Aˇ dahˬ 35
35
Beˬdeˬlaˇ lehˇ kuˇ-eu jawˇ duˬ-ahˇ Yaˬkoˆ-ahˇ Miˬyehˇ guiˬ lahˬ biꞈ nehˬ-euˬ
1Yaˬkoˆ-ahˇ Miˬyehˇ ehˇ nehˬ-eu, “Yaw kawˇ ma-ehˇ iˇ-awˇ Beˬdeˬlaˇ-ahˇ jawˇ-iˇ-awˬ. Nawˇ Iˇsawˇ-ahˇ guˆ-awˇ cehˆ ngeh, nawˬ-euˬ mehˬ shi doˆ le-euˬ Miˬyehˇ-aˬ, ngaˇ ma. Ngaˬ-euˬ gʼaˇ duˬ kʼoeˇ gaˇ lawˇ duˬ tiˬ tsahˇ tsoˆ-awˬ.”
2Kʼoeˇ ngeh, aˬ yawꞈ-euˬ miˬ sawˇ zaˬ deuˬ hawˇ-eu, aˬ yawꞈ-euˬ tsawˇ haˬ dawˬ tawˆ luꞈ-ahˇ, Yaˬkoˆ heu loꞈ-ehˇ ehˇ nehˬ-euˬ meh. “Naw maꞈ nehˬ-ehˇ jaˆ-eu aˬ cawˬ tsawˇ jeuˬ-euˬ Miˬyehˇ pyeuꞈ-eu tahˬ pahˬ aˬ ma mawˇ kawˇ dawˬ tawˆ luꞈ, biˬ dzeh jiˇ yaꞈ-awˬ. Yawˬ ha-euˬ gʼawˇ mawˇ shawˇ-awˇ, mehˬ tsoeˬ yaw shawˇ dm-awˬ. 3Aˬ dui maꞈ heu gaˇ neh doˆ-iˇ-awˇ, Beˬdeˬlaˇ-ahˇ jawˇ-iˇ ma. Shaˬ-eu zahˬ-eu jeˬ-ahˇ ngaˇ ya tahˬ puˬ ngeh, ngaˬ-ahˇ caw ba-awˇ, ngaˇ kʼaˇ iˇ kʼaˇ laˇ gaˇ ngaˬ nehˬ-ehˇ jawˇ-eu laꞈ kʼoeˇ, ngaˬ-ahˇ haw piˇ nehˬ laꞈ-eu Miˬyehˇ-euˬ gʼaˇ duˬ, lawˇ duˬ tiˬ tsahˇ kʼoeˇ gaˇ tsoˆ ma.” 4Kʼoeˇ ngeh, tahˬ pahˬ aˬ ma mawˇ kawˇ dawˬ tawˆ luꞈ hawˇ-eu, aˬ yawꞈ maꞈ-euˬ naˬ bawˇ naˬ yoˆ deuˬ, Yaˬkoˆ-ahˇ aˬ yawꞈ maꞈ biꞈ nehˬ-euˬ meh. Myawˬ kʼoeˇ deuˬ-ahˇ Yaˬkoˆ yuˇ-awˇ, Sheˬkmˬ meuˬ dawˬ peh bawˇ-eu tsuiꞈ kaˆ aˇ bawˇ dawˬ pehˬ-ahˇ duˬ pahˬ yaꞈ-euˬ meh.
5Yaˬkoˆ hawˇ-eu aˬ yawꞈ-euˬ aˬ li deuˬ pawˇ-iˇ ngeh, dawˬ peh jaˆ-eu meuˬ deuˬ-ahˇ jawˇ-eu tsawˇ haˬ deuˬ guˆ dui dui-eu miˇ neh, aˬ yawꞈ maꞈ-euˬ mehˬ nah maˬ caw teh peuˬ-a. 6Yaˬkoˆ-aˬ, aˬ yawꞈ-euˬ tsawˇ haˬ dawˬ tawˆ luꞈ sheuˬ-awˇ, nymˬ-mˇ Beˬdeˬlaˇ meuˬ lehˇ kuˇ-eu Kaˬnaˬ miˇ kʼahˬ Luˇzaˆ meuˬ-ahˇ oe-euˬ meh. 7Kʼoeˇ gaˇ, lawˇ duˬ tiˬ tsahˇ aˬ yawꞈ tsoˆ-awˇ, jawˇ duˬ kʼoeˇ tsahˇ-ahˇ Beˬdeˬlaˇ Miˬyehˇ-euˬ tsawˇ myahˇ myahˇ nehˬ-euˬ meh. Aˬ jeˬ miˇ neh ehˇ naˇ, aˬ yawꞈ Iˇsawˇ-ahˇ guˆ-awˇ cehˆ luꞈ ngeh, jawˇ duˬ kʼoeˇ tsahˇ-ahˇ, aˬ yawꞈ-euˬ mehˬ shi Miˬyehˇ doˆ le-euˬ meh. 8Leˬbehˇkaꞈ-ahˇ bo saˆ-eu gʼaˬ pyeuꞈ-eu Diˬboˇlaˬ shiˇ-awˇ, Beˬdeˬlaˇ meuˬ-euˬ laꞈ oˆ paw pyawˬ-ahˇ jaˆ-eu tsuiꞈ kaˆ aˇ bawˇ dawˬ pehˬ-ahˇ duˬ pahˬ nehˬ-euˬ meh. Kʼoeˇ miˇ neh, jawˇ duˬ kʼoeˇ tsahˇ-ahˇ, “Tsawˇ ngoeˇ ngoeˇ-euˬ tsuiꞈ kaˆ aˇ bawˇ” lehˇ kuˇ-euˬ meh.
9Maˬsoˬpoˬtaˬmiˇ miˇ kʼahˬ-ahˇ neh Yaˬkoˆ paˇ gʼoꞈ doˆ laˇ ngeh, aˬ yawꞈ-euˬ mehˬ shi Miˬyehˇ tiˬ poˆ paˇ doˆ le-awˇ, aˬ yawꞈ-ahˇ guiˬ lahˬ biꞈ le-euˬ meh. 10“Nawˬ-euˬ tsawˇ myahˇ Yaˬkoˆ meh. Ehˇ kʼawꞈ, aˬ kaˇ naˇ nawˬ-ahˇ Iˇsaˬleˬlaˆ lehˇ ya kuˇ tehꞈ-a” lehˇ, Yaˬkoˆ-ahˇ Miˬyehˇ ehˇ nehˬ-awˇ, tsawˇ myahˇ myahˇ paˇ nehˬ-euˬ meh. 11Kʼoeˇ naˇ, Yaˬkoˆ-ahˇ Miˬyehˇ ehˇ nehˬ-eu, “Ngaˇ-aˬ, Baoˬ huiˬ-eu Miˬyehˇ pyeuꞈ-eu ma. Nawˬ-euˬ zaˬ deuˬ jeuˬ le o le luꞈ-uˇ. Nawˬ-euˬ o neh tsawˇ jeuˬ gʼawˬ mya jeuˬ doˆ laˇ-awˇ, nawˇ-aˬ, miˇ kʼahˬ-ahˇ uˆ lahˇ-eu sahˬ paˬ deuˬ-euˬ aˬ da yaw dzahˇ ya pyeuꞈ laˇ tehꞈ-a. 12Aˬbyaˬhaˬ hawˇ-eu Iˇtsaˆ-ahˇ ngaˬ neh biꞈ-euˬ miˇ kʼahˬ kʼoeˇ kʼahˬ, nawˇ hawˇ-eu aˬ kaˇ dehꞈ le jawˇ le-eu nawˬ-euˬ zaˬ nawˬ-euˬ uˆ deuˬ-ahˇ ngaˇ biꞈ ma.” 13Kʼoeˇ loꞈ-ehˇ ehˇ gʼaˬ-awˇ, Miˬyehˇ doˆ-iˇ-euˬ meh. 14Jawˇ duˬ kʼoeˇ tsahˇ-ahˇ Miˬyehˇ aˬ yawꞈ-ahˇ dawˬ ngehˬ cawˬ le-euˬ gaˇ noeˬ keuˆ-eu gʼaˇ duˬ, kʼaˬ lo tiˬ siˬ Yaˬkoˆ kʼahˬ tuˇ-awˇ, aˬ gaꞈ dzaˇ uiˇ hawˇ-eu saˬ loˬ tsiˇ shehˆ daˆ-awˇ, Miˬyehˇ-ahˇ damˬ nehˬ-euˬ meh. 15Jawˇ duˬ kʼoeˇ tsahˇ-ahˇ Beˬdeˬlaˇ lehˇ aˬ yawꞈ myahˇ nehˬ-euˬ meh.
Laˬkeˬlaˇ shiˇ-euˬ
16Yaˬkoˆ hawˇ-eu aˬ yawꞈ-euˬ tsawˇ haˬ deuˬ, Beˬdeˬlaˇ meuˬ-ahˇ neh mehˬ hu paw paˇ iˇ gʼeh-awˇ, Eˇpaˬlaˇ meuˬ-ahˇ maˬ kaˬ maˬ kaˇ-ehˇ jaˆ-eu jawˇ duˬ-ahˇ iˇ keuˆ ngeh, Laˬkeˬlaˇ aˬ nyiˇ ciˬ-eu aˇ yamˬ tsaˬ laˇ-awˇ, uˬ maˆ naˇ dui dui laˇ-euˬ meh. 17Aˬ yawꞈ uˬ maˆ yaw kʼaˆ-ehˇ naˇ luꞈ ngeh, aˬ yawꞈ aˬ nyiˇ ciˬ gaˇ haw nehˬ-eu zaˬ miˬ zaˬ kʼoeˇ gʼaˬ aˬ yawꞈ-ahˇ, “Laˬkeˬlaˇ-oˇ, taˬ guˆ. Aˬ li tiˬ li paˇ dehꞈ le-euˬ nga” lehˇ ehˇ nehˬ-euˬ meh. 18Ehˇ kʼawꞈ, Laˬkeˬlaˇ shiˇ leˇ-awˇ, maˬ shiˇ tsehˆ mi naˆ-ehˇ aˬ li kʼoeˇ li-ahˇ Beˬnoˇniˆ#35.18 ‘Beˬnoˇniˆ’ lehˇ ehˇ-eu dawˬ tsuiꞈ-aˬ, ‘ngaˇ ya noeˬ shaˬ-eu aˬ li’ lehˇ ehˇ mawꞈ-eu meh. lehˇ myahˇ nehˬ yaꞈ-euˬ meh. Aˬ da gʼaˬ neh, aˬ li kʼoeˇ li-ahˇ, Beˬyaˬmiˬ#35.18 ‘Beˬyaˬmiˬ’ lehˇ ehˇ-eu dawˬ tsuiꞈ-aˬ, ‘guiˬ lahˬ huiˬ-eu aˬ li’ lehˇ ehˇ mawꞈ-eu meh. lehˇ myahˇ nehˬ-euˬ meh. 19Laˬkeˬlaˇ-ahˇ, nymˬ-mˇ Behˬlehˬhehˬ meuˬ lehˇ kuˇ luꞈ-eu Eˇpaˬlaˇ meuˬ-ahˇ le-eu gaˇ ma gaˇ dzeˇ duˬ pahˬ nehˬ-euˬ meh. 20Laˬkeˬlaˇ-ahˇ noeˬ keuˆ-eu gʼaˇ duˬ, jawˇ duˬ kʼoeˇ tsahˇ-ahˇ, Yaˬkoˆ kʼaˬ lo tiˬ siˬ kʼahˬ tuˇ-euˬ meh. Iˬ nah keuˆ ni, Laˬkeˬlaˇ-euˬ lmˬ bymˇ kʼoeˇ maˬ byoˆ-iˇ ni jaˆ luꞈ-eu meh. 21Kʼoeˇ gaˇ neh naˇ, mehˬ hu paw Yaˬkoˆ paˇ le gʼeh leꞈ-awˇ, goˇ dui dui-eu loꞈ duˬ nymˇ tsoˆ taˬ-euˬ Eˬdeuˬ meuˬ-euˬ kʼoeˇ paw dzeˇ le dzeuˇ leꞈ-awˇ, sehˬ gʼawˆ gʼawˆ-awˇ jawˇ-euˬ meh.
Yaˬkoˆ-euˬ aˬ li deuˬ
(1 Laˬsaˬbaˬ 2.1-2)
22Yaˬkoˆ kʼoeˇ gaˇ jawˇ luꞈ ngeh, aˬ yawꞈ-euˬ aˬ li Luˇbeˬ gʼaˬ, aˬ yawꞈ-euˬ ma nyiˇ Biˇlaˬhaˇ nehˬ-ehˇ yuꞈ taꞈ-euˬ meh. Gaˇ kawˆ kʼoeˇ Yaˬkoˆ ya gaˬ ngeh, nui ma pehˇ dui dui-euˬ meh.
23Yaˬkoˆ-euˬ aˬ li tseˇ nyiꞈ li jawˇ-eu meh. Leˇaˬ o neh jawˇ le-euˬ aˬ li deuˬ-aˬ, Yaˬkoˆ-euˬ aˬ li aˬ yuiꞈ yuiꞈ saˬ gʼaˬ pyeuꞈ-eu Luˇbeˬ, Suˇmoˬ, Leˬbiˇ, Yuˇdaˆ, Iˇsaˬkaˬ, Zeˬbuˬloˬ aˬ ha mehˇ nmˇ meh. 24Laˬkeˬlaˇ o neh jawˇ le-euˬ aˬ li deuˬ-aˬ, Yoˇsehˆ hawˇ-eu Beˬyaˬmiˬ aˬ nyaꞈ nmˇ meh. 25Laˬkeˬlaˇ-euˬ zaˬ kʼaˆ pyeuꞈ-eu Yaˬkoˆ-euˬ ma nyiˇ Biˇlaˬhaˇ o neh jawˇ le-euˬ aˬ li deuˬ-aˬ, Daˬ hawˇ-eu Naˬtaˬliˇ aˬ nyaꞈ nmˇ meh. 26Leˇaˬ-euˬ zaˬ kʼaˆ pyeuꞈ-eu Yaˬkoˆ-euˬ ma nyiˇ Ziˇlaˬpaˬ o neh jawˇ le-euˬ aˬ li deuˬ-aˬ, Gaˆ hawˇ-eu Aˬsaˬ aˬ nyaꞈ nmˇ meh. Aˬ li heu deuˬ dawˬ tawˆ luꞈ, Maˬsoˬpoˬtaˬmiˇ miˇ kʼahˬ-ahˇ jawˇ ngeh dehꞈ le-euˬ meh.
Iˇtsaˆ ziˇ jiˇ-euˬ
27Aˬbyaˬhaˬ hawˇ-eu Iˇtsaˆ-euˬ jawˇ duˬ pyeuꞈ-eu Heˬbyoˬ meuˬ dawˬ peh jaˆ-eu Mamˬliˬ meuˬ-ahˇ, aˬ yawꞈ aˬ da Iˇtsaˆ jawˇ gaˇ Yaˬkoˆ iˇ-euˬ meh. 28Iˇtsaˆ-aˬ, tiˬ yaˇ yehꞈ tseˇ kʼoꞈ keuˆ ni dehꞈ-euˬ meh. 29Tsawˇ mawˬ mawˬ dui dui laˇ-awˇ neh hawˇ-eu aˬ yawꞈ ziˇ jiˇ-awˇ, aˬ yawꞈ-euˬ aˬ li Iˇsawˇ hawˇ-eu Yaˬkoˆ aˬ nyaꞈ nmˇ neh, aˬ yawꞈ-ahˇ baꞈ pahˬ-euˬ meh.
Šiuo metu pasirinkta:
Aˇ dahˬ 35: AHK
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Akha Bible Revision (Latin Script) © Thailand Bible Society, 2011.