˆ-eu gʼaˬ oe luꞈ ngaˇ. Nymˬ-mˇ poˆ jawˇ aˬ dui maꞈ aˬ yawꞈ-ahˇ sehꞈ-awˇ, gui coˇ ni gʼeh-eu lah duˬ duˬ tsoeˬ kʼoeˇ duˬ-ahˇ biˬ ahˇ ma. Bawˇ tsahˬ jeˬ zaˬ yaw haiˬ deuˬ neh aˬ yawꞈ-ahˇ kawꞈ sehꞈ-euˬ bi geuꞈ tehꞈ-a. Nymˬ-mˇ poˆ jawˇ-aˬ, aˬ yawꞈ neh yuꞈ maˆ maˆ-euˬ aˬ joˆ-ehˇ pyeuꞈ laˇ nga lehˇ bi haw law.”
21Aˬ yawꞈ maꞈ kʼoeˇ loꞈ-ehˇ bawˬ dzaˬ luꞈ gaˇ Luˇbeˬ ya gaˬ-awˇ, Yoˇsehˆ-ahˇ maˬ bi diˬ sehꞈ-eu gʼaˇ duˬ leh jeh-euˬ meh. Luˇbeˬ ehˇ-eu, “Aˬ dui mehˇ nmˇ aˬ yawꞈ-ahˇ maˬ sehꞈ ni, heu loꞈ-ehˇ jahˇ nehˬ kaˇ-euˇ. 22Aˬ yawꞈ-ahˇ tiˬ jeˬ-iˬ maˬ laˆ tahˬ maˬ laˆ naˇ nehˬ ni, bawˇ tsahˬ-ahˇ jaˆ-eu iˇ cuꞈ maˬ dahˬ-eu lah duˬ duˬ tsoeˬ laꞈ kʼoeˇ biˬ ahˇ-awˇ, bi shaˬ yaꞈ kaˇ-euˇ.” Luˇbeˬ-aˬ, Yoˇsehˆ-ahˇ maˬ bi shiˇ ni, aˬ yawꞈ-euˬ aˬ da jawˇ gaˇ bi gʼoꞈ keuˆ leˇ mawꞈ-eu miˇ neh, tsawˇ gahˇ gahˇ-eu laꞈ kʼoeˇ, kʼoeˇ loꞈ-ehˇ ehˇ-eu meh. 23Aˬ yawꞈ-euˬ aˇ doˆ deuˬ jawˇ gaˇ Yoˇsehˆ iˇ keuˆ ngeh, aˬ yawꞈ dm luꞈ-eu haw muiˬ dui dui-eu pehˇ kʼahˬ pehˇ mahˇ kʼoeˇ kahˇ-ahˇ aˬ yawꞈ maꞈ nyehꞈ lehˆ-euˬ meh. 24Kʼoeˇ naˇ, aˬ yawꞈ-ahˇ nyehꞈ-awˇ, iˇ cuꞈ gui-iˇ-euˬ lah duˬ duˬ tsoeˬ laꞈ kʼoeˇ biˬ ahˇ-euˬ meh.
25Aˬ yawꞈ maꞈ kʼoeˇ loꞈ-ehˇ jahˇ gʼaˬ-awˇ hawˬ dzaˬ luꞈ ngeh, Iˇshaˬmeˬlaˇ tsawˇ haˬ tiˬ muˇ, Giˇlaˆ miˇ kʼahˬ paw neh oe-awˇ, Iˇjiˇtuˆ miˇ kʼahˬ-ahˇ iˇ luꞈ gaˇ aˬ yawꞈ maꞈ ya mawˇ-euˬ meh. Tsawˇ haˬ kʼoeˇ deuˬ-aˬ, tsiˇ yaw saw jeˬ hawˇ-eu aˇ poeˬ kʼaˆ-eu dzaˇ muiˇ dzaˇ sawˇ tawˬ luꞈ-eu law taw deuˬ teh luꞈ-eu meh. 26Kʼoeˇ ngeh, aˬ yawꞈ ha mehˇ nmˇ deuˬ-ahˇ Yuˇdaˆ ehˇ nehˬ-eu, “Aˬ dui mehˇ nmˇ aˬ dui-euˬ aˬ nyiˇ-ahˇ diˬ sehꞈ kʼoeˬ-awˇ laˆ zaꞈ-eu aˬ jeˬ gaˇ dahˇ tsoeˬ ta. 27Iˇshaˬmeˬlaˇ tsawˇ haˬ deuˬ-ahˇ ahˬ nehˬ kaˇ-euˇ. Kʼoeˇ loꞈ-ehˇ jahˇ naˇ, aˬ yawꞈ-euˬ uˬ kʼawˇ-ahˇ aˬ dui toeˬ ciˆ-eu maˬ loˬ-aˇ. Aˬ diˇ aˬ maˇ ehˇ leꞈ naˇ, aˬ yawꞈ-aˬ aˬ dui-euˬ shiˬ shaˬ, aˬ dui-euˬ aˬ nyiˇ tsi tsi ni gʼeh-eu miˇ neh, sehꞈ-eu maˬ tsaˬ-aˇ.” Yuˇdaˆ kʼoeˇ loꞈ-ehˇ ehˇ gaˇ, aˬ ha mehˇ nmˇ dawˬ tawˆ luꞈ nui ma tsaˬ-euˬ meh. 28Kʼoeˇ naˇ, Miˇdiˬyaˬ tsawˇ haˬ baw gaꞈ deuˬ dawˬ peh oe keuˆ ngeh, aˬ ha mehˇ nmˇ Yoˇsehˆ-ahˇ lah duˬ laꞈ kʼoeˇ neh gʼeu doˆ-awˇ, Iˇshaˬmeˬlaˇ baw gaꞈ deuˬ-ahˇ ahˬ nehˬ-euˬ meh. Baw gaꞈ kʼoeˇ deuˬ aˬ yawꞈ maꞈ-ahˇ pyuˇ mehˇ byaˆ nyiˬ tseˇ byaˆ biꞈ-awˇ, Yoˇsehˆ-ahˇ zeuˇ-awˇ, Iˇjiˇtuˆ miˇ kʼahˬ-ahˇ sheuˬ gʼeh-euˬ meh.
29Lah duˬ-ahˇ Luˇbeˬ haw-iˇ ngeh, Yoˇsehˆ-ahˇ maˬ paˇ ya mawˇ-euˬ miˇ neh, noeˬ shaˬ dui dui-eu laꞈ kʼoeˇ, aˬ yawꞈ dm luꞈ-eu mehˬ tsoeˬ cehˬ pyaˬ-euˬ meh. 30Aˬ yawꞈ-euˬ aˬ nyiˇ deuˬ jawˇ gaˇ aˬ yawꞈ iˇ-awˇ, “Aˬ dui-euˬ aˬ nyiˇ kʼoeˇ gaˇ maˬ paˇ jawˇ ngaˇ. Ngaˬ-ahˇ noeˬ maˬ paˇ doˆ miˇ-a” lehˇ ehˇ nehˬ-euˬ meh.
31Kʼoeˇ naˇ, aˬ yawꞈ maꞈ ciꞈ myehꞈ tiˬ mawˇ sehꞈ-awˇ Yoˇsehˆ-euˬ pehˇ kʼahˬ-ahˇ ciꞈ myehꞈ-euˬ shiˬ laˆ lehꞈ-euˬ meh. 32Pehˇ kʼahˬ kʼoeˇ kahˇ aˬ yawꞈ ha mehˇ nmˇ-euˬ aˬ da jawˇ gaˇ yuˇ kʼoꞈ gʼeh-awˇ, “Pehˇ kʼahˬ heu kahˇ ga-eu nga maꞈ mawˇ-euˬ ma. Nawˬ li-euˬ pehˇ kʼahˬ maˬ ngeuˇ nga loˇ lehˇ haw duˬ sheˇ” lehˇ ehˇ nehˬ-euˬ meh.
33Pehˇ kʼahˬ kʼoeˇ kahˇ-ahˇ Yaˬkoˆ ya mawˇ ngeh, aˬ yawꞈ aˬ li-euˬ pehˇ kʼahˬ nga lehˇ tiˬ poˆ tehꞈ-ehˇ haw siˬ-awˇ, “Ngeuˇ ngaˇ. Ngaˬ li-euˬ pehˇ kʼahˬ ngaˇ. Ngaˬ li-aˬ, bawˇ tsahˬ jeˬ zaˬ neh bi laˆ sehꞈ-euˬ nga. Ngaˬ li Yoˇsehˆ-aˬ, bawˇ tsahˬ jeˬ zaˬ neh bi cehˬ pyaˬ bi cehˬ shaˇ jiˇ-euˬ nga” lehˇ ehˇ-eu meh. 34Yaˬkoˆ-aˬ, noeˬ shaˬ dui dui-eu miˇ neh, aˬ yawꞈ dm luꞈ-eu mehˬ tsoeˬ cehˬ pyaˬ cehˬ shaˇ jiˇ-awˇ, noeˬ shaˬ ngeh dm-eu guˬ daˇ pehˇ zeuˇ mehˬ tsoeˬ dm-awˇ, aˇ yamˬ gʼawˬ myahˇ ni tsawˇ ngoeˇ ngoeˇ ngoeˇ-ehˇ jawˇ-euˬ meh. 35Aˬ yawꞈ-euˬ aˬ buˇ aˬ li dawˬ tawˆ luꞈ aˬ yawꞈ jawˇ gaˇ laˇ-awˇ, aˬ yawꞈ nui ma saˇ laˇ ni gʼaˬ biꞈ nehˬ kʼawꞈ, aˬ yawꞈ maˬ naˇ haˬ-ehˇ, “Ngaˬ li jawˇ-eu shiˇ-eu miˇ kʼahˬ-ahˇ maˬ keuˆ kʼoeˇ keuˆ ni, tsawˇ ngoeˇ ngoeˇ ngoeˇ-ehˇ iˇ byoˆ gʼeh-eu ma” lehˇ ehˇ-eu meh. Yaˬkoˆ-aˬ, nah doˆ le ngeh Yoˇsehˆ-ahˇ noeˬ-awˇ, tsawˇ ngoeˇ ngoeˇ ngoeˇ-ehˇ jawˇ-euˬ meh.
36Aˇ yamˬ kʼoeˇ yamˬ laꞈ kʼoeˇ, Iˇjiˇtuˆ miˇ kʼahˬ-ahˇ iˇ keuˆ-euˬ Miˇdiˬyaˬ tsawˇ haˬ baw gaꞈ kʼoeˇ deuˬ, Iˇjiˇtuˆ sahˬ paˬ-euˬ nymˇ-ahˇ loꞈ piˇ-eu guiˇ maꞈ kʼoeˇ taˆ uˆ lahˇ-eu yaw huiˬ yaw mahˇ pyeuꞈ-eu Pawˇtiˇpaˬ-euˬ aˬ laꞈ laꞈ kʼoeˇ, Yoˇsehˆ-ahˇ ahˬ ahˇ nehˬ-euˬ meh.
Šiuo metu pasirinkta:
Aˇ dahˬ 37: AHK
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Akha Bible Revision (Latin Script) © Thailand Bible Society, 2011.